Yesu Kristu Alibombele Bwino Sana Bumishonari

“Nafuma kuli wene, kabili Wene e wantumine.”—Yoh. 7:29.

1, 2. Bushe bamishonari ni bani, kabili nani twingatila e wabombele bwino sana bumishonari?

CINSHI mutontonkanyapo nga mwaumfwa ishiwi lya kuti “mishonari”? Bamo batontonkanya pali bamishonari ba mu Kristendomu. Abengi pali aba bamishonari balaipoosa mu fikansa fya mitekele ya mu fyalo ifyo babatumako. Lelo, apo imwe muli Nte ya kwa Yehova mufwile mutontonkanya pali bamishonari abo Ibumba Litungulula lituma mu kushimikila imbila nsuma mu fyalo fyalekanalekana ifya mu calo conse. (Mat. 24:14) Aba bamishonari baipeelesha balabomfya inshita na maka yabo mu mulimo wacindama uwa kwafwa abantu ukupalama kuli Yehova Lesa no kuba ifibusa fya cine cine ifya kwa Lesa.—Yako. 4:8.

² Muli Baibolo ya New World Translation of the Holy Scriptures tamwaba amashiwi ya kuti “mishonari” nelyo “bamishonari.” Lelo, ishiwi lya ciGriki ilyo bapilibula ukuti “bakabila” pa Abena Efese 4:11 kuti lyapilibula no kuti “bamishonari.” Yehova e waishiba bwino sana ifya kubomba umulimo wa kubila, lelo te kuti tutile ni Mishonari, pantu takwaba nangu umo uwamutumine. Lelo, Yesu Kristu ena alandile pali Wishi wa ku muulu ukuti: “Nafuma kuli wene, kabili Wene e wantumine.” (Yoh. 7:29) Pa kulanga ukuti Yehova alitemwa sana abantunse, alitumine Umwana wakwe uwafyalwa eka pano calo. (Yoh. 3:16) Kanshi kuti twatila Yesu ni Mishonari uwabombele bwino sana bumishonari pantu umulandu umo uo bamutumine pa calo wa ‘kushimike cine ubunte.’ (Yoh. 18:37) Alibombele bwino sana umulimo wa kubila imbila nsuma ya Bufumu ica kuti na pali ino ine nshita tulanonkelamo mu fyo acitile. Ica kumwenako fye, nampo nga tuli bamishonari nelyo iyo, kuti twapashanya imisambilishishe yakwe ilyo tulebomba umulimo wa kushimikila.

3. Mepusho nshi twalalandapo?

³ Nga twatontonkanya pa fyo Yesu abombele umulimo wa kubila imbila nsuma ya Bufumu, limbi kuti twayipusha ukuti: Finshi Yesu apitilemo ilyo alebomba umulimo wa kushimikila pano calo? Mulandu nshi alesambilishisha bwino sana? Kabili mulandu nshi abombele bwino umulimo wa kushimikila imbila nsuma?

Yesu Alekabila Ukuipeelesha pa Kushimikila Bwino Pano Calo

4-6. Bushe ifintu fyayalwike shani kuli Yesu ilyo bamutumine pano calo?

⁴ Bamishonari ba muno nshiku na Bena Kristu bamo abakuukila ukushaba sana bakasabankanya ba Bufumu nalimo kuti bakabila ukubelesha imikalile iyapusana sana ne fyo baleikala bwino ku mwabo. Nomba te kuti twelenganye ifyo imikalile ya kwa Yesu pano calo yapusene ne fyo aleikala bwino ku muulu pamo na Wishi na bamalaika abalebombela Yehova ne mitima yonse. (Yobo 1:6; 2:1) Ala mwandini ifintu fyalyalwike sana ilyo aishile mu kwikala na bantu ababembu muli cino calo caisulamo abantu babipa! (Marko 7:20-23) Yesu aleshipikisha ne fyalecita abasambi bakwe abali na kalumwa. (Luka 20:46; 22:24) Lelo, alelungika bwino bwino ifintu fyonse ifyo alepitamo ilyo ali pano calo.

⁵ Yesu tasambilile ululimi alelanda mu cipesha amano, lelo alusambilile ukutula ku bunya. Mwandini ifintu fyalyalwike pantu ku muulu, Yesu e wali umukalamba pali bamalaika bonse kabili e walebeba ifya kucita! Ilyo Yesu ali pano calo, alelandako ululimi nalimo lumo ulwa mu “ndimi sha bantu.” Lwalipusene sana ne ‘ndimi sha bamalaika.’ (1 Kor. 13:1) Lelo, takwatala akuba umuntu uwabomfyapo amashiwi ayasuma ilyo alelanda na bambi nga filya Yesu alecita.—Luka 4:22.

⁶ Tontonkanyeni na pa fintu fimbi ifyayalwike sana ku Mwana wa kwa Lesa ilyo aishile pano calo. Nangu cingati Yesu tapyeneko ulubembu lwa kwa Adamu, aishileba umuntunse, kwati fye ni filya fine fyali abaishileba “bamunyina” bakwe, nelyo Abena Kristu basubwa. (Belengeni AbaHebere 2:17, 18.) Ilyo Yesu ali ku muulu, e kutila ilyo ali Mikaele Malaika Mukalamba, aletungulula bamalaika abengi nga nshi, lelo pa bushiku bamwipeye talombele Wishi wa ku muulu ukutuma “amatulwe ayacila ikumi na yabili (12) aya bamalaika.” (Mat. 26:53; Yuda 9) Kwena, Yesu alecita ifipesha mano; lelo ifyo acitile ilyo ali pano calo teti filingane ne fyo ali no kucita aba ku muulu pali ilya nshita.

7. Bushe abaYuda balemona shani Amafunde bapokelele?

⁷ Ilyo Yesu ali “Cebo,” e kutila lintu ashilaisa pano calo, nalimo e o Lesa alebomfya pa kulanda na bena Israele na pa kubatungulula ilyo balepita mu matololo. (Yoh. 1:1; Ukufu. 23:20-23) Abena Israele ‘balipokelele Amafunde ayapeelwe ukupitila muli bamalaika, lelo tabayabakile.’ (Imil. 7:53; Heb. 2:2, 3) Na kuba, bashimapepo abaYuda abaliko mu nshita ya batumwa tabaishibe umulandu Lesa abikileko Amafunde. Pa kulangilila, natulande pe funde lye Sabata. (Belengeni Marko 3:4-6.) Bakalemba na baFarise ‘balisuulile ifyacindama ifya mu Mafunde, e kutila, ubulungi no luse na bucishinka.’ (Mat. 23:23) Na lyo line, Yesu tatontonkenye ukuti aba bantu te kuti baaluke kabili talekele ukubila icine.

8. Mulandu nshi Yesu engatwafwila?

⁸ Yesu aliipeeleshe. Alitemenwe sana abantu kabili ici calengele ukuti alefwaisha ukubafwa. Tafuupwike nakalya, lelo atwalilile fye ukuba uwacincila. Kabili pa mulandu wa kuti Yesu ali ne cishinka kuli Yehova ilyo ali pano calo, “ashingamikwe ipusukilo lya muyayaya kuli bonse abamumfwila.” Na kabili, “apo umwine aliculile ilyo aleeshiwa, kuti ayafwa abaleeshiwa [na ifwe bene kumo].”—Heb. 2:18; 5:8, 9.

Balabakansha Sana pa Kuti Balesambilisha Bwino

9, 10. Bushe Yesu bamukanshishe shani ilyo bashilamutuma ukwisa pano calo?

⁹ Ilyo Abena Kristu ba muno nshiku tabalabatuma mu mulimo wa bumishonari, Ibumba Litungulula lilateyanya ukuti babakanshe. Bushe Yesu balimukanshishe? Ee balimukanshishe, lelo ilyo Lesa ashilamusuba ukuba Mesia, Yesu tailepo ku masukulu ya barabi; kabili tasambilile kuli bashimapepo abalumbwike pali ilya nshita. (Yoh. 7:15; linganyeniko Imilimo 22:3.) Nomba mulandu nshi Yesu alesambilishisha bwino?

¹⁰ Nangu cingati Yesu nalimo balimusambilishe fimo fimo kuli nyina, Maria, na wishi wa pano calo, Yosefe, uwamukanshishe sana ni Yehova, pantu e waishiba bwino sana ukukansha. Yesu atile: “Nshilandile ifyandi ne mwine, lelo Tata umwine uwantumine alimpeela ifunde lya fyo ndi no kulanda no kusosa.” (Yoh. 12:49) Pano Umwana atila balimwebele fyonse ifyo ali no kulasambilisha. Ukwabula no kutwishika, ilyo Yesu ashilaisa pano calo, inshita iikalamba alekutika ku fyo Wishi alemusambilisha. Ala mwandini Yesu balimukanshishe bwino sana!

11. Bushe Yesu alepashanya shani Wishi mu fyo alemona abantunse?

¹¹ Ukutula fye ilyo bamubumbile, Umwana aleumfwana sana na Wishi. Ilyo ashilaisa pano calo, Yesu asambilile ifyo Yehova atemenwe abantunse lintu alemona ifyo alebasunga. Umwana na o aishiletemwa abantu nga filya fine Lesa abatemwa ica kuti ilyo alondololwa nga amano atile: ‘Napekelwe abana ba bantu [nelyo “ifyo natemenwe sana fyakumine abana ba bantu,” NW].’—Amapi. 8:22, 31.

12, 13. (a) Finshi Yesu asambilile lintu alemona ifyo Wishi alesunga abena Israele? (b) Bushe Yesu abomfeshe shani ifyo asambilile kuli Wishi?

¹² Na cimbi ico Umwana asambilile, kumona ifyo Wishi alepwisha amafya. Ica kumwenako fye, tontonkanyeni pa fyo Yehova alesunga abena Israele bacintomfwa. Pali Nehemia 9:28 patila: “Pa kubapo ukutusha kuli bene, babwekeshepo ukucito bubi ku cinso cenu [mwe Yehova]; e ico mwabalekeleseshe mu minwe ya balwani babo, no kuleka babateke. Lelo ilyo babwelele no kukuuta kuli imwe, imwe mwalyumfwile mu muulu, no kubapokolola umwabele nkumbu shenu ishingi kuli bene.” Ukulabombela pamo na Yehova no kulamona ifyo alecita kwalengele Yesu ukuba ne nkumbu ku bantu abaleikala mu ncende aleshimikilamo.—Yoh. 5:19.

¹³ Yesu alecita filya fine asambilile kuli Yehova pantu na o ali ne nkumbu ku basambi bakwe. Ubushiku ilyo Yesu bashilamwipaya, abatumwa bakwe bonse abo atemenwe nga nshi ‘balimushiile no kufulumuka.’ (Mat. 26:56; Yoh. 13:1) Nga mutumwa Petro ena alikeene Kristu imiku itatu! Na lyo line, Yesu ali ne nkumbu ku batumwa bakwe kabili alibetile ukuti batwalilile ukumukonka. Aebele Petro ukuti: “Ninkupaapaatilako ukuti icitetekelo cobe cinenuka; na iwe ilyo ukapilibuka, ukakoseleshe bamunonko.” (Luka 22:32) Israele wa ku mupashi akuulwa pa “batumwa na bakasesema,” kabili ilinga lya Yerusalemu mupya lyakwata amabwe ya mufula ayo balembapo amashina ya batumwa ba cishinka 12 aba Mwana wa mpaanga, Yesu Kristu. Ukufika na ino ine nshita, Abena Kristu basubwa pamo na banabo abapanga ibumba lya “mpaanga shimbi” balitwalilila ukulafulilako ilyo bashimikila imbila nsuma ya Bufumu pantu Lesa alabafwa kabili Umwana wakwe uwatemwikwa e ubatungulula.—Efes. 2:20; Yoh. 10:16; Ukus. 21:14.

Ifyo Yesu Alesambilisha

14, 15. Bushe ifyo Yesu alesambilisha fyapusene shani ne fyo bakalemba na baFarise balesambilisha?

¹⁴ Ilyo Yesu alesambilisha abasambi bakwe, bushe abomfeshe shani ifyo asambilile kuli Wishi? Nga twalinganya ifyo Yesu alesambilisha ku fyo bashimapepo abaYuda balesambilisha abantu babo, tulamona ukuti Yesu alesambilisha bwino sana ukubacila. Bakalemba na baFarise ‘basangwile icebo ca kwa Lesa ica fye pa mulandu wa cishilano cabo.’ Lelo, Yesu ena talesambilisha ifyo umwine aletontonkanya; lyonse fye alesambilisha icebo ca kwa Lesa. (Mat. 15:6; Yoh. 14:10) Ifi fine e fyo na ifwe bene tufwile ukulacita lyonse.

¹⁵ Kwali na cimbi icalengele ukuti Yesu apusaneko na bashimapepo abaYuda. Yesu alandile pali bakalemba na baFarise ukuti: “Fyonse ifyo bamweba, citeni no kubaka, lelo mwicita umwabele micitile yabo, pantu balasosa lelo tabacita.” (Mat. 23:3) Yesu alecita ifyo alesambilisha. Lekeni tulande pa lyashi limo ililanga ukuti Yesu alecita ifyo alesambilisha.

16. Mulandu nshi mwingasosela ukuti Yesu alecita filya fine asosele pali Mateo 6:19-21?

¹⁶ Yesu akonkomeshe abasambi bakwe ‘ukututila ifyuma mu muulu.’ (Belengeni Mateo 6:19-21.) Bushe Yesu na o aletutila ifyuma mu muulu? Ee, pantu umwine asosele ukuti: “Bamumbwe bali ne miimba ne fyuni fya mu lwelele fili ne fisansala, lelo Umwana wa muntu takwata apa kusaisho mutwe.” (Luka 9:58) Yesu alyangwishe imikalile yakwe. Abikile sana mano ku kubomba umulimo wa kushimikila imbila nsuma ya Bufumu, kabili alangile ne fyo abantu balingile ukulacita pa kuti belaba na masakamika ayo abantu bakwata nga ca kuti batutile fyuma pano calo. Yesu alangile ukuti caliwama sana ukututile fyuma mu muulu umo “icipelebesha ca bushiku nangu ni ndalawa tafyonaula, kabili umo abapupu tabengila nangu kwiba.” Bushe na imwe mulomfwila amashiwi ya kwa Yesu aya kuti tufwile ukututile fyuma mu muulu?

Imibele Yesu Akwete Iyalengele Ukuti Abantu Bamutemwe

17. Mibele nshi yalengele Yesu ukulabomba bwino umulimo wa kubila imbila nsuma?

¹⁷ Mibele nshi iyalengele Yesu ukulabomba bwino umulimo wa kubila imbila nsuma? Icalengele ni fintu alemona abantu abo aleyafwilisha. Imibele imo iisuma iya kwa Yehova iyo Yesu alepashanya ya kuicefya, ukutemwa, ne nkumbu. Moneni ifyo iyi mibele yalengele abantu abengi ukupalama kuli Yesu.

18. Mulandu nshi twingasosela ukuti Yesu ali uwaicefya?

¹⁸ Lintu Yesu asumine ukwisa pano calo, “aisangwile uwa fye no kubuule cipasho ca busha kabili aishileba mu cipasho ca bantu.” (Fil. 2:7) Ala kwena Yesu aliicefeshe! Na kabili, tasuulile abantu. Taleyumfwa ukuti, ‘Tapali ifyo mwinganjeba, ine nafumine ku muulu, kanshi mufwile ukulaumfwa kuli ine.’ Alipuseneko na bamesia babufi pantu ena talesabankanya ku bantu bonse ukuti e wali Mesia wa cine. Limo limo alelesha abantu ukuyabaleebako bambi pali ena nelyo ukubashimikilako ifyo acitile. (Mat. 12:15-21) Yesu alefwaya abantu ukuimwena abene ifyo alecita pa kuti nga batemwa e lyo bapingulapo ukuba abasambi bakwe. Ala abasambi bakwe balekoseleshiwa pantu Shikulu wabo taleenekela bena ukuba abapwililika nga filya bamalaika abo aleikala nabo ku muulu bali!

19, 20. Bushe ukutemwa ne nkumbu fyalengele shani ukuti Yesu aleyafwa abantu?

¹⁹ Na kabili Yesu Kristu ali no kutemwa, imibele iyapulamo sana iya kwa Lesa. (1 Yoh. 4:8) Icalengele ukuti Yesu alesambilisha abantu ni co alibatemenwe. Ica kumwenako fye, moneni ifyo aumfwile ilyo akumene na kateka wacaice. (Belengeni Marko 10:17-22.) Yesu “alimutemenwe” kabili alefwaya ukumwafwa, lelo kateka wacaice alifililwe ukusha ifyuma fyakwe pa kuti abe umusambi wa kwa Kristu.

²⁰ Cimbi icalengele ukuti abantu batemwe Yesu ni co ali ne nkumbu. Abalekutika kuli ena ilyo alesambilisha bali sana na mafya kwati fye ni fintu caba ku bantu bonse abashapwililika. Apo alishibe ukuti bali na mafya nga nshi, aleba ne nkumbu ne cililishi pa kubasambilisha. Ica kumwenako fye, bushiku bumo Yesu na batumwa bakwe balipamfiwe sana ica kuti tabakwete ne nshita ya kulya. Nomba, bushe acitile shani ilyo amwene abantu abengi balongana? “Abekatilwe inkumbu, pantu bali nge mpaanga ishabula kacema. Kabili atendeke ukubasambilishe fintu ifingi.” (Marko 6:34) Yesu alilwike ukuti abantu bali mu ncende aleshimikilamo bali na macushi kabili abomfeshe amaka yakwe ku kubasambilisha no kucita ifipesha mano pa kubafwilisha. Bamo balitemenwe imibele yakwe iisuma ne fyebo alesosa kabili baishileba abasambi bakwe.

21. Finshi tukasambilila mu cipande cikonkelepo?

²¹ Nge fyo tukamona mu cipande cikonkelepo, kuli na fimbi ifingi ifyo twingasambilila ku fyo Yesu abombele umulimo wakwe pano calo. Ni muli finshi fimbi umo twingapashanya Yesu Kristu, uwabombele bwino sana bumishonari?

Mulepashanya Uwabombele Bwino Sana Bumishonari

“Mube abampashanya, ifyo na ine mpashanya Kristu.”—1 KOR. 11:1.

1. Mulandu nshi tulingile ukulapashanishisha Yesu Kristu?

UMUTUMWA Paulo alepashanya Yesu Kristu uwabombele bwino sana bumishonari. Paulo na o akonkomeshe Abena Kristu banankwe ukuti: “Mube abampashanya, ifyo na ine mpashanya Kristu.” (1 Kor. 11:1) Pa kusambilisha abasambi bakwe ukuti bafwile ukuicefya, Yesu asambile amakasa yabo kabili abebele ukuti: “Imupeele ica kumulanga, ukuti ifyo nacicita kuli imwe, e fyo na imwe mulecita.” (Yoh. 13:12-15) Na muno nshiku mwine, fwe Bena Kristu tufwile ukulapashanya Yesu Kristu mu fyo tusosa na mu fyo tucita kabili tulingile no kukwata imibele nga ilya ine akwete.—1 Pet. 2:21.

2. Nangu cingati Ibumba Litungulula talyamutuma muli bumishonari, bushe kuti mulepashanya shani Yesu?

² Mu cipande cafumineko twasambilile ukuti mishonari muntu uo batuma ku calo cimbi ku kubila imbila nsuma. Na kuba, Paulo alipwishepo amepusho yamo ayacindama sana. (Belengeni Abena Roma 10:11-15.) Moneni icipusho cimo ico umutumwa aipwishe, atile: “Bakomfwa shani apabula uwa kushimikila?” Lyena ayambwile amashiwi mu kusesema kwa kwa Esaya ayatila: “Ifyo yayemba amakasa ya babile mbila nsuma iya fisuma!” (Esa. 52:7) Nangu cingati tabamutuma muli bumishonari, na imwe bene kuti mulepashanya Yesu, ukuba abacincila mu mulimo wa kubila imbila nsuma nga filya fine Yesu ali. Umwaka wapwile, bakasabankanya ba mbila nsuma ya Bufumu 6,957,852 e babombeleko umulimo wa kushimikila mu fyalo 236.—2 Tim. 4:5.

“Twalisha Fyonse no Kumukonka”

3, 4. Finshi Yesu ashile ku muulu, kabili cinshi tufwile ukucita pa kuba abasambi bakwe?

³ Pa kupwisha bwino bwino umulimo bamutumine ukubomba pano calo, Yesu “aisangwile uwa fye no kubuule cipasho ca busha,” alishile ubukata no mucinshi akwete ku muulu. (Fil. 2:7) Fyonse ifyo tucita ilyo tupashanya Kristu teti filingane ne fyo Yesu acitile pa kwisa pano calo. Lelo kuti twatwalilila ukuba abasambi bakwe nga ca kuti tatulefuluka ifyo twakwete mu calo ca kwa Satana.—1 Yoh. 5:19.

⁴ Bushiku bumo, umutumwa Petro aebele Yesu ukuti: “Moneni! twalisha fyonse no kumukonka.” (Mat. 19:27) Lintu Yesu aitile Petro, Andrea, Yakobo, na Yohane, apo pene fye balishile amasumbu yabo no kumukonka. Balilekele ukubomba umulimo wa kwipaya isabi no kutendeka ukulabomba umulimo wa kushimikila. Ukulingana na mashiwi yaba mwi buuku lya kwa Luka, Petro atile: “Moneni! Twalishe fintu fyesu no kumukonka.” (Luka 18:28) Fwe bengi tatwasha “ifintu fyesu” fyonse pa kuti tulekonka Yesu. Lelo, ‘twaliikaana’ pa kuti tube abasambi ba kwa Kristu no kulabombela Yehova ne mitima yesu yonse. (Mat. 16:24) Ifyo twasalapo ukucita fyalenga ukuti tuleipakisha amapaalo ayengi nga nshi. (Belengeni Mateo 19:29.) Ukuba abacincila ilyo tulebila imbila nsuma nga filya Kristu ali kulalenga imitima yesu ukulasekelela, sana sana nga twalyafwileko umuntu ukupalama kuli Lesa na ku Mwana wakwe uwatemwikwa.

5. Shimikeni icacitike icilelanga ifyo umuntu uwakuukila ku calo cimbi engapingulapo ukucita nga asambilila icine.

⁵ BaValmir bena Brazil lelo baleikala ku Suriname pantu e ko bakwatile maini iyo baleimbamo golde. Balikunkwime ku bwalwa kabili bali ne mibele iyabipa. Lelo, Inte sha kwa Yehova shatendeke ukusambilila nabo Baibolo, kabili balesambilila cila bushiku. Balilekele imibele iyabipa, kabili mu nshita fye inono balibatishiwe. Ilyo baValmir bailwike ukuti ubukwebo bwabo ubwalebaletela sana indalama bwalengele balefilwa ukulacita ifyo Baibolo isambilisha, balibushitishe no kubwelelamo ku Brazil ku kwafwa balupwa lwabo ukwishiba icine. Ilingi line, abantu abengi ababomba incito mu fyalo ifikankaala nga baishiba icine, balabwelelamo ku fyalo fya ku mwabo pa kuti bakayeafwa balupwa lwabo na bantu bambi ukupalama kuli Yehova. Bakasabankanya ba Bufumu aba musango yo balanga ukuti baliipeelesha ukubomba umulimo wa kubile mbila nsuma.

6. Cinshi twingacita nga ca kutila teti tukwanishe ukukuukila ukushaba sana bakasabankanya ba Bufumu?

⁶ BaNte abengi balikuukila ku ncende ukushaba sana bakasabankanya ba Bufumu. Bambi balakuukila fye na ku fyalo fimbi. Nalimo ifwe te kuti tukwanishe ukukuukila ku calo cimbi, lelo kuti tulepashanya Yesu nga ca kuti tulebomba umulimo wa kushimikila ukufika apapela amaka yesu.

Yehova Alatukansha

7. Masukulu nshi ayo bakanshamo abafwaya ukusambilila ifya kubomba bwino umulimo wa kushimikila imbila nsuma ya Bufumu?

⁷ Apo Yehova e wakanshishe Yesu, na ifwe bene kuti twanonkelamo nga ca kuti twabika amano ku fyo Yehova aletusambilisha pali ino nshita. Yesu atile: “Calembwa muli Bakasesema, aciti, ‘Kabili bonse bakasambilishiwa kuli Yehova.’” (Yoh. 6:45; Esa. 54:13) Pali ino nshita kwaliba amasukulu ayo tusambililamo ifya kushimikila bwino imbila nsuma ya Bufumu. Ukwabula no kutwishika, ifwe bonse twalisambilila fimo ifyo tushaishibe mwi Sukulu lya Butumikishi Ilya Bulesa mu cilonganino twabamo. Bapainiya nabo balasangwa kwi Sukulu lya Bupainiya uko babakansha ifya kubomba bwino umulimo. Bamo ababomba umulimo wa bupainiya pa myaka iingi balikwata ishuko lya kusangwa kuli ili sukulu na kabili. Baeluda na babomfi batumikila nabo balasangwa kwi Sukulu lya Butumikishi bwa Bufumu uko basambilila ifya kusambilisha no kulapyungila bwino abasumina banabo. Baeluda na babomfi batumikila abashimbe abengi balisangwa kwi Sukulu lya Kukansha Ilya Butumikishi, uko basambilila ifya kwafwa bambi ukulabomba bwino umulimo wa kushimikila. Kabili bamunyinefwe na bankashi abengi abo batuma muli bumishonari balipita mwi Sukulu lya Gileadi.

8. Finshi fimo ifyo bamunyinefwe baipusulako pa kuti fye basangwe ku masukulu ayo Yehova ateyanya?

⁸ BaNte abengi balacitapo fimo pa kuti fye basangwe kuli aya masukulu. Pa kuti Yugu asangwe kwi Sukulu lya Kukansha Ilya Butumikishi mu Canada, alilekele incito pantu abamwingishe incito balikeene ukumupeela cuti. Yugu atile: “Nshilanguluka nangu panono. Na kuba, abampeela cuti, nga baleenekela ukuti nkatwalilila ukulabomba pa kampani. Nomba ifi naleka incito, naliiteyanya ukuya ukuli konse uko Yehova akantuma.” Kanshi pa kusangwa ku masukulu ayo Lesa ateyanya, abengi baliipusula ku fyo bacindamike sana.—Luka 5:28.

9. Landeni pa fyacitika ifilanga ukuti ukubikako amano pa kusambilila mu masukulu ayo Yehova ateyanya kulanonsha nga nshi.

⁹ Ababikako sana amano ilyo balesambilila mu masukulu ayo Yehova ateyanya balanonkelamo nga nshi. (2 Tim. 3:16, 17) Ica kumwenako fye, moneni ifyacitikile Saulo uwa ku Guatemala. Ukufuma fye pa kufyalwa kwakwe, ukutontonkanya kwa kwa Saulo takwafikilepo sana, kabili bamo pali bakafundisha wakwe baebele banyina ukuti belamupatikisha ukusambilila ukubelenga pantu nga balemupatikisha akulaumfwa sana ububi. Awe Saulo afumine pa sukulu ukwabula ukwishiba ukubelenga. Lelo, Nte alisambilishe Saulo ukubelenga, alebomfya broshuwa ya kuti Sambilileni Ukubelenga no Kulemba. Mu kuya kwa nshita, Saulo alishibe ukubelenga bwino bwino ica kuti atampile no kulalanda amalyashi mwi Sukulu lya Butumikishi Ilya Bulesa. Ilyo bana Saulo baleshimikila ku ng’anda ne ng’anda, baileshimikila na ku bali bakafundisha ba kwa Saulo. Ilyo babebele ukuti alisambilila ukubelenga, batile mukese nankwe umulungu uleisa. Ilyo Saulo aile na banyina ku ng’anda ya bali bakafundisha wakwe, bamwipwishe ukuti, “Finshi walansambilishako?” Saulo atampile ukubelenga paragrafu mu citabo citila Bushe Cinshi Baibolo Isambilisha? Bakafundisha batile: “Napapa ukuti nomba ni we ulensambilisha.” Balitemenwe nga nshi ica kuti balilukwishe ifilamba no kukumbatila Saulo.

Ukusambilisha Ukufika Abantu pa Mitima

10. Citabo nshi icisuma sana ico tubomfya pa kusambilisha bambi icine ca mu Baibolo?

¹⁰ Yesu alesambilisha ifyo Yehova amusambilishe na mafunde ayaba mu Cebo ca kwa Lesa. (Luka 4:16-21; Yoh. 8:28) Tulapashanya Yesu nga tulecita ifyo atweba no kulasambilisha ifyaba mu Malembo. Ici calenga ukuti tulesosa no kutontonkanya fimo fine, kabili calenga no kuti tube abaikatana. (1 Kor. 1:10) Ala tulatasha nga nshi pa fyo “umusha wa cishinka kabili uwashilimuka” asabankanya impapulo shilanda pali Baibolo ishitwafwa ukulasambilisha fimo fine no kulabomba bwino umulimo wesu uwa kubila imbila nsuma! (Mat. 24:45; 28:19, 20) Lumo pali ishi mpapulo citabo citila Ico Baibolo Isambilisha, icaba nomba mu ndimi 179.

11. Bushe nkashi wa ku Ethiopia abomfeshe shani icitabo citila Ico Baibolo Isambilisha pa kulanshanya no walemukaanya?

¹¹ Ukusambilila Baibolo ukubomfya icitabo citila Ico Baibolo Isambilisha kuti kwalenga no muntu uwalekaanya Inte sha kwa Yehova ukwaluka. Bushiku bumo, nkashi Lula, painiya uwikala ku Ethiopia, aletungulula isambililo lintu lupwa lwa muntu alesambilisha aingile mu ng’anda bukali bukali no kubeba ukuti tabalingile ukutwalilila ukulasambilila. Mu mutima nteka, Lula atampile ukulanshanya na ulya mwanakashi. Abomfeshe icilangililo cilanda pa ndalama sha bufi icaba mu cipandwa 15 ica mu citabo citila Ico Baibolo Isambilisha. Ubukali bwa ulya mwanakashi bwalitontolweke kabili alibasuminishe ukutwalilila ukusambilila. Umuku wakonkelepo ilyo Lula aile ku kutungulula isambililo, ulya mwanakashi na o alisangilwepo, aebele Lula ukuti balesambilila nankwe, kabili asosele no kuti akulamulipila! Atendeke ukulasambilila imiku itatu mu mulungu kabili alilundulwike sana.

12. Landeni icacitike icilanga ukuti abacaice nabo kuti basambilisha bwino bwino icine ca mu Baibolo.

¹² Abaice kuti bashimikila imbila nsuma kuli bambi ukubomfya icitabo citila Ico Baibolo Isambilisha. Keanu, umulumendo wa ku Hawaii uwa myaka 11, alebelenga ici citabo lintu ali ku sukulu. Umulumendo asambililila nankwe amwipwishe ukuti, “Mulandu nshi ushisefeshako amaholide?” Keanu abelengele icasuko mu kamutwe katila “Bushe Tulingile Ukusefya Amaholide?” akaba mu cipande citila Ifyebo na Fimbi. Lyena akupukwile pe bula apaba imitwe ya fipandwa no kweba umulumendo ukusalapo ilyashi ilyo engatemwa ukuti balanshanyepo. Awe e fyo ne sambililo lyatendeke. Mu mwaka wa mulimo uwapwile, Inte sha kwa Yehova shatungulwile amasambililo ya Baibolo 6,561,426 kabili abengi balesambilila mu citabo citila Ico Baibolo Isambilisha. Bushe na imwe mulatungulula amasambililo muli ici citabo?

13. Bushe ukusambilila Baibolo kuti kwafika shani abantu pa mitima?

¹³ Ukulasambilisha abantu Baibolo ukubomfya icitabo citila Ico Baibolo Isambilisha kuti kwalenga mwafika pa mitima ya bafwaisha ukulacita ukufwaya kwa kwa Lesa. Bapainiya baibela babili, abalume na bakashi, abekala ku Norway batendeke ukusambilila Baibolo no lupwa ulwafumine ku Zambia. Aba bena Zambia balikwete abana abakashana batatu kabili tabalefwaya ukukwata umwana na umbi. Ilyo umwanakashi aimite, bapingwilepo ukufumya ifumo. Lintu kwashele fye inshiku shinono ukuyamonana na dokota, basambilile icipandwa citila “Cindikeni Ubumi Ifyo Lesa Abucindika.” Icikope ca mwana uushilafyalwa icaba muli ici cipandwa calibafikile pa mitima ica kuti bapingwilepo ukukanafumisha ifumo. Balitwalilile ukulunduluka, kabili baishilekwata umwana umwaume uo bainike ishina lya kwa munyinefwe uwalebatungulula isambililo.

14. Langilileni ifyo ukucita ifyo tusambilisha kwingafumamo ifisuma.

¹⁴ Cimo icacindeme sana ku misambilishishe ya kwa Yesu ca kuti alecita filya fine alesambilisha. Abantu abengi balatasha sana imibele isuma iya Nte sha kwa Yehova pantu balacita ifyo basambilisha nga filya fine na Yesu alecita. Shimakwebo wa ku New Zealand balimwibile icola ico ashile muli motoka yakwe. Alicitile lipoti kuli bakapokola kabili bamwebele ukuti: “Icola cenu kuti camoneka fye nga ca kuti Inte ya kwa Yehova e yacisanga.” Na kabushe, Inte ya kwa Yehova iyaletwala inyunshipepala e yasangile icola. Ilyo shimakwebo bamwebele ukuti icola cakwe nacimoneka, aile ku ng’anda ya kwa nkashi uwacisangile. Alyumfwile bwino ilyo asangile ukuti icintu cimo icacindeme nga nshi kuli ena cali pa ng’anda ya kwa nkashi. Nkashi yesu aebele shimakwebo ukuti, “Mfwile ukumupeela icola na fyonse ifilimo pantu ndi Nte ya kwa Yehova.” Shimakwebo alipapile pantu aibukishe ifyamwebele bakapokola ulucelo lintu bamwibile icola. Ukwabula no kutwishika Abena Kristu ba cine balacita ifyo Baibolo isambilisha kabili balapashanya Yesu.—Heb. 13:18.

Mulemona Abantu nga Filya Fine Yesu Alebamona

15, 16. Mibele nshi tufwile ukukwata pa kuti abantu balekutika ku mbila nsuma tushimikila?

¹⁵ Ifyo Yesu alemona abantu e fyalengele ukuti abengi baleya mu kumfwa ifyo alesambilisha. Ica kumwenako fye, Yesu ali uwaicefya kabili alitemenwe abantu. Iyi mibele yalengele ukuti abalanda balepalama kuli ena. Yesu aleumfwila inkumbu abantu baleya kuli ena kabili alebasansamusha ku fyebo ifisuma no kubondapa. (Belengeni Marko 2:1-5.) Ifwe te kuti tucite ifipesha amano, lelo kuti twakwata imibele iilenga abantu ukusambilila icine, pamo nga ukutemwa abantu, ukuicefya, ne nkumbu.

¹⁶ Ukuba ne nkumbu kwalengele painiya waibela Tariua ukufika bashikulubantu bamo pa mutima. Ilyo Tariua aleshimikila aile pa ng’anda ya bashikulubantu abe shina lya Beere, abekala pa kacishi ako baNte bashashimikilamo sana pa fishi fya Kiribati ifya ku South Pacific. Nangu cingati baBeere tabalefwaya ukukutika ku fyo alelanda, Tariua ailwike ukuti balilwele ubulebe kabili abekatilwe inkumbu. Abepwishe ukuti: “Bushe mwalishiba ifyo Lesa alaya abantu abalwala na bakalamba?” Lyena abelengele ifyebo fyaba mu kusesema kwa kwa Esaya. (Belengeni Esaya 35:5, 6.) Ba Beere balitemenwe ifyo baumfwile kabili batile, “Nalibelenga Baibolo pa myaka iingi kabili mishonari wa ku calici uko mpepa alintandalila pa myaka iingi lelo nshatalabelengapo amashiwi ya musango yu mu Baibolo.” Awe isambililo lyalitendeke kabili baBeere balilundulwike sana. Nangu cingati balilemene, pali ino nshita baBeere balibatishiwa kabili e batungulula ibumba lya Nte sha kwa Yehova ishaba pali kalya kacishi, e lyo balaya ku kushimikila imbila nsuma ku bantu baikala pali kalya kacishi.

Twalilileni Ukulapashanya Kristu

17, 18. (a) Finshi mufwile ukucita pa kuti mulebomba bwino sana umulimo wa kubila imbila nsuma? (b) Mapaalo nshi ayo ababika sana amano ku kubomba umulimo wa kushimikila bakapokelela?

¹⁷ Nga fintu fye ifitucitikila mu mulimo wa kushimikila filanga, kuti tulebomba bwino umulimo wesu uwa kubila imbila nsuma nga ca kuti twaba ne mibele nga ilya Yesu akwete. Kanshi tufwile ukulapashanya Kristu no kuba abacincila nga filya fine ali!

¹⁸ Mu nshita ya batumwa, ilyo bamo baishileba abasambi ba kwa Yesu, Petro aipwishe ukuti: “Finshi kanshi ifwe tukakwata?” Yesu amwaswike ukuti: “Onse uwasha amayanda nelyo bamunyina nelyo inkashi nelyo wishi nelyo nyina nelyo abana nelyo amabala pa mulandu we shina lyandi, akapokelela ifya miku iingi nga nshi kabili akapyana ubumi bwa muyayaya.” (Mat. 19:27-29) Aya yene e mapaalo na ifwe tukaipakisha nga twatwalilila ukulapashanya Yesu Kristu uwabombele bwino sana bumishonari.