Umuku wa Kulekeleshako Ukufunda Abali mwi Sukulu

Pa kutendeka amalyashi ayepi, ba John Larson, ababa muli Komiti wa Musambo uwa ku United States, balandile ilyashi lyali no mutwe wa kukosha icitetekelo uwaleti “Lesa Nga Ali Kuli Ifwe, Nani Engatulwisha?” (Abena Roma 8:31) Kalanda alondolwele umulandu wa mu Baibolo uo abasambi balingile ukucetekela amaka ya kwa Yehova ku kubafwa pa kuti bengacimfya amafya bengasanga mu milimo yabo. Munyinefwe Larson abomfeshe ilembo lya Abena Roma 8:38, 39, pa kukonkomesha abasambi, atile: “Taleni tontonkanyeni pa maka ayo Lesa alebomfya kuli imwe, kabili ibukisheni ukuti takuli nelyo cimo icingonaula ukutemwa Yehova amutemwa.”

Lyena pakonkele ba Guy Pierce, aba mwi Bumba Litungulula. Basalile umutwe waleti “Sungilileni Amenso Yenu aya Nsansa!” (Luka 10:23) Balondolwele ukuti insansa sha cine shabamo ukwishiba Yehova, ukumfwikisha ubufwayo bwakwe ubwa muyayaya no kumona ukufikilishiwa kwa kusesema kwa mu Baibolo. Konse uko bakaya, abasambi kuti batwalilila ukuba ne nsansa nga basungilila amenso yabo aya nsansa. Munyinefwe Pierce akoseleshe abalepwisha isukulu ukwetetula sana pa busuma bwa kwa Yehova no kubika amano yabo ne mitima pa kucita ukufwaya Kwakwe. (Amalumbo 77:12) Abalepwisha isukulu kuti bacimfya amafya yonse ayengesa pali bena nga batwalilila ne mibele isuma.

Lyena bakafundisha babili abalesambilisha cila bushiku baebele abasambi babo ifyebo fya kulekelesha kabili ifya kukoselesha. Ilyashi lya ba Lawrence Bowen lyali no mutwe waleti “Bushe Mulefwaya Ubukata?” Abantu abengi batila ubukata kuba uwalumbuka, uwacindama, nelyo ukutashiwa. Lelo, kemba wa malumbo Asafi atendeke ukumfwikisha ubukata bwa cine cine, ukutila kuba cibusa wine wine uwa kwa Yehova. (Amalumbo 73:24, 25) Abalepwisha isukulu balikoseleshiwe ukutwalilila ukuba bacibusa wa kwa Yehova ukupitila mu kusambilila sana Baibolo. Bamalaika “balakumbwa ukulengelamo” mu fintu fyakuma ukufishapo ubufwayo bwa kwa Yehova ukupitila muli Kristu. (1 Petro 1:12) Balafwaya ukusambilila sana pali Shibo pa kuti bengalanga ubukata bwakwe. Lyena kalanda akonkomeshe abasambi ukucindika Yehova mu milimo yabo iya bumishonari pa kwaafwa bambi ukusanga icuma ca mutengo.

Abalemba aba mwi sukulu, ba Wallace Liverance, e basondwelele amalyashi ya kwiswila pa mutwe waleti “Tulanda Amano ya kwa Lesa aya mu Nkaama Yashila.” (1 Abena Korinti 2:7) Bushe amano ya bulesa ayo umutumwa Paulo alandilepo mu mulimo wakwe uwa bumishonari e finshi? Ni nshila ya mano kabili iya maka iyo Yehova akaletelamo umutende no kwikatana mu calo conse. Aya mano yashimpwa pali Yesu. Ukucila fye ukusambilisha abantu ifishinte fya Bwina Kristu, Paulo abafwile ukumfwikisha ifyo Lesa akafumyapo ifyatumbuka mu lubembu lwa kwa Adamu. (Abena Efese 3:8, 9) Pa kukonkomesha abalemukutika, kalanda atile: “Bomfyeni ishuko lyenu ilya mulimo nga fintu Paulo alibomfeshe. Paulo amwene umulimo wakwe uwa bumishonari ukuba ishuko lya kwafwilamo abantu ukuti bamone ifyo Yehova ali no kufishapo ubufwayo bwakwe.”

Ukupandwa Amano ku Bakosoka

Pa nshita ye sukulu, abasambi balimwenenemo mu kubishanya na baba mu lupwa lwa Bethel ku United States. Ba Robert Ciranko na ba Robert P. Johnson, ababa muli komiti wa Musambo, balanshenye na babomfi ba kwa Yehova aba cishinka ababomba imyaka iingi, apali na bakangalila benda abalekanshiwa pa Watchtower Educational Center. Aba bonse abo balanshenye nabo, balipita mwi sukulu lya Gileadi kabili balibombelepo na bumishonari. Abasambi ne ndupwa shabo ne fibusa balikoseleshiwe pa kuumfwa amashiwi ya mano ayafumine ku baume ba bumupashi ababelesha.

Bapandile amano ukuti: “Mulekwata ifya kucita ifingi mu butumikishi na mu cilonganino.” “Mwilacilamo ukuimona abacindama. Angweni ku mulimo wa bumishonari, kabili akumoneni kuntu mulebombela bumishonari ukuti e kumwenu.” Amashiwi ya kwaafwa yamo ayo balandile yalangile ifyo ukukansha kwa pa Gileadi kupangasha umutumikishi ukubomba umulimo usuma, te mulandu ne ncende atumwako. Amashiwi yamo balandile yaleti: “Twasambilile ukuba abaikatana no kubombela capamo.” “Isukulu lyatwafwile ukusumina imyata ipya.” “Twasambilishiwe ukubomfya Amalembo mu nshila imbi.”

Ba John E. Barr, ababomba imyaka iingi kabili ababa mwi Bumba Litungulula, e balandile ilyashi likalamba. Umutwe wa mu Malembo uwa lyashi lyabo waleti: “Ishiwi Lyabo Lyaile mwi Sonde Lyonse.” (Abena Roma 10:18) Baipwishe icipusho caleti, Bushe abantu ba kwa Lesa leelo balikumanisha ukubomba uyu mulimo wakosa? Ee, ukwabula no kutwishika! Akale mu 1881, abalebelenga magazini wa Ulupungu lwa kwa Kalinda baipushiwe ati: “Bushe mulashimikila?” Lyena kalanda ancinkwileko ibumba lyakwe pa lwa bwite bwaliko kale mu 1922 pe bungano lyali pa Cedar Point, Ohio, U.S.A. ubwa kuti: “Sabankanyeni Imfumu no Bufumu Bwakwe!” Mu kupita kwa nshita, ukupimpa kwa babomfi ba kwa Lesa kwabalengele ukubila ku nko shonse icine cishaiwamina ica Bufumu. Ukupitila mu mpapulo no kulanda, imbila nsuma yalifika ku mpela she sonde—ku kucindika no kulumbanya Yehova. Pa kusondwelela ilyashi lishaiwamina, Munyinefwe Barr akonkomeshe abalepwisha isukulu ukupenda amapaalo yabo, atile: “Cila bushiku, ilyo mulepepa kuli Yehova mu mulimo wenu, tasheni Yehova ukufuma pa nshi ya mitima yenu pa fyo mulebomba ku kufishapo amashiwi yatila, ‘Ishiwi lyabo lyaile mwi sonde lyonse.’”