Leonardo, uwafwililwe bawishi alebukisha icacitike icamukoseshe no kumusansamusha. Bushiku bumo ilyo afikile pa ng’anda, ne co pashali muntu nangu umo, alimwene ukuti cine cine bawishi balifwa. Ici calengele alile icipesha amano. Aile muli parka imo iyali mupepi, ayaikala pa kapuna no kutwalilila ukulila. Lilya line alelila, apepele kuli Lesa ukuti amwafwe. Ukwabula ukwenekela, motoka yaishileiminina mupepi na po aali, ilyo Leonardo acebeleko, aishilemona ni munyina bapepa nankwe e wali na ulya motoka. Uyu munyina aletwala ifipe fya kushitisha ku cifulo cimbi e lyo aluba inshila. Ukuba fye no yu munyina kwalisansamwishe Leonardo.

Ilyo Leonardo afwililwe bawishi, asalilepo ukusambilila ululimi lwa bacibulu pa kuti alebasambilishako ifyaba mu Baibolo ifingabasansamusha. Asanga ukuti ukwafwa bacibulu kwalimwafwa nga nshi na o wine. Atile: “Icintu cimo icanenga ukushipikisha mu bulanda bwandi kwafwa bacibulu ukusambilila pali Lesa. Ndapoosa inshita yandi iikalamba na maka ku kubafwa. Ubulanda bwandi bwayalwike insansa ilyo namwene uo nalesambilisha Baibolo abatishiwa! Iyi e nshita nasansamwikepo sana ukutula apo batata bafwilile”—Imilimo 20:35.

Leornado elenganya bawishi balebuuka ku bafwa mu calo cipya ico Lesa alaya.