16. Bushe Ukusokolola 7:9, 14 kukoselesha shani ababa mwi “bumba likalamba”?

¹⁶ Aba mwi “bumba likalamba” ilyaba pa Ukusokolola 7:9, 14, bafwala “amalaya ayabuuta,” icalola mu kuti, Lesa abamona abasanguluka. Ni pali ino ine nshita aba mwi bumba likalamba abakapusuka “ubucushi bukalamba” balelonganikwa. Kanshi, na pali lelo Lesa abamona nga balungami. Ico babela abalungami mulandu wa kuba ifibusa fya kwa Yehova. (Rom. 4:2, 3; Yako. 2:23) Mwandini ilyo lipaalo nga nshi! Nga ca kuti mwaba mwi bumba likalamba, kuti mwacetekela ukutila Lesa ali-itemenwa ukumwafwa ilyo mulebombesha ukutwalilila ukuba abasanguluka mu menso yakwe.

17. Ni mwi calola ukuti Yehova ‘tebukisha’ imembu?

¹⁷ Finshi ficitika ku membu sha bantu ababa ifibusa na Lesa? Nge fyo tulandilepo pa kutampa, Yehova alandile ukupitila muli Yeremia ati: “Nkelela ifilubo fyabo, nshakebukishe ne membu shabo.” (Yer. 31:34) Lesa alelela imembu sha basubwa ukubomfya ilambo lya kwa Yesu. Mu nshila imo ine, Lesa kuti aelela ne membu sha baba mwi bumba likalamba ukubomfya “umulopa [umo wine] uwa cipangano.” Amashiwi Yeremia asosele aya kuti Lesa ‘takebukishe’ imembu tayalola mu kuti Lesa akakwata icilafi ica kufilwa no kwibukisha imembu. Lelo, yalangilila fye ukutila Yehova nga asalapula umubembu no kumwelela, ulubembu lwa muntu aelela talukuma bucibusa bwakwe na ena. Tontonkanyeni pa membu isho Imfumu Davidi yacitile kuli Bati-sheba na Uria. Davidi alisalapwilwe kabili ali-imwenene ububi ubwafumine mu membu shakwe. (2 Sam. 11:4, 15, 27; 12:9-14; Esa. 38:17) Lelo, Lesa taikalile fye ukulacinkulako Davidi pali shilya imembu acitile. (Belengeni 2 Imilandu 7:17, 18.) Ukulingana na mashiwi yaba mu cipangano cipya, Yehova nga aelela imembu, ukubomfya ilambo lya kwa Yesu, tashibukisha nakalya.—Esek. 18:21, 22.

18, 19. Lisambililo nshi ilyaba mu cipangano cipya pa lwa kwelela?

¹⁸ Kanshi icipangano cipya cikomaila pa cishinka cawamisha ica fyo Yehova abomba na bantunse ababembu, ababa mu mabumba yabili, e kutila abasubwa ababa mu cipangano, e lyo na bonse abakwata isubilo lya kwikala pe sonde. Kuti mwacetekela ukutila Yehova nga amwelela, takatale alandapo na kabili pa membu shenu.

AMAPAALO YABA MU CIPANGANO CIPYA

20. Bushe ifyo mwaba fyapusana shani ne fyo abengi bali mu nshiku sha kwa Yeremia?

²⁰ Mu nshiku sha kwa Yeremia, abaYuda abengi balelanda ukutila: “Yehova takacite icisuma kabili takacite icibi.” (Sefa. 1:12) Nangu ca kutila balishibe ifyo Yehova aba ne fyo afwaya, balemona kwati tali no kucitapo icili conse; no kuti talebenekela ukulakonka amafunde ayali yonse. Lelo imwe mwalishiba ukuti tapali icili conse ico Lesa ashimona. Mulatiina Lesa kabili tamufwaya ukucita icabipa. (Yer. 16:17) Na kabili, mwalishiba ukutila Yehova ni shifwe uwa nkumbu. Alamona ifisuma ifyo tucita, nampo nga abantu bambi nabafimona nelyo iyo.—2 Imila. 16:9.

21, 22. Mulandu nshi mushikabila uwa kumweba ati: “Ishiba Yehova”?

²¹ Icacindama sana mu cipangano cipya ni ci: “Nkabika amafunde yandi muli bena, kabili nkayalemba mu mitima yabo. Kabili nkaba Lesa wabo, . . . Kabili umuntu onse takasambilishe umunankwe nangu munyina, ati: ‘Ishiba Yehova!’ pantu bonse bakanjishiba.” (Yer. 31:33, 34) Abasubwa abacili pe sonde balilanga ukuti balikwata Amafunde ya kwa Lesa mu mitima yabo. Balitemwa icine icabamo, ukucila ukushintila pa fisambilisho fya bantu. Kabili balaitemenwa ukwebako aba mwi bumba likalamba ifyo basambilila mu Baibolo. Eco, aba abakwata isubilo lya pe sonde na bo balishiba Yehova no kumutemwa. Balaitemenwa ukumfwila amafunde yakwe no kucetekela amalayo yakwe. Ifi fine e fyo mufwile na imwe mwaba. Mwalimwishiba bwino bwino kabili ni cibusa wenu. Cine cine mulanonkelamo nga nshi!

²² Bushe mwakosha shani bucibusa bwenu na Yehova? Ukwabula no kutwishika mulebukisha inshita mwayumfwile ukuti alyaswike amapepo yenu. Ilyo ifyo fyacitike, mwatendeke ukulatasha sana pa kukwata Lesa wa musango yu. Mufwile mwalilwike ukuti alimwafwile ilyo mwaibukishe ilembo ilyamwafwile mu bucushi ubwa muponene. Lyonse muletontonkanyapo pali ifi. Ilyo muletwalilila ukusambilila Icebo cakwe, mukaya mulemwishiba bwino bwino kabili mukalanonkelamo fye lyonse.

23. Bushe ukwishiba Yehova kuti kwamulubula shani ku kuyumfwa aba mulandu na pashilingile?

²³ Lelo kwaliba ipaalo na limbi ilisangwa mu cipangano cipya ilyo twingapokelela pali lelo. Nga twaishiba ukutila Yehova alelela ukulingana ne ci cipangano kuti catwafwa ukukanalatontonkanya lyonse pa lubembu twacitile. Ku ca kumwenako, bamo abaponeshepo ifumo ilyo bashilaishiba amafunde ya kwa Lesa limbi kuti baleyumfwa aba mulandu kabili kuti baba aba bulanda pa mulandu wa kuti ku mufulo fye baonawile ubumi bwa muntu ubwaletendeka. Bambi na bo bayumfwa aba mulandu pantu baipeye abantu abengi mu nkondo. Ilambo lya cilubula ilya kwa Yesu—ilyacindama mu cipangano cipya—lilalenga abalapila ukufuma pa nshi ya mutima baelelwa. Ifi nga e fyo caba, bushe tatulingile ukushininwa ukutila nga ca kuti Yehova naelela imembu shesu, amona ukutila umulandu naupwa? Tatulingile ukulatontonkanya pa membu isho Yehova aelela umupwilapo.

24. Bushe ifyaba pali Yeremia 31:20 kuti fyamukoselesha shani?

²⁴ Ubushininkisho bwamonekesha ubwa kuti Lesa alelela tubusanga pali Yeremia 31:20. (Belengenipo.) Imyaka iingi pa ntanshi ya nshiku sha kwa Yeremia, Yehova akandile ubufumu bwa mikowa 10 ubwa bena Israele ubwali ku kapinda ka ku kuso (ubwaleimininwako na Efraimu, umukowa uwali uwalumbuka) pa mulandu wa kuti balepepa utulubi. Balibasendele muli bunkole. Lelo, Lesa talekeleshe aba bantu bali muli ulu luko kabili alibalangile icitemwiko. Acili alibatemenwe ngo “mwana uwatemwikwa.” Ilyo atontonkenye pali bena, umutima wakwe ‘walebafuluka,’ kanshi tabalabile nakalya. Ili lyashi, ilyakuma icipangano cipya, lilanga ifyo Yehova elela bonse abalapila pa membu isho bacitile kale.

25. Mulandu nshi mwingatashisha Yehova pa kubikako icipangano cipya?

²⁵ Ubulayo bwa kwa Yehova ubwa kuti akelela abantu imembu shabo ukupitila mu cipangano cipya bukafika pa kashongotwele pa mpela ya Kuteka kwa kwa Kristu ukwa myaka 1,000. Yesu Kristu, pamo na bashimapepo ababa 144,000, bakalenga abantunse aba cishinka ukupwililika na kabili. Pa numa ya bwesho bwa kulekeleshako, abantunse bakailunda ku lupwa lwa kwa Yehova. (Belengeni Abena Roma 8:19-22.) Ukufuma kale ukushinta na lelo, bonse balateta pa mulandu wa lubembu. Lelo, abantu abo Yehova abumba bakalubuka ku lubembu ne mfwa no ‘kuba abana ba kwa Lesa.’ Eco, cetekeleni ukutila ukupitila mu kutantika kwabamo ukutemwa ukwa cipangano cipya, kuti mwanonkelamo nga nshi. Kuti mwanonkelamo pali nomba e lyo na ku ciyayaya ukupitila mu “musambo,” e kutila impyani ya kwa Davidi, no kuipakisha “ubulungami mu calo.”—Yer. 33:15.