Afweni Abapya Ukushipikisha Ilyo Balebakaanya
1 Umuntu nga atendeka ukusambilila Baibolo kabili ‘alafwaisha no kwikala ukulingana na bukapepa,’ balamulwisha sana kuli Satana. (2 Tim. 3:12) Ukukaanya kuti kwafuma ku bo abomba na bo, ku bana be sukulu banankwe nelyo ku bena mupalamano. Cilafya sana nga ca kutila balupwa e balekaanya umupya.—Mat. 10:21; Marko 3:21.
2 Ukukaanya Kwalisobelwe: Abapya bafwile ukwishiba ukuti bakalabakaanya pantu balesanguka abasambi ba cine aba kwa Kristu. (Yoh. 15:20) Limo icilenga bamo ukutulwisha mulandu wa kuti tabaishiba ifishinka pa Nte sha kwa Yehova. Muleibukisha ukuti ukucula pa mulandu wa kuba umusambi wa kwa Yesu no kumfwila Lesa e kulenga umuntu ukuba sana ne nsansa. (Imil. 5:27-29, 40, 41) Koselesheni abapya ukucetekela ukuti Yehova akulabatungilila. (Amalu. 27:10; Marko 10:29, 30) Nga batwalilila aba cishinka kuli Yehova ninshi bali ku lubali lwa kwa Yehova kabili nabasumina ukuti e walinga ukuteka.—Amapi. 27:11.
3 Ukwishiba Bwino Icebo ca kwa Lesa Kwalicindama: Londolweleni umusambi wenu uwa Baibolo ukuti calicindama ukutwalilila ukusambilila nangu abe na mafya ya musango nshi. Satana alabomfya ukukaanya pantu tafwaya ukuti ifyo umusambi alesambilila filimbe imishila mu mutima wakwe uwa mampalanya. (Amapi. 4:23; Luka 8:13) Pa kuti alimbwe mu citetekelo, afwile ukutwalilila ukusambilila Icebo ca kwa Lesa.—Amalu. 1:2, 3; Kol. 2:6, 7.
4 Ukushipikisha Kwalicindama: Ukushipikisha amafya ayali yonse kwalicindama, kabili mu kushipikisha mulafuma ifisuma. (Luka 21:16-19) Abapya nga bashipikisha ilyo balebakaanya, balanonkelamo abene e lyo na bantu bambi. Yehova alabapaala nga nshi, pantu alapaala abashipikisha mu cishinka.—Yako. 1:12.
5 Umutumwa Paulo alisekelele pa fyo aba bwananyina mu Tesalonika balelunduluka. Alitashishe Lesa pa fyo balelunduluka, pantu abengi e wabasambilishe icine. (2 Tes. 1:3-5) Na ifwe bene kuti twasekelela no kuba ne nsansa nga twa-afwa abasambi besu aba Baibolo ukushipikisha ilyo balebakaanya.