Ifyo Abana Bakabila ne fyo Bafwaya

UKUTULA fye pa kufyalwa, akanya kafwaya ukusakamanwa bwino, pamo no kukangasha e lyo no kukafukatila. Badokota bamo batila, ici cilakabilwa sana pa ma-awala ya kubalilapo 12 ilyo kafyalwa fye. Basosa ati ico nyina afwaya sana ilyo fye umwana afyalwa, “te kulaala nelyo ukulya, lelo kwikata umwana no kumufukatila, pamo no kumusosha. Ifi fine e fyo no mwana afwaya.”a

Mu cifyalilwa fye, abafyashi balekata umwana no kumwimya, balamutomona, balamwangasha e lyo no kumufukatila. Umwana na o alatemwa sana banyina kabili alankula na ku fyo balemusakamana. Uku kwikatana kulakula sana ica kuti abafyashi balaipusula ifingi pa kuti fye basakamane umwana ukwabula ukutendwa.

Lelo, abafyashi nga balekelesha umwana, alanakuka no kufwa. E ico, badokota bamo batila calicindama ukupeela nyina akanya nga kafyalwa fye. Basosa ati napamo kuti cawama akanya ukuba na nyina pa maminiti 30 ukufika kuli 60 nga kafyalwa fye.

Nangu line bamo balakomaila sana pa kuti akanya kafwile ukuba na nyina ilyo kafyalwa fye, mu fipatala fimo ico kuti cayafya. Ilingi line, tabapeela umwana kuli nyina pantu balatiina ati akanya kuti ka-ambula amalwele kuli nyina. Lelo, kwaliba ifilangilila ukuti nga ca kuti utunya tuli na banyina e lyo tushingambula sana amalwele. E ico, ifipatala ifingi fyalitendeka ukusuminisha nyina ukuba no mwana pa nshita ntali nga afyalwa fye.

Isakamika lya Kutemwa Umwana

Banacifyashi bamo tabatemwa umwana wabo ilyo bamumona umuku wa kubalilapo. E ico balaipusha ati, ‘Bushe cikankosela ukutemwa umwana wandi?’ Kwena, te banacifyashi bonse abatemwa abana babo ilyo line fye babamona. E ico, tamufwile ukusakamikwa.

Nangu line pakokola pa kuti nyina atendeke ukutemwa umwana, kuti asuka amutemwa umuye nshiku. Nyina uwaishiba sana ifya kusakamana abana atile: “Takwaba ifili fyonse ificitika pa kufyalwa kwa mwana ifikosha nelyo ukonaula ukutemwa kuba pali nyina no mwana.” Na lyo line, nga muli pa bukulu, kabili mulasakamikwa, kuti cawama mwalanshanishisha kabela na bapapisha abana. Balondolweleni bwino ifyo mulefwaya. Bebeni ilyo mulefwaya ukufukatila umwana wenu ne nshita mukapoosa ukucite fyo.

“Ndolesheni!”

Casangwa ukuti mu mwaka wa kubalilapo nelyo iyakonkapo, umwana alatemwa sana uulemusunga, ne lingi line uyu aba ni nyina. Nga ca kuti umwana abelesha ukuba na nyina, alampana bwino na bambi ukucila balya abashiba na bafyashi. Batila ilyo umwana alefisha imyaka itatu, afwile ninshi kale kale alibelesha nyina.

Cinshi cingacitika nga ca kuti akanya kalekeleshiwa pali iyi nshita yacindama ilyo kakonkelesha sana ifilecita bambi? Martha Farrell Erickson, uwabebetele banacifyashi 267 na bana babo pa myaka 20, alanda ifyo asangile. Atila: “Ukulekelesha umwana kulatwalilila ukumubombomanika panono panono mpaka [umwana] aleka ukufwaya ukuba na bambi nelyo ukwishiba ifintu fimbi.”