Cinshi Amapepo Yenu Yalanga Pali Bucibusa Bwenu Na Lesa?

“Mwe bomfwa ipepo, kuli imwe e ko abantunse bakesa.”—AMALU. 65:2.

1, 2. Mulandu nshi ababomfi ba kwa Yehova bengapepela kuli ena nabacetekela no kuti Lesa akabasuka?

YEHOVA lyonse alomfwa ukupapaata kwa babomfi bakwe aba cishinka. Teti tutwishike no kutwishika ukuti na ifwe alatumfwa. Nangu fye Inte sha kwa Yehova amamilioni shapepela pa muku umo wine, Lesa akomfwa amapepo yabo bonse.

² Kemba wa malumbo Davidi alishibe ukuti Lesa aleumfwa ukupapaata kwakwe, e ico aimbile ati: “Mwe bomfwa ipepo, kuli imwe e ko abantunse bakesa.” (Amalu. 65:2) Amapepo ya kwa Davidi yalyaswikwe pantu ali ni kapepa wa cishinka kuli Yehova. Na ifwe kuti twaipusha atuti: ‘Bushe amapepo yandi yalanga ukuti nalicetekela Yehova no kuti nabika amano ku kupepa kwa cine? Cinshi amapepo yandi yalanga pali bucibusa bwandi na Lesa?’

Beni Abaicefya pa Kupepa Kuli Yehova

3, 4. (a) Mibele nshi tufwile ukukwata pa kupepa kuli Lesa? (b) Kuti twacita shani nga twaba na “malangulushi” pa mulandu wa lubembu lwabipisha?

³ Nga tulefwaya Lesa ukwasuka amapepo yesu, tufwile ukuba abaicefya pa kupepa. (Amalu. 138:6) Tufwile ukulomba Yehova ukuti atuceeceete, nga filya Davidi alombele ilyo atile: “Fwayeni muli ine, mwe Lesa, no kwishiba umutima wandi. Nceeceeteni, no kwishiba amalangulushi yandi, mumone nga muli ine mwaba amapange ya kuntwala mu nshila iibi, kabili muntungulule mu nshila ya muyayaya.” (Amalu. 139:23, 24) Twilapepa fye ukuti Lesa atuceeceete lelo tufwile no kukonka ifyo atufunda mu Cebo cakwe. Yehova kuti atutungulula “mu nshila ya muyayaya,” e kutila ukutwafwa ukuya mu nshila itwala ku mweo wa muyayaya.

⁴ Ni shani nga ca kuti tuli na “malangulushi” pa mulandu wa lubembu lwabipisha? (Belengeni Amalumbo 32:1-5.) Ukwesha ukushimaisha kampingu iilecula kuti kwatupwa amaka kwati fye ni filya icimuti cuma ku cikabilila ca kasuba. Insansa sha kwa Davidi shalipwile pa mulandu wa lubembu kabili nalimo alilwele no kulwala. Lelo ukuyebelela kuli Lesa kwamuletele insansa icine cine. Elenganyeni ifyo Davidi asansamwike ilyo aumfwile ukuti Yehova ‘alimwelela pa lubembu lwakwe.’ Ukuyebelela ulubembu kuli Lesa kuti kwaletela umubembu insansa, kabili ubwafwilisho bwa baeluda na bo kuti bwalenga umubembu abwesha bucibusa bwakwe na Yehova.—Amapi. 28:13; Yako. 5:13-16.

Papaateni Lesa no Kumutasha

5. Cinshi tufwile ukucita nga twasakamikwa?

⁵ Nga ca kuti twasakamikwa pa mulandu uli onse, tufwile ukukonka ukufunda kwa kwa Paulo ukwa kuti: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela.” (Fil. 4:6) Tufwile ukupapaata kuli Yehova ukuti atwafwe no kututungulula maka maka lilya tuli mu busanso nangu ilyo baletucusha.

6, 7. Mulandu nshi tufwile ukulatashisha Lesa mu mapepo yesu?

⁶ Nga tulepepa fye ilyo tulefwaya fimo, bushe kuti calanga ukuti bucibusa bwesu na Lesa bwa cine cine? Paulo atile tufwile ukuleka Lesa eshibe ukupapaata kwesu “pamo no kutootela.” Kanshi tufwile ukusosa nga filya Davidi asoseleko ati: “Fyenu, mwe Yehova, ubukulu na maka no kuyemba no kupulama no bucindami; pantu fyonse ifya mu muulu ne fya pe sonde fyenu. Ubufumu bwenu, mwe Yehova, mwe bakulisha ukucila bonse. . . . Mwe Lesa wandi, tulemutasha no kulumbanya ishina lyenu ilisuma.”—1 Imila. 29:11-13.

⁷ Yesu alitashishe Lesa pa fya kulya na pa mukate no mwangashi pa Mulaalilo wa kwa Shikulu. (Mat. 15:36; Marko 14:22, 23) Na ifwe tufwile ukulatasha, e lyo kabili tulingile ‘ukutootela Yehova’ pa “milimo yakwe iyapesha amano iyo aacitila abana ba bantu,” pa “bupingushi [bwakwe] ubwalungama,” na pa cebo cakwe, nangu amashiwi yakwe ayaba muli Baibolo.—Amalu. 107:15; 119:62, 105.

Mulepepelako Bambi

8, 9. Mulandu nshi tulingile ukupepelako Abena Kristu banensu?

⁸ Ukwabula no kutwishika, tulaipepela fwe bene, lelo tufwile no kupepelako bambi—na Bena Kristu abo tushaishiba na mashina. Nangu ca kuti umutumwa Paulo taishibe Abena Kristu bonse mu Kolose, alembele ati: “Lyonse ilyo tumupepelako, tulatootela Lesa, Wishi wa kwa Shikulwifwe Yesu Kristu, pantu twalyumfwa pa citetekelo cenu muli Kristu Yesu na pa kutemwa uko mwatemwa aba mushilo bonse.” (Kol. 1:3, 4) Paulo apepeleko na Bena Kristu ba ku Tesalonika. (2 Tes. 1:11, 12) Ilyo twapepelako bamunyinefwe ne nkashi, cilanga ifyo bucibusa bwesu na Lesa bwaba ne fyo tutontonkanya pali abo bamunyinefwe ne nkashi.

⁹ Nga tulepepelako Abena Kristu basubwa e lyo ne “mpaanga shimbi,” cilangililo ca kuti twalibikako amano ku kuteyanya kwa kwa Lesa. (Yoh. 10:16) Paulo alombele Abena Kristu banankwe ukuti balemupepelako pa kuti ‘apeelwe amaka ya kusosa ku kulenga inkama ya kwa Lesa iya mbila nsuma ishibikwe.’ (Efes. 6:17-20) Bushe na ifwe pa lwesu tulapepelako Abena Kristu banensu?

10. Bushe ukupepelako bambi kuti kwatwafwa shani?

¹⁰ Ukupepelako bambi kuti kwalenga twaba bwino kuli bena. Nga tulepepelako umuntu uo tushatemwa, kuti twasuka twamutemwa. (1 Yoh. 4:20, 21) Amapepo ya musango yu yalakoselesha kabili yalalenga twaikatana na bamunyinefwe. Amapepo ya musango yo yalanga no kuti twalikwata ukutemwa nga kulya ukwa kwa Kristu. (Yoh. 13:34, 35) Ukutemwa kwaba pa fisabo fya mupashi ifya kwa Lesa. Bushe tulalomba umupashi wa mushilo mwi pepo, ukulomba Yehova ukuti atwafwe ukulanga ifisabo fya mupashi ifyaba kutemwa, ukusekelela, umutende, ukushishimisha, icikuuku, ubusuma, icitetekelo, ukufuuka, no kuilama? (Luka 11:13; Gal. 5:22, 23) Nga ni fyo, ifyo tusosa ne fyo tucita fikalanga ukuti tukonka ifyo umupashi ututungulula kabili imikalile yesu yumfwana ne fifwaya umupashi.—Belengeni Abena Galatia 5:16, 25.

11. Cinshi mwingasosela ukuti caliba fye bwino ukweba bambi ukutupepelako?

¹¹ Nga twasanga ukuti abana besu baletunkwa ukushita ifipepala fya masuko ya mashindano, tufwile ukubapepelako no kubabelengela Amalembo ya kubafwa ukuba abafumacumi no kuti becita ifishalungama. Paulo aebele Abena Kristu ba ku Korinti ati: “Tulepepa kuli Lesa ukuti imwe mwicita icibi nangu cimo.” (2 Kor. 13:7) Amapepo ya musango yo ayabamo ukuicefya yalatemuna Yehova kabili yalanga ukuti twaliba na bucibusa na ena. (Belengeni Amapinda 15:8.) Kuti twaeba bambi ukuti baletupepelako nga filya fine no mutumwa Paulo acitile. Alembele ati: “Muletupepelako, pantu natucetekela ukuti tuli na kampingu umusuma, apo tufwaya ukuba aba cishinka muli fyonse.”—Heb. 13:18.

Fimbi Ifyo Amapepo Yesu Yalanga Pali Ifwe

12. Finshi ifyo tufwile ukulandapo sana mu mapepo yesu?

¹² Bushe amapepo yesu yalanga ukuti tuli Nte sha kwa Yehova isha nsansa kabili ishacincila mu mulimo wa kwa Lesa? Bushe ilyo tulepepa amapepo ya kupapaata tubika amano ku fintu ifi, e kutila ku kufwaya kwa kwa Lesa, ku mulimo wa kubila imbila ya Bufumu, kuli bumulopwe bwa kwa Yehova, na ku kulenga ishina lyakwe ukuba ilya mushilo? Ifi e fintu tufwile ukulandapo sana mu mapepo yesu, nga filya fine tumona mwi pepo lya cilangililo ilya kwa Yesu ilitampa na mashiwi ya kuti: “Shifwe wa mu muulu, ishina lyenu libe ilya mushilo. Ubufumu bwenu bwise. Ukufwaya kwenu kucitwe pano isonde nga mu muulu.”—Mat. 6:9, 10.

13, 14. Finshi amapepo yesu yalanga pali ifwe?

¹³ Amapepo tupepa kuli Lesa yalanga ifyaba mu mitima yesu, ifyo twatemwa, ne fyo tufwaisha. Yehova alishiba ifyaba mu mitima yesu. Amapinda 17:3 yatila: “Silfere yengulwilwa mu nongo e lyo golde yengulwilwa mwi lungu, lelo uubebeta imitima ni Yehova.” Lesa alamona ifyaba mu mutima. (1 Sam. 16:7) Alishiba ifyo tumona ukulongana, umulimo wa kushimikila, e lyo ne fyo tumona bamunyinefwe ne nkashi. Yehova alishiba ifyo tutontonkanya pali ‘bamunyina’ ba kwa Kristu. (Mat. 25:40) Aleshiba nga ca kuti ifyo tulepepela cine cine e fyo tulefwaya nangu nga ca kuti tulelanda fye pantu twalibelesha ukubwekeshapo ayo mashiwi. Yesu atile: “Ilyo ulepepa, wilabwekeshapo ukusosa fimo fine, nge ficita abantu ba muli cino calo, pantu [baliluba] bamona kwati kuti babomfwa nga basosa amashiwi ayengi.”—Mat. 6:7.

¹⁴ Ifyo tulelanda mwi pepo filanga ne fyo twacetekela Lesa. Davidi atile: “Pantu [mwe Yehova] muli cubo candi, muli lupungu ulwakosa ku cinso ca mulwani. Nkaba umulebeshi mwi tenti lyenu umuyayaya; nkooba mu mapindo yenu umwabelama.” (Amalu. 61:3, 4) Lesa nga ‘afungulwila itenti lyakwe pali ifwe,’ tuba mu mutelelwe kabili abacingililwa. (Ukus. 7:15) Cilatusansamusha sana ukupalama kuli Yehova ukupitila mwi pepo, pantu tatutwishika ukuti ‘alaba na ifwe’ ilyo kuli ubwesho.—Belengeni Amalumbo 118:5-9.

15, 16. Finshi ipepo lingalanga pa lwa kufwaisha kwesu ukwa kubombako imilimo mu cilonganino?

¹⁵ Ipepo lya bufumacumi kuli Yehova ukukuma ku fyo twaiminapo kuti lyatwafwa ukumona nga ca kuti ifyo twaimininapo fyaliba fye bwino. Ku ca kumwenako, nga tufwaya ukuba bakangalila pa bantu ba kwa Lesa, bushe cine cine twaiminina pa kubombela bambi mu kuicefya no kubombesha ukutwala ifya Bufumu pa ntanshi? Nangu bushe tufwaya fye “ukuba pa ntanshi” nangu fye ukufwaya ‘ukutitikisha’ bambi? Ifi te fyo ifintu fifwile ukuba pa bantu ba kwa Yehova. (Belengeni 3 Yohane 9, 10; Luka 22:24-27.) Nga ca kuti ifyo twaimininapo pa kufwaya imilimo mu cilonganino tafyawama, ukupepa kuli Yehova Lesa mu bufumacumi kuti kwatwafwa no kutulenga twa-aluka ilyo iyo mibele tailalimba imishila.

¹⁶ Bankashi abaupwa kuti napamo baleifwasha abena myabo ukuba ababomfi batumikila nangu ku ntanshi ukuba bakangalila, nangu baeluda. Aba bankashi bafwile ukulacita ukulingana ne fyo balanda mu mapepo ya pa lwabo ukupitila mu kwesha ukuba ne mibele isuma. Ici calicindama nga nshi pantu imilandile ne micitile ya ba mu lupwa lwa muntu kuti fyakuma ifyo abantu mu cilonganino bamumona.

Ukwimininako Bambi mu Mapepo ya pa Cintubwingi

17. Mulandu nshi cawamina ukuba ukuli umutalalila ilyo tulepepa amapepo ya pa lwesu?

¹⁷ Ilingi line, Yesu alefuma ukuli abantu no kuyaba eka pa kuti apepe kuli Wishi. (Mat. 14:13; Luka 5:16; 6:12) Na ifwe bene inshita shimo tulafwaya ukuba fweka. Nga tuli ukuli umutalalila e lyo tulepepa, kuti twapingula ifintu ifingatemuna Lesa no kutukosha muli bukapepa. Lelo, inshita shimbi Yesu alepepa na pa cintubwingi, kabili nacilinga ukuti tulandepo ifyo twingacita ifyo mu nshila isuma.

18. Finshi ifyo bamunyinefwe bafwile ukulaibukisha ilyo baleimininako icilonganino mwi pepo?

¹⁸ Pa kulongana kwesu, abaume ba cishinka balemininako icilonganino ukupepa pa cintubwingi. (1 Tim. 2:8) Abaleumfwako kuti bafwile ukusosako ati “ameni,” pa mpela ye pepo, icalola mu kuti “nacibe fyo fine.” Pa kuti bacite fyo, kano basuminishako ku fisoselwe. Ipepo lya kwa Yesu ilya kutulanga ifya kupepa talyalimo ifyaletulumusha abantu nangu ifya kwebelapo bambi. (Luka 11:2-4) E lyo kabili talumbwile fyonse fye ifyo abali mwi bumba lyakwe balekabila na mafya bakwete. Ifya pa lwesu fyalinga ukulanda mu mapepo ya pa lwesu, te mu mapepo ya pa cintubwingi. Kabili ilyo tuleimininako abantu mwi pepo lya pa cintubwingi, tatufwile ukusanshamo imilandu ya nkaama.

19. Bushe tufwile ukuisunga shani pa mapepo ya cintubwingi?

¹⁹ Ilyo umo aletwimininako mwi pepo, tufwile ukuba no mucinshi na “katiina kuli Lesa.” (1 Pet. 2:17) Ifintu fimo kuti fyalinga ukucita pa nshita imbi kabili ku ncende imbi, lelo te ku kulongana kwa Bena Kristu. (Luk. Mil. 3:1) Ku ca kumwenako, nga ca kuti umo atila bonse mwi bumba balingile ukwikatana amaboko pa kupepa, kuti capunwisha bamo nangu ukupumfyanya bambi, kumo na bantu tushipepa na bo abasangilweko fye. Abaupana nalimo kuti bafwaya ukwikatana ku maboko mu nshila ya kuti taicebwishe bambi. Lelo nga ca kuti bakumbatana pe pepo lya pa cintubwingi, abamonako nalimo kuti bapunwishiwa. Kuti balamona kwati aba baupana pa kupepa babikile sana amano ku citemwiko cabo ukucila kuli bucibusa bwabo na Yehova. Kanshi pa kulanga umucinshi kuli Lesa, ‘natucite fyonse ku kucindika Lesa’ no kukanacita ifingapumbula, ukutulumusha, nangu ukupunwisha uuli onse.—1 Kor. 10:31, 32; 2 Kor. 6:3.

Finshi Tufwile Ukupepela?

20. Bushe ilembo lya Abena Roma 8:26, 27 lyalola mwi?

²⁰ Inshita shimo, teti twishibe ifya kulanda mu mapepo ya pa lwesu. Paulo alembele ati: “Ubwafya tulingile ukupepela ilyo tulefwaya ukupepa tatubwishiba, lelo umupashi [wa mushilo] wine ulatupapaatilako ilyo tuleteta ukwabula ukulanda. Lelo [Lesa] uufwayafwaya mu mitima alishiba ififwaya umupashi.” (Rom. 8:26, 27) Yehova alengele ukuti amapepo ayengi yalembwe mu Malembo. Amona aya mapepo ngo kulomba uko na ifwe twingafwaya ukusansha mu mapepo yesu kabili alatwasuka. Lesa alitwishiba kabili alishiba no bupilibulo bwa fintu alengele ukuti umupashi ulandile ukupitila mu balembele Baibolo. Yehova alasuka ukupapaata kwesu ilyo umupashi ‘watupapaatilako’ nangu ukutwimininako. Ilyo tuleishiba sana ifyaba mu Cebo ca kwa Lesa, tatwakaleshomboka ukufwayafwaya ifya kulumbula mu mapepo.

21. Finshi tuli no kubebeta mu cipande cikonkelepo?

²¹ Nga fintu tusambilile, amapepo yesu yalalanga ifingi pali bucibusa bwesu na Lesa. Ku ca kumwenako, kuti yalanga ifyo twapalama kuli Yehova ne fyo twaishiba Icebo cakwe. (Yako. 4:8) Mu cipande cikonkelepo, tuli no kubebeta amapepo yamo na mashiwi ayalembwa muli Baibolo. Bushe ukubebeta ayo Malembo kukatwafwa shani ilyo tulepepa kuli Lesa?

Wamyeni Amapepo Yenu Ukupitila Mu Kuisambilisha Baibolo

“Iye, mwe Yehova, kutikeni kwi pepo lya mubomfi wenu.”—NEHE. 1:11.

1, 2. Mulandu nshi calatwafwila sana ukulanda pa mapepo yamo ayalembwa mu Baibolo?

IPEPO no kusambilila Baibolo lubali lwa kupepa kwa cine. (1 Tes. 5:17; 2 Tim. 3:16, 17) Kwena, Baibolo te citabo ca mapepo. Lelo mwaliba amapepo ayengi, ukubikako na yalya yasangwa mwi buuku lya Amalumbo.

² Ilyo mulebelenga no kusambilila Baibolo, nalimo muli no kusanga amapepo ayalelanda pa filemucitikila. Na kuba, ilyo mwalanda amashiwi yamo ayaba mu mapepo ya muli Baibolo ilyo mulepepa, amapepo kuti yalawama. Finshi mwingasambilila ku bantu abo Lesa ayaswike amapepo yabo e lyo na ku fyo balandile mu mapepo yabo?

Lombeni Lesa Ukuti Amutungulule Kabili Konkeni Ubutungulushi Bwakwe

3, 4. Mulimo nshi umubomfi wa kwa Abrahamu aendeele, kabili cinshi twingasambilila ku fyo Yehova amwafwile?

³ Ilyo muleisambilisha Baibolo, musambilila ukuti mufwile lyonse ukupepa kuli Lesa ukuti alemutungulula. Tontonkanyeni pa cacitike ilyo Abrahamu atumine umukalamba pa babomfi bakwe, nalimo Eliesere, ukuya ku Mesopotamia mu kufwaila Isaki umwanakashi waletiina Lesa. Ilyo abanakashi baletapa amenshi pa cishima, ulya mubomfi apepele ati: “Mwe Yehova . . . , lekeni umukashana uo nalasosako nati, ‘Tuula umutondo obe, pa kuti nwemo amenshi,’ kabili na o nga atila, ‘Nwenimo, nalamunwensesha ne ngamila,’ uyu e o mupeele umubomfi wenu, Isaki; kabili kuli ici e ko nalaishibila ukuti namulanga icikuuku kuli shikulu.”—Ukute. 24:12-14.

⁴ Lesa alyaswike ipepo lya mubomfi wa kwa Abrahamu ilyo Rebeka anwenseshe ingamila shakwe. Tapapitile ne nshita, Rebeka aile na ulya mubomfi ku Kanaani no kuyaba umukashi watemwikwa uwa kwa Isaki. Kwena, Lesa takamupeele icishibilo caibela. Lelo akamutungulula mu bumi bwenu ilyo mwapepa no kufwaya ukuti umupashi wakwe ulemutungulula.—Gal. 5:18.

Ipepo Lilacefyako Umwenso

5, 6. Finshi twamona mwi pepo Yakobo apepele ilyo ali mupepi no kukumana na Esau?

⁵ Ipepo kuti lyacefyako umwenso. Ilyo Yakobo aletiina mpundu munankwe Esau, apepele kuli Lesa ati: “Mwe Yehova, . . . Nshalingile ukukwata icikuuku cenu ne fya cishinka fyonse ifyo mwancitile ne mubomfi wenu . . . Ndepepa kuli imwe, nati, mpokololeni mu kuboko kwa kwa munyinane, mu kuboko kwa kwa Esau, pantu ndemutiina ukuti napamo kuti aisansanshila kumo na bana na banyinabo. Kabili imwe, mwatile, ‘Nkakucita icisuma kabili nkalenga abana bobe ukufula ngo mucanga wa pali bemba, uushingapendwa ku bwingi.’”—Ukute. 32:9-12.

⁶ Nangu ca kuti Yakobo alicitilepo fimo ifya kuicingilila nga ca kuti Esau amusansa, Lesa alyaswike ipepo lyakwe ilyo awikishenye na Esau. (Ukute. 33:1-4) Belengeni bwino sana ifyo Yakobo apepele, mwalasanga ukuti talepapaata fye ukuti bamwafwe. Alangile no kuti alitetekele ukuti kwali no kuba Umwana uo Lesa alaile kabili atashishe na Lesa pa cikuuku cakwe. Bushe na imwe mwalikwata “umwenso mu kati”? (2 Kor. 7:5) Nga ni fyo, ifyo Yakobo apapeete mwi pepo kuti fyamucinkulako ukuti ipepo kuti lyacefyako umwenso. Nomba mu mapepo yesu tamufwile ukuba fye ukulomba, lelo mufwile mwaba na mashiwi ayalangilila ukuti twaliba ne citetekelo.

Pepeleni Amano

7. Mulandu nshi Mose alombeele ukuti eshibe imibele ya kwa Yehova?

⁷ Nga mulafwaya ukusekesha Yehova, mufwile ukupepela amano. Mose apepele ukuti eshibe imibele ya kwa Lesa. Apapeete kuli Lesa ati: “Mwamona, muleti kuli ine, ‘Tungulula aba bantu [ukufuma mu Egupti]’ . . . Nomba, nga mwalintemwa, shi nengeni njishibe imibele yenu, . . . pa kuti ntemwikwe kuli imwe.” (Ukufu. 33:12, 13) Lesa alyaswike ipepo lya kwa Mose kabili amulengele ukwishiba sana imibele Yakwe. Ici calefwaikwa pa kuti atungulule abantu ba kwa Yehova.

8. Kuti mwanonkelamo shani nga mwatontonkanya sana pe lembo lya 1 Ishamfumu 3:7-14?

⁸ Davidi na o apepele ati: “Nengeni ukwishiba inshila shenu, mwe Yehova.” (Amalu. 25:4) Solomone, umwana wa kwa Davidi apapeete Lesa ukuti amupeele amano pa kuti aleteka bwino abena Israele. Yehova alitemenwe ipepo lya kwa Solomone, kabili amupeele ifyo alombele e lyo amupeelelepo ne fyuma no bukata. (Belengeni 1 Ishamfumu 3:7-14.) Nga bamupeela imilimo mu cilonganino iyo mwamona kwati yamukulila, pepeleni amano no kuba abaicefya. Lyena Lesa akamupeela amano no kumulanga ifya kubomba bwino imilimo yenu mu nshila isuma.

Amapepo Yalefuma pa Nshi ya Mutima

9, 10. Finshi mwamona mwi pepo Solomone apepele pa kupeela itempele kuli Lesa ifikumine umutima?

⁹ Pa kuti Lesa omfwe ipepo lyenu, lifwile ukufuma pa nshi ya mutima. Solomone apepele ipepo lya kufuma pa nshi ya mutima ilyalembwa pali 1 Ishamfumu icipandwa 8. Apepele ili pepo pa ntanshi ye bumba lyalongene mu Yerusalemu ilyo alepeela itempele kuli Yehova mu 1026 B.C.E. Solomone alumbenye Lesa ilyo icipao ca cipangano bacibikile mu muputule wa Mushilo Nga Nshi na lintu ikumbi lya kwa Yehova lyaiswile mwi tempele.

¹⁰ Belengeni bwino ipepo lya kwa Solomone no kumona imiku alanda pa mutima. Solomone alisumine ukuti Yehova eka fye e waishiba umutima wa muntu. (1 Isha. 8:38, 39) Ipepo limo line lilanga no kuti umubembu nga ‘abwelela kuli Lesa no mutima wakwe onse’ kuti bamwelela. Nga ca kuti abalwani basenda abantu ba kwa Lesa bunkole, kuti aumfwa ukupapaata kwabo nga ca kuti imitima yabo ili iya cishinka kuli Yehova. (1 Isha. 8:48, 58, 61) Kanshi, amapepo yenu yafwile ukufuma pa nshi ya mutima.

Ifyo Ibuuku lya Amalumbo Lingamwafwa Ukuwamyako Amapepo Yenu

11, 12. Finshi mwasambilila kwi pepo lya mwina Lebi uushali na maka ya kuya ku bwikalo bwa kwa Yehova pa nshita imo?

¹¹ Ukubelenga ifyebo fyaba mwi buuku lya Amalumbo kuti kwamwafwa ukuwamyako amapepo yenu no kumwafwa ukulolela ukuti Lesa asuke. Tontonkanyeni pa kutekanya kwa mwina Lebi umo uo basendele bunkole. Nangu ca kuti pa nshita imo tali na maka ya kuya ku bwikalo bwa kwa Yehova, aimbile ati: “Cinshi wasakamikilwa, we mutima wandi, cinshi wakulunkuntila muli ine? Lolela Lesa, pantu nkamutootela pa kuba umupusushi wandi.”—Amalu. 42:5, 11; 43:5.

¹² Cinshi mwingasambilila kuli uyu mwina Lebi? Nga ca kuti pa nshita imo bamupoosele mu cifungo ica kuti mwalafilwa no kuba na ba bwananyina ku cifulo ca mapepo, mufwile ukutekanya no kulolela Lesa ukuti amwafwe. (Amalu. 37:5) Tontonkanyeni pa fyo mwaleipakisha ukubombela Lesa. Ilyo ‘mulelolela Lesa’ ukuti akamulenge ukuba pamo na bantu bakwe na kabili, lombeni ukuti amwafwe ukushipikisha.

Mwilatwishika pa Kupepa

13. Ukulingana na Yakobo 1:5-8, mulandu nshi tamufwile ukutwishikila pa kupepa?

¹³ Te mulandu ne fyo ifintu fili, mwilatwishika pa kupepa. Nga ca kuti mule-eshiwa, citeni ifyo umusambi Yakobo asosele. Pepeni kuli Yehova, kabili te kwesha ukutwishika amuti nalimo takamupeele amano yafwaikwa pa kuti mushipikishe ubo bwesho. (Belengeni Yakobo 1:5-8.) Lesa aleshiba amesho yonse ayamuponena, kabili kuti amutungulula no kumusansamusha ukupitila mu mupashi wakwe. Mwebeni ifili mu mutima wenu no kumutetekela, ‘mwilatwishika iyo,’ kabili konkeni ubutungulushi bwa mupashi wakwe no kufunda kwa mu Cebo cakwe.

14, 15. Mulandu nshi twingasosela ukuti Hana taletwishika pa kupepa kabili acitile ifyalelanga ukuti ali ne citetekelo?

¹⁴ Hana, muka Elkana umwina Lebi, taletwishika pa kupepa kabili acitile ifyalelanga ukuti ali ne citetekelo. Apo ali ni ng’umba, balemuseka ku mukashi munankwe Penina pantu ena alifyele abana abengi. Ilyo ali ku cikuulwa ca mushilo, Hana alilapile ukuti nga afyala umwana umwaume, ali no kumupeela kuli Yehova. Apo imilomo yakwe yaletenta ilyo alepepa mu mutalalila, Shimapepo Mukalamba Eli atontonkenye ukuti Hana alikolelwe. Ilyo aishileishiba ukuti te fyo cali, amwebele ati: “Lesa wa kwa Israele akupeele ico wamulomba.” Nangu cingati Hana taishibe bwino bwino ifyali no kucitika, ali ne citetekelo ca kuti Lesa ali no kwasuka ipepo lyakwe. E ico, “icinso cakwe tacamoneke ica bulanda na kabili.” Tali uwabombomana na kabili.—1 Sam. 1:9-18.

¹⁵ Pa numa, Hana afyele Samwele kabili ilyo amusumwine, amupeele kuli Yehova ukuti alebomba umulimo wa kwa Lesa pa cikuulwa ca mushilo. (1 Sam. 1:19-28) Nga mwatontonkanya sana pe pepo Hana apepele pali ilya nshita, kuti camwafwa ukuwamyako amapepo yenu no kumwafwa ukumona ukuti nangu fye mwaba no bulanda pa bwafya bumo ubwabipisha, kuti mwacimfya nga ca kuti mwapepa ne citetekelo ukwabula ukutwishika amuti nalimo Yehova takamwasuke.—1 Sam. 2:1-10.

16, 17. Cinshi cacitike pa mulandu wa kuti Nehemia taletwishika pa kupepa kabili acitile ifyalelanga ukuti ali ne citetekelo?

¹⁶ Nehemia, uwali umuntu umulungami na o taletwishika pa kupepa kabili acitile ifyalelanga ukuti ali ne citetekelo. Apapeete kuli Lesa ati: “Iye, mwe Yehova, kutikeni kwi pepo lya mubomfi wenu na kwi pepo lya babomfi benu ababekelwa mu kutiina ishina lyenu; kabili, shi lekeni umubomfi wenu atunguluke buno bushiku kabili lekeni uyu muntu amumfwileko uluse.” Bushe “uyu muntu” Nehemia alelandapo ali nani? Ali ni Artakishashete Imfumu ya Persia, iyo Nehemia alepeela ifya kunwa.—Nehe. 1:11.

¹⁷ Pa numa ya kwishiba ukuti abaYuda abo balubwile mu busha mu Babiloni “bali mu bucushi ubukalamba na mu museebanya; ne linga lya Yerusalemu [lyaliwile],” Nehemia alipepele pa nshiku ishingi ukwabula ukutwishika. (Nehe. 1:3, 4) Lesa alyaswike amapepo mu nshila Nehemia ashale-enekela ilyo Imfumu Artakishashete yamusuminishe ukuya ku Yerusalemu ku kukuula cipya cipya ilinga. (Nehe. 2:1-8) Mu nshita fye inono, balikuulile ilinga. Lesa alyaswike amapepo ya kwa Nehemia pantu yakumine ukupepa kwa cine kabili taletwishika pa kupepa. Bushe na imwe e fyaba amapepo yenu?

Muleibukisha Ukulumbanya Lesa no Kumutasha

18, 19. Ni pa milandu nshi umubomfi wa kwa Yehova afwile ukumulumbanishisha no kumutasha?

¹⁸ Ilyo mulepepa, muleibukisha ukulumbanya Yehova no kumutasha. Fingi twingamulumbanishishapo no kumutashishapo! Ku ca kumwenako, Davidi alefwaya sana ukulumbanya bumfumu bwa kwa Yehova. (Belengeni Amalumbo 145:10-13.) Bushe amapepo yenu yalanga ukuti mulatasha pe shuko mwakwata ilya kusabankanya Ubufumu bwa kwa Yehova? Amashiwi ya kwa kemba wa malumbo kuti yamwafwa no kweba Lesa mwi pepo lya kufuma pa nshi ya mutima ukuti mulatasha sana pa kulongana kwa Bwina Kristu, ukulongana kukalamba, na pa kulongana kwa citungu.—Amalu. 27:4; 122:1.

¹⁹ Nga mulatasha pali bucibusa bwawamisha mwakwata na Lesa, kuti mwapepa ukufuma pa nshi ya mutima kabili mwi pepo kuti mwaba amashiwi pamo nga ya: “Mwe Yehova, nkamulumbanya mu bantu na bantu; nkamulumbanishisha pa cilimba mu nko. Pantu icikuuku cenu icikalamba cafika na mu muulu, ne cishinka cenu cafika na mu makumbi. Mwe Lesa, sansabikweni pa muulu wa myulu; lekeni ubukata bwenu bube pa muulu we sonde lyonse.” (Amalu. 57:9-11) We mashiwi nobe ulawama! Bushe tamulesuminishako ukuti amashiwi ya musango yo aya mwi buuku lya Amalumbo kuti yalenga mwawamyako amapepo yenu?

Beni na Katiina pa Kulomba Kuli Lesa

20. Bushe Maria alangile shani ukuti ali-ipeeleshe kuli Lesa?

²⁰ Ilyo mulepepa mufwile ukumfwika ukuti muli na katiina. Amashiwi Maria alandile ayalelanga ukuti ali na katiina, ilyo fye aishibe ukuti ali no kufyala Mesia, yalipalana na yo Hana alandile ilyo atwele Samwele ukuti alebombela pa cikuulwa ca mushilo. Ifilanga ukuti Maria ali na katiina kuli Lesa mashiwi asosele aya kuti: “Ndelumbanya Yehova, no mutima wandi teti ufilwe ukusansamukila nga nshi Lesa Umupusushi wandi.” (Luka 1:46, 47) Bushe na imwe kuti mwawamyako amapepo ukupitila mu kulanda amashiwi yapala aya? E mulandu wine Maria uwatemenwe ukupepa bamusaliile ukuba nyina wa kwa Yesu Mesia!

21. Bushe amapepo ya kwa Yesu yalanga shani ukuti ali na katiina kabili taletwishika?

²¹ Yesu pa kupepa aleba na katiina kabili taletwishika. Ku ca kumwenako, ilyo ashilabuusha Lasaro, “Yesu ainwine amenso mu muulu, no kutila: ‘Tata, ndemutootela ukuti mwang’umfwa. Ca cine, nalishiba ukuti lyonse mulang’umfwa.’” (Yoh. 11:41, 42) Bushe na imwe amapepo yenu yalalanga ukuti mwaliba na katiina kabili tamutwishika? Nga mwabelenga sana ipepo lya kutulanga ifya kupepa ilyo Yesu apepele na katiina, mwalasanga ukuti ifintu fyacindama sana ifyo alandilepo kufwaya ishina lya kwa Yehova ukuti libe ilya mushilo, ukufwaya Ubufumu bwakwe ukwisa, no kuti ukufwaya kwakwe kucitwe. (Mat. 6:9, 10) Tala tontonkanyeni pa mapepo yenu. Bushe yalanga ukuti mwalitemwa sana Ubufumu bwa kwa Yehova, ukucita ukufwaya kwakwe, no kufwaya ukuti ishina lyakwe likabe ilya mushilo? Yafwile ukulanga ifyo.

22. Mulandu nshi mwingacetekela ukuti Yehova akamupeela ubukose bwa kubila imbila nsuma?

²² Pa mulandu wa fya kwesha ne fyo batucusha, ilingi line mu mapepo yesu mulaba ukupapaata Yehova ukuti atwafwe no kutukosha. Ilyo aba mu cilye ca Sanhedrini baebele Petro na Yohane ukuti baleke “ukusambilishisha mwi shina lya kwa Yesu,” balya batumwa balishipile kabili tabalekele ukushimikila. (Imil. 4:18-20) Ilyo babakakwile, bashimikileko Abena Kristu banabo ifyacitike. E lyo bonse abalipo balombele Lesa ukuti abafwilishe ukulanda icebo cakwe no kushipa. Bafwile balitemenwe nga nshi ilyo Lesa ayaswike ilyo ipepo, pantu “baiswilemo umupashi wa mushilo kabili balelanda icebo ca kwa Lesa no kushipa”! (Belengeni Imilimo 4:24-31.) Ne cafuminemo ca kuti abantu abengi sana baishileba bakapepa ba kwa Yehova. Na imwe bene ipepo kuti lyamukosha pa kuti muleshimikila imbila nsuma no kushipa.

Twalilileni Ukuwamyako Amapepo Yenu

23, 24. (a) Landeni ifya kumwenako na fimbi ifya mu Baibolo ifingalenga mwawamyako amapepo yenu. (b) Cinshi mukacita pa kuti mukawamyeko amapepo yenu?

²³ Kwaliba ifya kumwenako na fimbi ifilanga ukuti ukubelenga Baibolo no kuisambilisha mwe bene kuti kwalenga mwawamyako amapepo yenu. Ku ca kumwenako, kuti mwapepa nga Yona no kusumina ukuti ‘Yehova e wa kumupususha.’ (Yona 2:1-10) Nga ca kuti mulecula ku mutima pa mulandu wa lubembu lwabipisha mwacitile e lyo baeluda na bo balimwafwa, ifyo Davidi alandile kuti fyamwafwa ilyo mulepepa kuli Lesa pa lwenu no kumweba ifyo mwalapila. (Amalu. 51:1-12) Mu mapepo yamo, kuti mwalumbanya Yehova nga filya Yeremia acitile. (Yer. 32:16-19) Nga mulefwaya uwa kuupana nankwe, ukubelenga ipepo lyaba mwi buuku lya kwa Esra icipandwa 9, pamo no kupapaata kwa pa lwenu, kuti fyamwafwa ukupampamina pa kumfwila Lesa no ‘kuupilwa muli Shikulu epela.’—1 Kor. 7:39; Esra 9:6, 10-15.

²⁴ Twalilileni ukubelenga Baibolo, ukuisambilisha mwe bene, no kufwailishamo. Sangenimo ifyo mwingasansha mu mapepo yenu. Kuti mwabomfya amashiwi yamo aya mu Baibolo mu kupapaata kwenu na mu mapepo yenu aya kutasha Lesa no kumulumbanya. Kabili mukapalama sana kuli Yehova Lesa ilyo mukalawamyako amapepo yenu ukupitila mu kuisambilisha mwe bene Baibolo.