Hana Alapa Umulapo

Ilambo lya mutende balelilila pe tempele lya kwa Yehova. Pa numa ya kufuma mu muputule wa kuliilamo, Hana apepa kuli Lesa. (1 Samwele 1:9, 10) Apaapaata ukuti: “Mwe Yehova wa milalo, ukulolesha nga mulelolesho bulanda bwa kwa cishiko wenu, no kunjibukisha, nga tamwakalabe cishiko wenu, kabili mwapeela cishiko wenu umwana mwaume, e lyo nkamupeela kuli Yehova inshiku shonse sha mweo wakwe; kabili icibeyo tacakabeye ku mutwe wakwe.”—1 Samwele 1:11.

Hana alomba fye ifyo alefwaya. Alomba umwana umwaume kabili alapa ukuti akamupeela kuli Yehova pa kuti akabe umuNasiri. (Impendwa 6:1-5) Pa kuti Hana afikilishe ulya mulapo umulume e uli no kusuminisha, kabili ifyo Elkana acita fyalanga ukuti asuminishako ku mulapo wa mukashi wakwe uo atemwa nga nshi.—Impendwa 30:6-8.

Ifyo Hana alecita pa kupepa fyalenga Shimapepo Mukalamba Eli ukutontonkanya ukuti nakolwa. Imilomo yakwe e iletenta, lelo ishiwi talileumfwika pantu alepepela mu mutima. Hana aleeba Yehova fyonse ifili ku mutima. (1 Samwele 1:12-14) Elenganyeni ifyo Hana aumfwa ilyo Eli amutunganya ukuti nakolwa! Na lyo line, ayasuka shimapepo mukalamba mucinshi mucinshi. Ilyo Eli aishiba ukuti Hana acilapepa mu “bwingi bwa masakamika [yakwe] no bucushi [bwakwe],” atila: “Lesa wa kwa Israele akupeele ico wamulomba.” (1 Samwele 1:15-17, NW) Awe Hana abwelelamo kabili alya “ne cinso cakwe [tacili] na bulanda kabili iyo.”—1 Samwele 1:18.

Cinshi twingasambilila kuli ifi fyonse? Nga tulepepa kuli Yehova pa masakamika yesu, tufwile ukumweba fyonse ifili ku mutima no kulomba ifyo tulefwaya. Nga tapali ico twingacita ku kupwisha ubwafya, tulingile ukushiila fyonse mu maboko ya kwa Lesa. Ifi e fyo tulingile ukucita epela.—Amapinda 3:5, 6.

Ababomfi ba kwa Yehova nga bapepa, bamweba fyonse ifili ku mutima, ilingi line tabatwalilila ukusakamikwa nge fyo cali na kuli Hana. Ilyo umutumwa Paulo alelanda pe pepo, alembele ukuti: “Mwisakamikwa nangu kamo, lelo muli fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.” (Abena Filipi 4:6, 7) Nga twapoosa icisendo cesu pali Yehova, tulingile ukucetekela ukuti alatwafwa. E lyo tatufwile no kutwalilila ukusakamikwa nge fyo na Hana acitile.—Amalumbo 55:22.

Ipepo Umo Hana Atasha Yehova

Hana uwali kale ing’umba natemwa nga nshi! Mu Baibolo tamwaba sana amapepo ayo abanakashi bapepele. Nomba ulwa kwa Hana ena twalishibako amapepo yabili ayo apepele. Ilya kubalilapo ni lilya alandilemo ifyali ku mutima wakwe lintu asakamikwe nga nshi, e lyo ilya bubili lipepo umo atasha Yehova. Apepa ukuti: “Umutima wandi wayangila muli Yehova, lwatumpulwo lusengo lwandi kuli Yehova.” Asekelela atila “ing’umba yasuka yafyala,” kabili alumbanya Yehova atila “alasansabika; emyo mulanda mu lukungu.” Ca cine, Yehova ‘alasumbulo mubusu ukumufumya pa cishala!’—1 Samwele 2:1-10.