Sara emininako “umukashi” wa kwa Lesa uwa ku muulu, e kuti ukuteyanya kwakwe ukwa fibumbwa fya ku mupashi. Caliba fye icalinga ukuti kulya kuteyanya kulondololwe ukuti mukashi wa kwa Yehova, pantu kwaliba na bucibusa bwine bwine na Yehova, kulanakila ubutungulushi bwakwe, kabili kulabombela pamo na wene mu kufishapo ubufwayo bwakwe bonse. Uku kuteyanya kwitwa no kuti “Yerusalemu wa mu muulu.” (Abena Galatia 4:26) Uyu “mwanakashi” umo wine e walumbulwa na pa Ukutendeka 3:15, kabili e wamonwa na mu cimonwa ca pa Ukusokolola 12:1-6, 13-17.

Sara, “umwanakashi umuntungwa” kabili umukashi wa kwa Abrahamu, emininako ukuteyanya kwa kwa Yehova ukwa fibumbwa fya mupashi ukwaba ngo mukashi.

6. Ni mu nshila nshi ukuteyanya kwa kwa Lesa ukwa ku muulu kwabelele ing’umba pa nshita ntali?

⁶ Apo twaishiba ifi fyebo, twatendeka ukumona ubucindami bwine bwine ubwa kwa Esaya 54:1. Pa numa ya kube ng’umba pa myaka iingi, Sara afyele Isaki ilyo ali ne myaka 90. E fyo no kuteyanya kwa kwa Yehova ukwa ku muulu kwali ing’umba pa nshita ntali. Ku numa sana mu Edene, Yehova alaile ukuti “umwanakashi” wakwe akakwata “ubufyashi.” (Ukutendeka 3:15) Ilyo papitile imyaka ukucila 2,000, Yehova acitile cipingo cakwe na Abrahamu pa Bufyashi bwalailwe. Lelo “umwanakashi” wa kwa Lesa uwa ku muulu ali no kupembelela imyaka iingi nga nshi ku ntanshi ukwabulo kukwata bulya Bufyashi. Lelo, inshita yalifikile ilyo abana ba uyu “mwanakashi” uwali “ing’umba” kale baishilefula ukucila balya ba kwa Israele wa cifyalilwa. Umulumbe wa mwanakashi ing’umba utwafwa ukwishiba ico bamalaika balefwaila nga nshi ukumona ukwisa kwa bulya Bufyashi bwasobelwe. (1 Petro 1:12) Ni lilali lintu ico casukile cacitika?

7. Ni lilali “Yerusalemu wa mu muulu” akwete inshita ya kusekelela, nga filya casobelwe pali Esaya 54:1, kabili mulandu nshi mwayasukile fyo?

⁷ Cine cine ukufyalwa kwa kwa Yesu nga kanya mu buntunse kwali ni nshita ya kusekelela kuli bamalaika. (Luka 2:9-14) Lelo ici te co Esaya 54:1 yasobele. Ni lintu fye Yesu afyelwe ku mupashi wa mushilo mu 29 C.E. e lyo abele umwana wa ku mupashi uwa kwa “Yerusalemu wa mu muulu,” uo Lesa umwine asosele apabuuta ukuti “Mwana” wakwe “uwatemwikwa.” (Marko 1:10, 11; abaHebere 1:5; 5:4, 5) Ni pali iyo nshita e lyo “umwanakashi” wa kwa Lesa uwa ku muulu akwete inshita ya kusekelela, ku kufishapo Esaya 54:1. Na ku kulekelesha asukile afyala Mesia, Ubufyashi bwalailwe! Ubuumba bwakwe ubwa pa nshita ntali nomba bwalipwile.