Ukubomfya Bwino Amepusho

AMEPUSHO yalafwa bakomfwa wenu ukuisansha mu fyo mulelanda pantu yakabila ukuti baasuke mwi shiwi atemwa mu mutima. Amepusho kuti yamwafwa ukutampa ukulanshanya no kuipakisha kwene. Pa kuba kalanda kabili kasambilisha, kuti mwabomfya amepusho ku kubalamuna icilaka ca kumfwa mu muntu, ukumwafwa ukupelulula pa mulandu mulelandapo, nelyo ukulundako ukukomaila pa co mulesosa. Nga mwabomfya bwino amepusho, mukalenga bambi ukulatontonkanya ilyo balekutika ukucila ukulakutika fye. Mufwile ukuba no buyo, na pa kwipusha amepusho lekeni yamwafwe ukufika kuli ubo buyo.

Pa Kutendeka Ifishinka Fyacindama. Ilyo mulelanda kwi bumba nelyo mulelanshanya no muntu umo, esheni ukwipusha amepusho ku kutwala ku fishinka fyacindama. Shininkisheni ukuti amepusho yenu yalimo ifintu ifyo ibumba lyenu lingafwaisha ukumfwa. Kuti mwaipusha na mepusho ayabalamuna fye ukutontonkanya pantu ifyasuko te fintu fyayeba. Nga mwapeemwinako pa numa ya kwipusha icipusho, ibumba likakutikisha sana ku fyo muli no kukonkeshapo ukusosa.

Pa nshita imo, kasesema Mika aipwishe amepusho yafulilako. Pa numa ya kwipusha ifyo Lesa enekela abamupepa ukucita, uyu kasesema aipwishe amepusho yambi yane, yonse yene ayengasukwa. Ayo mepusho yonse yateyanya bakabelenga ukumona icasuko ca mano ico alandile pa kusondwelela fintu alelanda. (Mika 6:6-8) Bushe kuti mwaeshako ukucita ifyapalako ilyo mulesambilisha? Mukeshe.

Ku Kupelulula pa Mulandu Mulelandapo. Amepusho kuti yaipushiwa ku kwafwa bambi ukukonka bwino imipelulwile yenu pali uyo mulandu. E fyo Yehova acitile ilyo alebilisha ubukombe bwakakala ku bena Israele, nga fintu calangililwa pali Malaki 1:2-10. Intanshi abebele ati: “Nalimutemwa.” Balifililwe ukutesekesha uko kutemwa, e ico abepwishe ati: “Bushe Esau tali munyina Yakobo?” Lyene Yehova alandile pa fyo Edomu aba amapopa no kutila e bushininkisho bwa kuti Lesa tatemenwe lulya luko pa mulandu wa bubifi bwabo. Akonkeshepo ifilangililo no kubikamo amepusho ku kukomaila pa fyo abena Israele bafililwe ukwankula bwino ku kutemwa kwakwe. Aipwishe amepusho yamo ayali kwati bashimapepo babulwa ubusumino e baleipusha. Yambi yali mepusho yantu Yehova umwine aipwishe bashimapepo. Uku kulanshanya kulafika pa mutima no kulenga tupooseko amano; tapali uwingapaasha iyi mipelulwile; ubukombe na bo tabwingalabwa.

E fyo na bakalanda bamo babomfya bwino amepusho. Nangu ca kuti abali mwi bumba tabenekelwa ukwasuka, balaisanshamo kwati na bo balelanshanyako.

Ku Kukomailapo. Amepusho kuti yabomba na ku kukomaila pa fyebo fimo. E fyo umutumwa Paulo acitile nga fintu calembwa pa Abena Roma 8:31, 32 aciti: “Lesa nga aba mwina mwesu, nani engapinkana na ifwe? Uyo ushaciikile Mwane wine, lelo amupooseele ifwe bonse, bushe akaleka shani ukutupeelo bupe ifintu fyonse pamo nankwe?” Moneni ukuti muli fyonse ifi, icipusho cilelunda pa cibalilepo.

Pa numa ya kulemba ubupingushi bwa kwa Yehova pa mfumu ya Babele, kasesema Esaya akonkeshepo amashiwi yalelanga ukuti alishininkishe nga nshi. Atile: “Apo Yehova wa milalo napanda amano, nani uwingayafubalisha? Ukuboko kwakwe ukwatambikwa, nani uwingakubwesha?” (Esa. 14:27) Ukumfwa fye ifyo amepusho ya musango yo yasoswa kulanga ukuti icasoswa cintu cashininkishiwa. Takuli icasuko cileenekelwa.

Ku Kusansalika Ukutontonkanya Kwalubana. Amepusho aya kuti mwabala mwalingulula e yabomba bwino sana ku kusansalika ukutontonkanya kwalubana. Ilyo Yesu ashilaposha umuntu umo ifi, aipwishe abaFarise ne ncenshi sha Mafunde ati: “Bushe casuminishiwa ukuposha pe sabata, nalimo iyo?” Pa numa ya kuposha uyo muntu, aipwishe icipusho na cimbi ati: “Nani pali imwe uukawilwe mpunda atemwa ing’ombe mu cilindi, no kukanaikula aifumyemo pa bushiku bwe sabata?” (Luka 14:1-6) Taleenekela ukuti baasuke, no kwasuka tabayaswike. Aya mepusho yasansalike ukutontonkanya kwabo ukwalubana.

Inshita shimo, na Bena Kristu ba cine kuti baba na matontonkanyo yalubana. Bamo mu Korinti mu mwanda wa myaka uwa kubalilapo baletwala bamunyinabo ku filye pa kwesha ukupwisha amafya ayo balingile ukupwisha pa kati ka bene na bene. Bushe umutumwa Paulo abombelepo shani pali uyu mulandu? Aipwishe amepusho ya kulungatika ku kwalula imitontonkanishishe yabo.—1 Kor. 6:1-8.