³ Kanshi nga tulefwaya ukwikalilila mu kutemwa kwa kwa Lesa, tufwile ukusala ifibusa ifingalenga twaba ne mibele iisuma. Kuti twasala shani? Ico tacafishe, kutemwa fye abo Lesa atemwa, e kutila ukupanga bucibusa ne fibusa fyakwe. Tontonkanyenipo. Fibusa nshi ifingacilapo ukuwama ukucila pali balya abakwata imibele iyo Yehova afwaya, kabili ababa ifibusa fyakwe? Lekeni nomba tumone abantu abo Lesa atemwa. Nga twaishiba abo Yehova atemwa, e lyo twingasala bwino abengaba ifibusa fyesu.

ABO LESA ATEMWA

4. Mulandu nshi uo Yehova akwatila insambu isha kukanasala fye icisalesale abengaba ifibusa fyakwe, kabili mulandu nshi Yehova aitile Abrahamu ukuti “cibusa wandi”?

⁴ Yehova tasala fye icisalesale abengaba ifibusa fyakwe. Na kuba e fyo cifwile fye ukuba! Yehova ni Shikulu Mulopwe, e mwine wa fintu fyonse, kabili ukuba cibusa wakwe lishuko ilikalamba nga nshi. Ni bani kanshi abo asala ukuti babe ifibusa fyakwe? Yehova apalama ku bantu abamutetekela kabili abamucetekela muli fyonse. Natulande pali Abrahamu uwatetekele Lesa nga nshi. Ukulanda fye icishinka, ukweba umufyashi ukuti epaye umwana wakwe no kumutuula ilambo kuti bwaba bwesho ubukalamba nga nshi ubwa kwesha icitetekelo cakwe.b Lelo, Abrahamu ena “apene atuule Isaki ilambo,” pantu alitetekele nga nshi “ukuti Lesa ali na maka ya kumwimya ku bafwa.” (AbaHebere 11:17-19) Pa mulandu wa kuti Abrahamu alikwete icitetekelo ca musango yo kabili ali ne cumfwila, Yehova amwitile ati “cibusa wandi.”—Esaya 41:8; Yakobo 2:21-23.

5. Bushe Yehova amona shani abamumfwila lyonse?

⁵ Yehova amona ukuti icumfwila calicindama sana. Lesa atemwa abantu abaitemenwa fye ukumumfwila muli fyonse. (Belengeni 2 Samwele 22:26.) Nga fintu twasambilile mu Cipandwa 1 muli cino cine citabo, Yehova alatemwa abantu abasalapo ukumumfwila pa mulandu wa kuti balimutemwa. Amapinda 3:32 yatila, “Abalungama e baba bacibusa bakwe.” Yehova alapokelela abacita ifyo afwaya kabili alabeeta mwi “tenti” lyakwe, e kutila, alabapokelela ukuti balemupepa kabili kuti balanda nankwe mwi pepo inshita iili yonse.—Amalumbo 15:1-5.

6. Kuti twalanga shani ukuti twalitemwa Yesu, kabili Yehova amona shani abantu abatemwa Umwana wakwe?

⁶ Yehova alitemwa abantu abatemwa Yesu, Umwana wakwe uwafyalwa eka. Yesu atile: “Umuntu nga antemwa, akomfwila amashiwi yandi, na Tata akamutemwa, kabili tukesa kuli ena no kwikala nankwe.” (Yohane 14:23) Kuti twalanga shani ukuti twalitemwa Yesu? Kulaumfwila amafunde yakwe no kulabomba umulimo atupeela uwa kubila imbila nsuma no kupanga abasambi. (Mateo 28:19, 20; Yohane 14:15, 21) Na kabili, tufwile ‘ukulakonka sana mu ntampulo shakwe,’ e kutila ukulamupashanya mu milandile na mu fyo tulecita ukulingana napengapela amaka yesu nangu ca kuti tatwapwililika. (1 Petro 2:21) Yehova alomfwa bwino sana nga amona abantu abatemwa Umwana wakwe bale-esha ukupashanya Kristu.

7. Mulandu nshi cawamina ukuba ifibusa na bantu ababa ifibusa fya kwa Yehova?

⁷ Yehova afwaya abengaba ifibusa fyakwe baba ne citetekelo, icishinka, icumfwila, no kutemwa ifyo Yesu afwaya. Bonse tufwile ukuipusha ukuti: ‘Bushe iyi mibele e yo ifibusa fyandi fyakwata? Bushe ifibusa fya kwa Yehova e fibusa fyandi?’ Nacilinga ukuipusha ifi fipusho. Abantu abakwata imibele iyo Lesa akwata kabili abacincila mu kushimikila imbila nsuma iya Bufumu kuti balenga twalabapashanya, kabili kuti balenga twatwalilila ukusekesha Lesa.—Moneni amashiwi ayali mu kabokoshi akaleti “Nani Uwingaba Cibusa Musuma?”

IFYO TWINGASAMBILILAKO KU BA MU BAIBOLO

8. Cinshi mwatemwapo pali bucibusa bwali (a) pali Naomi na Ruti? (b) pa balumendo batatu abaHebere? (c) pali Paulo na Timote?

⁸ Mu Malembo mwaba abantu abengi abo twingalandapo abapaalilwe pantu balisalile bwino ifibusa. Kuti mwabelenga pali bucibusa bwali pali Naomi na nafyala Ruti, na pa balumendo batatu abaHebere abali ifibusa fya cine cine mu Babiloni, e lyo na pali Paulo na Timote. (Ruti 1:16; Daniele 3:17, 18; 1 Abena Korinti 4:17; Abena Filipi 2:20-22) Nomba, lekeni tulande pali Davidi na Yonatani abali ifibusa fya cine cine.

9, 10. Cinshi calengele ukuti Davidi na Yonatani babe ifibusa?

⁹ Baibolo itila ilyo Davidi aipeye Galyati, “umutima wa kwa Yonatani waikatene no mutima wa kwa Davidi, na Yonatani amutemenwe ngo mweo wakwe.” (1 Samwele 18:1) E fyo baishileba ifibusa ifyaikatana nga nshi nangu ca kuti balipusene sana mu myaka ya kufyalwa, kabili bucibusa bwabo bwaishilepwa fye lintu Yonatani afwile mu nkondo.c (2 Samwele 1:26) Cinshi maka maka calengele ukuti aba babili batemwane nga nshi?

¹⁰ Icalengele ukuti Davidi na Yonatani babe ifibusa fya cine cine, ni co bonse balitemenwe Lesa kabili balefwaya ukutwalilila aba cishinka kuli ena. Bonse balikwete imibele iyalelenga ukuti batemwane. Ukwabula no kutwishika, ico Yonatani atemenwe Davidi ni co ali uwashipa kabili uwacincila ilyo alwilile ishina lya kwa Yehova ukwabula umwenso. Davidi na o alicindike Yonatani pantu aletungilila ifyo Yehova apekenye kabili alibikile pa ntanshi ukufwaya kwa kwa Davidi ukucila ukwakwe. Tontonkanyeni pa cacitike ilyo Davidi aali no bulanda sana pa nshita aleikala mu matololo pa mulandu wa kutiina Imfumu yabipa Shauli, wishi wa kwa Yonatani. Yonatani alilangile ukuti aali ni cibusa wa cishinka ilyo aitemenwe “ukuya kuli Davidi . . . ku kumukoselesha ukuti atetekele sana Lesa.” (1 Samwele 23:16) Elenganyeni ifyo Davidi aumfwile ilyo cibusa wakwe uwa pa mutima aishile no kumwafwilisha e lyo no kumukoselesha!d

11. Finshi mwasambililako kuli bucibusa bwa kwa Davidi na Yonatani?

¹¹ Finshi twasambililako kuli Yonatani na Davidi? Icikalamba ico twasambililako ca kuti, icacindama sana muli bucibusa kuba ne mibele iingalenga twaba ifibusa fya kwa Lesa. Nga tuleba na bantu abasumina mu fyo na ifwe twasuminamo, ababa ne mibele iyo twakwatako, kabili abafwaya ukuba aba cishinka kuli Lesa nge fyo na ifwe tufwaya, kuti tulekoseleshanya, kuti tulekuulana e lyo no kulaumfwana sana. (Belengeni Abena Roma 1:11, 12.) Ifibusa fya musango yu ifyabika amano kuli bukapepa fyaba mu cilonganino cesu. Nomba bushe ici cilolele mu kuti bonse fye abesa ku kulongana pa Ng’anda ya Bufumu kuti ba ifibusa ifisuma? Awe, te bonse.

IFYO TWINGASALA IFIBUSA

12, 13. (a) Mulandu nshi tulingile ukusalila bwino abengaba ifibusa fyesu na mu cilonganino mwine? (b) Mafya nshi abali mu filonganino fya kubalilapo ifya Bena Kristu bakwete, kabili Paulo abasokele shani?

¹² Na mu cilonganino mwine, tufwile ukusala ifibusa ifingatwafwa ukukosha bucibusa bwesu na Lesa. Bushe ici cifwile ukutupapusha? Awe nakalya. Nga filya fine ifisabo fimo fikokola ukupya ku cimuti cimo cine, e fyo na Bena Kristu bamo bakokola ukuba bakapepa abakosa. Kanshi e calenga ukuti Abena Kristu mu filonganino fyonse bapusane mu fyo bakosa muli bukapepa. (AbaHebere 5:12–6:3) Kwena, tufwile ukutekanishisha abapya na banaka no kubalanga ukuti twalibatemwa, pantu tufwaya ukubafwa pa kuti nabo bakule muli bukapepa.—Abena Roma 14:1; 15:1.

¹³ Limo limo, kuti kwacitika fimo mu cilonganino ifingalenga ukuti tumone nampo nga kuti twatwalilila ukuba ifibusa na bantu bamo nelyo iyo. Abantu bamo kuti batendeka ukucita ifintu ifyabipa. Bambi nabo kuti batampa ukulailishanya nga nshi. Abali mu filonganino fya kubalilapo ifya Bena Kristu nabo balikwete amafya ya musango uyu. Nangu ca kuti abengi baali aba cishinka, bamo bamo balecita ifintu ifyabipa. Pa mulandu wa kuti bamo mu cilonganino ca ku Korinti tabalekonka amasambililo ya Bena Kristu, umutumwa Paulo abasokele ati: “Mwilufiwa. Ukwampana pamo na babi kulonaula imibele isuma.” (1 Abena Korinti 15:12, 33) Paulo asokele Timote ukuti na mu cilonganino mwine, kuti mwaba bamo abacita ifyabipa. Amwebele no kuti ataluke ku bantu ba musango yu, ukukanapanga bucibusa nabo.—Belengeni 2 Timote 2:20-22.

14. Kuti twakonka shani ifyo Paulo asokele Abena Kristu ba kubalilapo pa bengaba ifibusa fyesu?

¹⁴ Kuti twakonka shani ifyo Paulo asokele Abena Kristu ba kubalilapo? Tatulingile ukuba ifibusa na bantu abengonaula imibele yesu iisuma, nampo nga baba mu cilonganino nelyo nga baba ku nse ya cilonganino. (2 Abena Tesalonika 3:6, 7, 14) Tufwile ukucingilila bucibusa bwesu na Lesa. Ibukisheni icilangililo ca butonge. Fwe bantu tulapashanya sana abanensu, ifyo baba ne fyo bacita. Filya fine tushingenekela ubutonge ubo batumpika mu muto ukoonka amenshi, e fyo tushingaba ne mibele iisuma ilyo tuleangala na bantu abacita ifyabipa.—1 Abena Korinti 5:6.

15. Kuti mwacita shani pa kusanga ifibusa ifisuma mu cilonganino?

¹⁵ Icawamako ca kuti, mu cilonganino mwaliba abantu abengi nga nshi abengaba ifibusa ifisuma. (Amalumbo 133:1) Kuti twacita shani pa kusanga ifibusa ifisuma mu cilonganino? Ilyo muleya mulekwatilako imibele iyo Lesa atemwa no kulacita ifintu ifyo atemwa, abantu abafwaya ukusekesha Lesa bakalaipalamika fye abene kuli imwe. Lelo na imwe bene, mufwile ukuitendekelako ukufwaya abengaba ifibusa fyenu. (Moneni amashiwi yali mu kabokoshi akaleti “Ifyo Twacitile pa Kuti Tukwate Ifibusa Ifisuma,”) Fwayeni abakwata imibele iyo na imwe mulefwaya ukukwata. Umfwileni ukufunda kwa mu Baibolo ukwa kuti “kusheni ukutemwa kwenu.” Kanshi mulingile ukupanga bucibusa na bakapepa banenu aba mishobo yonse nangu bafuma ku calo cimbi nangu nga ca kuti intambi shabo shalipusanako ne ntambi shenu. (2 Abena Korinti 6:13; belengeni 1 Petro 2:17.) Kabili mwila-angala fye na abo mulingene nabo imyaka. Ibukisheni ukuti Yonatani aali umukalamba nga nshi pali Davidi. Abakalamba abengi kuti balenga bucibusa bwenu bwakosa ilyo balemupandako amano na lintu balemushimikila ifyo bapitamo.