Ukucite Cisuma Kuli Bamunyina ba kwa Yesu

13, 14. (a) Ukulingana no mulumbe wa kwa Yesu uwa mpaanga ne mbushi, ni pi pashintilila ipusukilo lya mpaanga? (b) Muli ino nshita ya ku mpela, ni shani impaanga shimbi bacita icisuma kuli bamunyina Kristu?

¹³ Yesu akomaile pali bucibusa bwa pa mutima ubwaba pa mpaanga shimbi no mukuni unono mu mulumbe wakwe uwa mpaanga ne mbushi, uwaba na mu kusesema kwakwe ukwa pa “kupwa kwa pano isonde.” Muli ulya mulumbe, Kristu alangile apabuuta ukuti ipusukilo lya mpaanga shimbi lyalikuma nga nshi ku fyo bacita ku basubwa, abo aitile ati, “bamunyinane.” Atile: “Imfumu ikeba aba ku kulyo kwa iko, ikatila, Iseni, mwe bapaalwa ba kwa Tata, kwateni ubufumu ubwateyanishiwe imwe ukufuma pa kulengwa kwa pano isonde. . . . Ndemwebe cine cine, nati, apo ponse mwacitiile umo wa muli aba bamunyinane abacepesha, mwacitiile ine.”—Mateo 24:3; 25:31-34, 40.

¹⁴ Amashiwi ya kuti “apo ponse mwacitiile” yalosha ku milimo ya kutemwa iya kutungilila bamunyina Kristu abafyalwa ku mupashi, abo icalo ca kwa Satana cimona kwati beni, no kupoosa fye bamo pali bene mu cifungo. Balakabila ifya kulya, ifya kufwala fyalinga, no kusakamanwa mu kulwala. (Mateo 25:35, 36, utulembo twa pe samba, NW) Muli ino nshita ya ku mpela, ukutula mu 1914, abasubwa abengi baliponenwa ne fi fintu. Ifyacitikila Inte sha kwa Yehova muno nshiku e fishinina ukuti balyafwiwa ku banabo ba busumino, aba mu mpaanga shimbi, ukulingana ne fyo umupashi wabalengele ukucita.

15, 16. (a) Ni mu mulimo nshi maka maka impaanga shimbi bayafwa bamunyina Kristu pe sonde abasubwa? (b) Bushe abasubwa batasha shani impaanga shimbi?

¹⁵ Bamunyina basubwa aba kwa Kristu muli ino nshita ya ku mpela balyafwiwa nga nshi ukufuma ku mpaanga shimbi mu kubomba umulimo Lesa atupeela uwa ‘kushimikila imbila nsuma iyi ya bufumu ku fyalo fyonse ku kubo bunte ku nko shonse.’ (Mateo 24:14; Yohane 14:12) Nangula impendwa ya basubwa pe sonde iya ilecepelako fye mu kupita kwa myaka, impendwa ya mpaanga shimbi yena yalikula ica kuti ifikile na ku mamilioni. Amakana na makana pali aba balibomba bukabila bwa mbila nsuma mu mulimo wa nshita yonse, e kutila bupainiya na bumishonari, ukusalanganya imbila nsuma ya Bufumu ukufika ku “mpela ya pano nse.” (Imilimo 1:8) Bambi balabomba umulimo wa kushimikila ukufika apo bengapesha kabili balatemwa ukutungilila uyu mulimo wacindama mu fya ndalama.

¹⁶ Ala bamunyina Kristu abasubwa balatasha nga nshi pali uku kutungilila kwa bucishinka ukufuma ku banabo, impaanga shimbi! Ifyo bomfwa pali ici fyalembelwe bwino nga nshi mu citabo ca kuti Umutende wa mu Kusalala kwa Calo pe Samba lya kwa “Cilolo wa Mutende,” icapekanishiwe ne bumba lya musha mu 1986. Cisosa aciti: “Ukutula pa Nkondo ya Calo iya II, ukufikilishiwa kwa kusesema kwa kwa Yesu ukwa ‘kusondwelela kwa micitile ya fintu’ kuli maka maka pa mulandu wa mulimo uo “ibumba likalamba” ilya “mpaanga shimbi” babomba. . . . E ico, tuletasha nga nshi, kwi “bumba likalamba” mu fyalo fyonse, mu ndimi ishingi pa mulimo ukalamba babomba mu kufikilisha ukusesema kwa kwa [Yesu] ukwa pali Mateo 24:14!”

Abaikatana mu Mupashi pa Cibukisho

19. Cinshi “umupashi wa cine” wacitila abasubwa na banabo impaanga shimbi, kabili ni shani bakacilapo ukwikatana pa March 28 icungulo bushiku?

¹⁹ Mwi pepo lyakwe ilya kulekelesha pa Nisani 14 ubushiku, mu 33 C.E., Yesu atile: “[Ndelomba] . . . ukuti bonse babe bamo; ifyo imwe, mwe Tata, mwaba muli ine na ine muli imwe, e fyo na abo babe muli ifwe: ukuleka aba pano isonde batetekele ukuti ni mwe mwantumine.” (Yohane 17:20, 21) Pa mulandu wa kutemwa, Lesa atumine Umwana wakwe ukwisapeela ubumi bwakwe ukuti abasubwa e lyo na bantunse bonse aba cumfwila bamone ipusukilo. (1 Yohane 2:2) “Umupashi wa cine” walikatanya bamunyina Kristu na banabo impaanga shimbi. Pa March 28, pa numa ya kuwa kwa kasuba, aba muli aya mabumba yabili bakalongana ku kwibukishe mfwa ya kwa Kristu no kwibukisha fyonse ifyo Yehova abacitila mwi lambo lya Mwana wakwe uwatemwikwa, Kristu Yesu. Shi ukusangwapo kwabo kukakoshe ukwikatana kwabo no kubuukulula umupampamina wabo uwa kutwalilila ukucito kufwaya kwa kwa Lesa, no kuleka bakashinine ukuti balasekelela pa kuba pa bantu abo Yehova atemwa.