Te Kwesha ‘Ukuwa no Kupashanya Balya Ababulilwe Icumfwila’

6. Ni bani abo tushifwile ukupashanya, kabili finshi twingasambilila kuli bena?

⁶ Lesa alilondolwele bwino bwino ubufwayo bwakwe kuli Adamu na Efa, lelo tabamumfwilile. Pa numa, kwaishileba na bambi abengi nga nshi abakeene ukumfwila Lesa. No luko lwa bena Israele, abali abantu ba kwa Lesa, nabo balikeene ukumumfwila. E mulandu wine Paulo asokele Abena Kristu ba kubalilapo ukuti na pali bena kuti paba abengakaana ukumfwila Lesa nga filya Abena Israele bacitile. Alembele ukuti: “E ico tuibikilisheko ukwingila muli uko kutuusha, epali umo awa no kupashanya balya ababulilwe icumfwila.” (Heb. 4:11) Moneni ukuti Paulo atile ukubulwa icumfwila kwali no kulenga bafilwa ukwingila mu kutuusha kwa kwa Lesa. Bushe ico calola mwi? Bushe cilolele mu kuti nga twakaana ukutungilila ubufwayo bwa kwa Lesa, te kuti twingile mu kutuusha kwakwe? Icasuko kuli ici cipusho nacicindama sana kabili twalacilandapo na kabili. Lelo natubale tulande pa fyabipa ifyacitile abena Israele pa kuti tusambilileko na fimbi pa lwa kwingila mu kutuusha kwa kwa Lesa.

“Tabakengile mu Kutuusha Kwandi”

7. Cinshi Yehova alefwaya ilyo afumishe abena Israele mu buusha mu Egupti, kabili cinshi balingile ukucita?

⁷ Mu 1513 B.C.E., Yehova alyebele umubomfi wakwe Mose ubufwayo bwakwe ubwakumine abena Israele. Lesa atile: “Ndeya ku kubapokolola mu minwe ya bena Egupti no kubafumya muli cilya calo [Egupti] no kubatwala ku calo icisuma kabili icapabuka, icalo umwaba umukaka no buci.” (Ukufu. 3:8) Nga filya fine Yehova alaile Abrahamu icikolwe cabo, ico afumiishe abena Israele “mu minwe ya bena Egupti” ni co alefwaya babe abantu bakwe. (Ukute. 22:17) Lesa apeele abena Israele amafunde ayali no kulenga baba ifibusa fyakwe. (Esa. 48:17, 18) Aebele abena Israele ukuti: “Nga mwakulaumfwa kwi shiwi lyandi kabili nga mwakulasunga icipangano candi [nga fintu Amafunde yalandile], e lyo mukaba nge cipe candi ica mutengo pa bantu na bantu bonse, pantu isonde lyonse lyandi.” (Ukufu. 19:5, 6) Kanshi pa kuti abena Israele babe ifibusa fya kwa Lesa, balingile ukulaumfwila ishiwi lyakwe.

8. Bushe ubumi bwa bena Israele bwali no kuba shani ababa ne cumfwila kuli Lesa?

⁸ Tontonkanyeni ifyo ubumi bwa bena Israele bwali no kuba abomfwila ishiwi lya kwa Lesa! Yehova nga alipaalile amabala yabo yonse kumo na ya myangashi, ifitekwa fyabo, e lyo ne mikuni yabo. Abalwani babo nga tabatwalilile ukubacusha. (Belengeni 1 Ishamfumu 10:23-27.) Na lintu Mesia aishile, ababa ne cumfwila nga tabaletekwa ne nko shimbi pamo nga ubuteko bwa bena Roma ubwatekele inko ishingi. Israele ali no kuba uluko ulusuma ulo inko shimbi shali no kusambililako no kumona ukuti ukumfwila Lesa wa cine kwali no kulenga shapaalwa.

9, 10. (a) Mulandu nshi cabipile sana ku bena Israele ukufwaya ukubwelela ku Egupti? (b) Bushe ukubwelela ku Egupti kwali no kukuma shani ukupepa kwa bena Israele?

⁹ Abena Israele balikwete ishuko ilikalamba sana ilya kubombela pamo na Yehova mu kufikilisha ubufwayo bwakwe. Kabili ici cali no kuleta amapaalo kuli bena na mu kuya kwa nshita indupwa shonse pano calo shali no kupaalwa! (Ukute. 22:18) Lelo lulya luko lonse lwalipondweke kabili talwafwaile ukuba uluko lwa kwa Yehova no kuba ica kumwenako icisuma ku nko shimbi. Lwafwaile no kubwelelamo ku Egupti! (Belengeni Impendwa 14:2-4.) Lelo bushe ababwelela ku Egupti nga batungilile shani ubufwayo bwa kwa Lesa no kulenga inko shimbi ukusambililako kuli bena? Ico nga tacacitike. Na kuba, abena Israele ababwelelamo ku babatekele mu busha, nga tabalekonka na Mafunde ya kwa Mose, kabili nga tabanonkelemo mu fyo Yehova ateyenye pa kuti imembu shabo shile-elelwa. Ico nga calangile ukuti babikile fye amano ku fyabo, te ku bufwayo bwa kwa Lesa. E mulandu wine Yehova alandile pali aba bacipondoka ukuti: “Nalikalipe pali iyi nkulo kabili natile, ‘Balaluba lyonse mu mitima yabo, ne mibele yandi tabaishiba.’ Na ine e pa kulapa mu bukali bwandi nati, ‘Tabakengile mu kutuusha kwandi.’”—Heb. 3:10, 11; Amalu. 95:10, 11.

¹⁰ Ilyo lulya luko lwa bacipondoka lwafwaile ukubwelela ku Egupti, lwalangile fye ukuti talwacindike amapaalo ya kwa Lesa ayo lwapokelele, lelo lwabikile amano kuli liiki na kanyense na galiki ifyali mu Egupti. (Impe. 11:5) Bali nga Esau uwakabwile ububeli bwakwe ne mbale imo iya fya kulya.—Ukute. 25:30-32; Heb. 12:16.

11. Bushe ukubulwa icishinka ukwa bena Israele aba mu nshiku sha kwa Mose kwakumine shani ubufwayo bwa kwa Lesa?

¹¹ Nangu ca kutila abena Israele abafumine mu Egupti tabakwete icitetekelo, Yehova alitwalilile ukubomba pa kuti afikilishe ubufwayo bwakwe, kabili atendeke ukubika amano ku nkulo yakonkelepo. Aba muli ilya inkulo ipya bali ne cumfwila ukucila ifikolwe fyabo. Baingile mu Calo ca Bulayo no kutendeka ukucimfya ukulingana ne fyo Yehova abebele. Pali Yoshua 24:31 patila: “Israele atwalilile ukubombela Yehova mu nshiku shonse isha kwa Yoshua na mu nshiku shonse isha bakalamba abashele aba mweo ilyo Yoshua afwile kabili abaishibe umulimo onse uwa kwa Yehova uo abombeele Israele.”

12. Twaishiba shani ukuti na pali lelo abantu kuti baingile mu kutuusha kwa kwa Lesa?

¹² Na lyo line, aba muli ilya inkulo abali ne cishinka balipwile ukufwa kabili paishile inkulo imbi “iishaishibe Yehova nelyo imilimo iyo acitiile Israele.” E ico “abana ba kwa Israele batendeke ukucita ifyabipa mu menso ya kwa Yehova no kulabombela baBaali.” (Abapi. 2:10, 11) Nangu ca kuti bali mu Calo ca Bulayo, ‘tabaingile mu kutuusha.’ Pa mulandu wa kukanaba ne cumfwila, tabatwalilile ukuba pa mutende na Lesa. Paulo alilandilepo pali ici ilyo alembele ukuti: “Yoshua nga alibengishe [abena Israele] mu kutuusha, Lesa nga talandile na kabili pa bushiku bumbi. E ico kanshi kucili isabata lya kutuushamo ku bantu ba kwa Lesa.” (Heb. 4:8, 9) “Abantu ba kwa Lesa” abo Paulo alelandapo bali bena Kristu. Bushe ico cilolele mu kuti Abena Kristu baali no kwingila mu kutuusha kwa kwa Lesa? Ukwabula no kutwishika, Abena Kristu bonse, abaYuda na bena Fyalo, baali no kwingila muli uku kutuusha!

Bamo Balafilwa Ukwingila mu Kutuusha kwa kwa Lesa

13, 14. (a) Mu nshiku sha kwa Mose, cinshi abena Israele balingile ukucita pa kwingila mu kutuusha kwa kwa Lesa? (b) Mu nshiku sha batumwa, cinshi Abena Kristu balingile ukucita pa kwingila mu kutuusha kwa kwa Lesa?

¹³ Ilyo Paulo alembeele Abena Kristu abaHebere, alisakamene pantu bamo pali bena tabaletungilila ubufwayo bwa kwa Lesa ubwalesokololwa. (Belengeni AbaHebere 4:1.) Cinshi cilanga ifyo? Balitwalilile ukukonka Amafunde ya kwa Mose. Pa myaka nalimo 1,500, umwina Israele onse uwalefwaya ukutungilila ubufwayo bwa kwa Lesa alingile ukulakonka Amafunde ya kwa Mose. Lelo ilyo Yesu afwile, Lesa alifumishepo yalya Mafunde. Abena Kristu bamo balifililwe ukukonka ico, kabili bapampamine fye pa kulakonka fimo ifyali mu Mafunde.b

¹⁴ Paulo aebele balya Abena Kristu abakonkenyepo ukukonka Amafunde ya kwa Mose ukuti, bushimapepo bwa kwa Yesu, icipangano cipya, ne tempele lya mampalanya, fyaliweme sana ukucila ifyaliko mu nshita ya bena Israele. (Heb. 7:26-28; 8:7-10; 9:11, 12) E ico Paulo afwile aletontonkanya pe Funda lya kusunga Isabata cila mulungu ilyo alembele pa fyo cacindama ukwingila mu bushiku bwa kwa Yehova ubwa kutuusha. Atile: “Kanshi kucili isabata lya kutuushamo ku bantu ba kwa Lesa. Pantu umuntu uwaingila mu kutuusha kwa kwa Lesa, ninshi atuusha na ku milimo yakwe, filya fine na Lesa atuushishe ku milimo yakwe.” (He 4:8-10) Balya Abena Kristu abaHebere balingile ukuleka ukutontonkanya ukutila Yehova ali no kulabapaala nga balecita ifyali mu Mafunde ya kwa Mose. Ukutula pa Pentekoste ya mu 33 C.E., Lesa atendeke ukupaala abakwete icitetekelo muli Yesu Kristu.

15. Mulandu nshi tufwile ukubela ne cumfwila pa kwingila mu kutuusha kwa kwa Lesa?

¹⁵ Cinshi calengele abena Israele mu nshiku sha kwa Mose ukukanaingila mu Calo ca Bulayo? Kubulwa icumfwila. Cinshi calengele Abena Kristu bamo mu nshiku sha kwa Paulo ukukanaingila mu kutuusha kwa kwa Lesa? Nabo bene kubulwa icumfwila. Balifililwe ukusumina ukuti ico Lesa abapeelele Amafunde ya kwa Mose califikilishiwe no kuti Yehova nomba taletungulula abantu bakwe ukupitila muli yalya Mafunde.

Ifyo Twingengila mu Kutuusha kwa kwa Lesa Pali Lelo

16, 17. (a) Bushe kuti twaingila shani mu kutuusha kwa kwa Lesa? (b) Cinshi tukalandapo mu cipande cikonkelepo?

¹⁶ Tapali nangu umo pali ifwe uwasumina ukuti Abena Kristu pali lelo balingile ukulakonka ifyaba mu Mafunde ya kwa Mose pa kuti bakapusuke. Paulo alilondolwele bwino ici ilyo alembeele abena Efese Ukuti: “Pantu ni kuli ci cikuuku ca kwa Lesa ico mwatetekela e ko mwapusukila; kabili ici tacafuma kuli imwe, bupe fye bwa kwa Lesa. Tacafuma mu milimo iyo, pa kuti umuntu nangu umo eba na pa kuitakishisha.” (Efes. 2:8, 9) Nomba ninshi Abena Kristu bengila shani mu kutuusha kwa kwa Lesa? Yehova alengele ubushiku bwalenga 7 ukuba ubwaibela pa kuti akafikilishemo bwino bwino ubufwayo bwakwe kwi sonde. Kuti twaingila mu kutuusha kwa kwa Yehova, nga ca kutila tuletungilila ubufwayo bwakwe no kumfwila ifyo atweba ukupitila mu kuteyanya kwakwe.

¹⁷ Lelo nga twakaana ukulakonka ifya mu Baibolo ifyo umusha wa cishinka kabili uwashilimuka atufunda, no kulakonka fye ifyo fwe bene tulefwaya, ninshi tatuletungilila ubufwayo bwa kwa Lesa ubuya bulefikilishiwa. Ici kuti calenga bucibusa bwesu na Yehova ukupwa. Mu cipande cikonkelepo, tukalanda pa fintu fimo ifitupeela ishuko lya kulanga ukuti tulomfwila Lesa. Ifyo tusala ukucita pali ifi fintu e fikalanga nga twalingila mu kutuusha kwa kwa Lesa.

Bushe Mwalingila mu Kutuusha kwa kwa Lesa?

“Icebo ca kwa Lesa ca mweo kabili ca maka.”—Heb. 4:12.

1. Kuti twaingila shani mu kutuusha kwa kwa Lesa kabili mulandu nshi ici cishangukila?

MU CIPANDE cafumineko twasambilile ukutila, kuti twaingila mu kutuusha kwa kwa Lesa nga tulemumfwila no kutungilila ukufwaya kwakwe. Limo tacanguka ukucita ici. Ku ca kumwenako, ilyo twaishiba ukuti Yehova alipata ifintu fimo ifyo twatemwa ukucita, ilingi line tatuleka ukucita ico. Ica musango uyu nga cacitika, tufwile ukuitemenwa ukuba ne “cumfwila.” (Yako. 3:17) Muli cino cipande, twalasambilila ifintu fimo umo twingalanga nga tulatungilila ubufwayo bwa kwa Lesa no kumumfwila ukufuma pa nshi ya mutima.

2, 3. Finshi tufwile ukutwalilila ukucita nga tulefwaya Yehova aletupaala?

² Bushe mulomfwila nga bamufundako fimo ukufuma mu Baibolo? Amalembo yatila Lesa afwaya ukulonganika “ifisuma ifya mu nko shonse.” (Hag. 2:7) Kwena fwe bengi ilyo tatulasambilila icine, twalecita ifyabipa. Lelo, ukutemwa Lesa no Mwana wakwe e kwalengele twaluke sana mu kutontonkanya na mu fyo tucita pa kuti tuletemuna sana Lesa. Na mu kulekelesha, pa numa ya kupepa sana no kubombesha pa kuti twaluke, ubushiku bwalifikile ilyo twaipeele fwe bene no kubatishiwa pa kuti tube Abena Kristu.—Belengeni Abena Kolose 1:9, 10.

³ Lelo tacipilibula ukuti nga twabatishiwa ninshi te kuti tutunkwe ukucita ifyabipa. Apo tatwapwililika, itunko lya kucita ifyabipa lyena lyakulaisa. Lelo twalicetekela ukuti nga twatwalilila ukulwisha ukuti tulecita icalungama no kufwaya Lesa ukututemwa, Yehova akulatupaala.

Ilyo Batufunda Tufwile Ukwaluka

4. Ni mu nshila nshi shitatu umo tupokelela ukufunda kwa mu Malembo?

⁴ Pa kuti tuleke ukucita ifyabipa, tulingile intanshi ukufishiba. Ukukutika ku lyashi pa Ng’anda ya Bufumu ililelanda pa fikumine imibele yesu nelyo ukubelenga icipande mu mpapulo shesu kuti kwatwafwa ukwishiba ifilubo tucita. Lelo nga tatumfwile icishinka calandwapo mu lyashi nelyo nga twafilwa ukukonka ukufunda ukuli mu mpapulo, Yehova kuti abomfya Umwina Kristu munensu ku kutweba ifilubo fyesu.—Belengeni Abena Galatia 6:1.

5. Landeniko fimo ifishawama ifyo limo twingacita nga batufunda, kabili londololeni ico bakacema Abena Kristu balingile ukutwalilila ukutufunda.

⁵ Tacanguka ukumfwila ilyo umuntu ushapwililika atufunda, nangu engatufunda bwino shani no kutulanga ukutemwa. Lelo, nga fintu ilembo lya Abena Galatia 6:1 lilanda, Yehova alyeba bonse abafikapo mu buKristu ‘ukwesha’ ukulungika bambi no “mutima uwafuuka.” Nga tuleumfwila ifyo batufunda, Lesa akatutemwa. Ilyo tulepepa, tulamweba Lesa ukuti tatwapwilika. Lelo nga muntu umbi uwatweba pa filubo fyesu, tulaipokolola no kufwaya cimoneke kwati tapali ubwafya ubukulu. Limo tulatwishika ne co umuntu atufundila kabili tulailishanya pa nshila atufundilamo. (2 Isha. 5:11) Kabili nga ca kuti abaletufunda balanda pa fintu ifyo tushingatemwa bambi ukulandapo, pamo nga ificitile uwa mu lupwa lwesu, imifwalile ne misakwile yesu, ubusaka, nangu pa fyo twatemwa ukutamba ifyo Yehova apata, limo kuti twakalipa, twalanda ne fya kuti fyaletela uuletufunda ubulanda e lyo na fwe bene! Lelo nga papita inshita twatontonkanyapo, tusanga ukuti caciba fye bwino ukutufunda.

6. Bushe Icebo ca kwa Lesa cisokolola shani “amatontonkanyo na mapange ya mutima”?

⁶ Ilembo apashimpilwe cino cipande liletwibukishako ukuti icebo ca kwa Lesa “ca maka.” Ca cine icebo ca kwa Lesa calikwata amaka ya kwalula abantu. Cilatwafwa ukwaluka pa numa ya kubatishiwa nga filya fine citwafwa ilyo tushilabatishiwa. Muli kalata Paulo alembeele abaHebere, alandile no kuti icebo ca kwa Lesa “cilapulinkanya ica kuti calekanya ifyo umuntu aba ne fyaba mu mutima wakwe, cilekanya na pasuntikanina amafupa no bufyompo, kabili cileshiba amatontonkanyo na mapange ya mutima.” (Heb. 4:12) Ico Paulo alelandapo ca kuti, ilyo twaumfwikisha ico Lesa afwaya ifwe ukucita, ifyo tucita pa fyo twaumfwa e filanga ifyaba mu mutima wesu. Bushe limo palaba ubupusano pa fyo tumoneka ukuti e fyo twaba na pa fyaba mu mutima wesu? (Belengeni Mateo 23:27, 28.) Tontonkanyeni pa fyo mwingacita pali ifi twalalandapo.

Mulekonka Ifyo Ukuteyanya kwa kwa Yehova Kulemweba

7, 8. (a) Cinshi napamo calengele Abena Kristu abaYuda ukutwalilila ukukonka ifyali mu Mafunde ya kwa Mose? (b) Mulandu nshi twingalandila ukuti ifyo balecita tafya-ampene no bufwayo bwa kwa Yehova?

⁷ Fwe bengi kuti twalanda ku mutwe fye amashiwi yaba pa Amapinda 4:18 ayatila: “Inshila ya balungami yaba ngo lubuuto lwa lucelo uluya lulebuutilako fye ukufikila akasuba kasaama.” Ici cipilibula ukuti imibele yesu ikalawaminako mu kuya kwa nshita kabili tukalaumfwikisha no bufwayo bwa kwa Lesa.

⁸ Nga fintu twasambilile mu cipande cafumineko, pa numa ya mfwa ya kwa Yesu, abaYuda abengi Abena Kristu calibakosele ukuleka ukukonka Amafunde ya kwa Mose. (Imil. 21:20) Nangu ca kuti Paulo alibalondolwelele bwino bwino ukuti Abena Kristu balingile ukuleka ukukonka Amafunde ya kwa Mose, bamo balikeene ifyo alandile. (Kol. 2:13-15) Nalimo balemona kwati ukutwalilila ukucita fimo ifyali mu Mafunde, kwali no kulenga abantu ukukanabacusha. Te mulandu ne fyo, Paulo alilembeele Abena Kristu abaHebere no kubeba ukutila teti bengile mu kutuusha kwa kwa Lesa nga tabaletungilila ubufwayo bwa kwa Lesa ubuya bulesokoloka.a (Heb. 4:1, 2, 6; belengeni AbaHebere 4:11.) Pa kuti Yehova alebapaala, balingile ukusumina ukuti Yehova nomba alefwaya baleke ukukonka Amafunde ya kwa Mose.

9. Bushe tufwile ukumfwa shani nga kwaba ukwaluka mu fyo Amalembo yamo yalondololwa?

⁹ Muno nshiku, kulabako ukwaluka mu fyo twaishibe pa fintu fimo ifyo Baibolo isambilisha. Ici tacifwile ukulenga twaumfwa ububi, lelo cifwile ukulenga twacetekela sana umusha wa cishinka kabili uwashilimuka. Ilyo abeminishi ba “musha wa cishinka” baishiba ukuti tulekabila ukwaluka mu fya mu Baibolo fimo ifyo twasuminamo, balatulondolwela uko kwaluka. Umusha wa cishinka afwaya ukutungilila ubufwayo bwa kwa Lesa ubuya bulesokoloka, tatiina ifyo bambi bengasuusha ilyo baumfwa uko kwaluka. Bushe mucita shani ilyo mwaumfwa ukwaluka mu fyo Amalembo yalondololwa?—Belengeni Luka 5:39.

10, 11. Finshi twingasambililako ku fyacitile bamo ilyo baebelwe ukutendeka ukubomfya inshila shimbi isha kushimikilamo abantu imbila nsuma?

¹⁰ Natulande pa ca kumwenako na cimbi. Ku kupwa kwa myaka yaba 1800 na ku kutendeka kwa ba 1900, Abasambi ba Baibolo bamo abalelanda bwino sana amalyashi ya ku cintubwingi balemona kwati ukulanda amalyashi ayo balepekanya bwino sana, e nshila fye bali no kushimikilamo bwino imbila nsuma ku balekutika amalyashi yabo. Baleumfwa bwino ukulanda amalyashi ku cintubwingi kabili bamo baletemwa sana nga babatasha. Mu kuya kwa nshita calishibikwe ukuti Yehova alefwaya abantu ukulashimikila mu nshila shalekanalekana, ukusanshako no kushimikila ku ng’anda ne ng’anda. Bamo abalelanda bwino amalyashi balikaaninine fye ukwaluka. Balemoneka kwati bali Bena Kristu bakosoka, abaipeeleshe ukubombela Shikulu. Lelo, ilyo baebelwe ukuti ukufwaya kwa kwa Lesa kwa kuti baleya mu kushimikila abantu imbila nsuma, ifyali mu mitima yabo fyalimoneke. Yehova tatemenwe pa co bacitile kabili tabapaalile. Balishiile no kuteyanya kwakwe.—Mat. 10:1-6; Imil. 5:42; 20:20.

¹¹ Lelo tatuletila abakonkele ifyo ukuteyanya kwalandile calibangukile ukulaya mu kushimikila abantu. Pa kubala, uyu mulimo walikosele ku bengi, na lyo line bali ne cumfwila. Mu kupita kwa nshita amasakamika bakwete yalipwile kabili Yehova alibapaalile icine cine. Bushe mucita shani nga bamweba ukuti mubomfyeko inshila imbi iya kushimikilamo iyo mushi-ipakisha sana? Bushe mulaitemenwa ukwaluka?

Ilyo Uwa mu Lupwa Apondokela Yehova

12, 13. (a) Cinshi Yehova atwebela ukufumya imbifi mu kati kesu? (b) Bwesho nshi abafyashi Abena Kristu bakwata, kabili cinshi cilenga ubu bwesho ukukosa?

¹² Ukwabula no kutwishika bonse twalishiba ukuti pa kuti Lesa aletupaala, tufwile ukuba abasanguluka muli fyonse. (Belengeni Tito 2:14.) Lelo kulaba ilyo cafya ukuba abasanguluka ukulingana no bufwayo bwa kwa Lesa. Tutile Abena Kristu bakosa abaupana, bakwata fye umwana umo, kabili uyo mwana ashe icine no kutamfiwa pa mulandu wa kuti asalapo “ukuipakisha ubusuma bwa pa kashita fye ubwa lubembu,” ukucila ukuba cibusa wa kwa Yehova.—Heb. 11:25.

¹³ Abafyashi baumfwa ububi icine cine! Na lyo line balishiba ukuti Baibolo yeba bakapepa ‘ukukanayampana no wa bwananyina onse nga aba uwa bulalelale nelyo uwa lunkumbwa nelyo uupepa utulubi nelyo uutukana nelyo cakolwa nelyo umupuupu, nangu ukulya nankwe.’ (1 Kor. 5:11, 13) Balishiba no kuti ishiwi lya kuti “onse” muli ili ilembo, lilesanshako na ba mu lupwa lwabo abo bashikala nabo. Nomba balitemwa sana umwana wabo! Apo balimutemwa sana, limbi kuti balamona kwati nga balekelela fye ukwampana nankwe, te kuti bamwafwe ukubwelela kuli Yehova. Kuti baleibepa ukuti nga balelanshanya nankwe sana e lyo bengamwafwa ukubwelela kuli Yehova.b

14, 15. Cinshi ico abafyashi abakwata umwana uwatamfiwa balingile ukupampaminapo ukucita?

¹⁴ Tulomfwilako abafyashi ubulanda ica musango yu nga cacitika. Pantu na kuba umwana wabo aisalilepo fye umwine ukukonkelela imibele yabipa ukucila ukutwalilila ukula-ampana na bafyashi bakwe na Bena Kristu banankwe. Abafyashi balyeseshe ukumwafwa lelo taumfwile, e mulandu wine bengomfwila ububi!

¹⁵ Lelo cinshi abafyashi bafwile ukucita? Bushe bakomfwila ifyo Yehova alanda? Nelyo bushe bakatwalilila ukwampana no mwana wabo uwatamfiwa no kulenga cilemoneka kwati cili fye bwino ukwampana nankwe pantu balanshanya ifya lupwa ificindeme sana? Ilyo balepingula ifya kucita pali uyu mulandu bafwile ukutontonkanya pa fyo Yehova aleumfwa pa fyo balecita. Yehova afwaya ukuteyanya kwakwe ukuba ukwasanguluka no kulenga uwatamfiwa ukulapila no kubwela kuli Lesa. Cinshi abafyashi bengacita pa kuti batungilile ubu bufwayo bwa kwa Lesa?

16, 17. Finshi twingasambililako ku fyacitikile Aarone?

¹⁶ Aarone ndume ya kwa Mose na o ica musango yu calicitike ku bana bakwe babili. Tontonkanyeni pa fyo aumfwile ilyo abana bakwe babili, Nadabu na Abihu baipaiwe pa mulandu wa kutuula umutuulo wa pa mulilo kuli Yehova uo bashasuminishiwe. Kuli bena, e papwilile ukubishanya na bafyashi babo. Lelo kwali na cimbi icalefwaikwa. Yehova aebele Aarone na bana bakwe bambi aba cishinka ukuti: “Mwilekelesha umushishi wenu, kabili mwilepula ifya kufwala fyenu [pa mulandu wa kuloosha] epali mwafwa no bukali bwa kwa Lesa bwaimina ulukuta lonse.” (Lebi 10:1-6) Icishinka icaumfwika bwino sana pali uyu mulandu ca kuti, tulingile ukutemwa sana Yehova ukucila aba mu lupwa lwesu abatamfiwa.

¹⁷ Pali lelo Yehova tonaula abatoba amafunde yakwe apo pene fye. Alabapeela inshita ya kulapila no kuleka ukucita ifyabipa. Lelo bushe Yehova omfwa shani nga ca kuti abafyashi batwalilila ukula-ampana na pa shilingile no mwana wabo uwatamfiwa pa mulandu wa kucita ifyabipa ukwabula ukulapila?

18, 19. Mapaalo nshi aba mu lupwa bengakwata nga ca kutila balekonka ifyo Yehova alanda pa batamfiwa?

¹⁸ Abengi abatamfiwapo balailandila abene ukuti ifyo abanabo na balupwa balecita e fyalengele ukuti balapile no kubwela mu cilonganino. Ilyo baeluda bamo basuminishe ukuti nkanshi wacaice abweshiwe, balembele ukuti ali-isangulwile, kabili cimo icalengele “ni co ndume yakwe alikonkele sana ifyo Amalembo yalanda pa batamfiwa.” Nkashi atile, alimwene ukuti alingile ukubwela mu cilonganino pa mulandu wa kuti “ndume yakwe alikonkele ifyo Amalembo yalanda.”

¹⁹ Cinshi ici catusambilisha? Twasambilila ukuti tufwile ukwesha na maka ukukanakonkelela imitima yesu no kukanasuula ifyo Amalembo yatweba. Tatufwile ukutwishika ukuti ifyo Lesa acita pa mafya yesu, e fingatwafwa fye.

“Icebo ca kwa Lesa ca Mweo”

20. Ilembo ilya AbaHebere 4:12 lilanda pa fintu nshi fibili? (Moneni futunoti.)

²⁰ Ilyo Paulo alembele ukuti “Icebo ca kwa Lesa ca Mweo,” ico alelandapo sana te Cebo ca kwa Lesa, Baibolo.c Ilyashi lilanga ukuti alelanda pa bulayo bwa kwa Lesa. Ico Paulo alelandapo ca kuti Lesa tapelela fye pa kulaya, lelo alafikilisha ico alaya. Yehova alitweba pali ici ukupitila muli kasesema Esaya. Atila: “Icebo icifuma mu kanwa kandi, tacakabwelele kuli ine ukwabula ukucita nangu cimo, lelo . . . cikafikilisha ico nacitumina.” (Esa. 55:11) E ico tufwile ukutekanya ilyo ifintu fishile-enda bwangu nga fintu tulefwaya. Yehova “acili alebomba” pantu afwaya ubufwayo bwakwe bukafikilishiwe bwino bwino.—Yoh. 5:17.

21. Bushe ilembo lya AbaHebere 4:12, likoselesha shani abakoloci ba cishinka ababa mwi “bumba likalamba”?

²¹ Abakoloci ababa mwi “bumba likalamba” balibombela Yehova pa myaka iingi sana. (Ukus. 7:9) Abengi tabale-enekala ukuti bakakotela muli cino calo cabipa. Na lyo line tabafuupulwa, balitwalilila ukuba abakosa mu kubombela Yehova. (Amalu. 92:14) Balishiba ukuti icebo ca kwa Lesa ico alaya ca mweo, kabili Yehova alebombesha ukuti akacifikilishe. Apo Lesa alicindika sana ubufwayo bwakwe, nga twabikako sana amano kuli ubu bufwayo, tukalenga akabe ne nsansa. Muli ubu bushiku bwa kutuusha ubwalenga 7, takuli icili conse icikalenga Yehova akafilwe ukufikilisha ubufwayo bwakwe, kabili alicetekela ukuti na bantu bakwe bakabutungilila. Inga imwe? Bushe imwe pa lwenu mwalingila mu kutuusha kwa kwa Lesa?

[Amafutunoti]