NGA twafwa, bushe Lesa akatemwa ukutubuusha?— Umuntu musuma Yobo asumine ukuti Lesa alatemwa ukucite co. E co ilyo Yobo amwene kwati ali mupepi no kufwa, aebele Lesa ati: ‘Nga mwaita, na ine nkaasuka.’ Yobo atile Yehova Lesa ali no kufuluka, nelyo ukufwaisha ukumubuusha.—Yobo 14:14, 15.

Yesu aba fye nga Yehova Lesa, Wishi. Yesu alitemwa ukutwafwa. Ilyo umuntu wali ne fibashi amwebele ati, “nga mwatemwa, kuti mwansangulula,” Yesu ayaswike ati: “Nintemwa.” Kabili aposeshe ulya muntu ku fibashi fyakwe.—Marko 1:40-42.

Yesu asambilile kuli Wishi ukutemwa abaice. Imiku ibili kale sana, Yehova abomfeshe ababomfi bakwe ukubuusha abaice. Eliya alombele Yehova ukubuusha umwana mwaume wa mwanakashi uwamupokelele bwino. Kabili Yehova alicitile co. Yehova abomfeshe no mubomfi wakwe Elisha ukubuusha kalume umo.—1 Ishamfumu 17:17-24; 2 Ishamfumu 4:32-37.

Bushe te cisuma ukwishiba ukuti Yehova alitutemwa sana?— Tatontonkanya fye pali ifwe ilyo tuli aba mweo. Alatwibukisha nangu twafwa. Yesu atile Wishi amona na bafwa abo atemwa kwati bali no mweo! (Luka 20:38) Baibolo itila ‘nangu ni mfwa, nangu mweo, nangu fintu ifyabapo nangu fintu ifikesabako, te kuti fibe na maka ya kutupaatululako ku kutemwa kwa kwa Lesa.’—Abena Roma 8:38, 39.

Ilyo Yesu ali pe sonde, alangile ukuti Yehova alasakamana abaice. Ibukisha ukuti Yesu alelanda na baice pali Lesa. Lelo bushe walishiba ukuti Lesa alipeela Yesu amaka ya kubuusha abaice ku bafwa?— Natulande pa nshita lintu Yesu abuushishe umwana mwanakashi wa kwa Yairo uwa myaka 12.

Yairo ekala no mukashi wakwe e lyo no mwana wabo umo mpo mupepi na Bemba wa Galili. Bushiku bumo uyu mukashana alwalisha, kabili Yairo amona ukuti alafwa. Atendeka ukutontonkanya pali Yesu, ulya muntu musuma Yairo aumfwa uwingaposha abantu. E co Yairo aya mu kumufwaya. Asanga Yesu ku mbali ya Bemba wa Galili alesambilisha abantu abengi.

Yairo apita mwi bumba lya bantu no kuwa ku makasa ya kwa Yesu. Aeba Yesu ati: ‘Akana kandi akakashana nakalwala sana. Shi iseni mukaafwe. Napaapaata iseni.’ Ilyo line, Yesu aya na Yairo. Ibumba lya bantu abeshile mu kumona Kasambilisha Mukalamba na lyo lyabakonka. Lelo ilyo baendako, abantu bamo baisa ukufuma ku ng’anda ya kwa Yairo no kumweba ati: “Umwana obe nafwa. Cinshi ico ulepamfisha kabili Kasambilisha?”

Yesu aumfwa uko aba bantu balelande pa lwa mfwa. Naishiba ubulanda Yairo akwete pa kufwilwa umwana wakwe umo mpo. E co amweba ati: ‘Witiina. Tetekela fye muli Lesa, no mwana obe alaba bwino.’ Batwalilila ukwenda mpaka basuka bafika ku ng’anda ya kwa Yairo. Pa ng’anda basanga ifibusa fya ulu lupwa balelila. Bali no bulanda pantu cibusa wabo uwacaice nafwa. Lelo Yesu abeba ati: ‘Lekeni ukulila. Umwana tafwile, aleele fye utulo.’

Ilyo Yesu alande fi, abantu batendeka ukuseka, pantu nabeshiba ukuti uyu mukashana nafwa. Cinshi uletontonkanya calenga Yesu ukulanda ati umwana aleele fye?— Bushe uletontonkanya ukuti cinshi alefwaya ukusambilisha abantu?— Alefwaya beshibe ukuti imfwa kuti yaba fye ngo tulo tukalamba. Alefwaya ukubasambilisha ukuti ku maka ya kwa Lesa, kuti abuusha uwafwa filya fine fye twingabuusha umuntu uleele.

Yesu aeba bonse ukufuma mu ng’anda ukufumyako abatumwa bakwe Petro, Yakobo, na Yohane na bawishi ba kakashana pamo na banyina. Lyene aingila ku muputule ukuli akakashana. Akekata ku minwe no kutila: ‘We mukashana buuka!’ Kabili ilyo line abuuka no kutendeka ukwenda! Bawishi na banyina basekelela icine cine.—Marko 5:21-24, 35-43; Luka 8:40-42, 49-56.

Nomba tontonkanya pali ci. Apo Yesu alibuushishe ulya mukashana, bushe kuti acite co na kuli bambi?— Bushe uletontonkanya ukuti cine cine akacite co?— Ee, akacite co. Yesu umwine atile: “Inshita ileisa, iyo bonse aba mu nshishi bakomfwamo ishiwi [lyandi], no kufumamo.”—Yohane 5:28, 29.

Bushe uletontonkanya ukuti Yesu alafwaya ukubuusha abantu?— Ica kumwenako na cimbi mu Baibolo citwafwa ukwasuka ici cipusho. Icacitika mupepi no musumba wa Naini calanga ifyo Yesu ayumfwa pa lwa bantu abaloosha pa malilo.

Umwanakashi aleya mu kushiika umwana wakwe umwaume ilyo ibumba lilefuma mu musumba wa Naini. Ilyo ici cishilacitika umulume wakwe alifwile, kabili nomba umwana wakwe umo mpo nafwa. Ali sana no bulanda. Abantu abengi aba ku Naini balekonkamo ilyo icitumbi ca mwana wakwe ciletwalwa ku nse ya musumba. Uyu mwanakashi alelila, kabili abantu nabafilwa ukumusansamusha.

Pali ubu bushiku, caba fye nkuma ukuti Yesu na basambi bakwe baleisa ku musumba wa Naini. Mupepi ne mpongolo ya musumba, bakumanya ibumba lileya mu kushiika umwana wa uyu mwanakashi. Ilyo Yesu amona uyu mwanakashi aleloosha, aumfwa ubulanda. Ubulanda bwa ulya mwanakashi bwamwikata ku mutima. Alefwaya ukumwafwa.

E co mu kunakilila lelo mu kukosa pa kuti omfwe, atila: “Wilalila.” Ifyo acita fyalenga bonse ukufwaya ukumona ifyo alacita. Ilyo Yesu apalama ku citumbi, bonse bafwile balepapa ico alacita. Yesu alanda ati: “We mulumendo, ndekweba, nati, Ima.” Ilyo line umulumendo aikala! Kabili atendeka ukulanda.—Luka 7:11-17.

Tontonkanya ifyo ulya mwanakashi afwile aumfwile! Kuti waumfwa shani nga ca kuti umuntu watemenwe uwafwile abuuka?— Bushe ico tacilelanga ukuti Yesu alitemwa abantu icine cine no kuti alafwaya ukubafwa?— Tontonkanya ifyo cikawama mu calo cipya ica kwa Lesa ukupokelela abakalabuushiwa!—2 Petro 3:13; Ukusokolola 21:3, 4.

Pali ilya nshita bamo abakabuushiwa bakaba bantu twaishibe, pamo na baice. Tukabeshiba filya fine Yairo aishibe umwana wakwe lintu Yesu amubuushishe. Bambi bakaba bantu abafwile kale sana. Lelo Lesa takabalabe nangu baliko kale sana.

Bushe te cisuma ukwishiba ukuti ifyo e fyo Yehova Lesa no Mwana wakwe, Yesu batutemwa?— Bafwaya ifwe ukuba no mweo, te pa myaka fye inono, lelo ku ciyayaya!

MU FIPANDWA fibili ifyafumako, bantu banga twabelengele ababuushiwe?— Bali basano. Ni banga abali abana?— Bali batatu. Kabili uwalenga bune aitilwe ati umulumendo. Cinshi uletontonkanya ici cilelanga?—

Cilelanga ukuti Lesa alitemwa abacaice. Lelo akabuusha na bantu bambi abengi. Bushe Lesa akabuusha fye abalecite fisuma?— Napamo e fyo twingatontonkanya. Lelo, abantu abengi tabasambilile icine pali Yehova Lesa no Mwana wakwe. E co balecita ifintu ifyabipa pantu basambilishiwe ifyalubana. Bushe uletontonkanya ukuti Yehova akabuusha abantu ba musango yo?—

Baibolo itila: “Kukabo kwima ku bafwa kwa balungama na bashalungama.” (Imilimo 24:15) Mulandu nshi abantu abashali abalungama, nelyo abashalecita ifyalungama, bakabuushiwilwa?— Ni pa mulandu wa kuti tabaakwete ishuko lya kusambilila pali Yehova ne fyo afwaya abantu ukucita.

Bushe uletontonkanya ukuti abantu bakabuushiwa lilali?— Tontonkanya pa lwa nshita Lasaro afwile na lintu Yesu alaile nkashi yakwe Marita ati: “Indume yobe ilebuuka kabili.” Marita ayaswike ati: “Ninjishibo kuti akabuuka mu kubuuka kwa mu bushiku bwa kupelelekesha.” (Yohane 11:23, 24) Cinshi Marita alepilibula pa kulanda ati Lasaro akabuuka mu “bushiku bwa kupelelekesha”?—

Marita alyumfwile pa lwa bulayo bwa kwa Yesu ubwa kuti: ‘Bonse aba mu nshishi bakafumamo.’ (Yohane 5:28, 29) E co “ubushiku bwa kupelelekesha” ni lintu bonse abo Lesa ebukisha bakabuushiwa. Ubu bushiku bwa kupelelekesha te bushiku bwa maawala 24. Bukalepa imyaka 1,000. Pali ubu bushiku, Baibolo itila, ‘Lesa akapingula abantu ba pano isonde.’ Pa bo akapingula pakaba na bakabuushiwa.—Imilimo 17:31; 2 Petro 3:8.

Tontonkanya pa fyo ubu bushiku bukawama! Muli ubu bushiku ubukalepa imyaka 1,000, abantu abengi sana abafwa bakabuushiwa. Yesu eta uko bakabuushiwilwa ati Paradise. Natumone ukukabela Paradise ne fyo cikaba mulya.

Ilyo kwashala amaawala nalimo yatatu ukuti Yesu afwe pa cimuti ca kucushiwilwapo, alanda pali Paradise ku mwaume uuli pa cimuti mupepi na wene. Uyu mwaume aleipailwa pa milandu apanga. Lelo ilyo uyu mpulamafunde alemona Yesu no kumfwa ifilelandwa pali Wene, atendeka ukusumina muli Yesu. E co uyu mpulamafunde atila: ‘Mukanjibukishe ilyo mukesa mu bufumu bwenu.’ Yesu ayasuka ati: “Icine cine ndekweba leelo, Uli no kuba na ine mu Paradise.”—Luka 23:42, 43, NW.

Cinshi Yesu alepilibula pa kulande fi? Bushe Paradise yaba kwi?— Tontonkanyapo. Bushe pa kubala Paradise yali kwi?— Ibukisha, Lesa apeele umuntu wa kubalilapo, Adamu, no mukashi wakwe paradise umwa kwikala pano isonde line. Iyi paradise yaleitwa ati ibala lya Edene. Muli lilye bala mwali inama, lelo tashalesuma uuli onse. Kabili mwali ifimuti ifyaletwala ifisabo ifisuma, pamo no mumana uukalamba. Yali ni ncende iisuma ukwikalamo!—Ukutendeka 2:8-10.

E co lintu twabelenga pali uyo mpulamafunde ukuba mu Paradise, tufwile ukutontonkanya pali lino isonde ukwalulwa ukuba incende isuma iya kwikalamo. Bushe Yesu akaba pano isonde pamo na ulya mpulamafunde mu Paradise?— Iyo. Bushe nawishiba umulandu takabelepo?—

Pantu Yesu akaba ku muulu aleteka nge Mfumu pali Paradise wa pe sonde. E co Yesu akaba no yo muntu mu mano ya kuti Yesu akamubuusha ku bafwa no kumusakamana. Lelo mulandu nshi Yesu akalekela umuntu uwali mpulamafunde ukwikala mu Paradise?— Natumone nga kuti twasanga icasuko.

Ilyo uyu mpulamafunde talalanda na Yesu, bushe alishibe pa lwa fyo Lesa alefwaya?— Iyo, taishibe. Alecita ifintu fyabipa pantu taishibe icine pali Lesa. Mu Paradise akasambilishiwa ifyo Lesa afwaya. Lyene akakwata ishuko lya kulanga ukuti cine cine alitemwa Lesa pa kucita ukufwaya Kwakwe.

Bushe bonse abakabuushiwa bakekala muli Paradise pe sonde?— Iyo. Bushe nawishiba umulandu?—Pantu bamo bakabuushiwa ku kuyaikala na Yesu ku muulu. Bakateka na wene nge shamfumu, ukuteka pali Paradise wa pe sonde. Natumone ifyo twaishibe ci.

Ubushiku bwa kulekelesha pa ntanshi ya mfwa ya kwa Yesu, aeba abatumwa bakwe ati: ‘Mu ng’anda ya kwa Tata ku muulu, mwaba apa kwikala apengi. Kabili ndeya ku kumupekanisho bwikalo.’ Lyena Yesu abalaya ati: “Nkesa kabili, no kumupokelela kuli ne mwine; ukuti uko ndi e ko na imwe mukabe.”—Yohane 14:2, 3.

Ni kwi Yesu aya ilyo abuushiwa?—Ca cine, abwelela ku muulu ku kuba na Wishi. (Yohane 17:4, 5) E co Yesu alaya abatumwa bakwe na bakonshi bambi ukuti akababuusha ukuti bakabe pamo nankwe ku muulu. Cinshi bakacita kulya na Yesu?—Baibolo itila abasambi bakwe abakabuuka mu “kubuuka kwa ntanshi” bakekala ku muulu no kuteka isonde “pamo nankwe imyaka ikana limo [1,000].”—Ukusokolola 5:10; 20:6; 2 Timote 2:12.

Ni banga bakabuuka mu “kubuuka kwa ntanshi” no kuteka na Yesu nge shamfumu?— Yesu aebele abasambi bakwe ati: “Mwilatiina, mwe mukuni unono; ico Shinwe abekelwa ukumupeelo bufumu.” (Luka 12:32) Uyu “mukuni unono,” uubuushiwa ukuba na Yesu mu Bufumu bwakwe ubwa ku muulu, waba mukuni wingapendwa. Baibolo ilanga ukuti “aba makana umwanda umo na makana amakumi yane na makana yane [144,000]” bakabuushiwa ukufuma pe sonde.—Ukusokolola 14:1, 3.

Ni banga bakekala mu Paradise pe sonde?— Baibolo tayalanda. Lelo Lesa aebele Adamu na Efa ilyo bali mwi bala lya Edene ukukwata abana no kwisusha isonde. Na kuba, balifililwe ukucite co. Lelo Lesa akashininkisha ukuti ubufwayo bwakwe ubwa kuti isonde lisulemo abantu abasuma bwafishiwapo.—Ukutendeka 1:28; Esaya 45:18; 55:11.

Tontonkanya pa fyo cikawama ukwikala mu Paradise! Isonde lyonse likaba nga parka. Likesulamo ifyuni ne nama ne fimuti fyayemba pamo na maluba ya misango misango. Takwakabe uwa kukalipwa pa mulandu wa kulwala, kabili takwakabe ukufwa. Abantu bonse bakaba fibusa. Nga ca kuti tulefwaya ukwikala kuli pe na pe mu Paradise, ino e nshita ya kupekanishisha yene.