Ukuimona Ukuti Tuli Balungami Sana Kubi

5. Cinshi cingalenga twafilwa ukufwaya ubulungami bwa kwa Lesa?

⁵ Ilyo umutumwa Paulo alembele Abena Kristu ba ku Roma, alandile pa co tushifwile ukucita pa kuti tatufililwe ukufwaya ubulungami bwa kwa Lesa intanshi. Ilyo alelanda ku baYuda banankwe Paulo atile: “Ndi nte, nati, ukupimpa kwa kuli Lesa balikwata; lelo te kupimpa umwabelo kwishiba. Pantu pa kuba abashaishiba bulungami bwa kwa Lesa, na pa kufwayo kwimiko bulungami bwabo, tabanakiile ku bulungami bwa kwa Lesa.” (Rom. 10:2, 3) Ukulingana ne fyalandile Paulo, balya bakapepa tabaishibe ubulungami bwa kwa Lesa pantu babikile amano ku kufwaya ukulanga ubulungami bwabo.a

6. Cinshi tushifwile ukucita, kabili mulandu nshi?

⁶ Cimo icilanga ukuti tuleimikila ubulungami, kucimfyanya na banensu mu kubombela Lesa, nelyo ukulinganya imibombele yesu ku ya bambi. Ici kuti calenga twaicetekela sana mu fyo tucita. Lelo nga tuleimona ifyo ninshi tulelalanga fye ukuti tatwabika amano ku bulungami bwa kwa Yehova. (Gal. 6:3, 4) Ukutemwa Yehova e kufwile ukulenga tulecita icalungama. Kanshi lyonse nga tulefwaya bambi bamona ukuti twalilungama sana, ninshi tulelanga ukuti tatwatemwa Lesa.—Belengeni Luka 16:15.