7. Mulandu nshi ukwishiba ukuti Yesu Kristu ni Kateka Inkonkani ya kwa Yehova kubelele ukwakatama kuli ifwe?

⁷ Tontonkanyeni na pali ici cishinka, ica kuti Yehova alibika Yesu Kristu pa cipuna ca bufumu ku kuba Inkonkani yakwe. Apo ni Cibinda wa Mulimo uo Lesa abomfeshe ku kubumba isonde na bantunse, Yesu alishiba bwino ifyo tukabila ukucila ifyo ifwe bonse twaishiba. Kabinge, ukutula fye apo umuntu abelako, Yesu alilanga ifyo ‘apekelwa abana ba bantu.’ (Amapinda 8:30, 31; Abena Kolose 1:15-17) Alitemwa abantunse icine cine ica kuti aishile na pe sonde umwine no kupeelo bumi bwakwe ku kube cilubula cesu. (Yohane 3:16) Kanshi atupekanishishe umwa kulubukila ku lubembu ne mfwa no kuti tube ne shuko lya kwisakwata ubumi bwa muyayaya.—Mateo 20:28.

Yesu Kristu wena, uo Lesa apeela ubufumu, na o tafwa nge mfumu sha buntunse. (Abena Roma 6:9; 1 Timote 6:15, 16)