Ifya Kubilisha

◼ Ulupapulo lwa kushalika mu March: Bushe Cinshi Baibolo Isambilisha? Bombesheni ukutendeka amasambililo ya Baibolo. April na May: Shalikeni bamagazini ba Ulupungu lwa kwa Kalanda na Loleni! Tukabikeko sana amano ukutandalila abapya abasangilwe ku Cibukisho na ku lyashi ilyaibela lelo abashisangwa lyonse mu kulongana. Ico tukalatandalila aba bantu kutendeka ukusambilila nabo Baibolo. June: Shalikeni Icitabo ca Ukusapika Lesa Ukwa Mutundu wa Muntu nelyo icitabo ca Baibolo—Cebo ca kwa Lesa Nelyo ca Muntu? Ifilonganino ifishikwete ishi mpapulo kuti bashalika icitabo ca Pepeni Lesa Wine Wine Eka. Ifilonganino ifikwete ifitabo fya Sambilila Kuli Kasambilisha Mukalamba nelyo Umuntu Wakulisha Uwabalile Abako Uwa Mweo bafwile ukubombesha ukushalika ifi fitabo muli uyu mweshi. July: Kuti mwashalika broshuwa ili yonse iyakwata mabula 32 pamo nga: Bushe Lesa mu Cituntulu Alatusakamana?, Ipakishe Ubumi pe Sonde kuli Pe na Pe!, Mulelola!, “Moneni Ifintu Fyonse Nafilenga Fipya,” Bushe Ulingile Ukusumina Muli Bulesa Butatu?, Ishina lya Bulesa Ilikatwalilila Kuli Pe na Pe, Kamfulumende Iikaleta Paradise, Cinshi Cicitika Nga Twafwa?, Cinshi Caba Imifwaile ya Bumi—Ni Shani Fintu Wingaisanga?, na Ilyo Untu Watemwa Afwa. Amabroshuwa pamo nga A Book for All People, A Satisfying life—How to Attain It, Our Problems—Who Will Help Us Solve Them?, Imipashi ya Bafwa—Bushe Kuti Yakwaafwa Nelyo Ukukucena? Bushe mu Cituntulu Eko Yaba?, Bushe Mwalisanga Inshila Iitwala ku Mweo wa Muyayaya?, na Will There Ever Be a World Without War? Aya mabroshuwa yonse twalandapo kuti mwayashalika nga mwamona kuti na calinga.

◼ Amabaji ya kulongana kwa citungu ukwa 2008 yakalatumwa pamo ne mpapulo ukutendeka mu May. Tamufwile ukuorda, lelo nga mulefwaya na yambi e lyo mwingaorda ukubomfya Formu wa Kwipushishapo Impapulo (S-14). Kuti mwaorda utumanikilo twa mabaji utwa bali bonse abalefwaya mu cilonganino.

◼ Bakalemba ba filonganino bafwile ukushininkisha ukuti nabakwata amaformu ayengi ayo beta ati Formu wa Kulembeseshapo Bupainiya bwa Nshita Yonse (S-205) na maformu ya Ukwipusha Umulimo wa Bupainiya bwa Kwafwilisha (S-205b). Kuti baorda aya maformu pali Formu wa Kwipushishapo Impapulo (S-14). Bafwile ukukwata amaformu ayo bengabomfya umwaka onse. Ilyo mushilatuma formu ya kulembeseshapo bupainiya bwa nshita yonse ku musambo, mufwile ukushininkisha ukuti ifipusho fyonse nafyasukwa.

◼ Cikankaala nga nshi ukuti umusambo wesu ukwate amaadresi ayapya na manambala ya mafoni yaba kangalila wa kutangilila na bakalemba. Nga ca kutila kuli ukwaluka ukuli konse, ababa mu Komiti wa Mulimo uwa Cilonganino bafwile ukulemba no kusaina formu itila Akeyala Kapya aka kwa Kangalila wa Kutangilila nelyo Kalemba pali formu ya S-29 no kutuma mu kwangufyanya ku musambo. Ici cilepilibula ukuti mufwile ukutuma uyu formu na lintu inambala ya malamya iya ku ncende mwikalako yaaluka.

◼ Ilyo muli pa bulendo bwa pa lwenu kabili mulefwaya ukuyasangwa ku kulongana kwa cilonganino, ukwa muputule no ukwaibela, nelyo ukwa citungu ku calo cimbi, kabili mulefwaya ukwishiba inshiku sha kulongana ne nshita, e lyo ne ncende ukukabela ukulongana, mufwile ukwipusha iofesi lya Nte sha kwa Yehova ilyangalila umulimo muli ico calo. Amaadresi ya maofesi ya musambo yaba pe bula lya kulekeleshako ilya Yearbook wa nomba line.