“Umumbulu no mwana wa mpaanga fikamemena pamo, ne nkalamo ikalye mpimbili nge ng’ombe, ne nsoka, ulukungu lukaba e cilyo ca iko; tafyakacite bubi kabili tafyakonaule monse mu lupili lwandi lwa mushilo, e fyo asosa Yehova.” (Esaya 65:25)

34. Kufishiwapo nshi ukwa kucincimusha amashiwi ya kwa Yehova yafishiwapo lelo kabili yakafishiwapo shani mu calo cipya?

³⁴ Amashiwi ya kwa Yehova yalefishiwapo mu nshila ya kucincimusha pali bakapepa ba cine lelo. Ukutula mu 1919, Lesa alipaala icalo ca ku mupashi ica bantu bakwe, ukucisangula paradise wa ku mupashi. Abesa muli uyu paradise wa ku mupashi balaalula imibele yabo icine cine. (Abena Efese 4:22-24) Pa kwafwilishiwa ku mupashi wa mushilo uwa kwa Lesa, abantu abo kale bali abakali kwati fiswango—abo nalimo balecusha nelyo fye ukusansa abantu banabo—balibombesha ukucincintila iyi misango yabipa. Ne ci calenga ukuti baleipakisha umutende no kwikatana na basumina banabo mu kupepa.

35. Finshi filingile ukutulenga “ukwanga pe pe”?

³⁵ Mwandi tulatasha icine cine pa bulayo bwa kwa Yehova ubwa kulenge “myulu ipya, ne calo cipya”! Bulya bulayo bwalifishiwepo mu 537 B.C.E. kabili bucili bulefishiwa na lelo. Uku kusesema kubili kulanda pa nshita ya ku ntanshi iya lulumbi iya bantu aba cumfwila.