Nangu ca kuti aba mu mipepele yonse batila balishiba ifya kucita pa kuti babe abena Lesa, ifyo balanda ukuti e fyo umuntu afwile ukucita fingi nga nshi, kabili fyafula fye nga filya fine imipepele na yo yafula. Abapepa mu macalici yamo aya Bena Kristu batila umuntu kuti apusuka nga asangwa ku mapepo yabo. BaKatolika na bo basumina ukuti umuntu nga alasangwa ku Minsa ninshi alomfwana na Lesa. AbaBuddha batila nga ca kuti umuntu aleikala no kulatontonkanya sana pa fya mipepele, ninshi akafikapo ukuba umwina Lesa. AbaHindu na bo basumina ukuti umuntu nga talecita ifyabipa, nga afwa takafyalilwe mu cintu cimbi, umweo wakwe ukayaikala mu mutende. Bushe ifyo bonse aba bacita, filabafwa ukuba abena Lesa bene bene? Bushe bonse aba benda mu nshila ingabatwala kuli Lesa?

Batila umuntu tafwile no kulaya mu kupepa ku calici, afwile fye ukusumina muli Lesa umo ifi. Bambi na bo batila umuntu pa kuba umusuma tafwile no kuya ku calici, batila ubusuma bwa muntu, mutima. We mwine ngo uleumfwa mu mutima obe ukuti tapali icilubene kabili walishiba ne co wabela pano calo, nangu taulepepa ukuli konse, cili fye bwino. Kanshi batila filya fine umutima ulebeba ukucita e fibalenga ukuba abasuma. Umwaume umo alembele ukuti: “Ubwina Lesa bwaba mu kati ka mutima wa muntu. Ni filya we muntu umona abantu bonse e lyo na balya muba na bo, ifyo wabatemwa ne fyo umfwana na bo. Ubwina Lesa tabusangwa mu calici ilili lyonse, nangu mu kusumina amasambilisho ye calici ayali yonse.”

Ilyo umutumwa Paulo alandile pa busuma bwaba mu kubika amano ku fya kwa Lesa, alilandile na pa fyo twingeshibilako umwina Lesa wine wine. Ku Bena Kristu baleikala mu musumba wa Korinti, Paulo alondolwele ubupusano bwaba pa muntu uwabika amano ku fya buntunse, e kutila uukonka ififwaya umubili wakwe, no mwina Lesa wine wine, uwacindika sana ifya kwa Lesa. Paulo alembele ukuti: ‘Umuntu uwabula umupashi, te kuti apokelele ifintu umupashi ulemweba. Wena afimona ukuti fya buwelewele.’ Lelo Paulo alondolwele ukuti uwakwata umupashi wa kwa Lesa alaba na “mano ya kwa Kristu.”—1 Abena Korinti 2:14-16, The Bible in Current Cibemba.

Ukuba na “mano ya kwa Kristu” calola fye mu kuti ninshi umuntu aba “no mutima umo wine uo Kristu Yesu akwete.” (Abena Roma 15:5; Abena Filipi 2:5) Kanshi umwina Lesa ni ulya uutontonkanya nga Yesu no kumupashanya. (1 Petro 2:21; 4:1)

Umwina Lesa Alikwata “Ifisabo fya Mupashi”

Mwi buuku lya Mbila Nsuma ilyo Luka alembele, atile umupashi wa mushilo uwa kwa Lesa waishile pali Yesu ilyo abatishiwe, kabili alandile no kuti Yesu ‘aiswilemo umupashi wa mushilo.’ (Luka 3:21, 22; 4:1) Yesu na o akonkomeshe abasambi ukuti calicindama ukutungululwa no mupashi wa mushilo uwa kwa Lesa. (Ukutendeka 1:2; Luka 11:9-13) Mulandu nshi ukutungululwa no mupashi kwacindamina? Pantu umupashi wa kwa Lesa walikwata amaka ya kwalula ifyo umuntu atontonkanya no kumulenga ukupala Kristu. (Abena Roma 12:1, 2) Umupashi wa mushilo ulalenga umuntu ukuba ne mibele pamo nga “ukutemwa, ukusekelela, umutende, ukushishimisha, icikuuku, ubusuma, icitetekelo, ukufuuka, ukuilama.” Iyi mibele iyo Baibolo itila “fisabo fya mupashi,” e yo twingeshibilako umwina Lesa wine wine. (Abena Galatia 5:22, 23) Kanshi kuti twatila umwina Lesa untu atungululwa no mupashi wa kwa Lesa.

Umwina Lesa Alapepa Lyonse

Amabuuku ya Mbila Nsuma yatweba ukuti Yesu alepepa sana kuli Lesa. (Marko 1:35; Luka 5:16; 22:41) Ilyo alebomba umulimo pano calo, Yesu alepaatulako inshita ya kupepa. Mateo umusambi wa kwa Yesu atile: “Ilyo alekele amabumba yaye, [Yesu] aninine ulupili eka ku kupepa.” (Mateo 14:23) Inshita ya musango yo ilyo alelanda na Wishi wa ku muulu mu mapepo, e lyo Yesu alekosa sana. (Mateo 26:36-44) Muno nshiku na mo, abena Lesa bene bene balafwayako inshita ya kupepa, pantu balishiba ukuti amapepo yalalenga bucibusa bwabo na Lesa ukukosa kabili yalabafwa sana ukutontonkanya nga Kristu.

Ilingi line Yesu alepoosa inshita ikalamba alepepa. (Yohane 17:1-26) Ica kumwenako fye, ilyo talasala abaume 12 abaishileba abatumwa bakwe, Yesu “aile ku lupili ku kupepa, kabili aikele ubushiku bonse alepepa kuli Lesa.” (Luka 6:12) Nangu ca kuti tabapepa ubushiku bonse, abena Lesa bene bene balapashanya Yesu. Ilyo tabalapingula fimo ifyacindama, balapoosa inshita iikalamba ukupepa kuli Lesa ukulomba umupashi wa mushilo ukuti ubaafwe ukupingula ifingalenga bucibusa bwabo na Lesa ukukosa.

Na kabili, Yesu mu mapepo yakwe atulangile ukuti nga tulefwaya ukumupashanya tulingile ukulapepa no mutima onse. Umfweni ifyo Luka alandile pa fyo Yesu apepele icungulo bushiku ilyo talafwa. Atile: “Pa kuba mu kulunguluka, alapepa no mukoosha; kabili amabe yakwe yali nga matoni ya mulopa ayaleponena pa nshi.” (Luka 22:44) Na kale Yesu alepepa sana, lelo pali aka akashita, ilyo alepita mu bwesho bwayafya sana ukucila amesho yonse ayo apitilemo pano calo, Yesu apepele “no mukoosha”—kabili Lesa alimwaswike. (AbaHebere 5:7) Abena Lesa bene bene balapashanya Yesu. Ilyo balepita mu mesho ayayafya sana, balapepa “no mukoosha” kuli Lesa ukuti abapeele umupashi wa mushilo, e lyo no kuti abaafwe no kubakosha.

Yesu ukwabula no kutwishika alepepa sana kuli Lesa, e calengele na basambi bakwe ukufwaya ukumupashanya. E ico bamulombele ukuti: “Mwe Shikulu, tusambilisheni ukupepa.” (Luka 11:1) Na bena Lesa bene bene muno nshiku abafwaya ukutungululwa no mupashi wa mushilo balapashanya Yesu mu fyo bapepa kuli Lesa. Kanshi ipepo na bucibusa na Lesa fyendela pamo.

Na lelo line, ukushimikila abantu pa Bufumu bwa kwa Lesa e ca kwishibilako abapashanya Kristu. Yesu aebele bonse abafwaya ukuba abasambi bakwe ukuti: “Kabiyeni, kalengeni aba nko shonse ukuba abasambi, . . . mulebasambilisha ukubaka fyonse ifyo namwebele.” (Mateo 28:19, 20) Na kabili, Yesu asobele ukuti: “Ne mbila nsuma iyi ya bufumu ikashimikilwa pano isonde ponse ku kubo bunte ku nko shonse; e lyo ne mpela ikesa.” (Mateo 24:14) Icebo ca kwa Lesa cilanga ukuti umupashi wa mushilo e ulenga umulimo wa kushimikila ukubombeka, e ico ukuba abacincila muli uyu mulimo, ca kwishibilako abena Lesa bene bene.—Imilimo 1:8.

[Akabokoshi ne Fikope pe bula 7]

IFYA KWISHIBILAKO UMWINA LESA

◆ Alitemwa Icebo ca kwa Lesa

◆ Alalanga ifisabo fya mupashi

◆ Alapepa lyonse kuli Lesa no mutima onse

◆ Alashimikila abantu imbila nsuma ya Bufumu