Cisuma, amashiwi ya ciGriki ne ciHebere ayapilibulwa “paradise” yonse yalola mu kuti parka nelyo ibala lyayemba, icifulo ca mutende ica kupembula. Baibolo yalaya ukuti bushiku bumo isonde likaba paradise wine wine, icifulo capala ibala lyayemba umwa kwikala abantunse abashaba na lubembu. (Amalumbo 37:10, 11) Apo twaishibe fyo, kanshi paradise wa ku mupashi bwikashi busuma umo umuntu engekala na ku matwi tondolo. Afwile aleipakisha umutende na Lesa na bantu banankwe.

Paradise wa ku Mupashi Cinshi?

Cimo icalenga Inte sha kwa Yehova ukupusana sana na bambi ni co balacindikisha ico Baibolo yalanda. Baasumina ukuti Baibolo ya cine kabili Cebo ca kwa Lesa. Kanshi tabapelela pa kwishibako fye ifisambilisho fyacindamisha mu mipepele yabo. Cila muntu alatwalilila ukusambilila pa lwakwe no kubelenga Baibolo. Ilyo umuntu akokola ukubishanya ne Nte sha kwa Yehova, e lyo asambilila ifya kwa Lesa ifingi no kufwaya Kwakwe ukwasokololwa mu Baibolo.

Ukwishiba kwa musango yo kulalubula Inte sha kwa Yehova ku filenga abengi ukufilwa ukuba ne nsansa, ifili nga umutunganya wa kutiina ifishaishibikwa na mano yashalolamo. Yesu atile: ‘Icine cikamulenga abantungwa,’ kabili Inte sha kwa Yehova basanga ukuti ico ca cine. (Yohane 8:32) Fernando, uwalepupa imipashi kale, atile: “Mwandini nalyumfwile bwino sana ilyo naishibe ukuti kwaliba umweo wa muyayaya. Naletiina pantu nalishibe ukuti pali ine na bafyashi bandi, umo akafwa.” Icine calubwile Fernando ku kutiina ifibanda no kutiina ico abene beta ati icalo ca bafwa.

Muli Baibolo, ukwishiba Lesa kwalipalana sana no kwishiba paradise. Kasesema Esaya atile: “Tafyakacite bubi, kabili tafyakonaule, mu lupili lwandi lwa mushilo monse; pantu icalo cikesulamo ukwishiba Yehova, ifyo amenshi yafimba pali bemba.”—Esaya 11:9.

Kwena, ukwishiba fye kweka kweka te kuti kulete umutende wasobelwe na Esaya. Umuntu afwile ukucita ico alesambilila. Fernando atile: “Ilyo umuntu alundulula ifisabo fya mupashi, na o wine alalengako kwaba paradise wa ku mupashi.” Fernando alelanda pa mashiwi ya mutumwa Paulo, uwalandile ukuti imibele isuma iyo Umwina Kristu alundulula yaba “fisabo fya mupashi.” Atantawilile iyo mibele ukuti yaba “kutemwa, ukusekelela, umutende, ukutekanya, icongwe, ubusuma, icishinka, ukunakilila, ukuteko mutima.”—Abena Galatia 5:22, 23.

Bushe mwamona ifyo ukubishanya na bantu abalebombesha ukulundulula imibele ya musango yo kwingaba fye kwati muli mu paradise? Paradise wa ku mupashi uwasobelwe na kasesema Sefania kuti abako pa bantu ba ifyo. Atile: “Tabakacite bupondamishi, tabakasose bufi, kabili mu tunwa twabo tamwakasangwe ululimi lwa kufutika; pantu bene kuti bamema no kuyolola, apashaba na wa kututumya.”—Sefania 3:13.

Icacindama Ico Ukutemwa Kubomba

Nalimo mwamona ukuti ukutemwa e cisabo ca ku mupashi, ico Paulo abalilapo ukulumbula. Iyi e mibele Baibolo yalandapo sana. Yesu atile: “Muli ici e mo bonse bakeshibilo kuti muli basambi bandi, nga mwaba no kutemwana.” (Yohane 13:35) Kwena Inte sha kwa Yehova na bo bene tabapwililika. Limo balapusana mwi bumba lyabo mwine nga filya fine caleba na ku basambi ba kwa Yesu. Lelo balitemwana icine cine, kabili balapepa ukuti umupashi ulebafwa ilyo balelundulula ukutemwa.

E mulandu wine icumfwano cabo cabela icaibela. Kuli bena takwaba akapaatulula ka mushobo no kucilamo ukutemwa icalo cabo ukulenga ukuti abengi muno calo balepusana. Na kuba, Inte sha kwa Yehova abengi abaaleikala mu calo mwali ukwipayana kwa mikowa ku mpela ya myaka ya ba 1990 balefisa abanabo no kuibika mu kapoosa mweo. Nelyo fye “bafuma ku luko lonse ne mikowa ne misango ya bantu na bantu na ba ndimi,” balikatana ica kuti teti musumine, kano mwaimwena fye mwe bene.—Ukusokolola 7:9.

Paradise ku Bacita Ukufwaya kwa kwa Lesa

Muli paradise wa ku mupashi tamufwile ukuba abantu ababuuka, abalalelale, nelyo bakaitemwe. Abena Kristu baebwa ukuti: “Mwipalana no bwikashi buno; lelo musangulwe mu kulengwa kwa mitima yenu ipya, ukuti mulinge icabo kufwaya kwa kwa Lesa.” (Abena Roma 12:2) Ilyo tuleikala imikalile yasanguluka, ne mibele isuma nayo twakwata no kucita na fimbi ifyo Lesa afwaya, tulalengako ukuti kube paradise wa ku mupashi e lyo na ifwe fwe bene tulaba ne nsansa. Carla asangile ukuti ico ca cine. Atila: “Batata bansambilishe ukubombesha pa kuti ndeikwatila indalama shandi. Nangu ca kuti naleumfwako bwino pantu nalisomene amasomo ya ku yuniversiti, ico nshakwete lupwa lwaikatana ulwa mutende ifyo umuntu ashingamona, kano fye aishiba Icebo ca kwa Lesa.”

Kwena ukuipakisha paradise wa ku mupashi takufumyapo amacushi ya mu mikalile ayaculako abantu bonse. Abena Kristu bacili balalwala. Mu calo bekala nalimo kuti mwabuuka inkondo. Abengi bashipikisha fye no bupiina. Nalyo line, bucibusa na Yehova Lesa, pantu na kuba e bwacindamisha pa kuti umuntu abe muli paradise wa ku mupashi, bulenga twashintilila pali wene ku kutwafwa. Cine cine atucincisha ukuti ‘tupoose icisendo cesu icafina pali wene,’ na bengi kuti basumine co, pantu balimona ifyo Yehova abafwa ilyo bacula icine cine. (Amalumbo 55:22; 86:16, 17) Lesa alaya ukwafwa abamupepa nelyo fye baba mu “mupokapoka wa kufiita kwa mfwa.” (Amalumbo 23:4) Ukucetekela ukuti cine cine Lesa alapoosa sana amano ku kutwafwa kulenga twatwalilila no “mutende wa kwa Lesa uwapulamo mu kwiluka konse,” uwacindama nga nshi pa kuti tube muli paradise wa ku mupashi.—Abena Filipi 4:7.