Shintilileni Pali Yehova ku Kumukosha
1 Kwaba imilandu iingi iyo tulingile ukushintilila pali Yehova. Ukushimikila imbila nsuma “ku fyalo fyonse” te mulimo wayanguka. (Mat. 24:14) Lyonse tulashomboka ku kukanapwilika. (Rom. 7:21-23) Na kabili, ‘tulashomboka . . . na [bakwata amaka ayacila abantunse] bamwandanshi ba mfifi ino.’ (Efes. 6:11, 12) Cine cine tukabila ukwafwiwa. Kuti twanonka shani amaka ukufuma kuli Yehova?
2 Ukupitila mwi Pepo: Yehova alapeela umupashi wakwe uwa mushilo uwa maka ku babomfi bakwe abaulomba. (Luka 11:13) Bushe muimona kwati te kuti mushimikile ku ng’anda ne ng’anda, mu musebo, nelyo pa lamya? Bushe mulatiina ukushimikila ubunte bwa mu lyashi? Bushe mwalinashako ukupimpa pa mulandu wa kuti abantu mu cifulo cenu ica kushimikilamo tabangwa ku mbila nsuma? Ni shani nga mwapatikishiwa ukucita fimo ifinganashako icitetekelo cesu na bumpomfu? Shintilileni pali Yehova. Pepeni ukuti amukoshe.—Fil. 4:13.
3 Ukupitila mwi Sambililo lya pa Lwesu: Nga fintu fye tukwata amaka ilyo twalya ifya kulya, e fyo tukoshiwa na lwa ku mupashi nga lyonse tulebelenga Icebo ca kwa Lesa ne mpapulo sha “musha wa cishinka kabili uwashilimuka.” (Mat. 4:4; 24:45) Ilyo bamwipwishe icamukoseshe ukuti ashipikishe pa myaka iingi ilyo ali mu cifungo eka mu China ukwabula Baibolo, Stanley Jones atile: “Kuti twashangila mu citetekelo. Kwena, intanshi tufwile ukusambilila. Te kuti tukwate ubukose lwa nkati nga tatulesambilila.”
4 Ukupitila mu Kulongana: Pa kulongana kwa Bwina Kristu mu mwanda wa myaka uwa kubalilapo, Yuda na Sila “bakonkomeshe aba bwananyina ku fyebo ifingi no kubakosha.” (Imil. 15:32) Na lelo line, ifyo tumfwa pa kulongana fitulenga ukutasha sana Yehova, ukukosha icitetekelo cesu, kabili fitucincisha ukubomba ubutumikishi. Pa kulongana tulaba na ‘babomfi banensu ku bufumu bwa kwa Lesa,’ ababe ‘cisansamushi kuli ifwe.’—Kol. 4:11.
5 Tukabila ukwafwiwa muli shino “nshita ishayafya.” (2 Tim. 3:1) Pa lwa banonka amaka ukufuma kuli Yehova, twaebwa ukuti: “Banina na mapindo nga bakapumpe, babutuka no kukanafunshika, benda no kukanapomponteka.”—Esa. 40:31.