Cinshi Cingamulenga Ukuba ne Nsansa?

JESSE Livermore e o bamo balemona ukuba shimakwebo watunguluka sana mu New York, kabili balishibe no kuti fyonse ifyo aletontonkanya pa fya makwebo fyalebomba bwino. Alikwete sana ifyuma ifingi. Alefwala amasuti ayasuma nga nshi, ayo balebilila fye ena eka, aleikala mu ng’anda iikalamba iyakwete imiputule 29, kabili ale-enda muli motoka ya mutengo sana, iya lulumbi, iyo beta ati Rolls-Royce kabili alikwete na namutekenya wa kumwensha.

BaDavida na bo balefwaya sana ukukwata ifyuma. Balikwete icifulo cikalamba pantu e bali aba bubili ku mukalamba wa makampani ya kukopa no kulenga, e lyo kabili baDavid e bali no kupeelwa icifulo cikalamba sana muli iyi ine kampani, mu citungu cimo ifi. Balefwaisha ifyuma no kulumbuka. Lelo baDavid baishilesalapo ifintu fimo ifyalengele ukuti baleke incito. Batila: “Ninjishiba ukuti nshakakwate incito ya pa muulu sana na kabili.” Bushe muletontonkanya ukuti baDavid balilufyenye ukuleka incito?

Abantu abengi batontonkanya ukuti pa kuti umuntu abe ne nsansa afwile ukuba ne fyuma, afwile ukulumbuka mu calo kabili afwile no kuba ne cifulo ca pa muulu. Na lyo line, abakwata sana ifyuma limo balayumfwa ukuti balibulisha fimo kabili tabaishiba ne fyacindama. E cacitike kuli baLivermore. Nangu ca kutila balikwete sana ifyuma, balelunguluka umutima, kabili bali na macushi no bulanda. Baleikala abakungumana, baleti umwanakashi baupa, ifyupo fyapwa, kabili tabaleumfwana sana na bana babo. Na pa kulekelesha, bushiku bumo, ilyo ifyuma ifingi fyapwile, baLivermore baileingila umo bashitisha ubwalwa mwi hotela ilyalumbuka sana kabili batampile ukuilishanya pa fyo ifyuma fyabo fyapwile. Bashitile ubwalwa, kabili bafumishe akatabo akali ne nkupo ya mpapa ako balelembamo ifyebo, no kulembamo amashiwi ya kushalikapo abakashi babo. Ilyo bapwile ukunwa, baile mu muputule umo ifi umwafiita no kuipika ku mfuti.

Ica kumwenako, baDavid, abo tulandilepo mu cipande cafumako, babebele ukulabomba na pa numa ya kwinuka, kabili babebele no kulaya lyonse mu kubombela kumbi ukusha ulupwa lwabo. BaDavid batile: “Nalefuma pa ng’anda pali Cimo ulucelo no kubwela pali Cine icungulo.” Ifibusa fyabo, balupwa lwabo, na bo baDavid balebomba na bo balebeba ukuti: “Akubombeni, bakashi na bana benu mulebombela,” pantu bena balemona ukuti umuntu alingile ukuipeelesha pa kuti atunguluke muli cino calo. Balebeba ukuti bafwile ukulabomba ifi fine pa myaka fye iinono mpaka bakekale bwino. BaDavid batile: “Balenjeba ukuti ici kuti cawamina ulupwa lwandi pantu ninshi nkalaleta ulupiya ulwingi, kabili ici cikanenga ukuba sana ne nsansa. Abanandi balenjeba ukuti nangu ca kutila nshaleba pamo no lupwa lwandi, filya fine nshalebapo ninshi e kuipeelesha ku lupwa lwandi.” Nga filya fine baDavid balecita, abantu abengi balabombesha ukupeela ulupwa lwabo fyonse ifyo bamona ukuti e fyo lukabila. Nomba bushe ukukonka ukupanda mano kwa musango yu kuti kwalenga umuntu ukuba ne nsansa? Bushe cinshi ulupwa lukabila sana?

BaDavid baishibe ico ulupwa lwabo lwalekabila sana ilyo baile mu kubombela ku cifulo cimbi. Batile: “Nalelanda no mwana wandi Angelica pa foni, lyena anjebele ukuti: ‘Tata, cinshi ico mushifwaila ukwikala na ifwe pa ng’anda?’ Nalyumfwile sana ububi.” Amashiwi umwana alandile e yalengele baDavid ukukosa no kulemba kalata wa kulekelapo incito. BaDavid basalile ukupeela ulupwa lwabo ico lwalekabila sana, ne co cintu, kuba pamo na bo.