Londololeni. Ilyo umutumwa Paulo ashimikile mwi sunagoge ku Tesalonika, tabelengele fye ifyo abalemuumfwa bacetekele. Luka ashimika ati Paulo aleilula, aleshininkisha, no kulondolola ifyo abelengele. Na “bamo ba muli bene balinashiwe, bawilile kuli Paulo na Sila.”—Imil. 17:1-4.

Ukupelulula kwa musango yo kuti kwaba bwino, te mulandu na bali mwi bumba mulelandako. E fyo cingaba ilyo muleshimikila kuli balupwa, ilyo mulelanda na bo mubomba na bo nelyo abo musambilila na bo, ilyo mulelanda na bo mushaishiba mu butumikishi bwa ku cintubwingi, ilyo muletungulula isambililo lya Baibolo, nelyo ilyo mulelanda ilyashi ku cilonganino. Nga mwabelenga ilembo, napamo imwe kuti camwangukila ukwishiba umo lilolele lelo bambi teti beshibe. Ilyo mwalondolola ubupilibulo nelyo ifyo twingalibomfya kuti caumfwika kwati mulemenene kumo. Bushe ukusalamo amashiwi yakulu yakulu no kuyalondolola kuti kwayafwa? Bushe kuti mwalandapo ubushininkisho bumbi ubwa kutungilila, napamo ukufuma ku mashiwi yali mwi lembo nelyo ukufuma kwi lembo limbi ililanda pa mulandu umo wine? Bushe napamo icilangililo e cingabomba bwino ku kulanga ukuti ifyo mulesosa fya mano? Bushe amepusho kuti yayafwa ibumba lyenu ukupelulula pali uyo mulandu? Ukupelulula kwa musango yo kulenga abantu baishiba ati twaliba fye bwino no kubashiila ifya kutontonkanyapo.

Ukushintilila Sana pa Cebo ca kwa Lesa. Ifyo tusambilisha tafifwile ukufuma kuli fwe bene. Tufwaya ukushimikilako bambi ifyo twasambilila muli Baibolo. Muli uyu mulimo, twalyafwiwa nga nshi ku mpapulo she bumba lya musha wa cishinka kabili uwashilimuka. Ishi mpapulo shitukoselesha ukubebetesha Amalembo. Na ifwe tufwaya ukutwala bambi kuli Baibolo, te ku kubashinina ati natulungika, lelo pa kuba abaicefya tufwaya fye abene baimwena ifyo isosa. Tulasuminishanya na Yesu Kristu, uwasosele mwi pepo kuli Wishi ati: “Icebo cenu e cine.” (Yoh. 17:17) Takwaba uwa kuputula ifikansa uwacila pali Yehova Lesa, Kabumba wa muulu ne calo. Pa kuti ifyebo fyesu fibe ifya cishinka kano fyashintilila pa Cebo cakwe.

Inshita shimo kuti mwalanda na bantu abashaishiba ifyaba mu Baibolo nelyo abashasumina ukuti Baibolo Cebo ca kwa Lesa. Mufwile ukucenjela pa kuletamo amalembo ya mu Baibolo ne fya kuyaletamo mu kulanshanya. Lelo mufwile ukwesha ukubatwala bwangu bwangu kuli ci citabo ca maka icabamo ifyebo.

Bushe mulingile ukutontonkanya ati ukwambula fye ilembo likumine ku fyo mulelanda ninshi e bushininkisho bwa kapeleko? Te sana. Napamo kuti mwalanda na pa mashiwi yashingulwikeko pali co cikomo ku kushininkisha ukuti cine cine ilyo lembo lileshininkisha ico mulesosa. Nga ca kuti pali ilyo ilembo mulefumyapo fye icishinte kabili ilembo talilelanda pa mulandu mulelandapo, ubushininkisho na bumbi kuti bwafwaikwa. Kuti mwabomfya amalembo yambi ayakumine kuli uyo mulandu pa kuti ibumba lyenu lishininkishe ukuti ifyo mulesosa cine cine fyashintilila fye pa Malembo.

Mwikukumya ico ilembo lilelandapo. Bikeniko amano pa kulibelenga. Napamo ilembo kuti lilelanda pa mulandu mulelanshanyapo. Lelo pa kuti ifishinka fyenu fibe ifya kunashanasha, komfwa wenu afwile ukumona pali lyo ilembo ico cine cishinka muleti e co lileshininkisha.