Mwilasubila mu Fyuma Fishingacetekelwa

15. (a) Bushe abantu bamo babomfya shani icuma cabo? (b) Bushe Davidi afwaishe ukubomfya shani icuma cakwe?

¹⁵ Takwaba ubushininkisho bwa kutila Davidi afumine mu lupwa lwalumbuka nelyo ukutila ulupwa lwakwe lwali ulukankaala. Lelo ilyo ali pa bufumu, Davidi alinonkele nga nshi. Nge fyo mwaishiba, abantu abengi balalonganika icuma, kabili bafwaya ukucifushishako mu bufunushi, nelyo ukubomfya icuma muli bukaitemwe. Bambi babomfya indalama ku kuicindamika abene. (Mateo 6:2) Te fyo Davidi alebomfya icuma. Alefwaisha ukucindamika Yehova. Davidi aebele Natani ukutila alefwaisha ukukuulila Yehova itempele umwali no kubikwa imbokoshi ya cipingo, iyali mu Yerusalemu “mu kati ka fipembe.” Yehova alitemenwe ico Davidi alefwaya ukucita, lelo abomfeshe Natani ku kumweba ati uukakuula itempele ni mwana Davidi, Solomone.—2 Samwele 7:1, 2, 12, 13.

16. Finshi Davidi apekenye ku bukuule bwe tempele?

¹⁶ Davidi alonganike ifisolobelo fya kubomfya mu bukuule bwa lulumbi. Davidi aebele Solomone ati: “Napekanishishe ing’anda ya kwa Yehova golde bakikari amakana ikana limo, na silfere bakikari amakana ikana, no mukuba ne cela ifyabulo kulingwo kufina pantu fyalifula; ne miti na mabwe nalipekanya, nobe kuti walundapo.” Ku cuma akwete asangwilileko amatalanti 3,000 aya golde na amatalanti 7,000 aya silfere.a (1 Imilandu 22:14; 29:3, 4) Bukapekape bwa kwa Davidi tabwali bwa kufwaya ukuibililika, lelo bwa kufwaya ukulanga icitetekelo no kuipeelesha kwakwe kuli Yehova Lesa. Apo alishibe Intulo ya cuma cakwe, aebele Yehova ati: “Pantu fifuma kuli imwe fyonse, kabili ifyafuma mu kuboko kwenu e fyo tupeelako kuli imwe.” (1 Imilandu 29:14) Bukapekape bwa kwa Davidi bwamulengele ukutwala pa ntanshi ukupepa kwasanguluka.