• Yesu “Abiko Bupingushi Pano Isonde”
    Palameni Kuli Yehova

    • 1, 2. Ni pa kashita nshi Yesu akalipe, kabili mulandu nshi?

      CAMONEKE fye ukuti Yesu nakalipa—kabili pali umulandu wa kukalipila. Kuti mwafilwa ukwelenganya Yesu nakalipa, pantu aali uwafuuka nga nshi. (Mateo 21:5) Lelo kwena alitekele umutima icine cine, pantu ubukali bwakwe bwali ubwalungama.a Lelo cinshi cakalifye uyu muntu watemwo mutende? Cali lufyengo lwabipisha ulwalecitwa.

      2 Yesu alitemenwe nga nshi itempele lya mu Yerusalemu. Mwi sonde lyonse, lyali fye e cifulo capeelwe ku kupepelapo Wishi wa ku muulu. AbaYuda ukufuma mu fyalo ifingi baleenda intamfu yalepa ku kuyapepa kwi tempele. Na Bena fyalo baletiina Lesa na bo baleyako, no kwingila mu lubansa lwe tempele ulo bateyanishiwe. Lelo ku kutampa kwa butumikishi bwakwe, Yesu aingile mu ncende ye tempele kabili alisungwike pa co amwene. Cilya cifulo calemoneka ngo mushiika ukucila ukumoneka nge ng’anda ya mapepo! Mwaiswile abasuluushi na bakakaabula ba ndalama. Lelo ni pi paali ulufyengo? Kuli aba bantu, itempele lya kwa Lesa lyali fye cifulo ca kuliilapo bambi amasuku pa mutwe—no kubafinsha. Balecita shani ifyo?—Yohane 2:14.

      3, 4. Kuliila pa mutwe ukwa musango nshi ukwa bufunushi kwalecitwa pa ng’anda ya kwa Yehova, kabili cinshi Yesu acitile ku kulungika ifintu?

      3 Bashimapepo bapangile icipope ca kuti likobili fye ilya musango umo e lyali no kulipilwa pa kupeela umusangulo we tempele. Abalefuma kumbi balekaabula indalama shabo ukuti bakwateko ilyo ikobili. E ico bakakaabula ba ndalama babikile amatebulo yabo mu kati na nkati ke tempele, no kulalipilisha pa makaabu yonse. Ubukwebo bwa kushitisha inama na bo bwaleleta sana indalama. Abalefuma kumbi abalefwaya ukupeela amalambo kuti bashita ku musuluushi uuli onse mu musumba, lelo abalashi ba pe tempele kuti baisakaana fye abati tailingile ku kupeelwe lambo. Lelo ifya malambo baleshita mu ncende ye tempele fyena tabalekaana nangu panono. Apo balinyanyantile abantu umusango yo, aba basuluushi inshita shimo balekosha imitengo.b Ubu bwali bukwebo ubwabipisha ukucila na mu cipimo. Bwali fye bupuupu!

      4 Yesu tali na kulekapo fye pali lulya lufyengo. Iyi yali ni ng’anda ya kwa Wishi! Acitile ica kufopwelako ca myando no kutamfya ing’ombe ne mpaanga ukufuma mwi tempele. Lyena aile kuli bakakaabula ba ndalama no kupenuna amatebulo yabo. Elenganyeni uko amakobili yaleitaika pa nshi! Akalipile balya baleshitisha inkunda ati: “Sendeni utu, tufumyeni muno.” (Yohane 2:15, 16) Cilemoneka kwati, tapali nangu umo uwapamine ukusuusha uyu muntu wakosa.

  • Yesu “Abiko Bupingushi Pano Isonde”
    Palameni Kuli Yehova

    • b Ukulingana ne calembwa citwa Mishnah, kwali ukuilishanya mu myaka yakonkelepo pa lwa kukosa kwa mitengo ya nkunda shaleshitishiwa pe tempele. Mu kwangufyanya umutengo walibweshiwe pa nshi sana! Ni bani balenonkelamo muli ubu bukwebo bwalelete ndalama? Bakalemba ba lyashi lya kale bamo batila imishiika ya pe tempele yali ya ba ng’anda ya kwa Shimapepo Mukalamba Anasi, kabili ifyuma fyafulisha ifya lulya lupwa lwa bushimapepo fyafumine kuli iyi mishiika.—Yohane 18:13.