Tertullian, kalemba wa mu mwanda wa myaka uwa butatu atile: ifyalewama ukutamba “tafyalewama kuli bakapepa ba cine abaleumfwila Lesa wa cine.” Alemona abalesangwako ukuti balebombela pamo na baleipaya.

[Akabokoshi pe bula 28]

Imbuli sha “Kutalalika Abafwa”

Tertullian, kalemba wa mu mwanda wa myaka uwalenga butatu atile, ilyo imbuli sha kwipaya shatendeke fye, “aba ku kale balemona kwati pali ifi fyangalo balepyungila abafwa, pa numa ya kunashako ifyangalo no kucita ubunkalwe mu nshila imbi iya muno nshiku. Apo ku kale aba basumine ukuti umulopa wa bantu waletalalika imyeo ya bafwa, pa fililo balepeela amalambo ya bankole nelyo abasha bashali bwino abo bashitile. Pa numa bamoneke ukufwaisha ukuti abantu beishiba ukuti tabacindika ukupepa. E co balengele ici ukuba fye icangalo ca kusekesha. Kanshi abo baleshita nga bakanshiwa bwino bwino ifya kubomfya ifyanso fyaliko pali ilya nshita—balekanshiwa ifya kwipaiwa!—lyene baleipaiwa ku nshishi pa bushiku bwa cililo ubwasalilwe. E co, balya bantu balesanga icisansamushi pa mfwa nga baipaya bamo. E kwafuma ifyangalo fya munus. Pa numa ya kashita kanono balundulwike ica kuti ifishilano fyabo no bunkalwe fyaishilelingana ukubipa; pantu ubushiku bwa mwikalwe tabwalefikapo ukuwama, nga ca kuti tapali ifiswango fyakaluka ifya konaula imibili ya bantu. Ifyo balecita pa kutalalika abafwa fyalemonwa fye nge ntambi sha pa cililo.”