Imipepele Imo Iyo Basansa Sana

Inte sha kwa Yehova baba pa mipepele iyo Icalici lya Orthodox ilya ku Russia lisansa sana. Pa June 20, 1996, icilye ca ku Moscow catendeke ukubombela pa mulandu wabalamwinwe na kabungwe kashifwaya imipepele ya fyakaniko aka Committee for the Protection of Youth From False Religions. Nangu ca kuti uyu mulandu waleiminina libili libili pa kubulwa ubushinino bwa kuti Inte ni bampulamafunde, cila nshita walebukululwa.

Pa nshita imo ine, kwali ukukubanya ubufi bwabipisha pa Nte sha kwa Yehova. Inyunshipepala ya Russia iya Komsomolskaya Pravda, iikwata amakope 1,200,000, iyafumine pa November 21, 1998 yatile: “Pa myaka fye ibili, Icalici lya Orthodox ilya ku Russia lyalifumya ifitabo, amabroshuwa, no tutabo ukucila pali 10 ‘ifilanda fye’ pa Nte sha kwa Yehova.” Mulandu nshi icalici lyakoselele pa kufwaya ukubifya ishina lya Nte?

Inyunshipepala ya Komsomolskaya Pravda yakonkenyepo ukuti, “umulandu ukalamba ufwile wa kuti mu myaka fye 7 iyapitapo ababa muli uku kuteyanya balifulilako imiku 10, e lyo Icalici lya Orthodox ilya ku Russia, ngo kuteyanya kumbi ukwa bashikofu, talifwaya aba kucimfyanya na bo.”

Mu kutendeka kwa 1999 lintu uyu mulandu wa ku cilye uwa kulwisha Inte wabukulwilwe na kabili, ifyalo ifingi fyatendeke ukuukonka. Umutwe ukalamba uwali mu nyunshipepala ya New York Times iya pa February 11 watile: “Icilye ca ku Moscow Capimununa Icibindo pa Nte sha kwa Yehova.” Icipande casosele ukuti: “Uyu mulandu uli mu cilye ca ku Moscow, uulelubululwa mu muputule unono uwa mu cilye, ulekonkwa sana ku mabumba ya mipepele na yamona pa nsambu sha bantu apo uli muku wa kubalilapo ukwesha ukubomfya ifunde lya [Law of Freedom of Conscience and Religious Associations] ku kubinda imipepele.”

Lyudmila Alekseyeva, umukalamba wa kabungwe ka International Helsinki Federation, alondolwele umulandu ukulubulwishe Nte kwalekonkelwa sana. Atile nga ca kuti abaleesha ukutitikisha Inte sha kwa Yehova “batunguluka muli uyu mulandu,” ninshi “bakamona ukuti nabakwata insambu sha kusansa amabumba yambi” ayo beta ukuti te mipepele ya cishilano. Lelo, uku kulubulula kwaliminine na kabili pa March 12, 1999. Lelo umweshi wakonkelepo, pa April 29, Icipani ca ku Russia ica Bupingushi casuminishe “Administrative Center of Jehovah’s Witnesses mu Russia” ukulembeshiwa.

Te mulandu no kusuminishiwa ku buteko, ukusansa Inte na mabumba ya mipepele yambi ayanono kwalitwalilila mu Russia na mu fyalo fimbi ifyapangile Soviet Union. Lawrence Uzzell, umukalamba wa kabungwe ka Keston Institute mu Oxford, ku England, atile “lyonse cilawama ukukonka umulandu wa Nte sha kwa Yehova nga balelubulula” pantu ificitika kuli bene fiba “cishibilo ca kusoka kwa mu kubangilila.” Cine cine, ubuntungwa bwacindama ubwa mipepele ya minshipendwa ya bantu buli mu bwafya!

Ukusansa Takwalungama

Mu mwanda wa myaka uwa kubalilapo, bashimapepo bakalamba na bashimapepo bambi bapakese abakonshi ba kwa Yesu. (Yohane 19:15; Imilimo 5:27-33) E co, casoselwe pa buKristu ati: “Icakaniko ici caishibikwa kuli ifwe ukuti konse konse cisoselwo bubi.” (Imilimo 28:22) E co, tatufwile ukupapa ukuti Abena Kristu lelo na bo kuti bapakaswa, nga fintu caba ku Nte sha kwa Yehova.

Lelo, pa numa ya kubebeta ubushinino pa Bena Kristu ba kale, Gamaliele, umuFarise waishibikwe sana kabili kasambilisha wa Malango, atile: “Talukeni kuli aba bantu, no kubaleka babe; ico uku kupanga atemwa uyu mulimo nga cafuma ku bantu, cikawa; lelo nga ca kwa Lesa, mukafilwo kubawisha—epali mwasangwa abalwa na Lesa.”—Imilimo 5:38, 39.

Na lelo line bakalengulula balifwailisha pa Nte sha kwa Yehova. Finshi basanga? Sergey Blagodarov, uuitunga ukupepa ku Orthodox, atile mu nyunshipepala ya Komsomolskaya Pravda ukuti: “Imyaka ukucila pali 100, takwaba icalo mwi sonde icashininkisha ukuti Inte sha kwa Yehova ni bampulamafunde, nelyo ukuti te kuteyanya kwa mwi funde.”

[Ifikope pe bula 23]

Ukulubulula kwali mu Moscow mu February 1999. Abalebapokolola (ku kuso), kapingula (pa kati), na balebalubulwisha (ku kulyo)