Bashipikishe Imyunga mu Mibili Yabo

“Napeelwe umuunga mu mubili, malaika wa kwa Satana ku kuntutamo ififunshi.”—2 ABENA KORINTI 12:7.

1. Mafya nshi yamo abantu bakwete lelo?

BUSHE muleshomboka no bwesho ubushipwa? Nga muleshomboka, te imwe mweka muleshomboka. Muli shino “nshita shayafya,” Abena Kristu ba cishinka baleshipikisha ukukaanya kwabipisha, amafya mu lupwa, ukulwala, ukubulisha indalama, ukufunshika kwa ku mutima, ukufwilwa abatemwikwa babo, na mafya yambi. (2 Timote 3:1-5) Mu fyalo fimo, abantu abengi balecula ku fipowe ne nkondo.

2, 3. Kutontonkanya nshi ukwalubana twingakwata pa mulandu wa mafya yaba nge myunga ayatuponena, kabili mulandu nshi kwingabipila?

² Amafya ya musango yo kuti yalenga umuntu ukupeelelwa nga nshi, maka maka nga mafya ayengi yamuponena pa nshita imo ine. Moneni ifyo Amapinda 24:10 yasosa. Yatila: “Nga watompoka mu bushiku bwa kumanama, ninshi amaka yobe yanono.” Ca cine, ukufuupulwa pa mulandu wa mafya tukwete kuti kwatulenga ukukanaba no bukose tukabila nga nshi kabili kuti kwanasha umupampamina wesu uwa kushipikisha ukufika ku mpela. Bushe ici kuti cacitika shani?

³ Kwena, ukufuupulwa kuti kwatulenga ukukanashikatala. Ku ca kumwenako, kuti cayanguka ukumona kwati amafya yesu nayacilamo no kutendeka ukuililila ubulanda. Bamo nalimo kuti bailishanya na kuli Lesa abati, “Cinshi mulekela ici ukuncitikila?” Nga umuntu aba no kutontonkanya kwalubana ukwa musango yo mu mutima, kuti kwamulenga ukukanasekelela no kukanaba ne citetekelo. Umubomfi wa kwa Lesa kuti afuupulwa sana ica kuti nalimo aleka no “kupilikita kusuma kwa citetekelo.”—1 Timote 6:12.

4, 5. Bushe Satana alenga shani amafya yesu limo limo, lelo cinshi twingacetekela?

⁴ Kwena, Yehova Lesa tatutunka. (Yakobo 1:13) Tulaponenwa na mesho yamo pa mulandu fye wa kuti tulebombesha ukuba aba cishinka kuli wene. Na kuba, bonse ababombela Yehova balasanswa kuli Satana Kaseebanya, umulwani mukalamba uwa kwa Lesa. Mu nshita inono ashele na yo, uyu “mulungu wa nshita ino” umubifi aleesha ukulenga onse uwatemwa Yehova ukuleka ukucita ukufwaya Kwakwe. (2 Abena Korinti 4:4) Satana alesha apapela amaka yakwe ukuleta amacushi ayengi nga nshi pali bamunyinefwe mwi sonde lyonse. (1 Petro 5:9) Kwena, Satana te ulenga amafya yonse ayatuponena, lelo kuti abomfya amafya tukwata ku kutunasha nga nshi.

⁵ Lelo, nangu Satana nelyo ifyanso fyakwe fibe ifya maka nga nshi, kuti twamucimfya! Kuti twashininkisha shani ici? Pantu Yehova Lesa alatulwila. Alishininkisha ukuti ababomfi bakwe baishiba amapange ya kwa Satana. (2 Abena Korinti 2:11) Na kuba, Icebo ca kwa Lesa citweba ifingi pa mafya ayengi ayo Abena Kristu ba cine baculako. Baibolo yabomfeshe amashiwi “umuunga mu mubili” ilyo yalelanda pa mafya ya mutumwa Paulo. Mulandu nshi? Natubebete ifyo Icebo ca kwa Lesa cilondolola aya mashiwi. Lyene twalamona ukuti te ifwe fweka tukabila ukwafwa kwa kwa Yehova ku kucimfya amesho.

Umulandu Amesho Yabela Nge Myunga

6. Bushe Paulo aloseshe mwi ilyo alandile pa “muunga mu mubili,” kabili cinshi nalimo icali uyu muunga?

⁶ Paulo, uwapitile mu mesho ayengi nga nshi, apuutilwemo ukulemba ati: “Napeelwe umuunga mu mubili, malaika wa kwa Satana ku kuntutamo ififunshi, epali naisansabika.” (2 Abena Korinti 12:7) Bushe muunga nshi Paulo akwete mu mubili? Kwena, umuunga uuli mu mubili kuti walenga ubukali nga nshi. E ico iyi milandile ya mampalanya ilanga ukuti kwali cimo icalelenga Paulo ubukali—nampo nga ni lwa ku mubili nelyo mu mutima, nelyo konse kubili. Nalimo Paulo alilwele amenso nelyo ubulwele bumbi. Atemwa uyu muunga walimo abantu abalepaasha ukufikapo kwa kwa Paulo ukuba umutumwa no kutwishika umulimo wakwe uwa kushimikila no kusambilisha. (2 Abena Korinti 10:10-12; 11:5, 6, 13) Nangu tatwishibe bwino uyu muunga, watwalilile ukucusha Paulo kabili tawali no kufuma.

7, 8. (a) Amashiwi ya kuti ukutwalilila ‘kutuuta ififunshi’ yalanga cinshi? (b) Mulandu nshi cacindamina ukushipikisha amafya yonse ayo tukwata nomba?

⁷ Moneni ukuti uyu muunga watwalilile ukututa Paulo ififunshi. Ishiwi lya ciGriki ilyo Paulo alandile apa lyafuma kwi shiwi “impingu.” Ili shiwi lyalilembwa na pali Mateo 26:67 no kulilandila mu mampalanya pali 1 Abena Korinti 4:11. Muli ifi fikomo, lilosha ku kupumwa. Pa mulandu wa fyo Satana apata Yehova na babomfi Bakwe, kuti twashininkisha ukuti Kaseebanya alitemenwe ukuti umuunga watwalilile ukulasa Paulo. Na muno nshiku mwine, Satana alatemwa ilyo twacula no muunga mu mubili.

⁸ E ico, nge fyo Paulo acitile, tufwile ukwishiba ifya kushipikisha imyunga ya musango yo. Ukucite fyo e pashintilila ubumi bwesu! Ibukisheni ukuti Yehova afwaya ukuti tukekale umuyayaya mu calo cakwe icipya, umo amafya yaba nge myunga yashakatucushe. Pa kutwafwa ukunonka ici cilambu cawamisha, Lesa alitupeela ifya kumwenako ifingi mu Cebo cakwe icashila, Baibolo, ifilanga ukuti ababomfi bakwe aba cishinka balishipikisha imyunga mu mibili yabo. Bali fye nga bantu bambi kabili abashapwililika, nge fyo na ifwe twaba. Ukubebeta bamo pali ili “kumbi lya nte” kuti kwatwafwa ‘ukubutuka no mukoosha ulubilo ulwabikilwa ifwe.’ (AbaHebere 12:1) Ukutontonkanya sana pa fyo bashipikishe kuti kwakosha ukucetekela kwesu ukuti kuti twashipikisha ifintu fyonse fyapala imyunga ifyo Satana engabomfya ku kutulwisha.

Imyunga Yalecusha Mefiboshete

9, 10. (a) Bushe cali shani pa kuti Mefiboshete akwate umuunga mu mubili? (b) Imfumu Davidi yabelele shani Mefiboshete uluse, kabili kuti twapashanya shani Davidi?

⁹ Tontonkanyeni pali Mefiboshete, mwana Yonatani cibusa wa kwa Davidi. Ilyo Mefiboshete ali ne myaka isano, kwaishile ilyashi lya kuti wishi, Yonatani, na Imfumu Shauli shikulu wakwe, nababepaya. Umuleshi wa uyu kalume tatekenye. “Alimusendele. . . . Nomba wene pa kufulumbano kufulumuka, umwana aponene, no kulengwe cilema.” (2 Samwele 4:4) Ubu bulema bufwile bwali muunga Mefiboshete alekabila ukushipikisha ilyo alekula.

¹⁰ Ilyo papitile imyaka, Imfumu Davidi yabelele uluse Mefiboshete pa mulandu wa fyo yatemenwe Yonatani. Davidi apeele impanga ya kwa Shauli yonse kuli wene no kupeela kalume wa kwa Shauli Siba umulimo wa kusakamana iyi mpanga. Kabili Davidi aebele Mefiboshete ati: “Wakulalya pe icilyo pe tebulo lyandi.” (2 Samwele 9:6-10) Cine cine uluse lwa kwa Davidi lwasansamwishe Mefiboshete no kumwaafwa ukucefyako ubukali bwa bulema bwakwe. Ala lisambililo ilisuma! Na ifwe tufwile ukubelelo luse abalecula no muunga mu mubili.

11. Cinshi Siba atungenye Mefiboshete, lelo twaishiba shani ukuti uku kutunga kwa bufi? (Moneni amashiwi ya pe samba.)

¹¹ Ilyo papitile inshita, Mefiboshete ali no kushomboka no muunga na umbi mu mubili. Umubomfi wakwe Siba amubepeshe ubufi ku Mfumu Davidi, iyafulumwike ku Yerusalemu pa mulandu wa kupondoka kwa kwa Absalomu, mwana Davidi. Siba atile Mefiboshete ashele ku Yerusalemu pantu tali na bucishinka kabili aleenekela ukupoka ubufumu.a Davidi alyumfwilile ubufi bwa kwa Siba no kupeela impanga yonse iya kwa Mefiboshete kuli uyu kabepa!—2 Samwele 16:1-4.

12. Bushe Mefiboshete acitile shani ku fya mucitikile, kabili aba shani ica kumwenako cisuma kuli ifwe?

¹² Lelo, ilyo Mefiboshete asukile akumana na Davidi, aebele imfumu ifyacitike. Aleiteyanya ukuya kuli Davidi ilyo Siba amubepele no kuipeelesha ukuti wene aye pe punda lyakwe. Bushe Davidi alilungike ifintu? Panono. Ayakenye aba baume impanga. Apa nomba e pali umuunga wabipisha na umbi mu mubili wa kwa Mefiboshete. Bushe alibipilwe? Bushe aliilishenye pa fyo Davidi apingwile ukuti tapingwile bwino? Iyo, aliicefeshe no kusumina ifyo imfumu yalefwaya. Aletontonkanya pa fisuma, ukusekelela ukuti imfumu ya Israele yabwelele umutende. Cine cine Mefiboshete aba ca kumwenako mu kushipikisha ukulemana, ubufi, no kubipilwa.—2 Samwele 19:24-30.

Nehemia Ashipikishe Amesho Akwete

13, 14. Myunga nshi Nehemia alekabila ukushipikisha ilyo abwelele ku kukuula cipya cipya ifibumba fya Yerusalemu?

¹³ Tontonkanyeni pa myunga ya mampalanya Nehemia ashipikishe ilyo abwelele ku musumba wa Yerusalemu uwabula ilinga mu mwanda wa myaka walenga 5 B.C.E. Asangile ukuti umusumba tawacingililwe, kabili abaYuda babwelele ku calo cabo tabateyanishiwe, balifuupwilwe, kabili bali abakowela mu menso ya kwa Yehova. Nangu Imfumu Artakishashete yamupeele amaka ya kukuula cipya cipya ifibumba fya Yerusalemu, tapapitile ne nshita aishibe ukuti bakateka ba nko shali mupepi tabatemenwe umulimo alebomba. “Cabipile kuli bene ukubipa kukalamba ica kuti kwaiso muntu ku kufwaila abana ba kwa Israele ubusuma.”—Nehemia 2:10.

¹⁴ Balya bakakaanya ba ku fyalo fimbi baeseshe apapelele amaka yabo ukuti baleshe umulimo wa kwa Nehemia. Icintinya cabo, ubufi, ulwambo, ukututumya—pamo no kutuma inengu ku kumufuupula—fifwile fyali nge myunga yalelasa lyonse mu mubili wakwe. Bushe alinakile ku micenjelo ya balya balwani? Iyo! Acetekele Lesa no mutima onse, kabili tanakile. E ico, ilyo ifibumba fya Yerusalemu fyasukile fyakuulwa, fyali bushininkisho bushali na kulabwa ubwa fyo Yehova atungilile Nehemia.—Nehemia 4:1-12; 6:1-19.

15. Mafya nshi yali pa baYuda ayacushishe Nehemia nga nshi?

¹⁵ Apo Nehemia ali kateka, na kabili akwete amafya ayengi pa bantu ba kwa Lesa. Aya mafya yali nge myunga iyamucushishe nga nshi pantu yakumine bucibusa bwa bantu na Yehova. Abakankaala balefwaya abantu bakongwesha indalama ukulundapo ishingi, kabili bamunyinabo abapiina, pa kuti babweshe inkongole no kulipila umusonko ku Persia, baleshitisha impanga yabo no kushitisha fye abana mu busha. (Nehemia 5:1-10) AbaYuda abengi tabalebaka Isabata kabili balefilwa ukutungilila abena Lebi ne tempele. Kabili, bamo baupile “abanakashi abena Ashdode, abena Amone, na bena Moabu.” Kwena ici calikalifye Nehemia! Lelo tapali nangu umo pali iyi myunga uwamunashishe. Ilingi line alebombela pali aya mafya ngo muntu uwaletungilila nga nshi amafunde yalungama aya kwa Lesa. Nge fyacitile Nehemia, shi na ifwe twisuminisha imyendele ya bambi iyabula bucishinka ukutucilima ukubombela Yehova ne cishinka.—Nehemia 13:10-13, 23-27.

Aba Cishinka Bambi Abengi Balishipikishe

16-18. Amafya ya mu lupwa yaponene shani Isaki na Rebeka, Hana, Davidi na Hosea?

¹⁶ Mu Baibolo mwaba ifya kumwenako fimbi ifingi ifya bantu abashipikishe amafya yali nge myunga. Cimo icalelenga sana iyi myunga mafya ya mu lupwa. Abakashi ba kwa Esau babili bali “akalusha buci kuli Isaki kabili kuli Rebeka,” abafyashi ba kwa Esau. Rebeka alandile fye no kuti alengelwe ubunani ku mweo wakwe ukuba na balya banakashi. (Ukutendeka 26:34, 35; 27:46) Kabili tontonkanyeni pali Hana ne fyo umukashi munankwe, Penina, “alemufiisha no kumufiisha ku mutima” pantu Hana ali ng’umba. Nalimo Hana alecushiwa ifi fine imiku iingi mu ng’anda mu mwabo. Penina kabili alemukalifya pa bantu—ukwabula ukutwishika pali balupwa ne fibusa—ilyo ulupwa lwasangwa ku mutebeto ku Shilo. Ici cali ngo kulasa sana umuunga mu mubili wa kwa Hana.—1 Samwele 1:4-7.

¹⁷ Tontonkanyeni ifyo Davidi ashipikishe pa mulandu wa kalumwa kabi aka kwa shifyala, Imfumu Shauli. Pa kuipususha, Davidi apatikishiwe ukwikala mu ncengo mu matololo ya Engedi, uko aendele mu mikunkuluko ne nshila sha mabwe ishibi. Ulu lufyengo lufwile lwalimukalifye, pantu tapali ico abifishe kuli Shauli. Nalyo line, Davidi ali uwauluba pa myaka iingi—pa mulandu fye wa kalumwa ka kwa Shauli.—1 Samwele 24:14, 15; Amapinda 27:4.

¹⁸ Elenganyeni ubwafya bwa mu lupwa ubwaponene Hosea. Umukashi wakwe asangwike cilende. Bucisenene bwakwe bufwile bwali nge myunga iyalashile mu mutima wa kwa Hosea. Kabili afwile alilungulwike nga nshi ilyo umukashi wakwe afyele abana ba mu cani babili pa mulandu wa bulalelale bwakwe!—Hosea 1:2-9.

19. Bushe kasesema Mikaya apakeswe shani?

¹⁹ Umuunga umbi mu mubili kupakaswa. Tontonkanyeni pa ca kumwenako ca kwa kasesema Mikaya. Mikaya, uwali umulungami, afwile alilungulwike nga nshi pa kumona ifyo Imfumu ibifi Ahabu yakwete bakasesema ba bufi no kuti Ahabu asumine ubufi bwabo. Lyene, ilyo Mikaya aebele Ahabu ukuti bonse balya bakasesema balandile mu “mupashi wa kubepa,” cinshi intungulushi ya aba bakabepa yacitile? Ala “aumine Mikaya pe saya”! Icabipishe ni fyo Ahabu ayankwile ku kusoka kwa kwa Yehova ukwa kuti bali no kufilwa ukupoka umusumba wa Ramote-gileadi. Ahabu aebele ukuti Mikaya apooswe mu cifungo no kumupeela ifya kulya ifinono. (1 Ishamfumu 22:6, 9, 15-17, 23-28) Kabili ibukisheni Yeremia ne fyo bamucushishe kuli bakapakasa ba lucu.—Yeremia 20:1-9.

20. Myunga nshi Naomi ashipikishe, kabili alambwilwe shani?

²⁰ Ukufwilwa umuntu mwatemwa cintu cimbi ica bulanda nga nshi icingaba ngo muunga mu mubili. Naomi ashipikishe ukufwilwa umulume na bana baume babili. Ilyo no bulanda bwakwe bushilapwa, abwelelemo ku Betlehemu. Aebele abanankwe ukukanamwita Naomi, lelo ukumwita Mara, ishina ilyalelanga ifintu ifibi fyamucitikile. Lelo, Yehova asukile amulambula pa kushipikisha kwakwe pa kumupeela umwishikulu uwali no kuba icikolwe ca kwa Mesia.—Ruti 1:3-5, 19-21; 4:13-17; Mateo 1:1, 5.

21, 22. Yobo aculile shani ku fyo alufishe, kabili ayankwileko shani?

²¹ Tontonkanyeni pa fyo Yobo apeshiwe amano ilyo aumfwile imfwa ya kupumikisha kabili ibi iya bana bakwe 10 abo atemenwe, pamo no kuloba kwa fitekwa fyakwe fyonse na babomfi. Awe mu bushiku fye bumo ifintu fyonse fyalyalwike! Lyene, ilyo Yobo alecula na ya mafya, Satana amuumine no bulwele. Nalimo Yobo aleti ubu bulwele bubi bwali no kumwipaya. Alikalipwe icabipisha ica kuti ayumfwile fye no kuti ukufwa kwawama.—Yobo 1:13-20; 2:7, 8.

²² Mukwai kwati nalimo aya mafya yali ayanono, umukashi wa kwa Yobo, pa mulandu wa bulanda no kufiitwa, alilile kuli wene ati: “Tukeni Lesa, no kufwa.” Ala mwandini uyu wali muunga mu mubili wakwe uwalekalipa! Lyene, ukucila ukumusansamusha, ifibusa fitatu ifya kwa Yobo, fyamusanshile no kupelulula kwa bumyalumyalu, ukumupeela umulandu wa kubembuka mu bumfisolo no kutunganya ukuti e calengele na kalanda kakwe. Ukupaasha kwabo ukwalubana kwali ngo kulasa nga nshi imyunga mu mubili wakwe. Ibukisheni kabili ukuti Yobo taishibe umulandu ifintu fyabipa fyalemucitikila; kabili taishibe nga ali no kutwalilila uwa mweo. Lelo, “muli ici conse Yobo tabembwike, kabili talingile Lesa ukulufyanya.” (Yobo 1:22; 2:9, 10; 3:3; 14:13; 30:17) Nangu alashilwe ne myunga iingi mu mubili pa nshita imo ine, tabalile aleka ukuba uwa mpomfu. Kwena ici cakukoselesha nga nshi!

23. Mulandu nshi abantu ba cishinka twalanda muli cino cipande bashipikishishe imyunga yalekanalekana mu mibili yabo?

²³ Kwaba ifya kumwenako ifingi ifyaba nge fi twalandapo. Mu Baibolo mwaba na fimbi ifingi. Bonse aba babomfi ba cishinka bashipikishe imyunga yabo iya mampalanya. Kabili baponenwe na mafya yapusanapusana! Lelo, kwali cimo ico bonse bacitile. Tapali uwalekele ukubombela Yehova. Nangu bakwete amesho yabipa, bacimfishe Satana mu bukose Yehova abapeele. Bacitile shani ifyo? Icipande cakonkapo calaasuka ici cipusho no kutulanga ifyo na ifwe twingashipikisha conse icaba ngo muunga mu mubili wesu.

[Futunoti]

Ukushipikisha “Umuunga mu Mubili”

“Ukusenamina kwandi kwakumana kuli iwe.”—2 ABENA KORINTI 12:9.

1, 2. (a) Mulandu nshi tushilingile ukupapa ukuti tulaponenwa na mesho na mafya? (b) Mulandu nshi twingabela abacetekela na lintu tuli na mesho?

“BONSE abalefwayo kwikala umwabela bukapepa muli Kristu Yesu bakapakaswa.” (2 Timote 3:12) Mulandu nshi cabela ifi? Pantu Satana atunga ukuti abantu babombela Lesa pa mulandu fye wa kuitemwa, kabili alafwaisha ukulanga ukuti ici ca cine. Yesu asokele abatumwa bakwe aba cishinka ati: “Satana amufwaile bonse ukumwela nge ngano.” (Luka 22:31) Yesu alishibe ukuti Lesa alasuminisha Satana ukutwesha ukubomfya amafya yabipisha. Kwena, ici tacilepilibula ukuti amafya yonse tukwata yalengwa na Satana nelyo ifibanda fyakwe. (Lukala Milandu 9:11) Lelo Satana alafwaisha ukubomfya conse ico engabomfya ku konaula bumpomfu bwesu.

² Baibolo itweba ukuti tatufwile ukupapa ilyo ifya kwesha fyatuponena. Conse icatucitikila, te kuti cimoneke iceni nelyo ica mankumanya. (1 Petro 4:12) Na kuba, “[bamunyinefwe] ba pano isonde batuulo mutuulo uyo wine wa kucula.” (1 Petro 5:9) Muno nshiku, Satana aleleta amafya yabipisha pa babomfi ba kwa Lesa bonse. Kaseebanya alatemwa ukumona tulelunguluka na mafya ayengi nga nshi ayaba nge myunga. Pa kucite ci, abomfya ubwikashi bwakwe mu nshila ingakushako nelyo ukubifishako ‘umuunga onse mu mibili yesu.’ (2 Abena Korinti 12:7) Lelo, ukusansa kwa kwa Satana takufwile ukonaula bumpomfu bwesu. Nge fyo fye Yehova “akacita na pa kufuminamo” kuli ifwe pa kuti tushipikishe amesho, akacita cimo cine ilyo twaba na mafya ayaba nge myunga mu mubili wesu.—1 Abena Korinti 10:13.

Ifya Kushipikisha Umuunga

3. Bushe Yehova ayaswike shani ilyo Paulo amulombele ukufumya umuunga mu mubili wakwe?

³ Umutumwa Paulo alombele Lesa ukufumya umuunga mu mubili wakwe. “Pali ico napaapaatile Shikulu imiku itatu, ukuti acifumye kuli ine.” Bushe Yehova ayaswike shani ku fyo Paulo alombele? “Ukusenamina kwandi kwakumana kuli iwe; pantu mu kunaka e mo amaka yandi yalengwo kufikapo.” (2 Abena Korinti 12:8, 9) Natubebete ici casuko no kumona ifyo cingatwafwa ukushipikisha amafya yonse ayaba nge myunga ayatucusha.

4. Bushe Paulo amwenenemo shani mu kusenamina kwa kwa Yehova?

⁴ Moneni ukuti Lesa akoseleshe Paulo ukutasha ifyo amusenamine ukupitila muli Kristu. Ca cine, Paulo alipaalilwe nga nshi mu nshila ishingi. Yehova amupeele ishuko lya kuba umusambi wa kwa Yesu, nangu kale ali kakaanya wapimpa uwa bakonshi ba kwa Yesu. (Imilimo 7:58; 8:3; 9:1-4) Lyene, Yehova, pa mulandu wa cikuku cakwe, apeele Paulo imilimo iingi. Kanshi na ifwe kuti twasambilila kuli ici. Nangu ifintu fibipe shani, twalikwata amapaalo ayengi ayafwile ukutulenga ukutasha. Amesho tayafwile ukutulenga ukulaba ubusuma bwa kwa Yehova.—Amalumbo 31:19.

5, 6. (a) Bushe Yehova asambilishe shani Paulo ukuti amaka ya kwa Lesa ‘yalengwo kufikapo mu kunaka’? (b) Bushe ica kumwenako ca kwa Paulo cashinine shani ukuti Satana wa bufi?

⁵ Ukusenamina kwa kwa Yehova kwalikumana mu nshila na imbi. Amaka ya kwa Lesa kuti yatwafwa nga nshi ukushipikisha amesho. (Abena Efese 3:20) Yehova asambilishe Paulo ukuti amaka ya kwa Lesa ‘yalengwo kufikapo mu kunaka.’ Mu nshila nshi? Apeele Paulo ubukose bonse ubo alekabila ku kushipikisha amesho. Kabili ukushipikisha kwa kwa Paulo no kucetekela Yehova umupwilapo kwalangile bonse ukuti amaka ya kwa Lesa yalecimfya kuli uyu muntu wanaka kabili umubembu. Nomba tontonkanyeni ifyo Kaseebanya ayumfwile, pantu atunga ukuti abantu babombela Lesa ilyo fye ifintu fili bwino kabili ilyo kushili amafya. Bumpomfu bwa kwa Paulo bwali ngo kuuma ulupi pa cinso ca uyu kabepa!

⁶ E fyo cali kuli Paulo, uyo kale alebombela pamo na Satana mu kulwisha Lesa, kabili uwalepakasa nga nshi Abena Kristu, umuFarise wapimpa, uwaleipakisha ubwanalale icine cine pantu afyalilwe mu lupwa ulukankaala. Paulo nomba alebombela Yehova na Kristu ukuba “uwacepesha pa batumwa.” (1 Abena Korinti 15:9) Apo ali uwacepesha, alenakila ubutungulushi bwe bumba litungulula ilya Bena Kristu ilya mu mwanda wa myaka uwa kubalilapo. Kabili aleshipikisha mu cishinka nangu akwete umuunga mu mubili. Kabili icakalifye sana Satana ca kuti amesho Paulo alekwata tayamunenwine. Paulo talabile isubilo lya kuti ali no kuteka mu Bufumu bwa mu muulu ubwa kwa Kristu. (2 Timote 2:12; 4:18) Takwali umuunga nangu umo uwali no kunashako ukupimpa kwakwe, nangu uyo muunga ukalipe shani. Shi na ifwe natutwalilile abapimpa! Pa kutwaafwa ukushipikisha amesho, Yehova alatucindamika no mulimo wa kumwaafwa ukushinina ukuti Satana wa bufi.—Amapinda 27:11.

Ifyo Yehova Atupeela Fyalicindama

7, 8. (a) Bushe Yehova akosha shani ababomfi bakwe lelo? (b) Mulandu nshi ukubelenga no kusambilila Baibolo cila bushiku kwacindamina pa kushipikisha umuunga mu mubili wesu?

⁷ Ndakai, Yehova apeela Abena Kristu ba cishinka amaka ukupitila mu mupashi wakwe uwa mushilo, Icebo cakwe, no bwananyina bwesu ubwa Bwina Kristu. Na ifwe kuti twapoosa ifisendo fyesu pali Yehova mwi pepo nga filya Paulo acitile. (Amalumbo 55:22) Nangu ca kuti Lesa te kuti afumyepo amesho tukwata, kuti atupeela amano ya kushipikisha amesho, nangu ni yalya amesho ayaafya ukushipikisha. Kabili Yehova kuti atupeela no bukose—ukutupeela “ukucishamo kwa maka”—ku kutwaafwa ukushipikisha.—2 Abena Korinti 4:7.

⁸ Bushe kuti twapokelela shani ukwaafwa kwa musango yo? Tufwile ukusambilila Icebo ca kwa Lesa no mukoosha, pantu tukasangamo ifya kusansamusha fyakwe. (Amalumbo 94:19) Muli Baibolo, tubelenga amashiwi ya kutufika pa mitima aya babomfi ba kwa Lesa ilyo balelomba ukuti abaafwe. Ifyo Yehova ayaswike, umwaleba na mashiwi ya kusansamusha, fisuma ukutontonkanyapo. Ukusambilila Baibolo kukatukosha ica kuti “ukucishamo kwa maka kube kwa kwa Lesa, kabili te kuntu kwafuma kuli ifwe.” Filya fine tukabila ukulya ifya kulya cila bushiku pa kuti tukose, e fyo tufwile no kubelenga Icebo ca kwa Lesa lyonse. Bushe tulacita ifi? Nga tulacita, ninshi tukamona ukuti ukuba no “kucishamo kwa maka” kulatwafwa ukushipikisha umuunga onse uwa mampalanya uo twingakwata nomba.

9. Baeluda kuti batungilila shani abali na mafya?

⁹ Baeluda ba Bwina Kristu abatiina Lesa kuti baba “ngo mwa kufisama ku mwela” nelyo “ngo mwa kubelama ku kupongoloka kwa mfula,” e kuti balacingilila ku kumanama na mafya. Baeluda, abafwaya ukuba ifi Baibolo ilondolola, balaicefya no kuba abafumaluka ilyo balelomba Yehova ukubapa “ululimi lwa basambilila” pa kuti bengeshiba ifya kwasuka abalecula na mashiwi yasuma. Amashiwi ya baeluda kuti yaba nge mfula isuma iitutalalika no kutusansamusha ilyo ifintu fyaafya. Pa “kukosesha ku cebo uwapomponteka,” baeluda cine cine balatungilila bamunyinabo ne nkashi abo nalimo abengatompoka nelyo ukufuupulwa pa mulandu wa muunga mu mubili wabo.—Esaya 32:2; 50:4; 1 Abena Tesalonika 5:14.

10, 11. Ababomfi ba kwa Lesa kuti bakoselesha shani bambi abali na mesho yabipisha?

¹⁰ Ababomfi ba kwa Yehova bonse baba mu lupwa lwakwe ulwaikatana ulwa Bwina Kristu. Ca cine, tuli “cilundwa ca munankwe,” kabili “tufwile ukutemwana.” (Abena Roma 12:5; 1 Yohane 4:11) Bushe kuti twacita shani ici? Ukulingana na 1 Petro 3:8, kuti twacite fyo pa kuba “abalangulukilana, abatemwa aba bwananyina, [kabili] aba mitima ya nkumbu” ku ba bwananyina bonse aba mu citetekelo. Kumfwa kuli balya abaleshipikisha umuunga mu mubili uulenga ubukali nga nshi, nampo nga baice nelyo bakalamba, bonse kuti twabasakamana. Kuti twacita shani ifyo?

¹¹ Tufwile ukubalangulukilako pa fyo balecula. Nga tatukwete icikuku, tatulebalangulukilako, kabili tatulebasakamana, kuti twalenga ubucushi bwabo ukubipilako, nalimo ukwabula no kwishiba ukuti natucita ica musango yo. Ukwishiba amafya yabo kufwile ukutulenga twaishiba ifyebo fya kulanda, ne fya kulanda ifyo fyebo, ne fyo twingacita. Ukuba abacetekela kabili abakoselesha kuti kwabafwa ukunashako ubwafya bonse ubo bali na bo. Nga twacita ifi kuti twabasansamusha.—Abena Kolose 4:11.

Ifyo Bamo Bashipikisha

12-14. (a) Cinshi Umwina Kristu umo acitile pa kuti ashipikishe ubulwele bwa kansa? (b) Bushe bamunyinefwe ne nkashi aba ku mupashi bamutungilile shani no kumukoselesha?

¹² Ilyo tulepalama ku mpela ya shino nshiku, “ukushikitika kwa kupaapa” kulebipilako fye cila bushiku. (Mateo 24:8) E ico, amafya kuti yaponena onse pe sonde, maka maka ababomfi ba cishinka aba kwa Yehova, abalefwaya ukucita ukufwaya kwakwe. Ku ca kumwenako, tontonkanyeni pa Mwina Kristu uwalebomba umulimo wa nshita yonse. Bamusangile na kansa kabili bamufumishe ifilundwa fyakwe fimo ku cipatala. Ilyo wene no mulume wakwe baishibe ukuti alikwete ubu bulwele, apo pene fye bapepele kuli Yehova no kupaapaata sana inshita ntali. Pa numa atile baumfwile aba mutende nga nshi. Nalyo line, alishipikishe ilyo ifintu fili bwino na lintu fyabipa, maka maka ilyo aleshipikisha amafya yalefuma ku kuundapwa.

¹³ Pa kwishiba ifya kwikala no bu bwafya, uyu nkashi aeseshe ukusambilila ifingi pali kansa. Alanshenye na badokota bakwe. Asangile mu Ulupungu lwa kwa Kalinda, Loleni!, e lyo na mu mpapulo shimbi amalyashi yalanda ifyo abantu bamo bashipikishe ubu bulwele. Kabili abelengele na malembo yasuma aya mu Baibolo ayalanga ifyo Yehova akwata amaka ya kutungilila ababomfi bakwe ilyo bali na mafya, ne fyebo fimbi ifya mwafwile.

¹⁴ Icipande cimo icalelanda pa fya kucimfya ukupelelwa calandile aya mashiwi ya mano ati: “Uwanunuka afwayo mwa kufwailo lubuli.” (Amapinda 18:1) Ici cipande kanshi catile: “Tufwile ukucincintila ukuitalusha ku bantu.”a Nkashi atile: “Abantu abengi banjebele ukuti balempepelako; bambi balentumina lamya. Baeluda babili baletuma lamya lyonse ku kwipusha ifyo nali. Nalepokelela amaluba na makalata ayengi apali amashiwi yakukoselesha. Bamo balempekanishisha ne fya kulya. Kabili, abengi baliipeeleshe ukuntwala ku cipatala ku kuundapwa.”

15-17. (a) Bushe Umwina Kristu umo ashipikishe shani amafya yaishile pa mulandu wa kusangwa mu masanso ya pa musebo? (b) Bushe aba mu cilonganino bayafwile shani?

¹⁵ Umuntu uwabombele Yehova imyaka iingi mu New Mexico, United States of America, ali mu busanso bwa pa musebo ubwa bamotoka imiku ibili. Alifunike umukoshi ne fipeya, ukulenga ubulwele bwa mfyufyu alelwala pa myaka 25 ukubipilako. Atila: “Calengafya nga nshi ukwinuna umutwe no kusenda icintu conse icifinine ukucila amakilogramu yabili. Lelo ipepo lya mukoosha kuli Yehova lyalingafwa nga nshi. Kabili ifipande fya mu Ulupungu lwa kwa Kalinda ifyo twasambilila na fyo fyalingafwa. Cimo calandile pali Mika 6:8, ati ukwenda bufuke bufuke na Lesa kwishiba umo wapelebela. Ici calingafwile nga nshi ukwishiba ukuti te mulandu ne fyo nali, nshifwile ukufuupulwa, nangu ca kuti inshita nalebomba mu kushimikila tayali nge fyo nalefwaya. Icacindama kumubombela no bufwayo busuma.”

¹⁶ Kabili ashimika ati: “Baeluda lyonse balentasha pa fyo nalebombesha ukusangwa mu kulongana no kuya mu butumikishi bwa mwi bala. Abaice balenkumbatila pa kumposha. Bapainiya abatumikishi bali no mutembo sana kuli ine kabili ilingi baletelula inshita yabo ilyo nalwalisha ica kuti teti ndeya mu kushimikila. Nga imiceele taili bwino, balensenda ku fipempu fya kubwelelamo nelyo ukunjeba ukusangwako ilyo baletungulula amasambililo ya Baibolo. Kabili apo nshalekumanisha ukusenda icola ca fitabo, bakasabankanya bambi balebika impapulo shandi mu fyola fyabo ilyo naya mu mulimo wa kushimikila.”

¹⁷ Moneni ifyo baeluda ba mu cilonganino na basumina bambi bayafwile aba bankashi babili ukushipikisha amalwele yabo ayali nge myunga. Pali ifyo bacitile ku cikuku pa kuti babafwe ukukwata ifyo balekabila lwa ku mupashi, ku mubili, na mu mutima. Bushe ici tacilemukoselesha ukwaafwa bamunyinenwe bambi ne nkanshi abali na mafya? Imwe mwe baice na imwe kuti mwayafwa aba mu cilonganino mwaba abali ne myunga mu mubili.—Amapinda 20:29.

18. Kukoselesha nshi twingasanga mu malyashi yalanda pa bumi bwa bantu ayaba muli bamagazini ba Ulupungu lwa kwa Kalinda na Loleni!?

¹⁸ Muli bamagazini ba Ulupungu lwa kwa Kalinda na Loleni! mwaba amalyashi ayengi ayalanda pa fyacitikile baNte abashipikisha, kabili abacili baleshipikisha amafya. Ilyo mulebelenga lyonse ifipande fya musango yo, mukamona ukuti bamunyinenwe ne nkashi abengi mwi sonde lyonse balishipikisha amafya ya ndalama, ukufwilwa abatemwikwa babo mu tuyofi, ne nshita shayafya ilyo kuli inkondo. Bamo balwala amalwele yalemanika. Abengi te kuti bacite imilimo yayanguka iyo abantu abatuntulu bashacindamika. Amalwele yabo yaba bwesho nga nshi, sana sana ilyo bafilwa ukubombako imilimo ya Bwina Kristu nge fyo bengafwaya. Ala balatasha nga nshi ifyo bamunyinabo ne nkashi, abaice na bakalamba, babafwa no kubatungilila!

Mwaliba Amapaalo mu Kushipikisha

19. Mulandu nshi Paulo alesekelela nangu ali na mesho na mabunake ayali nge myunga ?

¹⁹ Paulo alisekelele ilyo amwene ifyo Lesa amukoseshe. Atile: “Ndetakisho kucisha no kucankwa mu fya kunaka fyandi, ukuti amaka ya kwa Kristu yekale pali ine. E ico mbekelwa mu fya kunaka, mu miponto, mu fya bucushi, mu fya kupakasa, mu fya lumanimani, pa mulandu wa kwa Kristu; pantu ilyo nanaka, e lyo naba na maka.” (2 Abena Korinti 12:9, 10) Pa mulandu wa fyacitikile Paulo, ali na maka ya kusosa no kucetekela ati: “Te kutila ndesoselo kubulwa, pantu ine ninsambililo kubo wateko mutima mu miikalile iyo ndimo. Naishibilo kucendwa; naishibila no kusangalala. Mu fintu fyonse ne misango yonse nasambilishiwe nkama iya kwikuta no kuba ne nsala, kabili iya kufulilwa no kubulwa. Ndi na maka aya kucite fintu fyonse mu ulenkoselesha.”—Abena Filipi 4:11-13.

20, 21. (a) Mulandu nshi twingasangila insansa mu kwetetula pa fintu “ifishimoneka”? (b) Fintu nshi fimo “ifishimoneka” ifyo mwenekela ukumona muli Paradise wa pe sonde?

²⁰ Kanshi nga twashipikisha umuunga onse uwa mampalanya uo tukwete mu mubili, kuti twasanga insansa ishingi mu kulanga bonse ukuti amaka ya kwa Yehova yalengwa ukufikapo mu kunaka. Paulo alembele ati: “Tatunenuka . . . [Ubuntu] ubwa mu kati bwena bulengwa cipya cipya ubushiku no bushiku. Pantu ubucushi ubwayanguka ubwa kashita akanononono, buletuteyanishe cintu ca bukata icapulishamo ica muyayaya, pa kuti . . . [tulolesha] ifishimoneka; pantu . . . ifishimoneka fya muyayaya.”—2 Abena Korinti 4:16-18.

²¹ Abantu ba kwa Yehova abengi lelo benekela ukwikala muli iyi Paradise ya pe sonde no kuipakisha amapaalo alaya. Amapaalo ya musango yo kuti yamonwa nga ‘yashimoneka’ kuli ifwe muno nshiku. Lelo, inshita ilepalama lubilo lubilo ilyo tukamona ayo mapaalo na menso yesu, no kuipakisha yene umuyayaya. Amapaalo yamo yakaba ya kukanaponenwa na kabili na mafya yaba nge myunga! Umwana wa kwa Lesa “asopolole imilimo ya kwa Kaseebanya” no ‘kufubalisha uukwete amaka ya mfwa.’—1 Yohane 3:8; AbaHebere 2:14.

22. Kucetekela nshi no mupampamina ifyo tufwile ukukwata?

²² E ico, te mulandu no musango wa muunga mu mubili uletukwema lelo, natutwalilile ukushipikisha. Nge fyo cali kuli Paulo, tukakwata amaka ya kucite fyo pa kwafiwa na Yehova, uupeela amaka kuli ifwe. Ilyo tukekala muli Paradise wa pe sonde, tukacindika Yehova Lesa wesu cila bushiku pa milimo isuma akatucitila.—Amalumbo 103:2.

[Futunoti]