Ilyashi Ilikosha Icitetekelo no Kulenga Ukushipa Ilya Nte sha kwa Yehova mu Ukraine

ABANTU ba kwa Lesa muno nshiku balapakaswa nga filya cali ku Bena Kristu ba mu kubangilila. (Mateo 10:22; Yohane 15:20) Ni mu fifulo fye ifinono umwatala amuba ukupakasa kwatantalila nelyo ukwatapata nga kulya kwali mu Ukraine, umo umulimo wa kushimikila pa Bufumu wabindilwe pa myaka 52.

Icitabo ca 2002 Yearbook of Jehovah’s Witnesses cashimike pa bantu ba kwa Lesa muli cilya calo. Lyashi lya citetekelo, ilya kushipa, kabili ilya kukoselesha mu nshita ifintu fibipile. Ifyakonkapo e fyo bamo batashishe kwi ofeshi linono ilya Nte sha kwa Yehova mu Ukraine.

“Nimpwisha ukubelenga 2002 Yearbook. Ilyo nalebelenga pa mulimo wenu mu Ukraine nalelila fye. Mukwai ndefwaya ukumwishibisha ifyo nakoseleshiwe ku ca kumwenako cenu ica kupimpa ne citetekelo cakosa. Ndayumfwa uwa cilumba ukuba mu lupwa lwa ku mupashi ulo na imwe mwabamo. Ndemutasha ukufuma pa nshi ya mutima wandi!”—Andreé, France.

“Nshishibe ifya kulanda pa kutasha imwe na Yehova pali 2002 Yearbook. Ilyo nalebelenga ifyacitikila bamunyinefwe abaikele mu fifungo na mu nkambi sha kucushiwilwamo, ifilamba fyaleilukutila fye. Ndakumbwa ukushipa kwabo. Nangu ca kuti ndi Nte pa myaka 27, kuti nasambililako kuli aba bamunyinefwe ne nkashi. Bakoseshe icitetekelo candi muli Shifwe wa mu muulu, Yehova.”—Vera, uwa ku calo baleita kale ati Yugoslavia.

“Ndi uwa nsansa pa kulemba uno kalata pa mulandu wa ca kumwenako cenu icisuma mu kushipikisha na mu busumino mu myaka yonse ilyo kwali ukukaanya. Ukucetekela Yehova umupwilapo no kupampamina pa kufwaya ukutwalilila aba busumino kulamuletela umucinshi. Kabinge, ukuicefya kwenu ilyo mwale-eshiwa kulakosha ubushinino bwandi ubwa kuti Yehova talekelesha abantu bakwe. Pa mulandu wa ca kumwenako cenu icisuma ica kushipa, ukushangila, no mukoosha, te kuti tuilishanye sana nga twaponenwa na mafya ayanono ayo tulepitamo.”—Tuteirihia, French Polynesia.

“Pa numa ya kubelenga Yearbook, natile mpaka fye mulembele kalata. Nalikoseleshiwa nga nshi pa fyacitike ifya kukoselesha. Nayumfwile uwa cilumba pa kuba mu cilonganino ca cishinka, icaikatana, icitungululwa na Shifwe wa kutemwa, uusakamana, utupeela inkosho pa nshita yalinga. Calinkalipe pa kucula no kufwa ukwa babomfi ba kwa Yehova abengi abashipa kabili abapimpa. Lelo na kabili nalisekelele pa mulandu wa kushipa kwabo no kupimpa, abantu abengi balisambilile icine kabili balishiba Shifwe wa kutemwa.”—Colette, Netherlands.

“Ine no mukashi wandi twatile kano tumulembele kalata pa kuti tumwebe ukuti ilyo twalebelenga ilyashi pali Ukraine muli Yearbook twalikoseleshiwe icine cine. Imwe bamunyinefwe aba busumino mwatwimikila ica kumwenako ca kushipikisha ilyo amafya yatapata yaletwalilila pa nshita ntali. Nga filya Amapinda 27:11 yalanda, Yehova afwile alisaminwe pa kwishiba ukuti bamunyinefwe aba busumino ku Ukraine balitwalilile aba mpomfu te mulandu ne micitile yabipa iya kwa Kaseebanya.”—Alan, Australia.

“Ilyo nabelengele pali bamunyinefwe mu Ukraine ifilamba fyapene fipone. Fingi bashipikishe—ukwikala mu cifungo pa myaka, ukucushiwa, ukufyenenkeshiwa, no kupaatulwa ku lupwa. Ndefwaya ukweba bamunyinefwe bonse abacili mu filonganino fyenu ukuti nalibatemwa nga nshi kabili nalibacindika. Ukushipa kwabo no kushangila filanenga ukumfwa bwino. Nalishiba intulo ya maka yabo, umupashi wa kwa Yehova. Yehova alipalamina kuli ifwe, kabili alafwaya ukutwafwa.”—Sergei, Russia.

“Nalibelenga 2002 Yearbook, kabili nalililile. Bamunyinefwe abengi ne nkashi mu cilonganino cesu balamulandapo. Mwalicindama nga nshi. Ndi uwa nsansa pa kuba mu lupwa lwakule fi ulwa ku mupashi.”—Yeunhee, South Korea.

“Ninkoseleshiwa nga nshi pa citetekelo cenu, ukushipikisha no kutemwa kushipwa ukwa kuli Yehova no Bufumu bwakwe. Limo limo tulafilwa ukucindamika ubuntungwa tuipakisha ne fya kulya fya ku mupashi ifyo Yehova atupekanishisha. Lelo, imwe mwalicindamika ifi. Ica kumwenako cenu mu citetekelo ciletwafwa ukwishiba ukuti nga twaba na bucibusa bwapalamisha na Lesa, akatupeela inkosho ilyo tulepita mu mesho yalekanalekana.”—Paulo, Brazil.

“Nalikwete ishuko lya kubelenga pa fyamucitikile muli 2002 Yearbook. Fyalinkoselesha nga nshi, no kucilisha ilyashi pa fyacitikile Nkashi Lydia Kurdas. Nayumfwile uwapalama kuli uyu nkashi.”—Nidia, Costa Rica.

“Napwisha lelo ukubelenga 2002 Yearbook. Ilyo nalebelenga, icitetekelo candi muli Yehova calikoselako. Cimo ico nshakalabe lyashi ilyasabankanishiwe ilya kutwishika abaletungulula. Lyansambilishe ukukanatwishika bamunyinefwe abatungulula. Natasha nga nshi! Ici ca kulya ca ku mupashi cilakoselesha kabili cilatupekanishisha libela ku nshita ya kweshiwa.”—Leticia, United States.

“Twatasha nga nshi pali Yearbook ishaiwamina. Bakasabankanya abengi babelengele pa muku wa kubalilapo pa mulimo wa bamunyinefwe mu Ukraine. Bamunyinefwe kuno balikoseleshiwa. Abengi, no kucilisha abacaice, balilundako umulimo wa mwi bala. Bamo balitendeka ukubomba bupainiya bwa nshita yonse nelyo ubwa kwafwilisha. Bonse balikoseleshiwa pa malyashi ya bamunyinefwe ne nkashi ababombele Yehova mu nshita ya cibindo.”—Komiti wa mulimo pa cilonganino cimo mu Ukraine.

Ubusumino bwa bamunyinefwe mu Ukraine cine cine bulakosha bantu ba kwa Yehova isonde lyonse. Na kuba, ukubelenga lyonse amalyashi ya kukoselesha muli Yearbook cila mwaka ni nshila yawamisha iya kukosha icitetekelo cesu no kushipikisha muli shino nshiku isha ku mpela.—AbaHebere 12:1.