Hana Alapa Umulapo

Ilambo lya mutende balelilila pe tempele lya kwa Yehova. Pa numa ya kufuma mu muputule wa kuliilamo, Hana apepa kuli Lesa. (1 Samwele 1:9, 10) Apaapaata ukuti: “Mwe Yehova wa milalo, ukulolesha nga mulelolesho bulanda bwa kwa cishiko wenu, no kunjibukisha, nga tamwakalabe cishiko wenu, kabili mwapeela cishiko wenu umwana mwaume, e lyo nkamupeela kuli Yehova inshiku shonse sha mweo wakwe; kabili icibeyo tacakabeye ku mutwe wakwe.”—1 Samwele 1:11.

Hana alomba fye ifyo alefwaya. Alomba umwana umwaume kabili alapa ukuti akamupeela kuli Yehova pa kuti akabe umuNasiri. (Impendwa 6:1-5) Pa kuti Hana afikilishe ulya mulapo umulume e uli no kusuminisha, kabili ifyo Elkana acita fyalanga ukuti asuminishako ku mulapo wa mukashi wakwe uo atemwa nga nshi.—Impendwa 30:6-8.

Ilyo Samwele acili fye akanya, Hana atendeka ukumusambilisha pali Yehova. Bushe nalabako ku mulapo alapile? Nakalya! Atila: ‘[Ilyo fye umwana akasumuka, NW] nkamutwala no kuleka amoneke ku cinso ca kwa Yehova no kwikala kulya pe.’ Ilyo Samwele asumuka, nalimo pa myaka itatu nelyo ukucilapo, Hana afikilisha umulapo wakwe kabili atwala Samwele kwi tempele lya kwa Yehova.—1 Samwele 1:21-24; 2 Imilandu 31:16.

Ilyo batuula ilambo kuli Yehova, Hana no mulume wakwe batwala Samwele kuli Eli. Hana afwile naikata umwana wakwe pa kuboko ilyo aleeba Eli ukuti: “Mwe shikulu, umweo wa mutima wenu, mwe shikulu, ni ne mwanakashi uwaiminine lubali kuli imwe muno, ukupepa kuli Yehova. Uyu mwaice e o nalombele; kabili Yehova nampeele co nalombele kuli wene. E ico na ine namwashima kuli Yehova; inshiku shonse isho akabapo, wene wa kwashima kuli Yehova.” E fyo Samwele atendeke ukubombela Lesa mpaka ne mfwa yakwe.—1 Samwele 1:25-28; 2:11.