Alicetekele Lesa kabili Alibikile Amano ku Fyalecitika

Eliya alicetekele ukutila Yehova akapwisha icilala, lelo taishibe ilyo Yehova ali no kucite fyo. Nomba, cinshi uyu kasesema alecita ilyo icilala cishilapwa? Umfweni ifyo icikomo 43 cisosa. Citila: “E lyo atile ku mulumendo wakwe, ‘Shi nina, uloleshe lubali kuli bemba.’ Na o alininine, alalolesha, no kutila, ‘Takuli kantu.’ E lyo [Eliya] atile, Bwelelako imiku cinelubali.” Kuli Eliya kuti twasambililako ifintu fibili. Ica kubalilapo, moneni ifyo uyu kasesema acetekele ifyalandile Yehova. E lyo mumone ne fyo ali uwalola.

Ica bubili, moneni ifyo Eliya aali uwalola. Aebele umubomfi wakwe ukubwelela ku lupili, te muku fye umo nelyo ibili, lelo imiku 7! Ulya mubomfi afwile alinakile pantu abwelele ku lupili imiku iingi, nomba Eliya ena alefwaisha ukumona icishibilo kabili tanenwike. Ilyo umubomfi abweleleko pa muku walenga 7, aishileeba Eliya ukuti: “Moneni! Kuli ikumbi ilinono ngo lupi lwa muntu lilefuma muli bemba.” (Icikomo 44) Elenganyeni ulya mubomfi natambulula ukuboko kabili alepima mu lupi, ubunono bwe kumbi amwene lilefuma muli Bemba Mukalamba.b Afwile tamwene ukuti lilya ikumbi kuti lyaleta imfula. Lelo Eliya ena alishibe ukuti lyacindeme. Bwangu bwangu aebele umubomfi wakwe ukuti: “Nina, kebe Ahabu auti: ‘Kulika iceleta kuli bakabalwe! Kabili kabiye, epali imfula yakucilikila!’”

Na kabili Eliya alicitile icintu cimo ico na ifwe twingapashanya. Na ifwe twikala mu nshiku sha kulekelesha kabili twalishiba ukuti nomba line Lesa akacita ifyo afwaya. Eliya alilolelele mpaka icilala capwa; ababomfi ba kwa Lesa pali lelo na bo balalolela ukupwa kwa calo cabipa. (1 Yohane 2:17) Nga filya fine Eliya aali, na ifwe tufwile ukuba abalola mpaka fye Yehova Lesa akonaule cino calo. Yesu, Umwana wa kwa Lesa aebele abasambi bakwe ukutila: “Mulelola, pantu tamwaishiba ubushiku ubo Shikulwinwe akesa.” (Mateo 24:42) Bushe Yesu aloseshe mu kuti abasambi bakwe tabali na kwishiba nangu panono ilyo impela yali no kwisa? Iyo, pantu alilandile sana pa fyo icalo cikaba mu nshiku sha kulekelesha. Bonse kuti twasambilila ifya kwishibilako ukuti “impela ya bwikashi” naipalama.—Mateo 24:3-7.c