Bushe Mulingile Ukulingulula Ilyo Mushilacetekela?

Kafundisha mukalamba pa koleji ya fya mipepele mu United States atile: “Bengi abaitunga ukuti ni bakapepa, ababa bakapepa pa kuti fye belabomfya amaka yabo aya kupelulula.” Asosele no kuti, “Bafwaya fye ukusumina fyonse ‘ukwabula ukushininkisha nga fya cine.’”

ICO alelandapo ca kuti, abantu abengi abatila balisumina mu mipepele tabatontonkanyapo pa co basuminina mu fyo basumina nelyo nampo nga ca kuti ifyo basumina fya cine. E mulandu wine abengi bashimunukila ukulanda pa mipepele.

Ku ca bulanda, ifintu ificitwa pamo nga ukubomfya ifipasho mu kupepa no kupepa amapepo ya kusungila ku mutwe, na fyo filenga bamo ukukanalingulula. Ukucita ifi twalandapo, pamo ne fikuulwa fyapuulama, amawindo ya makalasi yayemfiwa nga nshi, ne nyimbo sha kucincimuna, e fyapanga imipepele ya bengi. Nangu line amacalici yamo yatunga ukuti ifyo bacetekela fyafuma muli Baibolo, ubukombe bwabo ubwa kuti ‘cetekeleni muli Yesu e lyo mukapusuka’ bulanenuna bambi ku kusambilila Baibolo. Bamo babila ukuti ifishinte fya Bwina Kristu kuti fyapwisha amafya ya mu bwikashi nelyo aya bupolitiki. Cinshi catumbuka muli ici?

Kalemba umo uwa fya mipepele alemba pa ficitika mu North America, ati: “UbuKristu . . . buba fye bwa pa kanwa, [kabili] abakonka ubuKristu tabasambilishiwa bwino mu citetekelo.” Kasapika umo atile, United States “calo ca bantu abashaishiba Baibolo.” Ukulanda fye icishinka, na mu fyalo fimbi umo batunga ukuti mwaba ubuKristu, abengi tabaishiba Baibolo. Ne mipepele iingi iishili ya Bwina Kristu na yo taikoselesha abantu ukupelulula lelo, ikomaila pa kwimba, pa mapepo ya kubwekeshabwekeshapo, no kwetetula pa fyalekanalekana ifisanshamo amaele, ukucila ukutontonkanya pa fisuma kabili ifya mano.

Lelo, mu bumi bwabo ubwa cila bushiku, abantu bamo bene abashangwa ukubebeta nga ca kuti ifisumino fya mipepele yabo fya cine, ilingi balabebeta bwino bwino imilandu imbi. Bushe tacimusungusha ukuti umuntu uusapika sana pa kushita fye motoka—iyikonaika no kupooswa bushiku bumo—kuti alanda pa mipepele yakwe ukuti, ‘Nga ca kuti yali fye bwino ku bafyashi bandi, ninshi na kuli ine ili fye bwino’?

Nga cine cine tulafwaya ukuteemuna Lesa, bushe tatufwile ukubeebeeta bwino bwino nga ca kuti ifyo twasumina fya cine? Umutumwa Paulo alandile pali bakapepa bamo aba mu nshiku shakwe abali ‘abapimpa kuli Lesa, lelo, te kupimpa umwabelo kwishiba.’ (Abena Roma 10:2) Aba musango yo kuti twabapashanya ku muntu baingisha incito ya kupenta, uwabombesha ukupenta ing’anda lelo abomfya penti yapusana pantu akaana ukumfwila ifyo umwine wa ng’anda amweba ukucita. Uulepenta napamo kuti asekelela pa mulimo wakwe, lelo, bushe umwine wa ng’anda alatemwa?

Bushe cinshi citeemuna Lesa pa kupepa kwa cine? Baibolo yasuka ati: “Ukupaapaata uku kusuma kabili kwa kusekelelwa ku cinso ca kwa Lesa Umupusushi wesu, uufwaya abantu bonse ukupusuka no kufika ku kwishibe Cine.” (1 Timote 2:3, 4) Bamo kuti batontonkanya ati ukwishiba kwa musango yo te kuti kusangwe mu mipepele iingi iya pali lelo. Lelo, tontonkanyeni—nga ca kuti kufwaya kwa kwa Lesa ukuti abantu bafike ku kwishiba icine, bushe kuti abafyenga pa kufisa cene kuli bene? Tacumfwene na Baibolo, iisosa ati: “Nga wafwaya wene [Lesa], kuti asangwa kuli iwe.”—1 Imilandu 28:9.

Bushe Lesa aishibisha shani ku bamufwayafwaya mu bufumacumi? Icipande cikonkelepo calaasuka ico cipusho.

Fwayeni Lesa no Mutima Wenu no Muntontonkanya

UbuKristu bwa cine bukoselesha ukubomfya umutima no muntontonkanya pa kukuula icitetekelo iciteemuna Lesa.

NA KUBA Yesu Kristu, uwatendeke ubuKristu, asambilishe ati tufwile ukutemwa Lesa ‘ku mutima onse’ na ‘ku mweo onse,’ e lyo na ‘ku kutontonkanya kwesu konse,’ nelyo ku mano. (Mateo 22:37) Ca cine, tulakabila sana ukutontonkanya mu kupepa kwesu.

Ilyo aleeba abalekutika kuli wene ukutontonkanya pa fyo alesambilisha, ilingi Yesu alesosa ati: “Muletila shani?” (Mateo 17:25; 18:12; 21:28; 22:42) E fyo no mutumwa Petro asosele ilyo alembele abasumina banankwe pa kuti ‘acincishe ukutontonkanya kwabo.’ (2 Petro 3:1, NW) Umutumwa Paulo, mishonari wa kubalilapo uwaendawike sana pali bonse, akonkomeshe Abena Kristu ukubomfya “amaka ya kupelulula, NW” no ‘kulinge cabo kufwaya kwa kwa Lesa, icisuma kabili ica kutemuna kabili icapwililila.’ (Abena Roma 12:1, 2) Ni lintu fye babeebeeta sana ifyo basumina e lintu Abena Kristu bengakuula icitetekelo iciteemuna Lesa kabili icingabafwa ukucimfya amafya yesa mu bumi.—AbaHebere 11:1, 6.

Pa kwafwa bambi ukukwata icitetekelo ca musango yo, bakabila ba Bwina Kristu aba kubalilapo ‘balepelulushanya na bo ifya mu malembo, baleilula no kushininkisha’ ifyo balesambilisha. (Imilimo 17:1-3) Uko kupelulushanya kusuma kwalengele aba mitima ya bufumacumi ukwankulako bwino. Ku ca kumwenako, abengi mu musumba wa mu Berea uwa Makedonia “bapokelele icebo [ca kwa Lesa] no kucankwa konse, balefwayafwaya mu malembo akasuba na kasuba, beshibe ifi fintu [ifyo Paulo na banakwe baleilula] nga ni fyo fine.” (Imilimo 17:11) Muli ili Lembo muli ifintu fibili ifyo tulingile ukulandapo. Ica ntanshi, abena Berea balicankilwe ukukutika ku Cebo ca kwa Lesa; ica bubili, tabasumine ukuti ifyo baumfwile fya cine ukwabula ukutontonkanyapo, lelo babeebeetele Amalembo pa kuti bashininkishe nga fya cine. Mishonari wa Bwina Kristu, Luka alicindike no kutasha abena Berea pali ici, kabili balebeta ati “abakankaala.” Bushe na imwe muba no mutima uukankaala ilyo mulebeebeeta ifya ku mupashi?

Umuntontonkanya no Mutima Fibombela Pamo

Nga fintu tulandilepo kale, ukupepa kwa cine kusanshamo umuntontonkanya no mutima. (Marko 12:20) Tontonkanyeni pa cilangililo cili mu cipande cifumineko ica muntu baingishe incito ya kupenta uwabomfeshe penti yapusana pa kupenta ing’anda. Nga ca kuti alyumfwikishe ifyo uwa mwingishe incito alemweba, nga abombele incito yakwe no mutima onse kabili nga alicetekele ukuti uwamwingishe ncito alasekelela pa mulimo abombele. E fyo caba na ku kupepa kwesu.

Yesu atile, “bakapepa bene bene bakapepela Tata mu Mupashi na mu cine.” (Yohane 4:23) E co, umutumwa Paulo alembele ati: “E ico na ifwe . . . tatwaleka kumupepela, no kulombo kuti mwisulemo ukwishibo kufwaya kwakwe mu mano yonse no mucetekanya ifya bumupashi, ku kuleka mwende umwawamina Shikulu ku kutemuna konse.” (Abena Kolose 1:9, 10) Uko “ukwishiba” kwafwa abantu bafumaluka ukupepa ku mutima na ku mweo no kucetekela sana pantu ‘bapepe co baishiba.’—Yohane 4:22.

E mulandu wine Inte sha kwa Yehova bashibatishisha utunya nelyo abatendeka nomba line ukusambilila Baibolo abashilaishiba bwino bwino Amalembo. Yesu atumine abakonshi bakwe ati: “Kalengeni aba nko shonse ukuba abasambi, . . . mulebasambilisha ukubaka fyonse ifyo namwebele.” (Mateo 28:19, 20) Ni lintu fye baishiba Lesa bwino bwino e lyo abasambi ba Baibolo abafumaluka bengapingulapo ukumupepa ukulingana no ko kwishiba. Bushe muletukuta ukuba no ko kwishiba kwafikapo?