Amapepo Ya Lupwa Yakalenga Mukapusuke!

ELENGANYENI ifyo “inkondo ya bushiku bukalamba ubwa kwa Lesa Wa Maka Yonse” ikatiinya! (Ukus. 16:14) Kasesema Mika alilondolwele bwino mu mashiwi ya mampalanya ifikacitika ilyo alembele ukuti: “Impili shikasunguluka . . . , na mwi lungu mukapaatukana, kwati lipula ku mulilo, kwati menshi ayalepongololwa pa matelo.” (Mika 1:4) Cinshi cikacitikila abashibombela Yehova? Icebo ca kwa Lesa citila: “Abakepaiwa kuli Yehova, bakakumana pano isonde, ukufuma ku mpela ukufika na ku mpela.”—Yer. 25:33.

Uku kusoka kufwile ukulenga imitwe ya ndupwa ukubikako na bafyashi abashimbe abakwata abana abakulileko ukuipusha ukuti: ‘Bushe abana bandi bakapusuka Armagedone?’ Na kuba abafyashi abashimbe e bafula na sana. Baibolo yalitweba bwino bwino ukutila abana bakapusuka Armagedone nga ca kutila bali abakosa mu kupepa Yehova ukulingana ne fyo balingile ukuba pa mushinku wabo.—Mat. 24:21.

Ico Ukukwata Amapepo ya Lupwa Kwacindamina

Mwe bafyashi, bikeni sana amano ku kukusha abana benu “ukulingana no kusalapula kwa kwa Yehova no kukonkomesha kwakwe.” (Efes. 6:4) Calindama sana ukusambilila Baibolo na bana benu. Tufwaya abana besu ukuba nga Bena Kristu ba mu Filipi, abo Paulo atashishe pa kuitemenwa ukulaumfwila Yehova. Abalembeele ukuti: “Mwe batemwikwa bandi, ifyo mwaba ne cumfwila lyonse, ilyo ndipo kabili maka maka ilyo nshilipo, mulebombela ipusukilo lyenu no mwenso no kututuma.”—Fil. 2:12.

Bushe abana benu balakonka amafunde ya kwa Yehova ilyo mushilipo? Inga nga bali ku sukulu, bushe balayakonka? Kuti mwayafwa shani abana benu ukwishiba ukuti amafunde ya kwa Yehova yasuma pa kutila baleyakonka na lintu mushilipo?

Amapepo ya lupwa kuti yalenga abana benu ukulaumfwila Yehova na lintu bali beka. E ico, natulande pa fintu fitatu ififwaikwa pa kuti ukusambilila Baibolo no lupwa lwenu kule-enda bwino.

Mwilacilaukila

Baibolo itila, bamalaika, abana baume ba kwa Lesa, baletwa ukuya ku cinso ca kwa Lesa pa nshita iyasalwa. (Yobo 1:6) E fyo na imwe mulecita ku bana benu. Saleni ubushiku ne nshita ya kukwatilapo Amapepo ya Lupwa lyonse, kabili mulebukonka. E lyo kabili kuti mwasalako inshita na imbi iyo mwingalakwatilapo Amapepo ya Lupwa nga kwacitika fimo ifyapumfyanya.

Ilyo imyeshi ileya ilepita, te kwesha ukutendeka ukucilaukila. Ibukisheni ukuti abana benu e masambililo yenu aya Baibolo ayacindamisha. Na lyo line, Satana kuti atemwa ukubalufya. (1 Pet. 5:8) Nga ca kutila mwafilwa ukukwata Amapepo ya Lupwa pa mulandu fye wa kutamba TV nelyo ukucita ifintu fimbi ifishacindama sana, ninshi Satana amucimfya.—Efes. 5:15, 16; 6:12; Fil. 1:10.

Mulelanda pa Fingamwafwa

Inshita ya Mapepo ya Lupwa, te nshita ya kusambilila fye ifyo mushaishiba. Mulelanda pa fingafwa ulupwa. Finshi ifyo fine? Limo kuti mwalanda pa fingafwa abana benu mu nshiku shili ku ntanshi nelyo imilungu ikakonkapo. Ku ca kumwenako, kuti mwapituluka na bo mu fyo bengalanda ilyo baleshimikila. Abaice balomfwa bwino ukucita icintu nga nabacishiba bwino. Ukupituluka mu fya kulanda pa kushimikila no kulanda pa fya kwasuka abakaana ukubashimikila, kuti kwayafwa sana abana ukushipa ilyo baleshimikila pa Bufumu mu nshila shalekanalekana.—2 Tim. 2:15.

Kuti mwapituluka na mu fingafwa abana benu ukwishiba ifya kucita pa kuti belakonkelela abanabo. Pa kulanshanya no lupwa lwenu pali uyu mulandu, kuti mwabomfya icipandwa 15 mu citabo citila Ifipusho Abacaice Bepusha—ne Fyasuko Fingabafwa, Ibuuku 2. Pe bula 132 na 133 muli ici citabo, paliba ifyebo pa kamutwe katila “Ifyo Nkacita Abanandi nga Balefwaya Mbakonkelele.” Ifyebo fyabapo filalanga ifya kucita kabili filapeela na bacaice ishuko lya kulanda pa fyo abene balemona ukuti e fingabafwa. Amashiwi yaba pe samba, pe bula 133 yakoselesha abacaice ukuti: “Pituluka na bafyashi bobe nangu no munobe uwa mano mu fyo wingasuka.” Kuti cawama mu nshita mu nshita, mulepituluka mu fyebo fya musango yu pa Mapepo ya Lupwa.

Amapepo ya lupwa yapeela abafyashi ishuko lya kulanda pa milimo yalekanalekana iyo abana bengabombela Lesa. Mu citabo ca Abacaice Bepusha Ukuti, Ibuuku 2, mwaliba ifyebo ifisuma mu cipandwa 38, icitila, “Finshi Ifyo Nkacita mu Bumi Bwandi?” Ilyo mulelanshanya ici cipandwa, afweni umwana wenu ukwishiba ukuti ukubombela Yehova e cintu icisuma ico engacita pa calo. Afweni umwana wenu ukutemwa bupainiya, umulimo wa pa Bethel, no kufwaya ukusangwa kwi Sukulu lya Kukansha Ilya Butumikishi, nelyo ukubomba umulimo uuli onse umbi uwa nshita yonse.

Ica ku mucinkulako ni ci: Abafyashi bamo abafwaya abana babo ukubombela Lesa, balabika sana amano ku fyo bengatemwa abana babo ukuba ica kuti balalaba no kutasha abana babo pa fisuma ifyo batampa kale ukucita. Kwena cisuma ukukoselesha abana benu ukukwata ubuyo bwa kubombela pa Bethel no bwa kuba bamishonari. Lelo ilyo mulebakoselesha, mulecenjela ukuti imilandile yenu ilabakalifya nelyo ukulenga babe no bulanda. (Kol. 3:21) Muleibukisha ukuti umwana wenu alingile ukutemwa Yehova no mutima wakwe, tamufwile ukumupatikisha. (Mat. 22:37) E ico muletasha umwana wenu pa fisuma ifyo alecita, mwilabika fye amano ku fyo ashilecita bwino. Mwafweni ukwishiba ifisuma ifyo Yehova atucitila. Lyena lekeni umwine alecita fimo ifya kulanga ukuti alatasha Yehova pa busuma bwakwe.

Lengeni Amapepo ya Lupwa Ukumfwika Bwino

Ica butatu icilenga Amapepo ya Lupwa ukulaenda bwino, kulenga yaleumfwika bwino. Cinshi mwingacita pa kuti yaleumfwika bwino? Limo limo kuti mulekutikako na ku filangililo fya pa matepu na pa video ifyo Inte sha kwa Yehova shapanga, e lyo mwalanshanyapo. Nelyo kuti mwabelengela pamo Baibolo ngo lupwa no kwakana ifiputulwa fya kubelenga ukulingana na bantu bali mu lyashi mulebelenga.

Mu Ulupungu lwa kwa Kalinda na muli Loleni! mwaliba ifipande fimo ifingawama sana ukulanshanyapo ngo lupwa. Ku ca kumwenako, kuti mwalanshanya pa cipande ciba pe bula 31 muli Loleni! icitila “Kuti Mwayasuka Shani?” Imiku 6 pa mwaka, mu Ulupungu lwa kwa Kalinda ulwa bantu bonse mulaba “Icipande ca Baice” umuba ifipusho fya bacaice. Mulaba ne fipande fimbi ifya balumendo na bakashana ifyakwata umutwe wa kuti “Fundeni Abana Benu.”

Abafyashi abakwata abana abapungwe kuti babomfya ifipande fya “Abacaice Bepusha Ukuti” ifiba muli Loleni!, ne fipande fyaba mu citabo ca Abacaice Bepusha Ukuti, Ibuuku 2. Ilyo mulebelenga ici citabo, te kwesha ukulaba akabokoshi kaleti “Uletipo Shani?” akaba pa mpela ya cipandwa cimo na cimo. Aka kabokoshi takabelako ukupituluka mu fishinka fikalamba. Ifipusho fyabamo e fyo abafyashi bengabomfya pe sambililo lya lupwa.

Lelo te kwesha ukulenga inshita ye sambililo lya lupwa ukuba kwati ni nshita ya kulubulwisha abana. Ku ca kumwenako, tamulingile ukupatikisha umwana wenu ukumubelengela ifyo alembele pa mabula apaba akamutwe katila “Ifyebo Fyandi” nelyo fye mu fiputulwa fimbi ifya ici citabo umo bepusha umwaice ukulemba ifya ku mutima. Pa fyebo fyaba pe bula 3 pa mutwe wa kuti “Mwe Bafyashi,” paba amashiwi yatila: “Pa kukoselesha abacaice ukulalemba mu citabo cabo ifili ku mukoshi, tamulingile ukulamonamo mu citabo cabo. Nalimo inshita imbi kuti bamweba ifili mu mutima ifyo balemba.”

Nga tamulecilaukila mu mapepo ya lupwa, kabili mulelanda pa fingamwafwa, e lyo mulefilanda mu nshila ya kuti fileumfwika bwino, Yehova akamupaala. Amapepo ya Lupwa yakalenga abana benu ukubika amano ku kupepa no kuba abakosa.

[Akabokoshi pe bula 31]

Mulebikamo Ifingalenga Baletontonkanya

“Nga tulesambilisha abana besu abanono, ine na balume bandi twalepekanishisha pamo na bana besu ifya mu kulongana e lyo twabeba ukushila icikope icilelangilila ifishinka fikalamba. Limo twalecita ifilangililo pa lyashi lya mu Baibolo nelyo ukupituluka mu fya kuyalanda mwi bala. Twalebasambilisha ifyo bengomfwa ukulingana no mushinku wabo, kabili twalefilanda mu nshila ya kuti fileumfwika bwino kabili balesekelamo.”—J.M., United States.

“Pa kwafwa umwana wa musambi wandi uwa Baibolo ukumfwikisha ifyo caleba kale pa kusanga amalembo ilyo yalembelwe mwi buuku lyapombwa, twapulintile ifyebo fyaba mwi buuku lya kwa Esaya pa numa ya kufuutamo ifipandwa ne fikomo. Twalundenye amapepala pamo no kubikako ica kuyapombako. Lyena uyu kalume aeseshe ukucita ifyo Yesu acitile mwi sunagoge lya mu Nasarete. Ilyashi lyaba pali Luka 4:16-21 litila Yesu “afungulwile ili ibuuku [lya kwa Esaya] no kusanga” apalembelwe ifyo alefwaya. (Esa. 61:1, 2) Lelo ilyo uyu kalume aeseshe ukufwaya ifyebo fyaba pali Esaya icipandwa 61, alifililwe ukufisanga muli ili buuku lyapombwa ilitali ilishakwete ifipandwa ne fikomo. Ici calengele amone ifyo Yesu aishibe bwino ukubomfya amabuuku yapombwa, kabili calengele asose ati: ‘Kwena Yesu ali uwacenjela.’”—Y.T., Japan.

[Icikope pe bula 30]

Ukupituluka mu fyo abana benu bengacita kuti kwalenga belakonkelela abanabo

[Icikope pe bula 31]

Esheni na maka ukulenga Amapepo ya Lupwa ukulaumfwika bwino

Bushe Mwalitantika Inshita ya Kusambilila Baibolo?

UMWAKA wapwile, Ibumba Litungulula lyalibilishe ukwaluka kuliko nomba mu milonganine ukulenga tulekwata inshita iikalamba iya kusambilila Baibolo no kulanshanya ngo lupwa. Mwe mitwe ya ndupwa, muletungulula isambililo lya Baibolo lyonse ilya lupwa, ilingafwa abena mwenu na bana. Abaupana abashakwata abana kuti babomfya iyi nshita ku kusambilila Baibolo capamo. Bamunyina abashimbe na bankashi, abashakwata indupwa sha kusakamana, kuti balebomfya iyi nshita ku kuisambilisha Baibolo.

Abengi balitasha sana pali uku kutantika ukwa kukwata Amapepo ya Lupwa. Ku ca kumwenako, ba Kevin baeluda balembele ukuti: “Ifwe mu cilonganino, tatwishibe ne fyo twingatasha pali uku kutantika. Fwe baeluda twalilanshanya ukuti tukalasambilila ne ndupwa shesu pa bushiku bwa Mapepo ya Lupwa nga fintu Ibumba Litungulula litwebele.”

Ba Jodi, abaupwa kuli baeluda, balembele ukuti: “Twakwata abana batatu, uwa myaka 15, no wa myaka 11 e lyo no wa myaka ibili. Ni nomba line twakuukile ku cilonganino cibomfya ululimi lwa bankomamatwi. Tulapoosa inshita iikalamba pa kupekanya ifya mu kulongana konse. Nomba ifi imilonganine yalwike, natukwata ubushiku bumbi ubo tukalabomfya ku mapepo ya lupwa!”

Ba John na ba JoAnn, abaupana kabili ababomba bupainiya, balembele ukuti: “Te lyonse twalesambilila Baibolo capamo ngo lupwa pa mulandu wa kutila ifya kucita mu cilonganino fyalefula sana. Iyi mitantikile ipya lipaalo lifumine kuli Yehova kabili nga tulebomfya inshita ya Mapepo ya Lupwa ifyo ifwile ukubomfiwa, tukakosa sana mu kupepa.”

Tony, munyina umushimbe uuli ne myaka napamo 25, asala ubushiku bwa pali Cibili ukuti e bo akulaisambilisha Baibolo. Pa nshiku shimbi isha mu mulungu, e po apekanya ukulongana. Lelo, Tony atile: “Ndafwaya ubushiku bwa pali Cibili bwafika bwangu.” Mulandu nshi? “Inshita ya cungulo pali Cibili, ni nshita yandi iya kukosha bucibusa bwandi na Yehova.” Tony alondolwele ukuti: “Mpoosa ama-awala napamo yabili, ukusambilila ifingalenga napalama sana kuli Yehova. Ukukwata inshita iikalamba iya kusambilila, kulalenga ndetontonkanya pa fikomo fya mu Baibolo ifyo mbelenga.” Cinshi cifumamo? “Pali nomba ukufunda kwa kwa Yehova kulamfika sana pa mutima.” Ku ca kumwenako, alandile ukuti: “Mu citabo ca Insight, nalibelengelemo pali bucibusa bwali pali Davidi na Yonatani. Nalisambilileko sana ku fyo Yonatani atemenwe Davidi no mutima wakwe onse. Ifyo ali fyalingafwa ukwishiba bwino bwino ifyo icibusa ca cine cifwile ukuba. Ndafwaisha sana ukusambilila na fimbi ifisuma nga nshi pa bushiku bwa pali Cibili!”

Ukwabula no kutwishika, ababomfi ba kwa Yehova bonse, bakanonkelamo sana nga balebomfya bwino iyi nshita na imbi iyo batupeela ukuti tulesambililamo Baibolo no kukwata amapepo ya lupwa.