Ifipusho Ukufuma ku Babelenga

Bushe Satana Kaseebanya kuti aishiba ifyo muntu aletontonkanya?

Nelyo ca kuti tatwashininkisha, cimoneka kwati Satana nelyo ifibanda fyakwe te kuti beshibe ifyo tuletontonkanya.

Moneni amashina yabomfiwa ukulondolola Satana. Etwa ati Satana (Uukaanya), Kaseebanya (Uwa Bukwakwa), Icisoka (ishiwi lyapalana no Ufutika), Uutunka, kabili Wa bufi. (Yobo 1:6; Mateo 4:3; Yohane 8:44; 2 Abena Korinti 11:3; Ukusokolola 12:9) Pali aya mashina tapali ililelangilila ukuti Satana kuti aishiba ifyo abantu batontonkanya.

Lelo, Yehova Lesa ena bamulondolola nga “uulabule mitima.” (Amapinda 17:3; 1 Samwele 16:7; 1 Imilandu 29:17) Pa AbaHebere 4:13 patila: “Takwaba cibumbwa icishimoneka ku cinso [ca kwa Yehova], lelo ifintu fyonse fyaba ubwamba kabili fyaba pa mbilibili ku menso ya uyo tukalubululako.” Te ca kupapa kanshi ukuti Yehova alipeelako amaka ya kulabule mitima ku Mwana wakwe, Yesu. Yesu wabuushiwa ku bafwa abilishe ati: “Nine mfwayafwaye mfyo ne mitima, kabili nkapeela imwe umo umo umwabela imilimo yenu.”—Ukusokolola 2:23.

Tapaba apo Baibolo yalanda ukuti Satana kuti afwayafwaya ifili mu mitima ya bantu na mu matontonkanyo. Ifi fyalolamo, pantu umutumwa Paulo atukoselesha ukuti fwe Bena Kristu “tatwaluba amapange yakwe.” (2 Abena Korinti 2:11) E ico tatufwile ukutiina Satana no kutontonkanya ukuti alikwata amaka yamo ayaibela ayo tushaishiba umupwilapo.

Lelo tatuletila Icibambe cesu te kuti cishibe ubunake twakwata. Satana mukokole icine cine ica kuti kuti aishiba ifyo abantunse baba. Takabila ukwishiba ifyo tuletontonkanya pa kuti eshibe ifyo twaba, pa kwishiba ifyo twatemwa nga tuleangala, nelyo kukutika ku fyo tulelanda, ne fyashala. Ifyo icinso cilemoneka no mubili kuti pambi fya-afwa Satana ukwishiba ifyo tuletontonkanya nelyo ifyo tuleumfwa.

Ilingi line Satana abomfya fimo fine ifyo abomfeshe mwi bala lya Edene—ubufi, ubucenjeshi, no kupotonganya ifishinka. (Ukutendeka 3:1-5) Nelyo ca kuti Abena Kristu tabafwile ukutiina Satana ukuti alaishiba ico baletontonkanya, bafwile ukupempwila ulwa matontonkanyo ayo Satana engafwaya ukubika mu matontonkanyo yabo. Afwaya Abena Kristu ukuti ‘bonaike amatontonkanyo kabili babulwe cine.’ (1 Timote 6:5) Te kuti tupape kanshi umulandu icalo ca kwa Satana cisulilemo ifyebo fyabipa na mangalo yashayamo. Pa kucingililwa, Abena Kristu bafwile ukucingilila amatontonkanyo yabo ukupitila mu kufwala “ica kucingo mutwe ce pusukilo.” (Abena Efese 6:17) Bacite ci ukupitila mu kusambilila icine ca mu Baibolo no kukaana ifingabakowesha muli ci calo ca kwa Satana.

Satana mulwani wa maka icine cine. Lelo tatufwile kutiinatiina fye nelyo kutiina fibanda fyakwe. Yakobo 4:7 yatulaya ukuti: “Kaaneni Kaseebanya, na o akamufulumuka.” Nga twakonka uku kufunda, tukabilisha nga filya Yesu abilishe ukuti Satana takwata maka pali ifwe.—Yohane 14:30.