IFYO BAIBOLO ISAMBILISHA

Abapiina

Bushe Lesa alasakamana abapiina?

“Mu mikalile yenu mwilatemwa indalama . . . Pantu [Lesa] atila: ‘Nshakakushe nakalya nangu ukukulekelesha nakalya.’”—AbaHebere 13:5.

INSHILA LESA ALANGILAMO UKUTI ALASAKAMANA ABAPIINA Uupepa Yehova Lesa nga akwata amafya mu bumi, Lesa kuti amwafwa mu nshila shalekanalekana. Inshila imo ya kuti Abena Kristu banankwe abakwata ukutemwa kuti bamwafwa.a Pali Yakobo 1:27 patila: “Imipepele iyasanguluka kabili iishakowela mu menso ya kwa Lesa wesu kabili Shifwe ni yi: ukusakamana inshiwa na bamukamfwilwa mu kucula kwabo.”

Abena Kristu bakubalilapo baleafwilishanya. Ku ca kumwenako, ilyo kasesema asobele ukuti kwali no kuba icipowe ca maka mu calo ca Yudea, Abena Kristu mu musumba wa Antioke mu calo ca Siria, bali-ipeleshe ‘ukutuma ifya kukumbusuka ku ba bwananyina abaikele mu Yudea.’ (Imilimo 11:28-30) Ici calengele ukuti Abena Kristu banabo abo ifintu fyayafishe bakwate ifya kulya. Ifi bacitile fyalangile ukutemwana ukwaba pa kati ka Bena Kristu.—1 Yohane 3:18.

Finshi abapiina bengacita pa kuti imikalile yabo ibeko eyefilya?

“Ine, ne Yehova, nine Lesa obe, uukusambilisha ifingakuwamina.”—Esaya 48:17, 18.

LESA ALATWAFWA PA KUTI TULEYAFWA FWE BENE Abantu abengi nga nshi balisanga ukuti amano ayasangwa mu Baibolo yalabomba bwino kabili e yengatutungulula bwino sana. Amapinda 2:6, 7 yatila: “Yehova e upeela amano; mu kanwa kakwe e mufuma ukwishiba no kwiluka. Kabili abikila abalungami amano yene yene.” Abantu nga bafwayafwaya aya mano no kuyabomfya, imikalile yabo kuti yawama nga nshi.

Ku ca kumwenako, tabacita ifintu ifingabepaisha, e kutila ukubomfya bubi bubi imiti iikola no kunwesha ubwalwa. (2 Abena Korinti 7:1) Nga bali pa ncito, balaba ne cishinka kabili balabombesha ica kuti tababatamfya incito kabili balabacetekela sana ku babengisha incito. Pa Abena Efese 4:28 patila: “Uwibile eiba na kabili, lelo abombeshe, . . . pa kuti akwate ica kupeelako uushikwete.”

Bushe kwalibako abapiina bamo abo amano yaba mu Baibolo yayafwa?

‘Amano ya kwa Lesa yalashinina ku micitile yayako ukuti ya cine.’—Mateo 11:19, The Bible In Bemba.

IFILANGA UKUTI AMANO YA MU BAIBOLO YALABOMBA Ba Wilson, abekala ku Ghana balebomba incito ya pa nshita inono, kabili inshita yalifikile iya kuleka ukubomba. Pa bushiku bwa kulekelesha, ilyo balewamya motoka ya ba maneja, ba Wilson basangile indalama mu motoka. Kapitao wabo abebele ati basende ndalama. Aba ba Wilson ni Nte ya kwa Yehova, kabili balikeene ukwiba shilya ndalama. E ico balibulile indalama no kutwala ku bene. Icacitike ca kuti mu nshita ya kuti incito ipwe, balitwalilile ukubomba, nomba uyu muku bali babomfi aba nshita yonse e lyo balibapeela ne cifulo icikalamba.

Ba Géraldine banakashi abekala ku Europe, kabili balibatamfishe incito pantu umukalamba wa ncito alipatile sana Inte sha kwa Yehova. Nomba banyina ba uyu mukalamba wa ncito bamwebele ukuti “naulufyanya sana.” Banyina balandile no kuti: “Nga ulefwaya umubomfi uwa cishinka uwapoosa amano ku ncito, ninshi ufwile ukusala Inte ya kwa Yehova.” Uyu mukalamba wa ncito atampile ukufwailisha ifishinka pa Nte sha kwa Yehova, kabili ba Géraldine balibabweseshe pa ncito.

Ba Sarah, abekala ku South Africa, balikwata abana lelo tabakwata abalume. Inshita imo ifintu fyalyafishe nga nshi, lelo balimwene ifyo Baibolo ilenga abantu ukutemwa abanabo, lintu abo baba nabo mu cilonganino babapeele ifya kulya ne ndalama sha kwendela. Pa numa abana babo abakashana balandile ati: “Twalikwata abafyashi abengi mu cilonganino.”

Twalandapo fye pa bantu bamo bamo, lelo ifya kumwenako fyena fingi. Ifi ifyacitike filenga twaibukisha Amapinda 1:33, ayatila: “Lelo uumfwa kuli [Yehova], akekala umutelelwe.” Aya mashiwi ya cine cine!

[Futunoti]