Ica Bupe ca kwa Yehova ica Mupashi wa Mushilo

“Bushe Shinwe wa mu mulu takacishemo nga nshi ukupo mupashi wa mushilo ku bamulomba?”—LUKA 11:13.

1, 2. (a) Bulayo nshi Yesu acitile pa lwa mupashi wa mushilo, kabili mulandu nshi ici cili mu cine cine ica kusansamusha? (b) Cinshi cili umupashi wa mushilo?

MWI pukutu lya mwaka wa 32 C.E. ilintu Yesu aleshimikila imbila nsuma mu Yudea, alandile ku basambi bakwe pa lwa bukapekape bwa kwa Yehova. Abomfeshe ifilangililo fimo ifya maka kabili lyene apangile icilayo ca kusungusha, ukusoso kuti: “Nga imwe pa kuba ababi mwaishibo kupa abana benu ifya bupe fisuma, bushe Shinwe wa mu mulu takacishemo nga nshi ukupo mupashi wa mushilo ku bamulomba?”—Luka 11:13.

² Mwandi yali ica kusansamusha ayo mashiwi! Ilyo tuleshipikisha icimpungili ca nshiku sha kulekelesha isha ici calo, tulelolenkana no bulwani bwa kwa Satana ne fibanda fyakwe, no kulwisha ukukongama kwesu kwine ukwawa, mu cine cine cili ica kukafyo mutima ukwishibo kuti Lesa akatukosha ku mupashi wakwe. Mu cine cine, ukushipikisha kwa busumino te kuti kucitikeko ukwabula uko kwafwilisha. Bushe walikumanyapo amaka ya uyu mupashi, uuli amaka yabomba aya kwa Lesa? Bushe ulomfwikisha fintu yengakwaafwa apakalamba? Bushe ulayabomfya mu kukumanina?

Amaka ya Mupashi wa Mushilo

3, 4. Langilila amaka ya mupashi wa mushilo.

³ Languluka intanshi amaka ya mupashi wa mushilo. Tontonkanya ukubwelela ku numa ku mwaka wa 1954. Lilya e lintu ibomba lya hydrogen lyalishiwe pali Bikini Atoll mu South Pacific. Akashita kanono pa numa lintu ibomba lyapuulike, cilya cishi cayemba calikupikilwe mu ntumba ikalamba iya mulilo kabili casantawilwe ku kupuulika ukwalingana mu maka ku kulishiwa kwa matani amamilioni 15 aya TNT. Ni kwi ukwafumine yalya maka yonse aya konaula? Cali ca kufumamo ca kwalwila akaputusha fye kanono aka uranium na hydrogen mu maka yaluminisha e kwapangile ukuluma kwe bomba. Ni shani, nangu ni fyo, nga ca kuti basayantisti bacitile icapusana na cintu baali nabapwishishisha pa Bikini? Tutile bali na maka ya kwikata amaka yaluminisha ayo yonse aya mulilo no kuyapilibwila mu makilogramu yanono aya uranium na hydrogen. Fintu ico cali no kuba kusanga kwatunguluka! Nalyo line, Yehova acitile icintu cimo icapala kuli ico lelo pa cipimo cacilishapo bukulu lintu “ku kutendeka [wene] alengele umulu na pano isonde.”—Ukutendeka 1:1.

⁴ Yehova alikwata ubulamba bwabikwa pa mbali. (Esaya 40:26) Mu bubumbo, afwile alibomfeshe ulu lupikwe lintu apangile umusango onse uupanga ukubumbwa konse. Cinshi abomfeshe muli iyi mibombele ya kubumba? Umupashi wa mushilo. Tubelengo kuti: “Ku cebo ca kwa Yehova imyulu yalicitilwe, no mulalo onse wa iko ku [mupashi, NW] wa mu kanwa kakwe.” (Ilumbo 33:6) Kabili ubulondoloshi bwalembwa ubwa Ukutendeka ubwa bubumbo bubelengwa ukuti: “Amaka yabomba aya kwa Lesa [umupashi wa mushilo] yaleshunda pa mulu wa menshi.” (Ukutendeka 1:2, NW) Mwandi maka ya bulamba umupashi wa mushilo waba!

Imilimo ya Cipesha Amano

5. Ni mu nshila nshi ishasansabala umupashi wa mushilo ubombela?

⁵ Umupashi wa mushilo ucili ulabomba mu nshila shasansabala nga nshi. Ulasontelela no kutungulula ukuteyanya kwa kwa Yehova ukwa ku mulu. (Esekiele 1:20, 21) Ukupala amaka yaluminisha ayalekelwako kwi bomba lya hydrogen, kuti wabomfiwa mu konaula ku kuputunkanya ubupingushi pa balwani ba kwa Yehova, lelo na kabili walibomba mu nshila shimbi ishitucincimusha ku kupapa.—Esaya 11:15; 30:27, 28; 40:7, 8; 2 Abena Tesalonika 2:8.

6. Ni shani fintu umupashi wa mushilo watungilile Mose na bana ba kwa Israele mu kubomba kwabo na Egupti?

⁶ Ku ca kumwenako, mupepi na 1513 B.C.E., Yehova atumine Mose ku kumonekela pa ntanshi ya kwa Farao wa Egupti ku kupinda ubuntungwa bwa bana ba kwa Israele. Pa myaka yafumineko 40, Mose aali kacema mu Midiani, e co mulandu nshi Farao alingile ukukutikila kuli kacema? Pantu Mose aishile mwi shina lya kwa Lesa umo fye uwa cine, Yehova. Pa kushininkisha ici, Yehova amupeele amaka ya kucita ifipesha amano. Ifi fyali ifya kwebekesha nga nshi ica kuti nelyo fye ni ŋanga sha mu Egupti shapatikishiwe ukusumino kuti: “Munwe wa kwa Lesa.”a (Ukufuma 8:19) Yehova aletele ifinkunka ikumi pali Egupti, ica kupelako ica fyene icapatikishe Farao ukuleka abantu ba kwa Lesa ukusha Egupti. Lintu Farao mu bumankonso asupile bene pamo no mulalo wakwe, abena Israele balipuswike lintu inshila yaiswilwe mu cipesha amano ukupula muli Bemba Wakashika. Umulalo wa bena Egupti walibakonkele no kunwena muli bemba.—Esaya 63:11-14; Hagai 2:4, 5.

7. (a) Yali milandu nshi imo intu umupashi wa mushilo wabombele ifipesha amano? (b) Nangu cingati ifipesha amano ifyaletelweko no mupashi wa mushilo taficitika na kabili, mulandu nshi icalembwa ca fiko muli Baibolo cabela ica kusansamusha?

⁷ Ee, Yehova ukupitila mu mupashi wakwe abombele ifipesha amano fya maka mu kwimininako abena Israele mu nshita ya kwa Mose, kabili na pa nshita shimbi. Yali mifwaile nshi iya filya fipesha amano? Fyatwele pa ntanshi imifwaile ya kwa Yehova, fyalengele ishina lyakwe ukwishibikwa, kabili fyalangilile amaka yakwe. Kabili inshita shimo, pamo nga kuli Mose, fyashininkishe ukwabulo kushako ukuti umuntu alikwete ukutungilila kwa kwa Yehova. (Ukufuma 4:1-9; 9:14-16) Nangu cibe fyo, ifipesha amano ifyaletwako no mupashi wa mushilo fyaba fya limo limo ukupulinkana ilyashi lya kale lyonse.b Mu kupalako, abantu abengi umo umo abaleikala mu nshita sha Baibolo tababalile abacitilako bunte kuli cimo, kabili ilelo taficitika na kabili. Nangu ni fyo, ilyo tuleshashala ne mpika ishingamoneka pambi isha kukanacimfiwa, bushe tacili ca kusansamusha ukwishibo kuti nga ca kuti twalomba Yehova mu citetekelo, akatupa umupashi umo wine uwaafwilishe Mose pa ntanshi ya kwa Farao no kwisula inshila ku bena Israele ukupula muli Bemba Wakashika?—Mateo 17:20.

Ukulembwa Kwapuutwamo

8. Lwali lubali nshi ulwa mupashi wa mushilo mu kupeelwa kwa Mafunde Ikumi?

⁸ Pa numa ya kulubulwa kwabo ukufuma mu Egupti, Mose atungulwile abena Israele ku lupili lwa Sinai, uko Yehova acitile cipingo na bene no kubapeela Amalango yakwe. Ulubali lukalamba ulwa Malango yapeelwe ukupitila muli Mose lwali Mafunde Ikumi, kabili amakope ya kutendekelako aya muli aya yalicekelwe pa fipampa fya mabwe. Shani? Ku mupashi wa mushilo. Baibolo isoso kuti: “Nomba, [Yehova] pa kupwo kulanda nankwe mu lupili lwa Sinai, apeele kuli Mose ifipampa fibili fya cishimiko, ifipampa fya mabwe, ifyalembwa ku munwe wa kwa Lesa.”—Ukufuma 31:18; 34:1.

9, 10. Ni shani fintu umupashi wa mushilo wabombele mu kulembwa kwa Malembo ya ciHebere, kabili ni shani fintu ici cabe camonekesha ukufuma ku numbwilo shabomfiwe na basambi ba kwa Yesu?

⁹ Mu kulunda ku Mafunde Ikumi, Yehova ukupitila mu mupashi wakwe apeele Israele imyanda ya malango ne fipope ku kutungulula ubumi bwa baume na banakashi ba busumino. Kabili ifyacilapo fyali no kwisa. Imyanda ya myaka pa numa ya kasuba ka kwa Mose, Nehemia acitile ubunte mwi pepo lya pa cintubwingi kuli Yehova ukuti: “Mwashipikishe [ku bena Israele] ku myaka iingi, no kushimika kuli bene ku mupashi wenu mu kuboko kwa bakasesema benu.” (Nehemia 9:30) Amasesemo ayengi ayapuutwamo ayasoselwe na abo bakasesema yalilembelwe. Ukulundako, umupashi wa mushilo waseseshe abaume ba busumino ukulemba amalyashi ya kale ayashila ne nyimbo sha kuyumfwa kwa ku mutima isha kulumba.

¹⁰ Paulo alelanda ulwa uku kulembwa konse lintu atile: “Amalembo yonse yantu yapuutwamo kuli Lesa.” (2 Timote 3:16; 2 Samwele 23:2; 2 Petro 1:20, 21) Mu cine cine, lintu baleyambula aya malembo, abasambi ba kwa Yesu aba mu mwanda wa myaka uwa kubalilapo ilingi line babomfeshe inumbwilo pamo nga “umupashi wa mushilo wasoseele . . . mu kanwa ka kwa Davidi,” “umupashi wa mushilo walandile cisuma muli Esaya,” nelyo fye “umupashi wa mushilo wasosa.” (Imilimo 1:16; 4:25; 28:25, 26; AbaHebere 3:7) Mwandi lipaalo pa kuti umupashi wa mushilo umo wine uwasongele ukulembwa kwa Malembo ya Mushilo waliyabaka pa kuti yengatutungulula no kutusansamusha ilelo!—1 Petro 1:25.

Ukushintilila pa Mupashi wa Mushilo

11. Mibombele nshi iya mupashi yamwenwe ukulosha ku kukuulwa kwa ca kwikalamo?

¹¹ Ilintu abena Israele bacitile inkambi mwi samba lya lupili lwa Sinai, Yehova abakambishe ukukuula ica kwikalamo nge cifulo ca pa kati ica kupepa kwa cine. Ni shani fintu baali na maka ya kupwishishisha ici? “Mose atile ku bana ba kwa Israele, Moneni, Yehova naita mwi shina Besalele mwana Uri, mwana Huri, uwa mu mukowa wa kwa Yuda; kabili amwisushamo umupashi wa kwa Lesa ku mano, ku mucetekanya na ku kwishiba, na ku micitile yonse.” (Ukufuma 35:30, 31) Umupashi wa mushilo wakoseshe ukulamuka ukuli konse ukwa cifyalilwa uko Besalele akwete, kabili aali na maka ya kwangalila mu kutunguluka ukwimikwa kwa cilya cikuulwa cikalamba.

12. Ni shani fintu umupashi wakoseshe abantu umo umo mu nshila ishishili sha lyonse pa numa ya nshita ya kwa Mose?

¹² Pa nshita ya pa numa, umupashi wa kwa Yehova wabombele pali Samsone, ukumupeela ubukose bwacila pa maka ya buntunse ku kumulenga ukulubula Israele ukufuma ku bena Pelishiti. (Abapingushi 14:5-7, 9; 15:14-16; 16:28-30) Nalyo line pa numa, Solomone apeelwe amano yaibela pamo nge mfumu ya bantu basalwa aba kwa Lesa. (2 Imilandu 1:12, 13) Pe samba lyakwe, Israele akwete ulubanda ukucila na kale lyonse, kabili imibele ya uko iya nsansa yabele icipasho ca mapaalo yantu abantu ba kwa Lesa bakaipakisha pe samba lya Kuteka kwa Myaka Ikana Limo ukwa kwa Kristu Yesu, Solomone Wacilapo bukulu.—1 Ishamfumu 4:20, 25, 29-34; Esaya 2:3, 4; 11:1, 2; Mateo 12:42.

13. Ni shani fintu icalemwa ca kukosha kwa mupashi Besalele, Samsone, na Solomone citukoselesha ilelo?

¹³ Mwandi lipaalo pa kuti Yehova alenga ulya mupashi umo wine ukubako kuli ifwe! Lintu twayumfwa abapelebela ukufikilisha ukupeelwa kwa mulimo nelyo ukuibimba mu mulimo wa kushimikila, kuti twaipusha Yehova ukutupeela umupashi umo wine untu apeele kuli Besalele. Lintu twapita mu kulwala nelyo twashipikisha ukupakaswa, umupashi umo wine uwapeele Samsone ubukose bwacila pa bwa lyonse ukatukosha—nangu cingati, kwena, te mu cipesha amano. Kabili lintu twalolenkana ne mpika shayafya nelyo tuli no kucita ukupingulapo kwacindama, kuti twaipusha Yehova, uwapeele Solomone amano yacila pa ya lyonse, ukutwaafwa ukubomba mano mano. Lyene, ukupala Paulo, tukasoso kuti: “Ndi na maka aya kucite fintu fyonse mu ulenkoselesha.” (Abena Filipi 4:13) Kabili ubulayo bwa kwa Yakobo bukabomba kuli ifwe: “Nga umo uwa muli imwe abulwa amano, alombe kuli Lesa uupeela fye kuli bonse ukwabulo kwebaula, kabili yakapeelwa kuli wene.”—Yakobo 1:5.

14. Ni bani, mu nshita sha pa kale na lelo, bakoshiwa no mupashi wa mushilo?

¹⁴ Umupashi wa kwa Yehova na kabili wali pali Mose mu mulimo wakwe uwa kupingulo luko. Lintu bambi basontelwe ku kwaafwa Mose, Yehova atile: “Nkafumyapo umupashi uuli pali iwe, no kuubika pali bene; na bo bakasendela pamo nobe aba bantu, ukuti wisenda weka.” (Impendwa 11:17) Muli ifyo, balya baume tabali no kubomba mu bukose bwabo bwine. Umupashi wa mushilo walibatungilile. Tubelenga ukuti pa tushita twa pa numa umupashi wa kwa Yehova wali pa bantu bambi umo umo. (Abapingushi 3:10, 11; 11:29) Lintu Samwele asubile Davidi nge mfumu ya nshita ya ku ntanshi iya kwa Israele, icalembwa cisoso kuti: “Samwele abuulile ulusengo lwa mafuta, amusubile mu kati ka bamunyina; no mupashi wa kwa Yehova walompokele pali Davidi ukutula pali kalya kasuba no kupulapo.” (1 Samwele 16:13) Abo ilelo abakwata ifishingamo fyafina—ifya lupwa, ifya cilonganino, nelyo ifya mu kuteyanya—kuti basansamushiwa pa kwishibo kuti umupashi wa kwa Lesa ucili ulatungilila ababomfi bakwe ilyo balesakamana ukukakililwako kwabo.

15. Ni mu nshila nshi umupashi wa mushilo wakosha ukuteyanya kwa kwa Yehova (a) mu nshiku sha kwa Hagai na Sekaria? na (b) ilelo?

¹⁵ Amakana ya myaka imo pa numa ya kasuba ka kwa Mose, aba busumino pa kati ka bana ba kwa Israele babwelele ku Yerusalemu ukufuma ku Babiloni mu kuba no mulimo wa kukuula cipya cipya itempele. (Esra 1:1-4; Yeremia 25:12; 29:14) Ifipindami fyayafya fyalimine, nangu cibe fyo, kabili balifuupwilwe pa myaka iingi. Mu kupelako, Yehova aimishe bakasesema Hagai na Sekaria ku kukoselesha abaYuda ukukanashintilila pa bukose bwabo bwine. Lelo ni shani fintu umulimo wali no kupwishishiwa? “Te ku bulamba, kabili te ku maka, kano ku mupashi wandi, e fyo asosa Yehova wa milalo.” (Sekaria 4:6) Kabili mu kuba no kutungilila kwa mupashi wa kwa Lesa, itempele lyalikuulilwe. Abantu ba kwa Lesa ilelo mu kupalako balipwishishisha ifingi. Ukushimikila kwa mbila nsuma kwalitanununwa ukushinguluke sonde. Amamilioni ya bantu umo umo balesambilishiwa mu cine na mu bulungami. Amabungano yalateyanishiwa. Amayanda ya Bufumu na maofesi ya misambo yalakuulwa. Ifingi ifya ifi fyalicitwa mu kulolenkana no kukaanya kwakaluka. Lelo Inte sha kwa Yehova tabafuupulwa, ukwishibo kuti icili conse cintu bapwishishisha cacitwa, te ku bulamba, atemwa ku maka ya buntunse, lelo ku mupashi wa kwa Lesa.

Umupashi wa kwa Lesa mu Mwanda wa Myaka uwa Kubalilapo

16. Cakukumanya nshi ababomfi ba pa ntanshi ya Bwina Kristu aba kwa Yehova bakwete ne mibombele ya mupashi wa kwa Lesa?

¹⁶ Nga fintu tumwene, ababomfi ba pa ntanshi ya Bwina Kristu aba kwa Lesa baali abaibukila bwino ulwa maka ya mupashi wa kwa Lesa. Bashintilile pali wene ku kubaafwa ukufikilisha ukukakililwako kwafina no kupwishishisha ukufwaya kwa kwa Lesa. Na kabili balishibe ukuti Amalango no kulembwa kumbi ukwashila fyalipuutilwemo, ukulembwa pe samba lya kusonga kwa mupashi wa kwa Yehova, kabili muli ifyo kwali ‘Cebo ca kwa Lesa.’ (Ilumbo 119:105) Ni shani, nangula ni fyo, ulwa nshita ya Bwina Kristu?

17, 18. Kwali kumoneka nshi kumo ukwa cipesha amano ukwa mupashi mu nshita ya Bwina Kristu, kabili mifwaile nshi uku kwabombele?

¹⁷ Umwanda wa myaka uwa kubalilapo uwa Nshita yesu Iyaishibikwa na o wamwene imibombele ya kupapusha iya mupashi wa kwa Lesa. Kwaliko ukusesema kwapuutwamo no mupashi. (1 Abena Korinti 14:1, 3) Mu kufikilishiwa kwa bulayo bwa kwa Yesu ubwa kuti umupashi wa mushilo wali no kwibukishako abasambi bakwe ulwa fintu fyonse ifyo asosele kabili wali no kubasambilisha imbali shalundwako isha cine, amabuku yafulilako yalembelwe pe samba lya kusonga kwa mupashi wa mushilo. (Yohane 14:26; 15:26, 27; 16:12, 13) Kabili kwaliko ifipesha amano, nga fintu fikalandwapo mu kukumanina kwacilapo mu cipande cesu icikonkelepo. Mu cine cine, umwanda wa myaka uwa kubalilapo waletelwemo ne cipesha amano cikalamba. Mupepi no mwaka wa 2 B.C.E., akanya kaibela kaali no kufyalwa, kabili pamo nge cishibilo, nyina wacaice aali no kuba nacisungu. Ni shani fintu ico cali no kuba? Ukupitila mu mupashi wa mushilo. Icalembwa cisoso kuti: “Ukufyalwa kwa kwa Yesu Kristu kwali ifi: Nyina Maria akobekelwe kuli Yosefe, lelo ilintu bacili tabalapalamana asangilwe ali ne fumo ilyafuma ku mupashi wa mushilo.”—Mateo 1:18; Luka 1:35, 36.

¹⁸ Lintu Yesu akulile, atamfishe ifibanda, aposeshe abalwele, aimishe fye na bafwa mu maka ya mupashi wa mushilo. Bamo aba mu bakonshi bakwe nabo bene bacitile ifipesha amano ne milimo ya maka. Aya maka yaibela yali fya bupe fya mupashi. Yali mifwaile nshi iya fiko? Pamo fye nga fintu ifipesha amano fyabangilileko fyali naficita, fyatwele pa ntanshi imifwaile ya kwa Lesa no kusokolola amaka yakwe. Ukulundapo, fyalangilile bucine bwa kutunga kwa kwa Yesu ukwa kuti atuminwe ukufuma kuli Lesa; kabili pa numa, fyashinine ukuti icilonganino ca Bwina Kristu ica mu mwanda wa myaka uwa kubalilapo cali luko lwasalwa ulwa kwa Lesa.—Mateo 11:2-6; Yohane 16:8; Imilimo 2:22; 1 Abena Korinti 12:4-11; AbaHebere 2:4; 1 Petro 2:9.

19. Ni shani fintu icitetekelo cesu citungilila ku bulondoloshi bwalembwa ubwa Baibolo ubwa fipesha amano fya kwa Yesu na batumwa bakwe?

¹⁹ Umutumwa Paulo, nangu cibe fyo, asosele ukuti ukumoneka kwa musango uyo ukwa cipesha amano ukwa mupashi kwali kwa bwaice bwa cilonganino kabili kwali no kupwa, e co ifwe ilelo tatumona ifipesha amano fya musango uyo ukuletwako no mupashi wa mushilo. (1 Abena Korinti 13:8-11) Nalyo line, ifipesha amano ifyacitilwe na Yesu na batumwa bakwe fyakwata ifingi ukucila pa buseko bwa mu lyashi lya kale. Filakosha icitetekelo cesu mu bulayo bwa kwa Lesa ubwa kuti ukulwala ne mfwa tafyakakwate icifulo pe samba lya mitekele ya kwa Yesu mu calo cipya.—Esaya 25:6-8; 33:24; 65:20-24.

Ubunonshi Ukufuma ku Mupashi wa Mushilo uwa kwa Lesa

20, 21. Ni shani fintu twingashukila ukupayanya kwa mupashi wa mushilo?

²⁰ Mwandi bulamba bwa maka uyu mupashi waba! Lelo ni shani fintu Abena Kristu ilelo bengaushukila? Intanshi, Yesu asosele ukuti tulingile ukuulomba, e co mulandu nshi te kucitila ico cine fye? Pepa kuli Yehova ukukupeela ici ca bupe ca kusungusha te mu nshita fye sha kukanshika lelo pa kashita akali konse. Mu kulundako, belenga Baibolo pa kuti umupashi wa mushilo wingalanda kuli iwe. (Linganyeniko AbaHebere 3:7) Etetula pa cintu wabelenga kabili cibomfye pa kuti umupashi wa mushilo wingaba kusonga mu bumi bobe. (Ilumbo 1:1-3) Ukulundako, bishanya—pa lobe ngo muntu umo, mu filonganino, na pa kulongana kukalamba—na bambi abashintilila pa mupashi wa kwa Lesa. Fintu umupashi wa mushilo ukosha mu kufumba abo abapaala Lesa wabo “mu nkuta”!—Ilumbo 68:26.

²¹ Bushe Yehova te Lesa wa bukapekape? Asosa ukuti tufwile fye ukulombela umupashi wa mushilo kabili akapeela wene kuli ifwe. Fintu cili kutumpa ukushintilila pa mano yesu yene no bukose lintu ukwaafwa kwa musango uyo ukwa maka kwingasangwa kuli ifwe! Kuliko, nangu cibe fyo, imilandu imbi iikwete ifya kubomba no mupashi wa kwa Lesa iitwambukila nga Bena Kristu, kabili iyi ikalandwapo mu cipande cikonkelepo.

[Amafutunoti]

Bushe Kuti Wayasuka Ifipusho Fyakonkapo?

◻ Ni shani fintu Yehova abumbile umusango onse mu kubumbwa konse?

◻ Shali ni nshila nshi shimo umo umupashi wa mushilo wabombele mu nshita sha pa ntanshi ya Bwina Kristu?

◻ Ni shani fintu citusansamusha ilelo ukwishiba cintu umupashi wa mushilo wapwishishishe mu nshita sha pa kale?

◻ Ni shani fintu twingashukila ukupayanya kwa mupashi wa mushilo?

[Icikope pe bula 10]

Umupashi uwapeele Samsone ubukose bwacila pa maka ya buntunse kuti watupeela amaka ku fintu fyonse