Davidi alitwalilile ukulanda aya amashiwi ya kukoselesha pali Galyati ku mfumu. Atile: “Mwileka umutima wa muntu nangu umo utompoke.” Galyati alilengele Shauli na bashilika bakwe ukumfwa sana umwenso. Nalimo icalengele ni co baleilinganya kuli ili ipaka ilyo balefika fye mu lufumo nelyo mu cifuba. Baleelenganya ifyo ali no kubacimfya ukwabula no kupoosa inshita. Nomba ifi te fyo Davidi aletontonkanya. Nga fintu twalamona, Davidi talemona Galyati nga ifyo bambi balemumona. E ico, aliipeeleshe ukulwa na Galyati.—1 Samwele 17:32.

Davidi alimwene ukuti Galyati ali lipaka kabili alikwete ifyanso ifya maka. Nomba ifi tafyamutiinishe. Shauli na bashilika bakwe baleilinganya kuli Galyati, lelo Davidi ena alelinganya Galyati kuli Yehova. Galyati alepele amamita 2.9, kanshi aali mutali pa bantu bambi. Nomba bushe kuti twamulinganya kuli Lesa umwine wa fintu fyonse? Lesa alemumona fye nga umuntu onse, kabili nga kumulinganya kuli Lesa aali fye nga akashiishi ako engepaya inshita iili yonse.

Davidi abutukiile kuli Galyati kabili abuliile ilibwe mu cola cakwe. Alibikile mu cisukushilo cakwe e lyo alishingulusha na maka. Galyati aile alepalamina kuli Davidi ninshi nalimo ali ku numa ya walemusendela inkwela. Nalimo icamuletelele ni co aali mutali sana, e lyo uwalemusendela inkwela ena alepele fye nga abantu bambi, e ico alifililwe ukwimya sana inkwela pa kuti acingilile umutwe wa kwa Galyati. Nomba ku mutwe kwine eko Davidi alefwaya ukulasa.—1 Samwele 17:41.

1 | Bushe ca cine umuntu kuti alepa amamita 2.9?

Baibolo itila, Galyati “alepele nalimo amamita yatatu.” (1 Samwele 17:4) Abantu bamo batila nalimo ifi te fyo Galyati alepele. Nomba tontonkanyeni pali ici, pali ino inshita, umuntu batila e walepesha pa bantu bonse, alepa amamita 2.7. Bushe Galyati kuti afilwa ukucilako uyu muntu amamita 0.15? Galyati ali mwina Rafa kabili aba bantu bali abatali icine cine. Icalembwa cimo ica muli ba 1400 B.C.E, ico basangile mu Egypt calandile ukuti mu fitungu fya Kanaani mwaliba abashilika aba maka abalepa ukucila amamita 2.4. Kanshi nangu ca kuti abantu abalepa nga Galyati tabafula, ifyo Baibolo yalanda pali ena fya cine.