Baibo ilanda ukuti abantu ‘bekala fye inshita iipi kabili balaba na macushi ayengi.’ (Yobo 14:1) Bushe ifi e fyo Lesa alefwaya ukuti tuleikala? Nga te fyo alefwaya, ninshi alefwaya ukuti tuleikala shani? Bushe tukabala atwikalapo nge fyo Lesa alefwaya ukuti tuleikala? Moneni ifyo Baibo yasuka aya mepusho.

1. Bushe Yehova afwaya tuleikala shani?

Yehova afwaya ukuti tuleikala bwino sana. Twaishiba shani ukuti ifi e fyo afwaya tuleikala? Ilyo abumbile abantu ba kubalilapo, Adamu na Efa, ababikile mu paradaise iyayemba, e kutila ibala lya Edeni. Kabili “Lesa alibapaalile no kubeba ati: ‘Fyaleni, fuleni, kumaneni pe sonde no kulalisakamana.’” (Ukutendeka 1:28) Yehova alefwaya ukuti balekwata abana, bakalenge isonde lyonse ukuba paradaise, e lyo no kulasakamana inama. Alefwaya ukuti abantu bonse bakabe no bumi ubwapwililika no kulaikala umuyayaya.

Nangu ca kuti ifi twikala te fyo Lesa alefwaya tuleikala,a ifyo alefwaya tafya-aluka. (Esaya 46:10, 11) Acili alafwaya ukuti abantunse abamumfwila bakaleikala bwino umuyayaya.—Belengeni Ukusokolola 21:3, 4.

2. Kuti twacita shani pa kuti tuleba ne nsansa pali ino nshita?

Yehova atupangile ukuti ‘tulekabila ifya kwa Lesa,’ e kutila ukulafwaya ukumwishiba no kulamupepa. (Belengeni Mateo 5:3-6.) Yehova afwaya twaba sana ifibusa fyakwe, ‘tule-enda mu nshila shakwe shonse, tulemutemwa kabili tulemubombela no mutima wesu onse.’ (Amalango 10:12; Amalumbo 25:14) Nga tulecita ifi tukaba ne nsansa, nangu ca kuti natukwata amafya. Nga tulepepa Yehova tulaba ne nsansa, pantu ninshi tuleikala ukulingana ne fyo afwaya tuleikala.

3. Yehova afwaya abantunse baleikala bwino

Tambeni VIDIO, lyena lanshanyeni icipusho cakonkapo.

VIDIO: Mulandu Nshi Lesa Apangiile Icalo? —Iyo Baipifya (1:41)

• Cinshi Lesa apangiile isonde ilisuma?

Belengeni Lukala Milandu 3:11, lyena lanshanyeni ici cipusho:

• Ukulingana ne li ilembo, cinshi mwasambilila pa co Lesa abumbiile abantu?

4. Ifyo Lesa alefwaya tafya-aluka

Belengeni Amalumbo 37:11, 29 na Esaya 55:11, lyena lanshanyeni ici cipusho:

• Twaishiba shani ukuti ifyo Yehova alefwaya tuleikala tafya-aluka?

5. Ukupepa Yehova kulalenga tuleba ne nsansa

VIDIO: Nalisambilile Ico Twabela Pano Calo (5:03)

• Bushe ba Terumi banonkelemo shani ilyo basambilile ico twabela pano calo?

Belengeni Lukala Milandu 12:13, lyena lanshanyeni ici cipusho:

• Apo Yehova alitucitila ifintu ifingi nga nshi, cinshi na ifwe tulingile ukucita pa kulanga ukuti tulatasha?

IFYO MUSAMBILILE

Yehova afwaya tukatwalilile ukuba ne nsansa umuyayaya mwi sonde ilisuma nga nshi. Nga tulemupepa ne mitima yesu yonse, tulaba ne nsansa na pali ino ine nshita.

Ukupitulukamo

• Bushe ilyo Yehova abumbile Adamu na Efa alefwaya ukuti baleikala shani?

• Twaishiba shani ukuti ifyo Lesa alefwaya abantu baleikala tafya-aluka?

• Finshi mufwile ukucita pa kuti mube ne nsansa?

ISHIBILENIPO NA FIMBI

Belengeni pa kuti mumone icalenga tushininkishe ukuti ibala lya Edeni e ko lyali.

“Bushe Ibala lya Edeni e ko Lyali?” (Ulupungu lwa kwa Kalinda, January 1, 2011)

Moneni icingalenga twashininkisha ukuti isonde likatwalilila ukubako.

“Bushe Isonde Likonaulwa?” (Icipande ca pa jw.org)

Moneni ifyo Baibo ilanda ukuti e fingalenga mwaba ne nsansa.

“Cinshi Twabela Pano Calo?” (Icipande ca pa jw.org)

Moneni ifyo umwaume uwaletontonkanya ukuti alikwete fyonse aishileiluka ukuti kwali ifyacindama ifyo ashakwete.

Pali ino Nshita Naliba ne Nsansa sha Cine Cine (3:55)

2. Ni bani bateka na Yesu?

Yesu tateka eka. “Abantu ukufuma mu mitundu yonse, mu ndimi, mu bantu na mu nko . . . bakaba ishamfumu ishikalateka isonde.” (Ukusokolola 5:9, 10) Ni banga bakalateka na Kristu? Ukutula apo Yesu aishiile pano isonde, abantu abengi nga nshi balisalapo ukuba abasambi bakwe. Lelo bantu fye 144,000 e bakalateka na Yesu ku muulu. (Belengeni Ukusokolola 14:1-4.) Abena Kristu bambi abashala bakalaikala pano isonde kabili bakalatekwa no bu Ubufumu.—Amalumbo 37:29.

Ubufumu bwa kwa Lesa bwalitendeka ukuteka ku muulu. Kabili nomba line buli no kuwamya ifintu pano isonde. Natulande pa fintu fimo ifisuma ifyo Ubufumu bwa kwa Lesa bukacita nga bwatendeka ukuteka isonde lyonse.

1. Bushe Ubufumu bwa kwa Lesa bukalenga shani pano isonde pakabe umutende no mulinganya?

Yesu Imfumu ya Bufumu bwa kwa Lesa ali no konaula abantu ababipa na mabuteko pa nkondo ya Armagedone. (Ukusokolola 16:14, 16) Pali iyi nshita, ifyo Lesa atulaya mu Baibo fikafikilishiwa. Atulaya ukuti: “Kwashala fye panono ababifi tabakabepo.” (Amalumbo 37:10) Yesu akabomfya Ubufumu bwa kwa Lesa pa kulenga pano isonde pakabe umutende no mulinganya.—Belengeni Esaya 11:4.

2. Bushe abantu bakalaikala shani ilyo ukufwaya kwa kwa Lesa kukacitwa pano isonde?

Ilyo Ubufumu bwa kwa Lesa bukalateka, “abalungama e bakekala mu calo, kabili bakekalamo umuyayaya.” (Amalumbo 37:29) Elenganyeni ifyo cikawama ukwikala mu calo umo bonse bakaba abalungama, abatemwana, kabili abatemwa Yehova! Takwakabe uukalalwala, kabili bonse bakalaikala umuyayaya.

3. Finshi Ubufumu bwa kwa Lesa bukacita nga bwaonaula ababifi?

Pa numa ya konaula ababifi, Yesu akateka imyaka 1,000. Muli iyi imyaka 1,000 Yesu na ba 144,000 abo akalateka nabo bakalenga abantu pano isonde bakabe abapwililika. Ilyo iyi imyaka ikapwa isonde likaba paradaise, kabili abantu bonse abakalaikalamo bakaba ne nsansa pa mulandu wa kuti bakalakonka amafunde ya kwa Yehova. Lyena Yesu akabwesesha Ubufumu kuli Wishi Yehova. Ishina lya kwa Yehova likacilanapo ‘ukuba ilya mushilo.’ (Mateo 6:9, 10) Pali iyi nshita, bonse bakeshiba ukuti Yehova ni Kateka umusuma kabili alibika amano ku bo ateka. Yehova akonaula Satana ne fibanda fyakwe na bonse abapondokela imitekele yakwe. (Ukusokolola 20:7-10) Ifisuma ifyo Ubufumu bwa kwa Lesa bukacita fikatwalilila ukubako umuyayaya.

SAMBILILENI NA FIMBI

4. Ubufumu bwa kwa Lesa bukafumyapo amabuteko ya bantunse

Baibo itila “umuntu atekela umuntu munankwe ku kumucusha.” (Lukala Milandu 8:9) Yehova akabomfya Ubufumu bwakwe pa kufumyapo ulufyengo no kulenga pano isonde pakabe umulinganya.

Belengeni Daniele 2:44 na 2 Abena Tesalonika 1:6-8, lyena lanshanyeni aya mepusho:

• Cinshi Yehova no Mwana wakwe Yesu bakacita ku mabuteko ya bantunse na ku bayatungilila?

• Bushe ifyo mwasambilila pali Yehova na Yesu fyalenga shani mwacetekela ukuti bakaba no mulinganya muli fyonse ifyo bakalacita?

5. Yesu ni Mfumu iisuma

Yesu Imfumu ya Bufumu bwa kwa Lesa akacitila abantu abo akalateka ifintu ifingi. Tambeni VIDIO pa kuti mumone ifyo Yesu acita ifilanga ukuti alafwaya ukwafwa abantu, kabili akabomfya amaka Lesa amupeela pa kubafwa.

VIDIO: Yesu Alilangile Ifyo Ubufumu Bukacita (1:13)

Ilyo Yesu ali pano isonde, alilangile ifyo Ubufumu bwa kwa Lesa bukacita. Mapaalo nshi pali aya ayo mwingatemwa ukwisamona yafikilishiwa? Belengeni amalembo ayalelanda pa mapaalo mutemenwe.

6. Ubufumu bwa kwa Lesa bukalenga ifintu ukuwama

VIDIO: Ifyo Ifintu Fikawama mu Calo Cipya (4:38)

Belengeni Amalumbo 145:16, lyena lanshanyeni ici cipusho:

• Bushe mwaumfwa shani ifi mwaishiba ukuti Yehova ali ‘no kupeela ica mweo conse ifyo cilefwaya’?

IFYO MUSAMBILILE

Lesa akabomfya Ubufumu bwakwe pa kufikilisha ifyo afwaya. Ubufumu bukalenga isonde likabe paradaise umukaba abantu abasuma abakalapepa Yehova umuyayaya.

Ukupitulukamo

• Bushe Ubufumu bwa kwa Lesa bukalenga shani ishina lyakwe ilya kuti Yehova ukuba ilya mushilo?

• Finshi fingalenga twacetekela ukuti Ubufumu bwa kwa Lesa bukafikilisha fyonse ifyo Lesa atulaya?

• Pa fintu fyonse ifisuma ifyo Ubufumu bwa kwa Lesa bukacita, ni cisa ico mulefwaisha ukwisamona cacitika?

ISHIBILENIPO NA FIMBI

Belengeni ici icipande pa kuti mwishibe ifyo Armagedone ipilibula.

“Bushe Inkondo ya Armagedone Cinshi?” (Icipande ca pa jw.org)

Belengeni ifikacitika mu “bucushi ubukalamba.”—Mateo 24:21.

“Bushe Ubucushi Bukalamba ni Cinshi?” (Icipande ca pa jw.org)

Moneni ifyo aba mu ndupwa bengelenganya ukuti bali capamo mu paradaise.

Elenganya Ukuti uli mu Paradaise (1:50)

Belengeni icipande citila “Nalikwete Amepusho Ayengi Ayalencusha,” pa kuti mumone ifyo umwaume umo uwapondokele ubuteko asangile amasuko ku mepusho akwete.

“Baibolo Ilaalula Abantu” (Ulupungu lwa kwa Kalinda, January 1, 2012)