Nomba line Yehova ali no kubomfya Ubufumu bwakwe ukupwisha amafya yonse ayo abantunse bakwata. Iyi ni mbila iisuma iyo abantu bonse balingile ukumfwa. Yesu alefwaya abasambi bakwe ukulaebako abantu iyi imbila nsuma! (Mateo 28:19, 20) Bushe Inte sha kwa Yehova bakonka shani ifyo Yesu alandile?

1. Bushe ilembo lya kwa Mateo 24:14 lilefikilishiwa shani muno nshiku?

Yesu alandile ukuti: “Iyi mbila nsuma ya Bufumu ikabilwa ku bantu bonse aba pe sonde.” (Mateo 24:14) Fwe Nte sha kwa Yehova tulatemwa ukubombako uyu mulimo uwacindama. Tulabila imbila nsuma mwi sonde lyonse mu ndimi ukucila pali 1,000! Pa kubomba uyu mulimo uukalamba nga nshi, tulakabila ukubombesha no kuba abateyanishiwa bwino. Nomba te kuti tubombe uyu mulimo ku maka yesu. Tulakabila Yehova ukutwafwa.

2. Finshi tucita pa kuti tulebila imbila nsuma ku bantu?

Tulabila imbila nsuma konse uko twasanga abantu. Nga filya Abena Kristu mu nshiku sha batumwa balecita, na ifwe tulabila imbila nsuma “ku ng’anda ne ng’anda.” (Imilimo 5:42) Ukubila imbila nsuma ku ng’anda ne ng’anda kulalenga tulelanshanya na bantu abengi nga nshi cila mwaka. Apo inshita shimo abantu tabasangwa pa mayanda, tulabila imbila nsuma na ku cintubwingi. Lyonse nga twakwata ishuko lya kuba pamo na bantu, tulafwaya ukubebako pali Yehova na pa fyo afwaya ukucitila abantu.

3. Ni bani balingile ukulabila imbila nsuma?

Abena Kristu ba cine bonse balingile ukulaebako abantu imbila nsuma. Twalicindika sana uyu mulimo tubomba. Tulabila imbila nsuma apapela amaka yesu, pantu twalishiba ukuti ikalenga abantu bakesepusuka. (Belengeni 1 Timote 4:16.) Tabatulipila pa kubomba uyu mulimo, pantu Baibo itila: “Apo mwapeelwe fye ubupe, na imwe mulepeela fye.” (Mateo 10:7, 8) Na lintu abantu bashilefwaya ukukutika kuli ifwe, tatuleka ukubila imbila nsuma. Pantu nga tatulekele ninshi tuleumfwila Yehova kabili tulalenga alasekelela.

SAMBILILENI NA FIMBI

4. Tulabombesha pa kuti tubile imbila nsuma ku bantu bonse

VIDIO: Ukubila Imbila Nsuma “ku Mpela ya Pano Isonde” (7:33)

• Finshi mwatemwa pa fyo Inte sha kwa Yehova babombesha ukubila imbila nsuma?

Belengeni Mateo 22:39 na Abena Roma 10:13-15, lyena lanshanyeni aya mepusho:

• Bushe umulimo wa kubila imbila nsuma ulanga shani ukuti twalitemwa abantu?

• Bushe Yehova amona shani ababila imbila nsuma?—Moneni icikomo 15.

5. Tubombela pamo na Lesa

Ificitika filanga ukuti Yehova e utungulula umulimo wesu uwa kubila imbila nsuma. Ku ca kumwenako, ilyo munyinefwe Paul uwa ku New Zealand alebila imbila nsuma ku ng’anda ne ng’anda mu nshita ya kasuba, alisangile umwanakashi umo. Pali bulya bwine ubushiku ulucelo, ulya umwanakashi alipepele kuli Lesa ukubomfya ishina lyakwe ilya kuti Yehova, ukuti atume uwa kuyamusambilishako Baibo. Ba Paul balandile ukuti: “Ilyo papitile fye ama-awala yatatu, nalifikile pa ng’anda ya ulya mwanakashi.”

Belengeni 1 Abena Korinti 3:9, lyena lanshanyeni ici cipusho:

• Bushe ificitika, pamo nge fyacitike kuli munyinefwe wa ku New Zealand, filanga shani ukuti Yehova e utungulula umulimo wa kubila imbila nsuma?

Belengeni Imilimo 1:8, lyena lanshanyeni ici cipusho:

• Mulandu nshi tukabilila ukuti Yehova aletwafwa ilyo tulebila imbila nsuma?

Bushe mwalishiba ici cishinka?

Cila mulungu pa kulongana kwa mu kati ka mulungu, tulasambilila ifingatwafwa ukulabila bwino imbila nsuma. Nga mwalisangwako kuli uku kulongana, finshi mwatemenwe pa fyo balesambilisha pa fya kubila imbila nsuma?

6. Tulakonka ifunde lya kwa Lesa ilya kubila imbila nsuma

Mu nshiku sha batumwa, kwali abalelesha abasambi ba kwa Yesu ukubila imbila nsuma. Abena Kristu abaliko mu nshiku sha batumwa, balicingilile insambu bakwete isha kushimikila abantu ilyo ‘bakoseshe imbila nsuma ukulingana ne funde.’ (Abena Filipi 1:7) Ifi fine e fyo ne Nte sha kwa Yehova bacita muno nshiku.a

VIDIO: Ukucingilila Imbila Nsuma Ukulingana ne Funde (2:28)

Belengeni Imilimo 5:27-42, lyena lanshanyeni ici cipusho:

• Mulandu nshi tushakalekele ukubila imbila nsuma?—Moneni ifikomo 29, 38, na 39.

IFYO MUSAMBILILE

Yesu aebele abasambi bakwe ukubila imbila nsuma ku bantu bonse aba pe sonde. Kabili Yehova alafwa ababomfi bakwe ukubomba uyu mulimo.

Ukupitulukamo

• Ni bani babila imbila nsuma mwi sonde lyonse?

• Bushe umulimo wa kubila imbila nsuma ulanga shani ukuti twalitemwa abantu?

• Bushe mulemona ukuti ukubila imbila nsuma kuti kwalenga twaba ne nsansa? Cinshi mwalandile ifyo?

ISHIBILENIPO NA FIMBI

Moneni ifyo Inte sha kwa Yehova babila imbila nsuma mu misumba iikalamba.

Ukubila Imbila Nsuma ku Cintubwingi mu Paris (5:11)

Bushe Inte sha kwa Yehova babila shani imbila nsuma ku mbutushi?

Ifyo Aba Bwananyina Balesambilisha Imbutushi Icine (5:59)

Umfweni ifyo nkashi umo alondolwele ifyo ukubila imbila nsuma lyonse kwalenga aba ne nsansa.

Nalicitile Bwino Ukutendeka Ukubomba uyu Umulimo (6:29)

Moneni ifyo imilandu twacimfishe mu cilye yalenga umulimo wa kubila imbila nsuma wailako pa ntanshi.

“Bakabila ba Bufumu Batwala Umulandu ku Cilye” (Ubufumu bwa kwa Lesa Bwalitendeka Ukuteka!, icipandwa 13)

Yesu atile Abena Kristu bafwile fye ukubatishiwa. (Belengeni Mateo 28:19, 20.) Bushe ulubatisho cinshi? Kabili finshi umuntu afwile ukucita pa kuti abatishiwe?

1. Bushe ulubatisho cinshi?

Ishiwi lya ciGriki ilyo bapilibula ukuti “ukubatisha” lipilibula “ukutumpika” mu menshi. Ilyo Yesu balemubatisha, balimwibishe mu Mumana wa Yordani, kabili “afumine . . . mu menshi.” (Marko 1:9, 10) Nga filya fine cali kuli Yesu, Abena Kristu ba cine nabo balabatumpika nelyo ukubebisha mu menshi ilyo balebatishiwa.

2. Bushe umuntu nga abatishiwa ninshi alanga cinshi?

Umuntu nga abatishiwa ninshi alanga ukuti ali-ipeela kuli Yehova Lesa. Bushe umuntu aipeela shani? Ilyo ashilabatishiwa, alapepa kuli Yehova ninshi ali fye eka no kumweba ukuti alefwaya ukulamubombela ubumi bwakwe bonse. Alaya ukuti akulapepa fye Yehova eka, kabili ukucita ukufwaya kwa kwa Lesa e cikaba icacindama sana mu bumi bwakwe. Alasalapo ‘ukuikaana umwine no kulakonka’ ifyo Yesu alesambilisha ne fyo alecita. (Mateo 16:24) Umuntu nga aipeela abatishiwa no kubatishiwa, bucibusa bwakwe na Yehova na ba bwananyina bulakoselako.

3. Finshi umuntu afwile ukucita ilyo ashilabatishiwa?

Ilyo mushilabatishiwa calicindama ukusambilila pali Yehova no kumutetekela sana. (Belengeni AbaHebere 11:6.) Ilyo mulesambilila ifingi pali Yehova no kumutetekela, mukalamutemenwako. Ukwabula no kutwishika, mukalafwaya ukwebako abantu pali ena no kulaikala ukulingana na mafunde yakwe. (2 Timote 4:2; 1 Yohane 5:3) Nga ca kuti mwatendeka ukulaikala “ukulingana ne fyo Yehova afwaya . . . pa kuti lyonse mulecita ifya kumusekesha,” nalimo mukafwaya ukuipeela kuli Lesa no kubatishiwa.—Abena Kolose 1:9, 10.a

SAMBILILENI NA FIMBI

4. Kuti twasambililako ku lubatisho lwa kwa Yesu

Belengeni Mateo 3:13-17 pa kuti musambilile na fimbi pa lubatisho lwa kwa Yesu. Lyena lanshanyeni aya mepusho:

• Bushe Yesu ali akanya ilyo alebatishiwa?

• Bushe bamubatishe shani? Bushe bamusanshile fye amenshi?

Ilyo Yesu abatishiwe, atendeke ukubomba umulimo uwacindama uo Lesa amupeele. Belengeni Luka 3:21-23 na Yohane 6:38, lyena lanshanyeni ici cipusho:

• Ilyo Yesu abatishiwe, mulimo nshi acindamike sana?

5. Ukubatishiwa cintu ico mwingakumanisha ukucita

Pa kubala, nalimo kuti mwalamona kwati te kuti mukumanishe ukuipeela no kubatishiwa. Lelo nga mwatwalilila ukusambilila pali Yehova no kumwishiba bwino, mukamona ukutila kuti mwakumanisha ukuipeela kuli ena no kubatishiwa. Pa kuti mumone abantu bamo abacitile ifi twalandapo, tambeni VIDIO.

VIDIO: Ifyo Mwingacita pa Kuti Mube Cibusa wa kwa Yehova (1:11)

Belengeni Yohane 17:3 na Yakobo 1:5, lyena lanshanyeni ici cipusho:

• Finshi fingafwa umuntu ukufikapo ukubatishiwa?

1. Ukuipeela kweba Yehova ukuti tulefwaisha ukulamubombela umuyayaya

2. Nga twabatishiwa ninshi twalanga bonse abalemonako ukuti twali-ipeela kuli Lesa

6. Nga twabatishiwa tulaba mu lupwa lwa kwa Yehova

Nga twabatishiwa tulaba mu lupwa ulwaikatana ulwa mwi sonde lyonse. Nangu ca kuti twalipusana inkulilo kabili twikala mu fyalo ifyapusanapusana, twasumina fye ifintu fimo fine kabili bonse twikala ukulingana na mafunde ayalanda pa mibele iyo Abena Kristu balingile ukuba nayo. Belengeni Amalumbo 25:14 na 1 Petro 2:17, lyena lanshanyeni ici cipusho:

• Bushe ukubatishiwa kulenga umuntu aba cibusa wa musango nshi uwa kwa Yehova e lyo na bantu bambi abapepa Yehova?

IFYO MUSAMBILILE

Yesu asambilishe ukuti Abena Kristu bafwile ukubatishiwa. Pa kuti umuntu abatishiwe afwile ukucetekela sana Yehova, ukulaikala ukulingana na mafunde yakwe, kabili afwile no kuipeela kuli Yehova.

Ukupitulukamo

• Bushe ulubatisho cinshi, kabili mulandu nshi lwacindamina?

• Bushe umuntu nga abatishiwa ninshi alanga finshi?

• Finshi umuntu alingile ukucita ilyo ashilaipeela no kubatishiwa?

ISHIBILENIPO NA FIMBI

Sambilileni umo ulubatisho lwalola no mo lushalola.

“Bushe Ulubatisho ni Cinshi?” (Icipande ca pa jw.org)

Pitulukeni mu fingafwa umuntu pa kuti alunduluke no kubatishiwa.

“Ukutemwa Yehova no Kumutasha Kuti Fyalenga Umuntu Abatishiwa” (Ulupungu lwa kwa Kalinda, March 2020)

Belengeni icalengele umwaume umo asalepo ukubatishiwa.

“Balefwaya Njishibile ne Mwine Ifyo Baibolo Isambilisha” (Ulupungu lwa kwa Kalinda, February 1, 2013)

Moneni ifyo mwinganonkelamo nga ca kuti mwaibikilishako no kubatishiwa, e lyo ne fyo mwingaipekanya.

“Bushe Nkabatishiwe?” (Ifipusho Abacaice Bepusha, ne Fyasuko Ifingabafwa, Ibuuku 2, icipandwa 37)