Pa Kuti Alipepele

PALI 1 Abena Tesalonika 5:17, 18, umutumwa Paulo asosele ukuti: “Pepeni no kukanaleka; muli fyonse tooteleni; pantu uku e kufwaya kwa kwa Lesa ukwa kuli imwe muli Kristu Yesu.” Nangu cibe fyo, bushe ulaisanga inshita shimo shimo uwashingashinga pa kupeela ukutootela lintu uleipakisha ica kulya mu cifulo ca cintubwingi, pamo nga mu ŋanda ya kuliilamo? Mu cilola ca kusoka kwa kwa Yesu kwi pepo lya kuilangisha, caliba icaumfwika ifyo umo pambi kuti afwaya ukusengauka ukubimbula ukucebusha kushalinga ku mwine. (Mateo 6:5, 6) Nangu ni fyo, ipepo lipeelwa mu kushilimuka kuti lyabimbula ukumona kwawamisha.

Ici caali e cakukumanya ca mutumikishi wacaice umo uubomba pa Bethel ya Brooklyn, icishinte ca calo ica Nte sha kwa Yehova. Alelya umwikulo mu ŋanda ya kuliilamo, ukuipekanya ukuya ku cilonganino cakwe ica cikaya no kukumana ne bumba ilyo lyali no kwakanamo mu mibombele ya kushimikila Ubufumu. Lintu umwikulo wakwe wafikile, apepele ipepo mu musango wakwe uwa lyonse. Pa kwisula fye amenso yakwe, aliinwike no kumona uulete fya kulya umwanakashi naiminina alelolesha pali ena.

“Ulepepa, bushe te ifyo?” e fyo aipwishe. Lintu ayaswike mu kusuminisha, umwanakashi asosele ukuti: “Ufwile ukuba umo uwa Nte sha kwa Yehova. Abafyashi bandi na bo bene ni Nte sha kwa Yehova. Nshabalile njibimba mu cituntulu mu butotelo bwabo, lelo ninjishiba ningile ukucita ifyo. Napamo kuti nakwata ukulembesha kwa Ulupungu lwa kwa Kalinda na Loleni! Bushe kuti nalembesha kwene ukufuma kuli iwe?”

“Nali mupepi no kusakamina pa ca kulya candi,” e fibukisha munyina wacaice. Nangu ni fyo, aali na maka ya kushalika ukulembesha kubili na bamagazini ba nomba line babili kuli wene kabili no kupekanya icipempu ca kubwelelamo—conse ici ni pa kuti alipepele.