Ifipusho Ukufuma ku Babelenga

Mwi pepo lyakwe ilya cilangililo, bushe Yesu apilibwile ukuti ukufwaya kwa kwa Lesa kwalecitwa mu muulu libe ninshi bamalaika babifi bacili tabalatamfiwa?

Nga fintu calembwa pali Mateo 6:10, Yesu atile: “Ukufwaya kwenu kucitwe pano isonde nga mu muulu.” Abantu kuti baumfwila uku kulomba mu nshila shibili. Iya kubalilapo, ngo kulomba ukuti ukufwaya kwa kwa Lesa kucitwe pe sonde nge fyo kale kale kwacitwa mu muulu nelyo, iya bubili, ngo kulomba ukuti ukufwaya kwakwe kucitwe mu kukumanina mu muulu na pano isonde.a Ubupilibulo bwa mashiwi ya kwa Yesu ayatangilileko aya kuti “ubufumu bwenu bwise,” bulangilila ukuti inshila ya bubili e yumfwana sana na Malembo. Kabili bulangilila ifyo imibele yali lintu Yesu ali pe sonde na pa numa ya nshita ntali. Ni mu nshila nshi?

Ibuuku lya Ukusokolola lilosha ku fya kufumamo fibili ifyamonekesha mu kwimikwa kwa Bufumu bwa kwa Lesa mu muulu. Ica kubalilapo cikuma imyulu ine, e lyo ica bubili cikuma isonde. Ukusokolola 12:7-9, 12 kutila: “Kwabuukile inkondo mu muulu: Mikaele na bamalaika bakwe balwile ne cing’wena, ne cing’wena na bamalaika ba ciko fyalilwile lelo tacacimfishe iyo, ne cifulo cabo tacasangilwe kabili mu muulu. E fyo icing’wena cikalamba capooselwe pa nshi, icisoka ca pa kutendeka, iciitwa Kaseebanya kabili Satana, icilufya aba pano isonde bonse; capooselwe pe sonde, na bamalaika ba ciko bapooselwe pamo na co. E ico, angeni, mwe myuulu na mwe baikalamo! Kalanda kwi sonde na kuli bemba, pantu Kaseebanya naikila pali imwe, ali ne cipyu cikalamba, pa kwishiba ukuti ali ne nshita inono.”

Ukutamfiwa kwa kwa Satana ne fibanda ukufuma mu muulu pa numa ya 1914 kwafumishe mu muulu imipashi yonse iyapondweke. Ici caletele ukusekelela kukalamba ku bana ba bumalaika aba cishinka aba kwa Yehova, ababa e cinabwingi ca fibumbwa fyakwe ifya ku mupashi. (Yobo 1:6-12; 2:1-7; Ukusokolola 12:10) E co, ukulomba kwa mwi pepo lya cilangililo ilya kwa Yesu ukulosha ku myulu kwalifishiwepo. Bonse abashele ku muulu baali aba cishinka kuli Yehova kabili abainashisha umupwilapo kuli bumulopwe bwakwe.

Cifwile ukukomailwapo ukuti libe ici tacilacitika, bamalaika babifi bali bacili balayako ku muulu nangu ca kuti bali abatamfiwa mu lupwa lwa kwa Lesa no kuba pa fibindo. Ku ca kumwenako, Yuda 6 asokolola ukuti mu nshita ya kutendeka kwa buKristu aba bamalaika ninshi kale kale ‘basungilwa mu fikakilo fya pe mu mfifi ya ku mupashi umwafiita fititi ukulolela ubupingushi pa bushiku bukalamba.’ Na 2 Petro 2:4 itila: “Lesa tashimbile ukukanda bamalaika ababembwike, lelo, pa kubapoosa mu Tartari [e kuti ukusaalulwa icine cine], abapoosele mu filindi [fya ku mupashi] umwafiita fititi ku kusungilwa ubupingushi.”b

Aba bamalaika babifi balikwata sana amaka pano isonde, ukupusanako ne fyo cali ilyo bali abatamfiwa ku muulu. Na kuba, Icebo ca kwa Lesa ciita Satana “kateeka wa pano calo,” kabili ciita ifibanda “bakateeka ba calo aba mfifi ino.” (Yohane 12:31; Abena Efese 6:11, 12; 1 Yohane 5:19) Pa mulandu wa maka yakwe, Kaseebanya aali na maka ya kutambika Yesu “amabufumu yonse aya pano calo no bukata bwa yako” nga amupepako fye. (Mateo 4:8, 9) E co, ilyo Ubufumu bwa kwa Lesa ‘bukesa’ pe sonde, bukaletako ukwaluka ukukalamba.

Kuumfwa pano isonde, ukwisa kwa Bufumu bwa kwa Lesa kukaletako ubwikashi bupya. Ubu Bufumu bukashonaula imitekele yonse iya bantunse kabili bukaba e buteko bweka ubwe sonde. Pa nshita imo ine, abatekwa ba buko abatiina Lesa e bakapanga “isonde lipya.” (2 Petro 3:13; Daniele 2:44) Ubu Bufumu bukafumyapo no lubembu pa bantunse bacumfwila kabili mu kuya kwa nshita bukalenga isonde lyonse ukuba paradise. Kabili mu kucite fyo bukafumyapo conse icakuma imitekele ya kwa Satana.—Abena Roma 8:20, 21; Ukusokolola 19:17-21.

Ku kupwa kwa Myaka Ikana Limo, ilyo Ubufumu bwa buMesia bukaba nabupwishishisha imifwaile Lesa abukwatile, “Umwana umwine akanakila Uwalengele fyonse ukunakila wene, ukuti Lesa akabe fyonse muli bonse.” (1 Abena Korinti 15:28) Lyene kukaba ukweshiwa kwa kupelako, kabili pa numa ya ico Satana, ifibanda fyakwe, e lyo na bantunse bonse bacipondoka abakalufiwa bakonaulwa umupwilapo mu “mfwa ya cibili.” (Ukusokolola 20:7-15) Pa numa ya ico, bamalaika na bantunse bakatwalilila ukuinashisha ne nsansa kuli bumulopwe bwa kwa Yehova ubwabamo kutemwa. Mu nshila fye shonse, uko kukaba e kufishiwapo kwakumanina ukwa mashiwi ya kwa Yesu aya mwi pepo lya cilangililo.—1 Yohane 4:8.

[Amafutunoti]