Ifipusho Ukufuma ku Babelenga

Inshita shimo tulomfwa uko bamunyina balanda nelyo ukupepa ukuti Ubufumu bwa kwa Lesa bwise pe sonde. Bushe iyi numbwilo yalilungama?

Ukulanda mu kukosa, te nshila ya mu Malembo iya kulumbulwilamo ifintu. Ubufumu bwa kwa Lesa bwa mu muulu. Muli fyo, e mulandu wine umutumwa Paulo alembele ukuti: “Shikulu akampokolola ku mulimo onse wa bubifi, no kumpususha nje mu bufumu bwakwe bwa mu muulu; kuli wene kube ubukata umuyayaya umuyayaya. Amene.”—2 Timote 4:18; Mateo 13:44; 1 Abena Korinti 15:50.

Ubufumu bwaimikwe mu myulu mu 1914, kabili tabwakatale abukuushiwa ukwisa kuli Paradise wabweshiwa pe sonde nelyo ukuya ukuli konse kumbi. Yesu Kristu e Mfumu ya ubu Bufumu. Pamo nge Mfumu, Yesu alikwata ubulashi pali bamalaika. Muli fyo, icifulo cakwe icalinga ica kutekelako caba ni ku kulyo kwa kwa Lesa mu myulu. Abena Kristu basubwa balailunda kuli wene pamo nge shamfumu kabili bashimapepo mu muulu.—Abena Efese 1:19-21; Ukusokolola 5:9, 10; 20:6.

Bushe ici kanshi, cilepilibule fyo tulingile ukuleka ukulumbulula kuli Lesa ukupaapaata ukusangwa mu lubali lwe Pepo lya kwa Shikulu ulutila: “Ubufumu bwenu bwise. Ukufwaya kwenu kucitwe pano nse nga mu muulu”? (Mateo 6:10) Ico capusanako, lilye pepo lyalilinga kabili licili lyaisulamo ubupilibulo.

Ubufumu bwa kwa Lesa ku ntanshi buli no kubomba mu nshila yalungama ukulola kwi sonde lino, kabili ici e co tutontonkanyapo lintu tulepepa no kubomfye numbwilo nga shilya isha mu mashiwi ye Pepo lya kwa Shikulu. Ku ca kumwenako, Daniele 2:44 asobele ukuti Ubufumu buli no “kwisa” ku konaula inko shonse kabili bukapyanapo mu kuteka lino isonde. Ukusokolola 21:2 kulanda pa lwa kwa Yerusalemu Mupya uuleika ukufuma mu muulu. Yerusalemu mupya apangwa na Bena Kristu basubwa ba 144,000 abakaba nabwinga wa kwa Kristu. Na kabili ni bakateka banankwe aba kwa Yesu mu Bufumu. E co Ukusokolola 21:2 kulondolola ukuti bakaalukila ku kusakamana isonde, mu kuba na mapaalo yawamisha ukwisa ku mutundu wa muntu uwa busumino.—Ukusokolola 21:3, 4.

Lelo apo aya masesemo yawamisha na yambi tayalafikilishiwa, cikatwalilila ukuba icalinga ukupepa kuli Yehova Lesa mu kumfwana na mashiwi ya kwa Yesu aya kuti, “Ubufumu bwenu bwise.” Lelo tatulingile ukutontonkanya ukuti Ubufumu bukesa pali uno planeti uwe Sonde mu cine cine. Kamfulumende wa Bufumu aaba mu muulu, te pe sonde.

[Abatusuminishe Ukubomfya Icikope pe bula 31]

Isonde: Ukushimpwa pa cikope ca NASA