“Bacananika ba mu Mpanga”

UKUBULWE ncito. Ukunina kwa mitengo. Ubupiina. Ukubotelela kwa fya bunonshi. Aya mashiwi yamoneka mu kuba no kubwekeshapo kuleingilishako mu manyunshipepala. Kabili yabelebesha amafya ayo amamilioni balolenkana nayo ilyo baleesha ukuliisha no kufwike ndupwa shabo no kufwaye cifulo ca kutubilishamo.

Abasumina na bashasumina mu musango umo wine balyambukilwako. Lelo abasumina tabalekeleshiwa mu kulolenkana ne sho mpika. Yesu, ukulanda ku bantu baicefya aba mu mwanda wa myaka uwa kubalilapo, asosele ukuti: “Lolesheni pa fyuni fya mu lwelele; tafitanda nangu kuseepa, nangu kututila ku matala, kabili Shinwe wa mu muulu alafilela. Bushe imwe tamwaficilako apakalamba?”—Mateo 6:26.

Yesu na kabili asosele ukuti: “Lolekesheni bacananika ba mu mpanga ifyo bamena; tabacucutika nangu kupikula, lelo ndemweba, nati, nangu ni Solomone mu bukata bwakwe bonse tasaamikwe nga umo wa muli aba. Awe nga Lesa afwike fi icani ca mu mpanga icilipo lelo na mailo cikapooswa mwi buku, bushe takacileko apakalamba ukufwika imwe.”—Mateo 6:28-30.

Bushe ici cilepilibulo kuti Umwina Kristu talekabilo kubomba pa kusange mikalile? Te kuti cibe fyo! Umwina Kristu alabomba na maka ukulingana ne fintu cilekabilwa pa kulipile fipooswa fyakwe. Umutumwa Paulo asosele ukuti: “Ngo muntu tafwaya kubomba, no kulya elalya.” (2 Abena Tesalonika 3:10) Nangu ni fyo, Umwina Kristu aleluka ukusakamana kwabamo kutemwa ukwa kwa Lesa kabili alikwate citetekelo ca kuti Wishi wa ku muulu alamulinda. Muli ifyo, tafulunganishiwa na masakamika ya bumi. Nangu fye ni mu nshita shaafya, abike fintu fya ntanshi—ifintu fya ku mupashi—intanshi. Asumina amashiwi ya kwa Yesu aya kuti: “Lelo mubale mufwaye ubufumu bwa kwa Lesa no bulungami bwakwe, ne fi fyonse fikalundwako kuli imwe.”—Mateo 6:33.