Mwileka Uuli Onse Onaule Ifibelesho Fyenu Ifisuma

“Mwilufiwa: ukubishanya kubi konaule mibele isuma.”—1 ABENA KORINTI 15:33.

1, 2. (a) Ni shani fintu umutumwa Paulo ayumfwile ukulola ku Bena Kristu ba ku Korinti, kabili mulandu nshi? (b) Kufunda nshi maka maka twalalanguluka?

MWANDI kukunta kwa maka ukutemwa kwa bufyashi kwaba! Kusesha abafyashi ku kuipusula pa mulandu wa bana babo, ukubasambilisha no kubapanda amano. Umutumwa Paulo taali wishi wa cine cine, lelo alembele ku Bena Kristu mu Korinti ukuti: “Nelyo mwingaba na ba kumufunda amakana ikumi muli Kristu, tamuli na bashinwe abengi. Pantu muli Kristu Yesu ine namufyalile mu mbila nsuma.”—1 Abena Korinti 4:15.

² Mu kubangilila, Paulo aali naya ku Korinti, uko ashimikile ku baYuda na bena Hela. Alyafwile ukupanga icilonganino mu Korinti. Muli kalata na umbi Paulo apashenye ukusakamana kwakwe kuli kulya ukwa kwa nyina uonsha, lelo aali nga wishi ku bena Korinti. (1 Abena Tesalonika 2:7) Nge ficita wishi wa cine cine uwakwato kutemwa, Paulo alikonkomeshe abana bakwe aba ku mupashi. Kuti pambi mwanonkelamo mu kufunda kwakwe ukwa buwishi ku Bena Kristu mu Korinti: “Mwilufiwa: ukubishanya kubi konaule mibele isuma.” (1 Abena Korinti 15:33) Mulandu nshi Paulo alembele ifyo ku bena Korinti? Ni shani fintu twingabomfya uko kupanda amano?

Ukufunda Kuli Bene na Kuli Ifwe

3, 4. Cinshi twaishiba pa lwa Korinti wa mu mwanda wa myaka uwa kubalilapo no bwingi bwa uko ubwa bekashi?

³ Mu mwanda wa myaka uwa kubalilapo, Strabo uusambilila impanga umuGreek alembele ukuti: “Korinti itwa ‘iikankaala’ pa mulandu wa fya bukwebo fya iko, apantu yabela pa musoso uwitwa Isthmus kabili e ine ya fyabu fibili, cimo icitungulula umulungamina mu Asia, na cimbi ku Italy; kabili cicilenga ukuba icayanguka ukukaushanya kwa fipe ukufuma ku fyalo fyonse fibili.” Imyaka iili yonse ibili ifyangalo fyalumbuka ifya Isthmus fyaleleta amabumba yakulisha ku Korinti.

⁴ Ni shani pa lwa bantu muli uyu musumba uwali cifulo ca pa kati ica bulashi bwa kamfulumende no kupepa kwa musamwe ukwa kwa Aphrodite? Profesa T. S. Evans alondolwele ukuti: “Ubwingi bwa bantu [bwali] napamo mupepi na 400,000. Sosaite [aali] wa ntambi shasumbuka, lelo imibele isuma iya muleketela, nelyo fye iyabipisha. . . . Abekashi ba cina Hela aba mu Akaya baishibikilwe ku kulamuka kwatwalilila no kufwaisha kwacincila ukwa fintu ifyeni. . . . Icilumba cabo cali ca kuluminisha ica nshita iili yonse ku kubalamuna amalekano.”

5. Busanso nshi bamunyina ba ku Korinti balolenkene nabo?

⁵ Mu kupita kwa nshita nelyo fye icilonganino cabele icayakanikana kuli bamo abacili bakongamine ukulola ku kutunganya kwa cilumba. (1 Abena Korinti 1:10-31; 3:2-9) Impika ikalamba yali ya kuti bamo baletila: “Ukwima kwa bafwa takuli.” (1 Abena Korinti 15:12; 2 Timote 2:16-18) Te mulandu ne cali icisumino cabo (nelyo icisumino calubana) ica kulungatika, Paulo aali no kubalungika mu kuba no kushininkisha kwaumfwika ukuti Kristu ‘alibuushiwa ku bafwa.’ Muli ifyo, Abena Kristu kuti bacetekela ukuti Lesa aali no kubapeelo “kucimfya muli Shikulwifwe Yesu Kristu!” (1 Abena Korinti 15:20, 51-57) Nga ca kuti e ko wali kulya, bushe nga wali mu busanso?

6. Ukufunda kwa kwa Paulo pali 1 Abena Korinti 15:33 kwalebomba ukucilisha kuli bani?

⁶ Mu kupayanya ubushininkisho bwashangila ubwa kuti abafwa bali no kubuushiwa, Paulo abebele ukuti: “Mwilufiwa: ukubishanya kubi konaule mibele isuma.” Inkonta ya uku kufunda yakumine abo abalebishanya ne cilonganino abalekaana icifundisho ca kubuuka. Bushe baali fye abashashininkisha pa lwa cishinka ico bashaumfwikishe? (Linganyeniko Luka 24:38.) Iyo. Paulo alembele ukuti ‘bamo ba muli imwe batila ukwima kwa bafwa takuli,’ e co abo ababimbilwemo balelumbulula ukukanasuminisha, ukukongamina ku busangu. Paulo aali uwaibukila bwino ukuti ici kuti caonaula imibele isuma no kutontonkanya kwa bambi.—Imilimo 20:30; 2 Petro 2:1.

7. Ni mu mibele nshi imo umo twingabomfya 1 Abena Korinti 15:33?

⁷ Ni shani fintu twingabomfya ukusoka kwa kwa Paulo pa lwa kubishanya? Taloseshe mu kuti tulingile ukukaana ukwaafwa umo mu cilonganino uulecisanga icakosa ukumfwikisha icikomo ca Baibolo nelyo icisambilisho. Mu cituntulu, Yuda 22, 23 atucincisha ukupeela ukwaafwa kwabamo inkumbu ku bafumaluka abakwete ukutwishika kwa musango yo. (Yakobo 5:19, 20) Ukufunda kwa buwishi ukwa kwa Paulo, nangu cibe fyo, kulingile mu kushininkisha ukubomba nga ca kuti umo aletwalilila ukulengulula ico twaishibo kuba icine ca Baibolo nelyo atwalilila ukulandapo kwa mintelengu nelyo ukwa musango wapusanako. Tulingile ukuba abapempwila ku kubishanya no muntu wa musango yo. Kwena, nga ca kuti umo asangwike umusangu wa cine cine, bakacema ba ku mupashi bali no kubomba ku kucingilila umukuni.—2 Timote 2:16-18; Tito 3:10, 11.

8. Ni shani twingabomba no kwiluka lintu umo apaasha pa lwa cisambilisho ca Baibolo?

⁸ Na kabili kuti twabomfya amashiwi ya buwishi aya kwa Paulo pali 1 Abena Korinti 15:33 lintu caisa kuli abo aba ku nse ya cilonganino abasumbula ifisambilisho fya bufi. Ni shani fintu pambi twingakulilwa mu kubishanya nabo? Kuti cacitika nga ca kuti tatwalekenye pa kati ka abo pambi abengafwiwa ukusambilila icine na abo abaleimya fye ifikansa pa kuti bengasumbula icisambilisho ca bufi. Ku ca kumwenako, mu mulimo wesu uwa kucitilo bunte, kuti pambi twakumanya umuntu uwakaana icishinka cimo lelo uuli uwaitemenwa ukulanshanya cene mu kulundapo. (Imilimo 17:32-34) Ico mu cine ceka te kuti cileteko impika, pantu mu nsansa tulalondolola icine ca Baibolo ku uli onse uyo mu cine cine alefwaya ukwishiba ifya musango yo, nelyo fye ukubwelelako ku kupeela ubushininkisho bwa kushinina. (1 Petro 3:15) Nalyo line, bambi te kuti pambi babe abasekelela mu cine cine mu kusanga icine ca Baibolo.

9. Ni shani fintu tulingile ukwankulako ku kusonsomba ku fisumino fyesu?

⁹ Abantu abengi kuti bapaashanya pa maawala ayengi, cila mulungu, lelo te pa mulandu wa kuti balefwaya icine. Bafwaya fye ukucefya icisumino ca umbi ilintu baletakisha ukusambilila kwabo ukwatungwa mu ciHebere, iciGreek, nelyo sayansi wa kusanguka. Lintu babakumanya, Inte shimo baliyumfwa abasonsombwa kabili icafumamo kukwata ukubishanya kwatantalila ukwashimpwa pa fisumino fya butotelo ifya bufi, amano ya buntunse, nelyo ifilubo fya sayansi. Cili icawaminwo kumonwa ukuti Yesu talekele ico ukumucitikila, nangula cingati nga alicimfishe ukukansana ukwingi ne ntungulushi sha butotelo abasambilile mu ciHebere nelyo iciGreek. Lintu asonsombelwe, Yesu ayaswike mu kwipifya kabili lyene ayalwilile ukusakamana kwakwe na kabili ku baicefya, impaanga shine shine.—Mateo 22:41-46; 1 Abena Korinti 1:23–2:2.

10. Mulandu nshi ukucenjela kwalingila ku Bena Kristu abakwata bakompyuta no kufika ku mibombele ya kompyuta uko ubukombe busungwa?

¹⁰ Bakompyuta ba muno nshiku nabo balisula inshila shimbi ku kubishanya kubi. Amakampani yamo aya bukwebo yapeela abalembesha amaka ya kubomfya kompyuta na lamya ku kutuma ubukombe ku mibombele ya kompyuta uko ubukombe busungwa no kufikwako ku bantu abengi ukupitila muli kompyuta na lamya; muli ifyo umuntu kuti atuma ubukombe ubwingafikwako kuli bonse abalembesha. Ici catungululwa ku citwa mu kuluba ngo kupaashanya kwa fibombelo fya malaiti pa milandu ya butotelo. Umwina Kristu kuti pambi akulilwa mu kupaashanya kwa musango yo kabili kuti pambi apoosa amaawala ayengi no utontonkanya mu busangu uyo pambi uwatamfiwa ukufuma mu cilonganino. Ubutungulushi pali 2 Yohane 9-11 bwebekesha ukufunda kwa kwa Paulo ukwa buwishi pa lwa kusengauka ukubishanya kubi.a

Sengaukeni Ukulufiwa

11. Imibele ya bukwebo mu Korinti yatambike amashuko nshi aya mu nshita?

¹¹ Nga fintu cimwenwe, Korinti cali cifulo ca pa kati ica bukwebo, mu kuba na matuuka ayafulilako na makwebo. (1 Abena Korinti 10:25) Abengi abaleisa ku fyangalo fya Isthmus baali no kwikala mu matenti, kabili mu kati ca cilya ica kucitika abasulwishi baali no kushitisha ukufuma mu nsakwe shingaseshiwa nelyo amatuuka. (Linganyeniko Imilimo 18:1-3.) Ici cacilengele ukucitikako kuli Paulo ukusanga incito kulya ukupanga amatenti. Kabili kuti abomfya icifulo ca kubombelapo ku kutwala pa ntanshi imbila nsuma. Profesa J. Murphy-O’Connor alembo kuti: “Ukufuma mwi tuuka pa mushiika wapamfiwa . . . apalungatana no musebo waisulamo abantu Paulo alelanda, te ku babomfi banankwe fye na bakushishanya nabo, lelo na kwi bumba lyali ku nse. Mu fiputulwa fya nshita ilyo aba kushita bacepele aali no kwiminina pa mwinshi no kwikata mu kulanshanya abo atontonkenye ukuti kuti pambi bakutika . . . Cili icakosa ukwelenganya ukuti ubuntu bwakwe ubwa maka no kushininwa kwapwililila tafyamulengele ‘umuntu wapulamo’ mu bwina mupalamano mu kwangufyanya, kabili ici nga calikulile abafwaisha ukwishiba, te bambokoya fye ba pa mushiika lelo na abo abalefwaya mu cine cine. . . . Abanakashi baupwa na babomfi babo, abamumfwile, kuti bamutandalila mu kabepesho ka kwisa ku kushita. Mu nshita sha kukanshika, lintu ukupakasa nelyo ukululunkanya kunono kwatiinishe, abasumina baali no kumukumanya nga bakushishanya nabo. Icifulo ca kubombelamo na kabili camulengele ukukumanya abalashi ba kamfulumende wa cikaya.”

12, 13. Ni shani fintu 1 Abena Korinti 15:33 mu kulingisha ingabomba pa cifulo ca ncito?

¹² Paulo alingile alimwensekeshe, nangu ni fyo, ukucitikako kwa “kubishanya kubi” mu cifulo ca ncito. Na ifwe bene tulingile ukumwensekesha. Mu kukatama, Paulo ayambwile imibele ya mutima iyo yaanene pa kati ka bamo iya kuti: “Tulye no kunwa, pantu mailo tukafwa.” (1 Abena Korinti 15:32) Ilyo line fye akonkeshepo ukufunda kwakwe ukwa buwishi ukwa kuti: “Mwilufiwa: ukubishanya kubi konaule mibele isuma.” Ni shani fintu pambi icifulo ca ncito no kufwaya ukuipakisha fingasuntinkanishiwa ku kulenga ubusanso bwingacitikako?

¹³ Abena Kristu bafwaya ukuba aba bucibusa na babomfi banabo, kabili ifya kukumanya ifingi filangilila fintu ici cingaba icifumamo cimo mu kwisula inshila ku kupeelo bunte. Nangu cibe fyo, kabomba munankwe kuti asenda bucibusa bubi bubi, pamo ngo kucebusha ukubishanya pa kuipakisha capamo. Wene kuti pambi atambika ubwite ku ca kulya ca kasuba pa kati, ukwimininako panono ku kunwa pa numa ya kwinuka ku ncito, nelyo ukukokoloka pa mpela ya mulungu. Uyu muntu kuti pambi amoneka uwa cikuuku kabili uwayemba, kabili ubwite kuti pambi bwamoneka ubwa kaele. Nalyo line, Paulo atupanda amano ukuti: “Mwilufiwa.”

14. Ni shani fintu Abena Kristu bamo balufiwa ukupitila mu kubishanya?

¹⁴ Abena Kristu bamo balilufiwa. Panono panono balundulwile imibele ya mutima iyanaka ukulola ku kubishanya na banabo ba pa ncito. Napamo kwakulile pa mulandu wa buseko mwakwata bonse mu cangalo nelyo ica kuleseshamo icitendwe. Nelyo uushili Mwina Kristu pa ncito kuti pambi aba ukucilisha uwa cikuuku kabili uulangulukilako, icatungulwile ku kupoosa inshita yaingilishiwako no yo muntu, nelyo fye ukusalapo ukubishanya kwa musango yo ukucila ukwa bamo mu cilonganino. Lyene ukubishanya kuti pambi kwatungulula ku kupusa ukulongana fye kumo. Kuti capilibula ukutandala kwatantalila inshita ya cungulo bushiku cimo kabili ukutoba imitantikile ya kwakana mu butumikishi bwa mwi bala ulucelo. Kuti cafumamo ukutamba filimu nelyo tepu wa video uyo Umwina Kristu pe samba lya mibele ya lyonse engakaana. ‘Oo, ico te kuti cincitikile,’ e fintu pambi twingatontonkanya. Lelo abengi abo abalufiwa limbi pa kubala bayankwileko mu nshila imo ine. Tulekabila ukuipusha fwe bene ukuti, ‘Naba uwapampamina shani pa kubomfya ukufunda kwa kwa Paulo?’

15. Mibele nshi iya mutima iyashikatala tulingile ukukwata ukulola ku bena mupalamano?

¹⁵ Cintu fye twalanguluka pa lwa cifulo ca ncito cilabomba ku kubishanya na bena mupalamano nako kwine. Mu kushininkisha, Abena Kristu mu Korinti wa pa kale balikwete abena mupalamano. Mu mekashi yamo caliba ica lyonse ukuba aba bucibusa kabili aba kwafwilisha ku bena mupalamano. Mu ncende sha mu mishi abena mupalamano kuti pambi bashintilila pali umo no munankwe pa mulandu wa kuba beka. Ifikakilo fya ndupwa fyaliba maka maka ifyakosa mu ntambi shimo, ukufumamo ubwite ubwingi ku fya kulya. Ukwabulo kutwishika, imimwene yashikatala yaliba iyakatama, nga fintu Yesu alangishe. (Luka 8:20, 21; Yohane 2:12) Mu kubomba kwesu na bena mupalamano na balupwa lwesu, bushe twakongamina ku kutwalilila ukubomba nabo mu nshila twalecitilamo ilyo tatulaba Abena Kristu? Ukucila, bushe nomba tatulingile ukupituluka mu kubomba kwa musango yo kabili ukupima mu kuba no kwangwako umwa kupelela umwalinga?

16. Ni shani fintu amashiwi ya kwa Yesu pali Mateo 13:3, 4 yalingile ukumfwiwa?

¹⁶ Yesu inshita imo apashenye icebo ca Bufumu ku mbuto “shaponene mu mbali ya nshila, ne fyuni fyaisa no kucibaula.” (Mateo 13:3, 4, 19) Ku numa kulya, umushili mu mbali ya musebo wasangwike uwakosa apantu amakasa ayengi yalepitapo. E fintu caba ku bantu abengi. Ubumi bwabo bwaisulamo abena mupalamano, balupwa lwabo, na bambi abesa no kuya, ukubasunga abapamfiwa. Ici, cilanyantaula umushili wa mitima yabo, ukucilandila muli iyo nshila, ukucilenga icakosa ku mbuto sha cine ukulimbuka. Ukukanaankulako kwa musango umo wine kuti calunduluka kuli umo uli kale kale Mwina Kristu.

17. Ni shani fintu ukubishanya na bena mupalamano na bambi kulingile ukutwambukila?

¹⁷ Abena mupalamano bamo aba ku calo na balupwa kuti pambi baba aba bucibusa kabili aba kwaafwa, nangula ca kuti lyonse tabalangisha atemwa ubuseko mu fintu fya ku mupashi nelyo ukutemwa ubulungami. (Marko 10:21, 22; 2 Abena Korinti 6:14) Ukusanguka kwesu Abena Kristu takulingile ukupilibula ukuti tube aba bulwani, abashatemwa bena mupalamano. Yesu atufundile ukulangisha ubuseko bwine bwine muli bambi. (Luka 10:29-37) Lelo ukwapuutwamo mu kulinganako kabili ukwakabilwa kwaba kufunda kwa kwa Paulo ukwa kuba abasakamana pa lwa kubishanya kwesu. Ilyo tulebomfya ukufunda kubangilile, tatulingile ukulaba ukulekelesheko. Nga ca kuti tatusungile ifishinte fyonse fibili mu muntontonkanya, ifibelesho fyesu kuti fyayambukilwa. Ni shani fintu ifibelesho fyobe ficilana ne fyo ifya bena mupalamano bobe nelyo balupwa ukulosha ku bufumacumi nelyo ukumfwila ifunde lya kwa Kaisare? Ku ca kumwenako, kuti pambi bayumfwa ukuti pa nshita ya musonko, ukucita lipoti amalipilo yanono nelyo icibwesha ca bukwebo kuli ukwalungamikwa, nelyo fye ukwalinga ku kupusunsuka. Kuti pambi balanda mu kunashanasha pa lwa mimwene yabo lintu mulenwa kofi pa kukokoloka nelyo mu kati ka kutandala ukwipi. Ni shani fintu ico cingambukila ukutontonkanya kobe ne fibelesho fya bufumacumi? (Marko 12:17; Abena Roma 12:2) “Mwilufiwa: ukubishanya kubi konaule mibele isuma.”

Ifibelesho fya Bwaice na fyo Fine

18. Mulandu nshi 1 Abena Korinti 15:33 ibombela na ku misepela nako kwine?

¹⁸ Abacaice balambukilwa ukucilisha ku fintu bamona no kumfwa. Bushe tamwamona abana abo ukubomfya kwabo ukwa mubili nelyo ifibelesho fimo fyapalisha kuli ifyo ifya bafyashi babo nelyo indume shabo ne nkashi? Tatulingile ukupapushiwa, lyene, ukuti abana kuti pambi basongwa apakalamba ku banabo bangala nabo nelyo abanabo ba pa sukulu. (Linganyeniko Mateo 11:16, 17.) Nga ca kuti umwana mwaume wenu nelyo umwanakashi ali pa kati ka misepela abalanda mu kubulwo mucinshi ku bafyashi babo, mulandu nshi uwa kwelenganishisha ukuti ici tacakambukile abana benu? Ni shani nga ca kuti lyonse baleumfwa imisepela imbi ilebomfya ululimi lwa nsele? Ni shani nga ca kuti ifibusa fyabo pa sukulu nelyo mu bwina mupalamano nabacincimuka pa lwa musango upya uwa nsapato nelyo fashoni mupya uwa fibekobeko? Bushe tulingile ukutontonkanya ukuti ukusonga kwa musango yo kuti kwatuna mu Bena Kristu bacaice? Bushe Paulo atile 1 Abena Korinti 15:33 yalikwata apa kupelela mu mushinku?

19. Mimwene nshi abafyashi balingile ukwesha ukulimba mu bana babo?

¹⁹ Nga ca kuti uli mufyashi, bushe waliba uwaibukila ulwa uko kufunda ilyo mulepelulula no kucita ukupingulapo ukukuma ku bana benu? Napamo cikaafwa nga ca kuti mwasumina ukuti ici tacipilibula ukuti imisepela yonse imbi iyo abana benu baba nayo mu bwina mupalamano nelyo pa sukulu tayaba bwino. Imo kuti yaba iisuma kabili iyatekanya, kwati fye ni fintu bamo aba bena mupalamano benu, balupwa, nelyo abanenu ba pa ncito baba. Esheni ukwaafwa ubufyashi bwenu ukumona ici no kumfwikisha ukuti muli abashikatala mu kubomfya kwenu ukwa kufunda kwa kwa Paulo ukwabamo amano, ukwa buwishi ku bena Korinti. Ilyo baleiluka inshila mulengelamo ifintu ukushikatala, kuti cabaafwa ukumupashanya.—Luka 6:40; 2 Timote 2:22.

20. Mwe misepela, kusonsomba nshi mwalolenkana nako?

²⁰ Imwe mwe bacili abaice, esheni ukwiluka ifya kubomfya ukufunda kwa kwa Paulo, ukwishiba ukuti kwaliba ukwakatama ku Mwina Kristu uuli onse, umwaice nelyo umukalamba. Ici cikaba ca kusonsomba, lelo mulandu nshi uwa kukanabela abaitemenwa ukubomba no ko kusonsomba? Mwensekesheni ukuti pa mulandu fye wa kuti mwalishiba imo iya iyo misepela ukufuma ku bwaice tacipilibula ukuti te kuti yambukile ifibelesho fyenu, ukuti te kuti yonaule ifibelesho ifyo mulepanga nge misepela ya Bwina Kristu.—Amapinda 2:1, 10-15.

Intampulo Shashininkishiwa ku Kucingilila Ifibelesho Fyesu

21. (a) Kukabila nshi twakwata ukukuma ku kubishanya? (b) Mulandu nshi twingabela abashininkisha ukuti ukubishanya kumo kuti kwaba kwa busanso?

²¹ Ifwe bonse tulakabila ukubishanya. Tufwile ukuba abapempwila, nangula ni fyo, ku cishinka ca kuti ifibusa fyesu kuti fyatusonga, ku busuma nelyo ku bubi. Ico cashininkishe ica cine kuli Adamu kabili kuli onse pa myanda ya myaka ukutula lilya. Ku ca kumwenako, Yehoshafati, imfumu isuma iya Yuda, aliipakishe ububile bwa kwa Yehova ne paalo. Lelo pa numa asuminishe umwana mwaume wakwe ukuupa umwana mwanakashi wa Mfumu Ahabu iya Israele, Yehoshafati atendeke ukubishanya na Ahabu. Kulya kubishanya kwabipa kwapene kwipaishe Yehoshafati. (2 Ishamfumu 8:16-18; 2 Imilandu 18:1-3, 29-31) Nga ca kuti twacita ukupingulapo kushili kwa mano mu kubishanya kwesu, kuti caba fye icalinganako ubusanso.

22. Cinshi tulingile ukusunga mu mutima, kabili mulandu nshi?

²² Shi, lyene, natusungilile mu mutima ukufunda kwabamo ukutemwa uko Paulo atutambika pali 1 Abena Korinti 15:33. Ayo tayali fye mashiwi ayo pambi twaumfwa ilingi ica kuti kuti twayalanda ku mutwe. Yabelebesha icitemwishi ca buwishi ico Paulo akwatile bamunyina abena Korinti ne nkashi, kabili, mu kutanukila, kuli ifwe. Kabili ukwabulo kutwishika yabamo ukufunda uko Shifwe wa ku muulu apayanya pantu afwaya ukubombesha kwesu ukutunguluka.—1 Abena Korinti 15:58.

[Futunoti]

Bushe Muleibukisha?

◻ Ni ku mulandu nshi ukucilisha Paulo alembele 1 Abena Korinti 15:33?

◻ Ni shani fintu twingabomfya ukufunda kwa kwa Paulo pa cifulo ca ncito?

◻ Mimwene nshi iyashikatala iya bena mupalamano tulingile ukukwata?

◻ Mulandu nshi 1 Abena Korinti 15:33 ukucilisha yabela kufunda kwalinga ku misepela?

[Icikope pe bula 17]

Paulo abomfeshe icifulo ca ncito ku kutanununa imbila nsuma

[Icikope pe bula 18]

Imisepela imbi kuti yaonaula ifibelesho fyobe ifya Bwina Kristu