Kuti Mwanonkelamo Shani mu Kusangwa Ku Kulongana kwa Nte sha kwa Yehova?

Bushe mwalibala amusangwapo ku kulongana kwa Nte sha kwa Yehova? Nga ca kuti tamwabala amusangwako, nalimo kuti mwaumfwa umwenso ukusangwako pa muku wa kubalilapo. Nalimo kuti mwalatontonkanya amuti: ‘Finshi ficitika pali uku kwine kulongana? Cinshi kwacindamina? Kabili cinshi ningile ukusangilwako?’ Muli lino isambililo, mwalasambilila ifyo ukulongana capamo na bantu bambi kwingamwafwa, ne fyo kwingalenga mwapalama sana kuli Lesa.

1. Cinshi Inte sha kwa Yehova balonganina capamo?

Uwalembeleko Baibo umo alilandile umulandu uukalamba uo tulingile ukulonganina capamo na bantu bambi. Atile: “Mu lukuta ulukalamba e mo nkalumbanishisha Yehova.” (Amalumbo 26:12) Ifi fine e fyo caba na ku Nte sha kwa Yehova. Balomfwa bwino ukulongana capamo. Inte sha kwa Yehova mwi sonde lyonse balalongana pamo cila mulungu ku kulumbanya Lesa, ku kumwimbila, na ku kupepa. Kabili inshita shimo cila mwaka balalongana mu mabumba ayakalamba ku kupepa Yehova.

2. Finshi mukasambilila nga mwalongana na ifwe?

Pali uku kulongana tulasambilila ifyaba mu Cebo ca kwa Lesa. Tulabelenga amalembo no kuyalondolola bwino bwino pa kuti abantu beshibe umo yalolele. (Belengeni Nehemia 8:8.) Nga mwasangwako, mukasambilila pali Yehova na pa mibele yakwe iisuma. Nga mwaishiba bwino ifyo amutemwa mukapalama sana kuli ena. Na kabili mukasambilila ifyo engalenga mwaba ne nsansa.—Esaya 48:17, 18.

3. Kuti mwanonkelamo shani nga muleba pamo na bantu abo mukasanga nga mwaisa mu kulongana na ifwe?

Yehova alitweba ukuti “[tuletontonkanya] sana pa banensu pa kuti tulecincishanya ukuba no kutemwa no kubomba imilimo iisuma, twilapuswa mu kulongana.” (AbaHebere 10:24, 25) Pa kulongana kwesu mukasanga abantu ababika sana amano ku bantu banabo, kabili abatemwa ukusambilila pali Lesa nge fyo na imwe mwatemwa ukusambilila pali Lesa. Mukomfwa uko bakalalanda amashiwi ya mu Baibo aya kukoselesha ilyo ukulongana kushilatendeka, pa kulongana, na pa numa ya kulongana. (Belengeni Abena Roma 1:11, 12.) Na kabili mukeshibana na bamo, abashimbe e lyo na baupa nelyo abaupwa ababa ne nsansa nangu ca kuti balaba na mafya. Ifi twalandapo ni fimo fye pa fyalenga Yehova atwebe ukuti tulelongana capamo lyonse.

SAMBILILENI NA FIMBI

4. Ukulongana kwa Nte sha kwa Yehova

Mu nshiku sha batumwa, Abena Kristu balelongana capamo lyonse ku kupepa Yehova. (Abena Roma 16:3-5) Belengeni Abena Kolose 3:16, lyena lanshanyeni ici cipusho:

• Bushe Abena Kristu ba mu nshiku sha batumwa balepepa shani Yehova?

VIDIO: Finshi Ficitika pa Ng’anda ya Bufumu? (2:12)

• Finshi mwamona ifipalene pa ficitika pa Ng’anda ya Bufumu na pa fyo mwacibelenga pa Abena Kolose 3:16?

• Finshi mwacitemwa pa fyo mwacimona muli vidio nelyo pa cikope, pa fyo ukulongana kuba?

Belengeni 2 Abena Korinti 9:7, lyena lanshanyeni ici cipusho:

• Cinshi Inte sha kwa Yehova bashebela abantu ukulipila indalama pa kulongana kwabo?

Ebeni abamusambilisha Baibo bamulange ifyo tukasambilila pa kulongana kumo ukukabako uno mulungu.

• Lubali nshi ulwa kulongana ulo mwatemwa nelyo ulo mwamona ukutila kuti lwamwafwa?

Bushe mwalishiba ici cishinka?

Pa jw.org, kuti mwasanga inshita ne fifulo apabela ukulongana kwesu mwi sonde lyonse.

1. Pa kulongana kwesu palaba amalyashi, ifilangililo, e lyo no kutamba amavidio. Pa kutendeka ukulongana na pa mpela ya kulongana, tulemba ulwimbo e lyo no kupepa

2. Limo abali mwi bumba balasukapo pa kulongana

3. Bonse fye kuti basangwako—indupwa, abashimbe, abakalamba, e lyo na bana

4. Tatulipilisha abesa mu kulongana na ifwe. Inte sha kwa Yehova tabalipilisha abesa mu kulongana nelyo ukupishamo imbale ya mutuulo

5. Mufwile ukuibikilishako pa kuti musangwe mu kulongana

Tontonkanyeni pa fyo ulupwa lwa kwa Yesu balecita. Pa kuti basangwe ku kulongana ukwalebako cila mwaka, bale-enda amakilomita nalimo 100 ukupita mu mpanga umwali impili ukufuma ku Nasarete ukuya ku Yerusalemu. Belengeni Luka 2:39-42, lyena lanshanyeni aya mepusho:

• Bushe mulemona ukutila ulupwa lwa kwa Yesu balingile ukuibikilishako pa kuti baleya ku Yerusalemu?

• Cinshi inshita shimo mulingile ukuibikilishishako pa kuti musangwe mu kulongana?

• Bushe mulemona ukuti calicindama ukulasangwa lyonse mu kulongana nangu ca kuti limo te kuti cimwangukile ukucita ifyo? Cinshi mwa-asukila ifyo?

• Cinshi tulingile ukulasangilwa mu kulongana lyonse?

IFYO MUSAMBILILE

Ukulongana kukamwafwa ukwishiba ifingi pali Yehova, kukalenga bucibusa bwenu na ena ukukoselako, kabili kukalenga mukalemupepela capamo na bantu bambi.

Ukupitulukamo

• Cinshi Yehova atukoselesesha ukulalongana capamo?

• Finshi mukasambilila nga mwasangwa ku kulongana kwa Nte sha kwa Yehova?

• Finshi fimbi ifyo mulemona ukutila e fyo mwinganonkelamo nga mulesangwa ku kulongana?

ISHIBILENIPO NA FIMBI

Finshi mwingacita nga mulomfwa umwenso ukusangwa mu kulongana? Moneni ifyalengele umwaume umo atemwe ukulongana.

Tabakalabe Ifyo Babapokelele (4:16)

Moneni ifyalengele umulumendo umo atemwe ukulongana e lyo ne fyo alecita pa kuti alelongana lyonse.

Nalitemenwe Sana Kulya Kulongana! (4:33)

Moneni ifyo bamo bomfwa pa kusangwa mu kulongana.

“Cinshi Ningile Ukwila ku Ng’anda ya Bufumu?” (Icipande ca pa jw.org)

Moneni ifyo umwaume umo uwali mwi bumba lya fipondo ayalwike ilyo atendeke ukulongana ne Nte sha kwa Yehova.

“Nshalesha Imfuti Konse uko Naya” (Ulupungu lwa kwa Kalinda July 1, 2014)

5. Ifintu mu calo fyalyaluka ukutula mu 1914

Tambeni VIDIO.

VIDIO: Ifintu mu Calo Fyalyaluka Ukutula mu 1914 (1:10)

Yesu alilandile pa fyali no kucitika nga atendeka ukuteka. Belengeni Luka 21:9-11, lyena lanshanyeni ici cipusho:

• Ni fisa pa fyo Yesu alandile ifyo mwamona nelyo ifyo mumfwa ukuti filecitika??

Umutumwa Paulo alilondolwele ifyo abantu bali no kuba mu nshiku sha kulekelesha. Belengeni 2 Timote 3:1-5, lyena lanshanyeni ici cipusho:

• Mibele nshi pali iyi twabelenga iyo mwamona abantu bakwata?

6. Mulecita ifilanga ukutila mwalishininkisha ukuti Ubufumu bwa kwa Lesa bwalitendeka ukuteka

Belengeni Mateo 24:3, 14, lyena lanshanyeni aya mepusho:

• Mulimo nshi uwacindama uulanga ukuti Ubufumu bwa kwa Lesa bwalitendeka ukuteka?

• Finshi mwingacita pa kuti mulebombako uyu mulimo?

Ubufumu bwa kwa Lesa bwalitendeka ukuteka, kabili nomba line fye buli no kutendeka ukuteka isonde lyonse. Belengeni AbaHebere 10:24, 25, lyena lanshanyeni ici cipusho:

• Finshi bonse tufwile ukucita apo ‘tulemona ukuti bulya bushiku bulepalama’?