Nga filya fine Yesu asobele, ‘ukubapo kwakwe’ nge Mfumu mu muulu kwaishibikilwa ku filecitika muno calo ifyapala inkondo, ifipowe, ifinkukuma, ifikuko. (Mateo 24:3-8; Luka 21:11) Ifi, filalanga bwino bwino ukuti mu 1914 e lyo Ubufumu bwa kwa Lesa ubwa mu muulu bwatendeke ukuteka kabili e yali ntendekelo ya “nshiku sha kulekelesha” isha buno bwikashi bwabipa.

Bushe Mikaele Malaika Mukalamba Nani?

MALAIKA witwa Mikaele alumbulwa fye imiku iinono mu Baibolo. Nomba imiku alumbulwa, ninshi pali fimo ifyo alecita. Mwi buuku lya kwa Daniele, Mikaele aalelwa ne cibanda; muli kalata yalembele Yuda, aalekansana na Satana; mwi buuku lya Ukusokolola, aalelwa inkondo na Kaseebanya ne fibanda fyakwe. Apo e ulandilako bwino ukuteka kwa kwa Yehova e lyo no kulwisha abalwani ba kwa Lesa, Mikaele acite fintu ukulingana no mwalola ishina lyakwe ilyalola mu kuti: “Nani Waba Nga Lesa?” Nomba bushe Mikaele nani?

Limo limo abantu bakwata amashina ayengi. Ku ca kumwenako, ishina limbi ilya cikolwe Yakobo ni Israele, e lyo umutumwa Petro, ni Simone. (Ukutendeka 49:1, 2; Mateo 10:2) E ico, ifyalembwa mu Baibolo filangilila ukutila Mikaele lishina na limbi ilya kwa Yesu Kristu ilyo alebomfya ninshi talaisa pe sonde e lyo na pa numa ya kubwelelamo ku muulu. Natumone Amalembo yalekosha ico cishinka.

Malaika mukalamba. Icebo ca kwa Lesa citila Mikaele ni “malaika mukalamba.” (Yuda 9) E kutila malaika uwacila bamalaika bonse. Mwamona ukutila Mikaele etwa malaika mukalamba. E mu kuti kwaba fye malaika mukalamba umo, epela. Na kuba Baibolo taitila “bamalaika bakalamba,” kwati nakalimo bengi, lelo itila “malaika mukalamba,” pantu ili lishina lya muntu umo fye. Kabinge, Yesu alumbulwa pamo ne shina lya kuti malaika mukalamba. Ilembo lya 1 Abena Tesalonika 4:16 lisosa pali Shikulu Yesu Kristu ati: “Shikulu umwine akatentemuka ukufuma ku muulu no kubilikisha kukalamba, kwi shiwi lya kwa malaika mukalamba.” E ico ishiwi lya kwa Yesu e lyo pano batila lya kwa malaika mukalamba. Kanshi ili lembo liletweba fye ukutila Yesu wine e malaika mukalamba, Mikaele.

Mushika. Baibolo itila “Mikaele na bamalaika bakwe balwile ne cing’wena . . . na bamalaika ba ciko.” (Ukusokolola 12:7) E ico, Mikaele e Ntungulushi ya mulalo wa bamalaika ba cishinka. Kabili Ukusokolola kutila Yesu ni Ntungulushi ya mulalo wa bamalaika ba cishinka. (Ukusokolola 19:14-16) Umutumwa Paulo na o alumbula mu kulungatika “Shikulu Yesu” na “bamalaika bakwe aba maka.” (2 Abena Tesalonika 1:7; Mateo 16:27; 24:31; 1 Petro 3:22) E ico Baibolo ilanda pali Mikaele na “bamalaika bakwe” e lyo na Yesu na “bamalaika bakwe.” (Mateo 13:41) Apo tapaba amashiwi yalembwa mu Cebo ca kwa Lesa ayatila mu muulu mwaba imilalo ibili iya bamalaika ba busumino—e kuti bamalaika ba kwa Mikaele na ba kwa Yesu—ninshi kanshi icingalolamo fye ca kuti Mikaele te umbi: ni Yesu Kristu wine ilyo ali ku muulu.a

[Futunoti]

Ifyo Mwingeshiba “Babiloni Mukalamba”

MWI buuku lya Ukusokolola mwaba ifyebo fyalembwa mu mampalanya. (Ukusokolola 1:1) Cimo ica mampalanya lyalandapo, mwanakashi uo ishina lya kuti “Babiloni Mukalamba” lyalembwa pa mpumi yakwe. Ili buuku litila, uyu mwanakashi aikala pa “mabumba ne nko.” (Ukusokolola 17:1, 5, 15) Apo umuntu te kuti ekale pa mabumba ne nko, ninshi Babiloni Mukalamba muntu wa mampalanya fye. Nomba ninshi uyu cilende wa mampalanya emininako cinshi?