Te Christopher fye, Hannah na Gina abomfwa ifi. Abantu abengi mu calo conse balishininkisha ukuti Lesa abamona ukuti ni cibusa wabo. Inga imwe, bushe mulomfwa ukuti mwalipalama kuli Lesa? Nelyo bushe kuti mwatemwa ukupalama kuli ena? Nalimo mulaipusha amuti, ‘Bushe umuntu-untu fye kuti aba cibusa wa kwa Lesa Uwa Maka Yonse? Nga kuti cacitika, finshi afwile ukucita pa kuba cibusa wa kwa Lesa?’

KUTI MWAPALAMA KULI LESA

Baibolo itila fwe bantu kuti twapalama kuli Lesa, kuti twaba ifibusa fyakwe. Itila Lesa aleita Abrahamu, icikolwe ca baHebere, ati “cibusa wandi.” (Esaya 41:8) Moneni ne fyo atweba pali Yakobo 4:8, patila: “Palameni kuli Lesa, na o akapalama kuli imwe.” Kanshi fwe bantu kuti twaba ifibusa fya kwa Lesa. Nomba apo Lesa tamoneka, bushe kuti ‘twapalama’ shani kuli ena no kuba ifibusa fyakwe?

Pa kwasuka ici cipusho, natulande pa fyo ciba pa kupanga bucibusa no muntu. Icibalilapo, kwishibana amashina. Nga baishibana, balatendeka ukulanshanya lyonse, kabili ilyo balelanda pa fyo baletontonkanya ne fyo baleumfwa, icibusa cabo cilakoselako. Kabili nga balepelana ifintu, nelyo ukwafwana mu fintu, bucibusa bulacilapo ukukosa. E fi fine e fyo ciba na pa kuba cibusa wa kwa Lesa. Natulande pa fyo twingacita pa kuba cibusa wa kwa Lesa.

Bushe mwalikwata umunenu uo mushaishiba ishina? Ukwabula no kutwishika kuti mwakaana. Irina, umwanakashi wa ku Bulgaria alandile ati, “Te kuti tube ifibusa fya kwa Lesa nga ca kuti tatwishibe ishina lyakwe.” Lelo nge fyo twacumfwa mu cipande cifumineko, Lesa afwaya ukuti mube ifibusa fyakwe. Mu Baibolo, Lesa alimweba ishina lyakwe, atila: “Nine Yehova. Ilyo e shina lyandi.”—Esaya 42:8.

Bushe Yehova omfwa shani nga twalishiba ishina lyakwe no kulishimbula tulalishimbula? Tontonkanyeni pali ici: Mu Malembo ya CiHebere, ishina lya kwa Lesa, ilyo balemba ne filembo fine ifyo mu ciHebere beta ukuti Tetragramatoni, lyabamo imiku nalimo 7,000. Lilasangwa imiku iingi ukucila pa mashina yonse ayaba mu Baibolo. Ubu bushininkisho bwa kuti Yehova alafwaya twishibe ishina lyakwe no kulalibomfya.a

Lelo, bamo, kuti batila apo Lesa wa mushilo kabili wa maka yonse, te mucinshi ukulabomfya ishina lyakwe. Kwena, te kuti ciwame ukulabomfya ishina lya kwa Lesa apa fye, nga filya fine mushingacita kwi shina lya munenu. Lelo Yehova afwaya ukuti abantu abamutemwa balecindika ishina lyakwe no kulaebako abantu bambi pa kuti balishibe. (Amalumbo 69:30, 31; 96:2, 8) Ibukisheni ukuti Yesu alesambilisha abasambi bakwe ukulapepa ukuti: “Shifwe wa mu muulu, ishina lyenu libe ilya mushilo.” Na ifwe bene kuti twalenga ishina lya kwa Lesa ukuba ilya mushilo nga tulesambilisha abantu ili ishina. Ukucita ifi kulalenga tulepalama kuli Lesa.—Mateo 6:9.

Baibolo ilanda ukuti Lesa alibika sana amano ku ‘batontonkanya pe shina lyakwe.’ (Malaki 3:16) Yehova alaya abantu ba musango yu ukuti: “Nkamucingilila pantu alishiba ishina lyandi. Akandilila na ine nkamwasuka. Nkaba nankwe mu kucula kwakwe.” (Amalumbo 91:14, 15) Kanshi ukwishiba ishina lya kwa Yehova no kulalibomfya kwalicindama sana pa kuti tube cibusa wakwe.

Ifibusa filalanshanya lyonse nga fyakumana, filalanshanya lyonse pa foni, pa intaneti, nelyo mu makalata. Kanshi pa kuti tube ifibusa fya kwa Lesa, tulingile ukulalanshanya nankwe lyonse. Nomba kuti twacita shani pa kuti tulelanshanya nankwe?

Tulanda na Lesa mwi pepo. Lelo ukulanda na Lesa mwi pepo kwalipusana no kushimika ilyashi no munensu. Tufwile ukwibukisha ukuti ilyo tulepepa, ninshi tulelanda na Kabumba, Uwapulamo pano isonde ponse na mu muulu. Pa kuti Lesa akutike ku mapepo yesu, tulingile ukupepa ukulingana ne fyo afwaya. Natulande pa fintu fitatu ifyo tulingile ukucita.

Ica kubalilapo, tufwile ukulungatika amapepo yesu kuli Yehova Lesa fye, te kuli Yesu, ku “batakatifu” nelyo ku fimpashanya. (Ukufuma 20:4, 5) Baibolo itila: “Muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela.” (Abena Filipi 4:6) Ica bubili, tufwile ukupepela mwi shina lya Mwana wa kwa Lesa, Yesu Kristu. Yesu atile: “Takuli uwisa kuli Tata kano aishila muli ine.” (Yohane 14:6) Ica butatu, tufwile ukupepa ukulingana no kufwaya kwa kwa Lesa. Baibolo itila: “Cikulu fye nacilingana no kufwaya kwakwe, alatumfwa.”a—1 Yohane 5:14.

Nomba, bucibusa te kuti butwalilile nga ca kuti umuntu fye umo e ulelanda lyonse. Nga filya ciba ku fibusa nga filelanshanya, na ifwe tufwile ukulakutika ilyo Lesa alelanda na ifwe. Bushe mwalishiba inshila Lesa alandilamo kuli ifwe?

Muno nshiku, Yehova Lesa abomfya Icebo cakwe Baibolo pa kulanda na ifwe. (2 Timote 3:16, 17) Mulandu nshi twalandila ifyo? Natulangilile: Tutile mwapokelela kalata kuli cibusa mwatemwa sana. Pa numa ya kubelenga, kuti mwaebako bambi ukuti, “naumfwa bwino ifyo anjeba!” Nangu ca kuti apokelele fye kalata kuli cibusa wakwe, ciba kwati nalanda nankwe. E fyo caba na kuli ifwe, nga tulebelenga Baibolo ninshi Yehova alelanda na ifwe. E fyo na Gina uo tulandilepo mu cipande ca kubalilapo alandile, atile: “Naishiba ukuti nga ndefwaya Lesa alemona ukuti nine cibusa wakwe, mfwile fye ukulabelenga Baibolo, kalata iyo atulembela.” Kabili atile: “Ukubelenga Baibolo cila bushiku kwalilenga mpalame sana kuli Lesa.” Bushe mulaleka Yehova alelanda nenu ukupitila mu kubelenga Baibolo cila bushiku? Nga mulecita ifi, mukapalama sana kuli Lesa.

“Njebeni fye fyonse ifyo mulefwaya ncite, nalamucitila.” Te kuti mwebe aya mashiwi umuntu uo mushaishiba nelyo uushili munenu. Lelo cibusa wenu uwa cine cine ena kuti mwamweba aya mashiwi. Abantu balatemwa ukucitila abanabo fyonse ifyo balefwaya.

Baibolo ilanga ukuti lyonse Yehova alacita ifisekesha abamupepa. Ku ca kumwenako, Imfumu Davidi uwali cibusa wa kwa Lesa atile: “Ifyo mwacita fingi, Mwe Yehova Lesa wandi, imilimo yenu iyapesha amano na matontonkanyo yenu kuli ifwe na fyo fingi. . .  Fyalifulisha ica kutila te kuti mfipende.” (Amalumbo 40:5) Na kabili, Yehova alacita ifisekesha na bantu abashilamwishiba, ‘alabapeela ifya kulya ifingi no kulenga imitima yabo ukusangalala.’—Imilimo 14:17.

Apo Yehova alitemwa ukucita ifisuma ifyo abantu bafwaya, kanshi na bafwaya ukuba ifibusa fyakwe balingile ukulacita ‘ifisekesha umutima wakwe.’ (Amapinda 27:11) Nomba finshi ifisekesha Lesa ifyo mufwile ukulacita? Baibolo itila: “Mwilaba ukucita icisuma no kupeelana ifintu, pantu amalambo ya musango yu e yasekesha Lesa.” (AbaHebere 13:16) Bushe ici cilepilibula ukuti ukucita ifisuma no kupeelako bambi e fifwaikwa fye pa kusekesha Yehova?

Baibolo itila: “Ukwabula icitetekelo te kuti tusekeshe Lesa.” (AbaHebere 11:6) Na kuba, ni lintu “Abrahamu atetekele Yehova” e lyo aishileitwa ati “Cibusa wa kwa Yehova.” (Yakobo 2:23) Yesu Kristu na o alandile ukuti pa kuti Lesa aletupaala, tufwile ‘ukutetekela Lesa.’ (Yohane 14:1) Kuti mwaba shani ne citetekelo ico Lesa afwaya pa kuti mumupalame? Ico mufwile ukubalilapo ukucita, kulasambilila Icebo ca kwa Lesa, Baibolo lyonse. Nga mulecita ifi, ‘mukeshiba bwino bwino ukufwaya kwakwe’ kabili mukeshiba ne “fya kumusekesha.” Nga mwatwalilila ukusambilila pali Yehova, mulekonka na mafunde yakwe, icitetekelo cenu muli ena cikakosa kabili akapalama nga nshi kuli imwe.—Abena Kolose 1:9, 10.

Finshi mulingile ukucita pa kuti mupalame kuli Lesa? Ifi e fyo mulingile ukucita pa kuti mube cibusa wa kwa Lesa:

1. Ukwishiba ishina lya kwa Lesa, Yehova no kulalibomfya.

2. Ukulalanshanya nankwe lyonse mwi pepo no kulabelenga Icebo cakwe, Baibolo.

3. Ukutwalilila ukulacita ifisekesha Yehova.

Ukulingana ne fi tulandilepo, bushe kuti mwatila mulecita ifingamwafwa ukupalama kuli Lesa? Bushe kuliko mumo umo mulemona ukuti mulingile ukuwamyako? Kwena, tulingile ukubombesha, lelo mulingile ukumona ne fisuma ififumamo.

Ba Jennifer abekala ku United States batile: “Umuntu nga ale-esha na maka ukuba cibusa wa kwa Lesa, mulafuma ifisuma. Ubu bucibusa bulaleta amapaalo: tulacetekela sana Lesa, tuleshibilako imibele yakwe, ne cacindamisha tulamutemwa sana. Takwaba icintu icacindama nge ci!”

Nga mulefwaya ukuba cibusa wa kwa Lesa, Inte sha kwa Yehova shikatemwa sana ukumwafwa. Bakapekanya ukusambilila Baibolo, ukwabula ukumulipilisha.Kabili tulemwita ukuti mulesangwa ku kulongana ukubela pa Ng’anda ya Bufumu iyabela uko mwikalila uko tusambilila Baibolo. Mukatemwa ukulongana na bantu ababika amano kuli bucibusa bwabo na Lesa.a Nga mwacita ifi, mukomfwa nga filya uwaimbile amalumbo aumfwile, uwatile: “Lelo ine, ukupalama kuli Lesa kusuma kuli ine.”—Amalumbo 73:28.