Bushe na imwe mutontonkanya nge fyo ba Rogelio baletontonkanya? Ni cili kwi pali ifi fyakonkapo ico mwasuminamo?

• Satana taabako, bubifi fye ubwaba konse.

• Satana eko aba, lelo tabika amano ku bantunse.

• Satana cibumbwa ica maka ico tushingamona icilenga abantu ukulacita ifyabipa.

Kwaliba abantu abengi abasumina muli cimo pali ifi fitatu twalandapo. Lelo bushe nacicindama ukwishiba icine? Cisuma, nga takwaba Satana, abasumina ukuti eko aba balilufiwa. Nga Satana eko aba, lelo tabika amano ku bantunse, abengi bamutiina fye ukwabula no kwishiba ico bamutiinina. Nomba nga Satana cibumbwa icilenga abantu ukulacita ifyabipa, ninshi alibipisha ukucila ne fyo abantu abengi batontonkanya.

Natumone ifyo Amalembo ya Mushilo yayasuka aya mepusho: Bushe Satana ni ani? Bushe bubifi fye ubwaba konse nelyo cibumbwa ico tushingamona? Nga eko aba, bushe kuti amusansa? Nga kuti amusansa, bushe kuti mwaicingilila shani?

Calyanguka ukutontonkanya ukuti Satana uo Baibolo yalandapo bubifi fye ubwaba konse. Lelo, bushe ifi e fyo Baibolo isambilisha? Nga Satana bubifi fye ubwaba konse, cinshi Baibolo ilandila ukuti alelanda na Yesu Kristu e lyo na Lesa Uwa Maka Yonse? Natulande pali ishi nshita ilyo Satana alandile na Yesu e lyo na Lesa.

ILYO SATANA ALANDILE NA YESU

Ilyo Yesu atendeke ukushimikila, Satana alimutunkile pa miku itatu. Umuku wa kubalilapo, atunkile Yesu ukuti abomfye amaka ayo Lesa amupeele ku kupanga ifya kulya pa kuti apwishe insala aumfwile. Lyena, Satana atunkile Yesu ukuibika mu kapoosa mweo pa kuti fye Yesu alange ukuti mwana wa kwa Lesa. Na pa kulekelesha, aebele Yesu ukuti alamupeela amaka pa mabufumu yonse aya pe sonde nga amupepako fye panono umuku umo. Yesu alikeene amatunko yonse yatatu, kabili pa miku yonse itatu aleambula Amalembo.—Mateo 4:1-11; Luka 4:1-13.

Bushe Yesu alelanda na ani? Bushe alelanda no bubifi ubwali mu mutima wakwe? Baibolo ilanda ukuti Yesu ‘alyeshiwe muli fyonse nga ifwe, nomba ena tali na lubembu.’ (AbaHebere 4:15) Ilanda no kuti: “Kristu ena tacitile ulubembu, kabili tatalile alanda ifya bucenjeshi.” (1 Petro 2:22) Yesu tabembwikepo, ali uwa kaele. Tatalile aleka ububifi bwaba mu mutima wakwe. Kanshi Yesu talelanda ku bubifi ubwali mu mutima wakwe; lelo alelanda ku cibumbwa ca cine cine.

Uku kulanshanya kulenga twakwata ubushininkisho na bumbi ubulanga ukuti Satana e ko aba.

• Ibukisheni ukuti Satana alaile Yesu amabufumu ya mu calo nga ca kuti fye amupepa. (Mateo 4:8, 9) Nga ca kuti Satana tabako, nga talaile ukupeela Yesu amabufumu. Na kabili, Yesu tatwishike ilyo Satana alandile ukuti alikwete amaka ya musango yu.

• Ilyo Yesu akeene aya matunko, Satana “alimushile mpaka inshita imbi iyalinga.” (Luka 4:13) Bushe ifyo ili lembo lyalanda filelanga ukuti Satana bubifi fye ubwaba konse, nelyo filelanga ukuti mulwani uufwaisha ukutusansa?

• Moneni ukuti ‘bamalaika balishile no kutendeka ukwafwa’ Yesu. (Mateo 4:11) Bushe balya bamalaika abaishile mu kukoselesha Yesu no kumwafwa, bali fibumbwa ifyo tushingamona? Ee, te kuti tutwishike no kutwishika. Nomba mulandu nshi twingalandila ukuti Satana ena ali bubifi fye?

ILYO SATANA ALANDILE NA LESA

Inshita imbi, ni lilya Satana alelanda pali Yobo umwaume uwaletiina Lesa. Ibuuku lya kwa Yobo lilanga ukuti Satana pa miku ibili alilandile na Lesa. Pa miku yonse ibili, Lesa aletasha Yobo pali bukaele bwakwe. Satana aleti Yobo alebombela Lesa pantu balemucingilila. Mu nshila imbi Satana aleti, alishibe Yobo bwino sana ukucila ifyo Lesa amwishibe. Yehova alisuminishe Satana ukulofya ifyuma fya kwa Yobo, abana bakwe, e lyo no kumulwalika ubulwele ubwabipisha.a Mu kupita kwa nshita, calishibikwe ukuti ifyo Yehova alelanda pali Yobo fyali fya cine, no kuti Satana wa bufi. Lesa alipaalile Yobo pali bukaele bwakwe.—Yobo 1:6-12; 2:1-7.

Ilyo Lesa alelanda na Satana, bushe kuti twatila alelanda ku bubifi ubwali mu mutima wakwe? Baibolo itila: “Lesa wa cine ena, imibele yakwe yalipwililika.” (2 Samwele 22:31) Icebo ca kwa Lesa cilanda no kuti: “Wa mushilo, wa mushilo, wa mushilo Yehova Lesa, Uwa Maka Yonse.” (Ukusokolola 4:8) Ishiwi lya kuti umushilo lipilibula ica busaka, icasanguluka, umushaba ulubembu. Yehova alipwililika, takwata lubembu. Muli ena te kuti mube ububifi nangu panono.

Na lyo line, bamo kuti batila na Yobo wine tali muntu wa cine cine, kanshi ne lyashi line te lya cine. Lelo bushe ukutontonkanya ifi kwaliba fye bwino? Amabuuku yambi aya mu Baibolo yalanga ukuti Yobo ali muntu wa cine cine. Ku ca kumwenako, pali Yakobo 5:7-11, ica kumwenako ca kwa Yobo balicibomfya pa kukoselesha Abena Kristu ukulashipikisha inshita sha-afya na pa kubalanga ukuti Yehova alapaala abashipikisha nga Yobo. Nomba Yobo nga taliko e lyo na filya Satana amusanshile nga tafyacitike, bushe ici ca kumwenako nga calikoseleshe Abena Kristu? Na kabili, pali Esekiele 14:14, 20, Yobo balimulumbula pamo na Noa na Daniele ukuti bali bantu batatu abalungama. Yobo e ko ali kabili mwaume uwali ne citetekelo icakosa nga filya fine Noa na Daniele bali. Nga ca kuti Yobo e ko ali, ninshi no walemucusha wine e ko aba!

Baibolo ilanda ukuti Satana e ko aba, cibumbwa icakwata umubili uo tushingamona. Lelo, nalimo kuti mwaipusha amuti, ‘Inga pali ino nshita, bushe kuti ansansa pamo na ba mu ng’anda yandi?’

INGA PALI INO NSHITA?

Elenganyeni ukuti ibumba lya fipondo lyatebelela umusumba mwikalamo. Ukwabula no kutwishika, kuti muleikala fye mwenso mwenso kabili ifintu kuti fyabipa. Nomba tontonkanyeni pali fi: Satana ne fibanda fyakwe, bamalaika ababipa kwati ni Satana wine, bapondokela Lesa, e lyo babapoosa pano calo. Finshi mwingenekela ukulacitika? Tontonkanyeni pa malyashi ayo mumfwa ilyo mulekutika ku mulabasa.

• Bushe tamulemona ifyo bumpulamafunde no bunkalwe bulefulilako nangu ca kuti abantu besha ukubupwisha?

• Bushe tamulemona ifyo mu mafilimu muba sana ukupupa imipashi, nangu ca kuti abafyashi balailishanya?

• Bushe tamulemona ifyo isonde balelyonaula, nangu ca kuti bamo balabombesha ukulisungilila?

• Bushe tamulemona ifyo imibele ya bantu ibipile, ne fyo ileya ilebipilako fye?

Umfweni uo Baibolo yalanda ukuti e ulenga fyonse ifi: “Icing’wena cikalamba capooselwe pa nshi, icisoka ca pa kutendeka, iciitwa Kaseebanya kabili Satana, icilufya aba pano isonde bonse; capooselwe pe sonde, na bamalaika ba ciko bapooselwe pamo na co. . . . Nomba cabipila imwe mwe sonde na bemba, pantu Satana Kaseebanya naikila pali imwe, ali ne cipyu icikalamba, pa kwishiba ukuti ali fye ne nshita inono.” (Ukusokolola 12:9, 12) Ilyo abantu abengi bamona ifilecitika, balasumina ukuti Satana cibumbwa ca maka ico tushingamona iciletunka abantu ukulacita ifyabipa.

Nomba bushe kuti mwaicingilila shani? Nacicindama sana ukwishiba ifyo mwingaicingilila. Icipande cikonkelepo cilelanda pa fingamwafwa ukuicingilila.

Satana na o kuti twamupashanya ku mwela wa carbon monoxide. Tamoneka, abantu tacibangukila ukwishiba ukuti alebalufya, kabili mubi icine cine. Lelo Lesa alitubikilako ifya kutwafwa. Nga tulekonka ifi Lesa atubikilako, ninshi tatwakaletiina Satana.

Amaka ya kuisalila. Pali Yakobo 4:7 patila: “Kaaneni Satana Kaseebanya, na o akafulumuka kuli imwe.” Nangu ca kuti Satana alikwata amaka, te kuti amupatikishe ukucita ifyo mushilefwaya. Ni mwe mufwile ukusalapo. Pali 1 Petro 5:9 patila: “Mukaanyeni [Satana], beni abakosa ndi mu citetekelo.” Ibukisheni ukuti ilyo Yesu akeene amatunko yatatu, Satana alimushile. (Mateo 4:11) Na imwe bene, kuti mwakaana amatunko ya kwa Satana.

Bucibusa na Lesa. Pali Yakobo 4:8, Baibolo itukoselesha ukuti: “Palameni kuli Lesa.” Yehova umwine e ufwaya ukuti mube ifibusa fyakwe. Finshi mufwile ukucita pa kuti mube cibusa wa kwa Lesa? Ico mufwile ukucita kutendeka ukusambilila sana pali ena mu Baibolo. (Yohane 17:3) Ifyo mukalasambilila pali Yehova fikalenga ukuti mukamutemwe, kabili uko kutemwa kukalenga mukalecita ukufwaya kwakwe. (1 Yohane 5:3) Bushe Shinwe wa mu muulu akacita shani nga mwamupalama? Yakobo atwalilila ukuti, “[Lesa] akapalama kuli imwe.”

Ubulayo bwa kumucingilila. Pa Amapinda 18:10 patila: “Ishina Yehova lupungu ulwakosa. E mo umulungami abutukila no kucingililwa.” Ici tacilepilibula ukuti ishina lya kwa Lesa cipuuta. Lelo, cilepilibula ukuti abacindika ishina lya kwa Lesa kuti balilila kuli ena no kucingililwa pa nshita iili yonse.

Ica kumwenako icisuma. Pa Imilimo 19:19 paliba ilyashi ilisuma ililanda pa basangwike Abena Kristu abaleikala mu Efese, patila: “Abengi abalecita ifinjelengwe balonganike amabuuku yabo no kuyoca pa menso ya bonse. Kabili bapendele umutengo wa yako, basanga ukuti yalingene ne ndalama sha silfere 50,000.”a Balya Bena Kristu balyonawile fyonse ifyo balebomfya pa kupupa imipashi, te mulandu no mutengo wa fiko. Ici ca kumwenako kuti catwafwa nga nshi. Cino calo calyobelwa no kupupa imipashi. Nangu fye fintu ifyo babomfya pa kupupa imipashi ifimoneka kwati tafyabipa, na fyo kuti fyalenga twalatungululwa ne mipashi. Calicindama ukupoosa ifintu fya musango yu, nangu fibe ifya mutengo.—Amalango 18:10-12.

Ba Rogelio, abo tulandilepo mu cipande ca kubalilapo, tabasumine ukuti Satana e ko aba ukutula fye na ku bwaice mpaka bafisha ne myaka 50. Lelo, balishilealuka. Mulandu nshi? Bebukisha ukuti: “Uyu e muku wa kubalilapo nashitile Baibolo. Ifyo nasambilile muli Baibolo fyalengele nshininkishe ukuti Satana eko aba. Filya fine nasambilile filancingilila na ino nshita pa kuti Satana tambeleleke.”

Bushe te kuti mutemwe ukwikala mu calo pa nshita ilyo Satana ashakabeko? Na imwe bene kuti mwaisaikalamo. Baibolo yalisobela inshita ilyo Satana, uulufya abantu abengi, ‘bakamupoosa muli bemba wa mulilo umwaba na mabwe ya mingu.’ (Ukusokolola 20:10) Kwena, umulilo na mabwe ya mingu te kuti yoce icibumbwa icishimoneka. Kanshi bemba wa mulilo emininako ukonaulwa umuyayaya. Satana bakamonaula umuyayaya. Ala abantu abatemwa Lesa bakasansamuka nga nshi!

Lelo pali ino nshita, mufwile ukutwalilila ukusambilila pali Yehova ne fyo afwaya.b Elenganyeni ukuti eko muli ilyo “Satana ashakabeko!”