Ifyo Yehova Alenga Umulimo Wakwe Ukutunguluka

MU MAKUMI ya myaka aya nomba line Inte sha kwa Yehova balikumanya ukukula kwa cinjelengwe. Mu myaka fye ikumi iyalekeleshako, balitanunuka ukufuma ku filonganino 42,600 ukufika ku bwingi bonse ubwa 60,192 mu fyalo 212. Mu mimwene ya ici, bamo balipusha ukuti: Ni shani fintu umulimo wa Nte wafwilishiwa mu fya ndalama? Watch Tower Society ili iyasekelela ukwasuka ici ne fipusho fyaampanako muli ici cipande.

Bushe Inte sha kwa Yehova balabelesha ukupeela ica pe kumi?

Iyo. Muli Israele wa pa kale, ukupeela ica pe kumi kwakambishiwe pe samba lya Malango ya kwa Mose pa kwafwilisha ababomfi ba pe tempele lya kwa Lesa, abena Lebi na bashimapepo. (Impendwa 18:21, 24-29) Aba tabakwete mpanga ya mukowa ukucila pa misumba imo, e co bakabile uku kwafwilisha kwaibela. Mu kulundapo, abena Israele ba busumino baali abantungwa ukupeela mu kuitemenwa imisangulo ku milimo yaibela, pamo ngo kukuula kwe hema kabili, pa numa, itempele.—Ukufuma 25:1-8; 1 Imilandu 29:3-7.

Nangu cibe fyo, lintu Yesu afwile, Baibolo isosa ukuti “aputwile . . . Amalango ya mafunde aya mu fipope.” (Abena Efese 2:15; Abena Kolose 2:13, 14) Mu mashiwi yambi, mu menso ya kwa Lesa Amalango tayali na kabili na maka atemwa pa baYuda nelyo pa Bena Kristu. E ico, capamo ne mbali shimbi isha Malango, pamo nga malambo ya musango yo aya lyonse pe tempele, ukupeela ica pe kumi tacalefwaikwa na kabili ku ba busumino.

Pa kati ka Bena Kristu, ukupeela kukuntwa no kutemwa, te ku malango. Umutumwa Paulo alondolwele icishinte lintu aleteyanya ukulonganika kwa Bena Kristu abali mu kukabila mu Yudea. Asosele ukuti: “Onse acite umo apangile mu mutima wakwe; te kupeela no mutimako nangu mu kupatikishiwa, pantu Lesa atemwo mupe wa nsansa.” (2 Abena Korinti 9:7) Iyi nshila ya mu Malembo iya kupeela mu kuitemenwa e ibeleshiwa ne Nte sha kwa Yehova.

Bushe mulalukila ku kutantika imitebeto ya kufwaye cuma, amaenivelupu ya bupe, inyendo sha kufwaye cuma, ne nshila shapalako isha kufwaye ndalama?

Iyo, Abena Kristu ba cine tabakabila ukupatikishiwa nelyo ukusembelekelwa mu kupeela pa kukwata ifilambu ukukobekwa pa ntanshi yabo. Amabumba ya butotelo ayo ayalukila ku kuteya bingo, imishiika, ukusobola inambala ya kunonka icilambu, imitebeto, ukusonkeshe fipuna, nelyo ukupishamo imbale sha bupe kusokolola ukuti tabapeela abantu babo ica kulya ca ku mupashi, kabili e co umupashi wa kwa Lesa tausesha abaya ku macalici babo mu buntungwa ukusangule cuma. Cimo cine kuti casoswa ulwa abo abalukila ku cibelesho caleko kubomba ica kupeele ifya pe kumi.—Mateo 10:8.

Ni shani mwafwilisha mu ndalama imilimo pamo ngo bukuule bwa Mayanda ya Bufumu amaofesi ya musambo, pamo pene no kutanununa kwenu pa cishinte ca calo mu Brooklyn na pa Patterson, New York?

Yehova alapongolola umupashi wakwe uwa mushilo pa Nte shakwe, ukubalenga ukuba na maka ya “kucite cisuma, ukuba abacindama ku milimo isuma, ukuba abape, aba nkumbu, abaitutilile fyuma fisuma ifya bwikashi ubukesa, ukuti bekate ku mweo uwabo mweo wine wine.” (1 Timote 6:18, 19) Uyu mupashi ulakunta Inte sha kwa Yehova ku kwafwilisha umulimo wa Bufumu mu nshila iili yonse.

Mu 1989, ku ca kumwenako, Inte 3,787,188 mu fyalo 212 bapoosele amaawala 835,426,538 mu kusambilisha Icebo ca kwa Lesa kuli bambi. Kabili batungulwile amasambililo ya lyonse aya Baibolo 3,419,745 na balesekelela. Ifipooswa fyonse ifyakumanishiwe muli uyu mulimo fyafumine ku muntu umo umo uwaleucita. Yehova alilambwile uyu mulimo wa kutemwa mu kuba no kwingilishiwako kwa Nte ababatishiwe abapya 263,855.

Umupashi umo wine uwa kupeela ulakunta Inte na balesekelela ku kwafwilisha umulimo mu nshila ya fya ndalama. Pa mbali ya kwaafwa ukukumanisha imitengo ya lyonse iya cilonganino cabo ica pa mwabo, bafwilisha umulimo wa bukuule uuli onse uyo uwingaba uwakabilwa, pamo ngo kukuululula nelyo ukukusha Iŋanda yabo iya Bufumu nelyo Iŋanda ya Kulonganinamo nelyo ukukuula iipya. Cila mwaka, pa mulandu wa kukula kwa lubilo lubilo, impendwa ikalamba iya Mayanda ya Bufumu ilingile ukukuulwa, yamo ukukabila imyanda ya makana aya madola. Ifipooswa fya ifi fifuma ku Nte sha cikaya ukupitila mu misangulo yabo iya kuitemenwa no kubomba.

Mu kulundapo, mu fyalo ifingi ifibombelo fya musambo ifya kupulintila na maofesi pamo pene ne fikuulwa ifya mwa kwikala fyali no kutanununwa—nelyo ifipya ukukuulwa—ku kusuminisha ababomfi baleingilishiwako ne fibombelo fipindwa no kuteyanya kulekula. Ici na co cafwilishiwa no bupe bwa kuitemenwa no kubomba, nga fintu caba pa milimo ya kukuula no kukuululula mu Brooklyn na mu Patterson, New York. Uko cingacitika, Inte sha cikaya shilalipila indalama sha bukuule. Mu milandu imo, Watch Tower Society ilatantikila imisambo ukupokelela ukwaafwa—ponse pabili mu fya ndalama na mu musango wa kubomba kwa balamuka—ukufuma ku fyalo fimbi. Muli fyo, pe samba lya butungulushi bwa Sosaite, ‘ukulingana’ kulacitika.—2 Abena Korinti 8:14.

Mulandu nshi tamutungulwila ifipatala nelyo amakiliniki no kuibimba mu mulimo wa kukumbusuka ne milimo imbi iya kwangalila capamo nga fintu amabumba ya butotelo ayengi yacita?

Inte sha kwa Yehova balankulako mu kwangufyanya ku fya bukangalume pa numa ya nkondo nelyo akayofi ka cifyalilwa lintu bengacita. Na kuba, ilingi line baba pa kati ka bakubalilapo pa ca kucitika mu kuba ne fya kulya, ifya kufwala, na ba kuitemenwa ukwaafwa mu kuba no kukuula cipya cipya. Nangu cibe fyo, Inte sha kwa Yehova tabatungulula ifipatala nelyo amakiliniki, nge fyo bashitungulula amadipartimenti ya kushimyo mulilo nelyo imilalo ya bakapokola, ifyaba na fyo ku kubakilila ubumi.

Baba batumikishi baipeela kwi landwe, kabili ukupeelwa kwabo ukwa mulimo kwaba kushimikila no kusambilisha imbila nsuma iya Bufumu bwa kwa Lesa mu calo conse ku kubo bunte pa ntanshi impela tailaisa. (Mateo 24:14) Nga fintu Yesu asosele, ukulobolola kukalamba na babomfi nabacepa. Kuti pambi caba icishingelelwa ukulekelesha uyu mulimo wacilapo kucindama ku kubuula imibombele imbi, te mulandu na fintu ingatashiwa.—Mateo 9:37, 38.

Nga fintu caba, impendwa ya Nte sha kwa Yehova baba ni badokota, banasi, na bakafwilisha ba fya cipatala. Lelo bamona uyu mulimo pamo ngo kulundwapo pa mulimo wabo uukalamba, ubutumikishi bwa Bwina Kristu.

Bushe abali bonse aba balashi ba Watch Tower Society nelyo ifilundwa balapange ndalama ukufuma ku mibombele yenu ikalamba iya kupulinta?

Apakalamba, iyo! Ukulingana ne funde, Sosaite yaba kulembeshiwa kushipanga cibwesha. Takwaba abene ba fipe, takwaba ukwakane ndalama, nelyo fye malipilo. Umutumikishi umo na umo pa cishinte, ukusanshako presidenti wa Sosaite na badairekita, alibuula umulapo wa mwi funde uwa bupiina. Apokelela ifya kulya, umwa kwikala, no kusakamana kwakabilwa ukwa fya cipatala, pamo pene no kubweseshapo kunono ukwa ndalama ku fipooswa finono. Nga ca kuti Nte ali pa mulimo wa Sosaite, ifipooswa fya kwenda kwakwe ilingi line filafimbwa.

Mu kulundapo, takwaba mu calo uko abatumikishi besu balipilisha pa kusefya kwa menga, imbatisho, nelyo ifililo. Kabili takwabako ukulipilisha kwa kwingila nelyo ukupoko bupe pa malyashi ya Baibolo nelyo amabungano.

Apo imbale sha bupe tashipishiwamo, ni shani fintu ifilonganino fya cikaya fipokelela imisangulo ku kukumanya ifipooswa fya fiko?

Imbokoshi sha misangulo shilasungwa mu Mayanda yabo aya Bufumu pa kuti abantu umo umo kuti bacita ubupe bwa kuitemenwa nga ca kuti balefwaya. (2 Ishamfumu 12:9) Ubupe bonse, nangu bube bukalamba nelyo ubunono, bulatashiwa. (Marko 12:42-44) Limo mu mweshi, umutumikishi uusakamana amakaunti ya cilonganino alabelenga stetimenti iipi ku cilonganino ukubeba ubwingi bonse ubwa misangulo yapokelelwe, ishapooselwe, no bupe bwacitilwe ne cilonganino ku Watch Tower Society ku kwafwilisha umulimo wa kushimikila uwa mu kusaalala kwa calo ne milimo imbi.

Lintu abantu umo umo baumfwikisha uku kutantika, baba abantungwa ukubuulamo ulubali nga ca kuti balefwaya ukucite fyo, umo umo “umo akwatile.” (1 Abena Korinti 16:2) Ici e cibelesho muli cimo na cimo ica fya filonganino fyacila pali 60,000 mu kusaalala kwa calo.

Pa Pentekoste Abena Kristu ba mu kubangilila bakwete ifintu mu cinkumbawile. Bushe Inte sha kwa Yehova balacite ci?

Imibele ya bukangalume yalimineko ukukonka pa Pentekoste 33 C.E. lintu abaYuda ukufuma ku fifulo fyaleepa abo abasangwililwe ku buKristu mu kwipipa baikele mu Yerusalemu ku kupokelela ukubuutushiwa kwa ku mupashi ukwalundwapo. Bakabile amayanda ya pa nshita iipi no kuliishiwa; e ico, Abena Kristu ba cikaya batungulwile ukushitisha kwa kuitemenwa ukwa cikwatwa no kwakana mu cinkumbawile ku kupayanishisha imibombele ya ciputulwa ca nshita icatanunwinwe ku kubishanya. (Imilimo 2:1, 38-47; 4:32-37) Takwali nangu umo uwapatikishiwe ukushitisha nelyo ukupeela ubupe. (Imilimo 5:1-4) Uku kukwata ifintu mu cinkumbawile takwali kwa bonse, nga fintu bamo batunga. Cali kutantika fye kwa pa kashita akepi. Lintu Abena Kristu babwelele ku mayanda yabo yene, kwalipwile.

Bushe mulasambilisha ukuti ukupeela ifintu fya ku mubili ni nshila ya kulekelelwamo imembu?

Ca kutali fye! Baibolo isosa ukuti: “Pa kwishibo kuti mwalubwilwe ku mibele yenu ya fye iyashililwe imwe kuli bashinwe, tamwalubwililwe ku fyonaika, silfere atemwa golde, lelo ni ku mulopa wafinisha wa kwa Kristu, ngo wa mwana wa mpaanga uwabula akalema kabili uwabula akabi.”—1 Petro 1:18, 19.

Inte sha kwa Yehova babika icitetekelo mu cilubula ce lambo lya kwa Yesu kwi pusukilo. Tabacita misangulo ya kuitemenwa mu kwenekela ukuti iyi ikabaletela ipusukilo. Nangu ni fyo, balishiba ukuti indalama ishingi shilakabilwa ku kwananya imbila nsuma iya calo cipya icalungama ica kwa Lesa. (2 Petro 3:13) Kabili bayumfwa ukuti ukusangwila ukulola kuli uku kubilisha kwaba lishuko ilyapeelwa na Yehova.

Lintu alecita umusangulo ukalamba ukulola kwi tempele ilyo umwana wakwe umwaume Solomone aali no kukuula, Imfumu Davidi apepele ukuti: “Fyenu, mwe Yehova, ubukulu na bumpalume no kuyemba no kupulama na bukatebebe, pantu conse icili mu mulu na pa nshi cenu; . . . Lelo ni ne ani, kabili ni bani abantu bandi, ukuti twingaba na maka aya kupeela ku kuitemenwa ifya bupe nge fi? pantu fifuma kuli imwe fyonse, kabili ifyafuma ku kuboko kwenu e fyo tupeelako kuli imwe.”—1 Imilandu 29:11, 14.

Ilelo, Inte sha kwa Yehova na bambi abantu bakongamina ku bulungami bayumfwa mu nshila imo ine nge fyayumfwile Davidi. Baliba aba nsansa pa kukwata ishuko lya kucita imisangulo ku kwafwilisha umulimo wa kutasha Yehova, ukwishiba ukuti icili conse bapeela ku mulimo wakwe kwena cifuma kuli wene. Yehova alapaala uyu mupashi, kabili ifyo e fyo alenga umulimo wakwe ukutunguluka.

[Akabokoshi pe bula 22]

IFYO BAMO BASANGWILAKO KU MULIMO WA BUFUMU

◻ IFYA BUPE: Imisangulo ya kuitemenwa iya ndalama kuti yatumwa mu kulungatika ku Watch Tower Bible and Tract Society of Pennsylvania, Box 21598, Kitwe, nelyo kwi ofesi lya musambo wa Sosaite ilya mu mwenu. Ifikwatwa pamo nge fikuulwa, pamo pene ne fibekobeko nelyo ifya mutengo fimbi, na fyo fine kuti fyapeelwo bupe. Kalata iyipi iya kulondolola ukuti ica musango yo cili bupe ilingile ukwendela pamo ne yi misangulo.

◻ UKUTANTIKA KWA MUSANGULO WA CIPANGANO: Indalama kuti shapeelwa ku Watch Tower Society ukusungwa mu kuseekeshiwa, mu kuba no kupayanya kwa kuti nga kwabako ukukabila kwa pa lwakwe, shikabweshiwa ku wapeele.

◻ INSHUWALANSI: Watch Tower Society kuti yalumbulwa nga kapokelela wa ndalama sha mibombele yatantikwa iya inshuwalansi ya bumi nelyo mu mapange ya kuleka incito/penshoni. Sosaite ilingile ukwishibishiwa ulwa mitantikile iili yonse iya musango yo.

◻ UKUSEEKESHA: Amaakaunti ya kusunga kwa ndalama ku banki kuti yabikwa mu kuseekesha ku Sosaite. Nga ici cacitwa, twapaapaata ishibisha Sosaite. Ifibwesha, indalama shaashimishiwa ku buteko, ne fikwatwa na fyo fine kuti fyapeelwa pe samba lya kutantika ku kumwenamo kwa kwa kapeela mu kati ka nshita yakwe iya bumi. Iyi nshila ifumyapo ifipooswa ne fishashininkishiwa ifya calembwa ca mwi funde lya fya cishale, ilintu muleshininkisho kuti Sosaite yapokelela ifikwatwa nga kwacitikako imfwa.

◻ IFYA CISHALE: Ifikwatwa nelyo indalama kuti fyashiilwa ku Watch Tower Society mu nshila ya fya cishale iyacitwa mwi funde. Kope ilingile ukutumwa ku Sosaite.

Ku fyebo fyalundwako no kupanda amano ukukuma ku milandu ya musango yo, lembela ku Watch Tower Society, Akabokoshi 21598, Kitwe, nelyo kwi ofesi lya musambo wa Sosaite ilya mu mwenu.

[Icikope pe bula 24]

Ulubali lwa cifulo ca kusambilisha kwa Baibolo ica Nte sha kwa Yehova pe samba lya kukuulwa mu Patterson, New York

[Ifikope pe bula 25]

Yehova alalenga umulimo wa bukuule ukutunguluka ku bantu bakwe abacita ubupe bwa kuitemenwa