Endeni Nga Fintu Mwakambishiwa na Yehova
“Nangeni inshila yenu, mwe Yehova, nalaenda mu cishinka cenu; lengeni umutima wandi ukusaminwo kuba na katiina kwi shina lyenu.”—ILUMBO 86:11.
1, 2. Cinshi cisesesha Inte sha kwa Yehova ku kukaana ukupokelela ukukuushishamo kwa mulopa?
“NAKALIMO Inte sha kwa Yehova balilungika mu kukaana ukubomfya kwa misango ya mulopa, pantu cili ca cine ukuti impendwa yacindama iya fibombelo fya kulenga ubulwele kuti fyapishiwa ukupitila mu mulopa wa kukuushishamo.”—Inyunshipepala ya fya cipatala iya ciFrench Le Quotidien du Médecin, December 15, 1987.
2 Bamo ababelengele kulya kulandapo kuti pambi bacumfwile fyo cali fye ni kuli cela mushuke ukuti Inte sha kwa Yehova bakene ukukuushishamo kwa mulopa kale sana ilyo tacilati cishibikwe mu cinkumbawile ifyo uku kwingaba ukwa busanso, nelyo fye ukwa kulenge mfwa. Lelo ukwiminina kuntu Inte sha kwa Yehova shabuula pa mulopa te kwa kuicitikila, kabili talili lifunde lyapangwa ne cakaniko cimo iceni, ukwiminina ukwatuntuka ukufuma ku mwenso wa kuti umulopa walibamo busanso. Ukucila, Inte balakaana umulopa pa mulandu wa mupampamina wabo ku kwenda mu cumfwila ku cinso ca kwa Kasambilisha wabo Uwakulisha—Lesa.
3. (a) Ni shani fintu Davidi ayumfwile pa lwa kushintilila pali Yehova? (b) Ca kufumamo nshi Davidi alolesheko ku ntanshi pa mulandu wa kucetekela muli Lesa?
3 Imfumu Davidi, uwayumfwile ukushintilila kwakwe pali Lesa, apampamine ukusambilishiwa na wene no ‘kwenda mu cishinka cakwe.’ (Ilumbo 86:11) Davidi pa nshita imo apandilwe amano ukuti nga ca kuti asengawike ukuba uwa mulandu wa mulopa mu menso ya kwa Lesa, ‘umweo wakwe wali no kufungilwa mu mfunga ya mweo pamo na Yehova.’ (1 Samwele 25:21, 22, 25, 29) Pamo nga fintu abantu bafungile ifya katamikwa ku kuficingilila no kufibaka, e fyo no bumi bwa kwa Davidi bwali no kucingililwa no kubakwa kuli Lesa. Pa kupokelela ukupanda amano kusuma, Davidi tafwaile ukuipususha umwine ku kubombesha kwa pa lwakwe lelo acetekele muli Umo untu akwatile misha ya bumi bwakwe: “Mulenengo kwishibo mwa kuyila ku mweo, ku cinso cenu kwabo kusekelela ukwafikapo, mu kuboko kwenu kwa kulyo mwabe fya muilemeno pe.”—Ilumbo 16:11.
4. Mulandu nshi Davidi afwaile ukusambilishiwa na Yehova?
4 Mu kuba ne yo mibele, Davidi tayumfwile ukuti pa lwakwe aali na maka ya kusala mafunde nshi aya bulesa yalebomba nelyo yakabilwe ukumfwila. Imibele yakwe yali ya kuti: “[Nsambilisheni, NW] inshila yenu, mwe Yehova, no kuntungulula mu kashila akatambalala.” “[Nsambilisheni, NW] inshila yenu, mwe Yehova, nalaenda mu cishinka cenu; lengeni umutima wandi ukusaminwo kuba na katiina kwi shina lyenu. Ndemutootela, mwe [Yehova, NW] Lesa wandi, no mutima wandi onse.” (Ilumbo 27:11; 86:11, 12) Pa nshita shimo ukwenda mu cine pa ntanshi ya kwa Lesa kuti pambi kwamoneka ukushalinga nelyo kuti pambi kwapilibula ilambo likalamba, lelo Davidi afwaile ukusambilishiwa mu nshila yalungama no kwenda muli yene.
Uwasambilishiwa pa lwa Mulopa
5. Cinshi cintu Davidi aali no kwishiba pa lwa kwiminina kwa kwa Lesa pa mulopa?
5 Cili icawaminwa ukumona kwesu ukuti ukufuma ku bulumendo ukuya ku ntanshi, Davidi afundilwe imimwene ya kwa Lesa iya mulopa, imimwene iishali ni nkama ya butotelo. Lintu Ifunde lyabelengelwe ku bantu, Davidi nga alyumfwile ici: “Umweo wa ca mubili uli mu mulopa wa ciko; kabili ine naupeela kuli imwe pa cipailo ku kukonsolwele myeo yenu: pantu umulopa e ukonsolwela ku mweo uulimo. Ni pali ici e po nasoseele ku bena Israele, nati, Umuntu onse uwa muli imwe te kuti alye umulopa, kabili umulebeshi uulebela mu kati kenu, te kuti alye umulopa.”—Ubwina Lebi 17:11, 12; Amalango 4:10; 31:11.
6. Ni shani fintu kwaliko ukukabila kwatwalilila ku babomfi ba kwa Lesa ukusambilishiwa pa lwa mulopa?
6 Ilyo lyonse lintu Lesa abomfeshe Israele nga bantu bakwe aba lukuta, abo abalefwaya ukumutemuna bakabile ukusambilishiwa pa lwa mulopa. Inkulo ne nkulo iya balumendo na bakashana ba bena Israele muli ifyo balisambilishiwe. Lelo bushe ukusambilisha kwa musango uyo kwali no kutwalilila pa numa lintu Lesa apokelele icilonganino ca Bena Kristu, ukubapanga “Israele wa kwa Lesa”? (Abena Galatia 6:16) Ee, mu cine cine. Imimwene ya kwa Lesa iya mulopa tayaalwike. (Malaki 3:6) Icifulo cakwe icalondololwa pa lwa kukanabomfya bubi bubi umulopa caliko ilyo icipingo ce Funde tacilaisa mu maka, kabili calitwalilile pa numa lintu Ifunde lyafumishiwepo.—Ukutendeka 9:3, 4; Imilimo 15:28, 29.
7. Mulandu nshi ukusambilishiwa na Lesa pa lwa mulopa kwacindamina kuli ifwe?
7 Umucinshi ku mulopa e cikalamba ku buKristu. ‘Bushe ico tacili makukumya?’ e fintu pambi bambi bengepusha. Nalyo line, cinshi cabe cikalamba ku Bwina Kristu nga ca kuti te lambo lya kwa Yesu? Kabili umutumwa Paulo alembele ukuti: “Muli [Yesu] twabela no kulubuka mu mulopa wakwe, ukulekelelwa kwa mampuulu yesu, umwabelo bucindami bwa kusenamina kwakwe.” (Abena Efese 1:7) The Inspired Letters, iyapilibulwa na Frank C. Laubach ipilibula ici cikomo ukuti: “Umulopa wa kwa Kristu walipilwe pa mulandu wa ifwe kabili nomba tuli Bakwe.”
8. Ni shani fintu “ibumba likalamba” lyashintilila pa mulopa ku bumi?
8 Bonse abasubila ukupusunsuka “ubucushi bukalamba” ubusungamine no kuipakisha amapaalo ya kwa Lesa pe sonde lya paradise bashintilila pa mulopa wasumiwa uwa kwa Yesu. Ukusokolola 7:9-14 kulondolola bene no kusosa ukulosha ku fyapita kale ukuti: “Aba e bafuma mu Bucushi bukalamba, kabili basambile amalaya yabo, no kuyabuutusha mu mulopa wa Mwana wa mpaanga.” Mona ululimi pano. Tapalesosa ukuti aba abapusuka ukupula mu bucushi ‘bapokelele Yesu’ nelyo ‘bamutetekele,’ nangu cingati isho mu cishinka shili ni mbali shakatama. Kulundapo ulutampulo na lumbi no kusoso kuti “basambile amalaya yabo, no kuyabuutusha mu mulopa wa [kwa Yesu].” Ico cili pa mulandu wa kuti umulopa wakwe walikwata umutengo wa kulubula.
9. Mulandu nshi ukumfwila Yehova ukulosha ku mulopa kwakatamine fyo?
9 Ukutesekesha kwa uyu mutengo kwaafwa Inte sha kwa Yehova ukupingulapo mu kukosa ukukanabomfya umulopa bubi bubi, nelyo fye nga ca kuti shiŋanga wa fya cipatala mu bufumacumi atunga ukuti ukukuushishamo mulopa kuli ukwakatama. Kuti pambi asumina ukuti ubunonshi bwa kwenekela ubwa kukuushishamo mulopa bwacila pa masanso ya butuntulu bwa bumi ayalengwa no mulopa wine. Lelo Umwina Kristu te kuti asuuleko ubusanso bwacila na po kubipisha, ubusanso bwa kulufya ukusuminisha kwa kwa Lesa pa kusuminisha ukubomfiwa bubi bubi kwa mulopa. Paulo pa nshita imo alandile ulwa abo “ababembuka itolo [pa numa babe na bapokelela ukwishiba kwalungikwa ukwa, NW] Cine.” Mulandu nshi ulubembu ululi lonse ulwa uyo musango lwali ulwakakala ifyo? Pantu umuntu wa musango uyo “[anyanyantilo] Mwana wa kwa Lesa, uwatila umulopa wa cipingo uo ashishiwemo cinangwa.”—AbaHebere 9:16-24; 10:26-29.
Afwa Bambi Ukusambilishiwa
10. Cinshi caba ku numa ya mupampamina wesu uwa kutaluka ku mulopa?
10 Ifwe fwe batesekesha ilambo lya cilubula ilya kwa Yesu twalisakamana ukukanabelesho lubembu, ukukaana umutengo wa kupususho bumi uwa mulopa wakwe. Pa kuba natulanguluka umulandu, tumwensekesha ukuti ukutootela fye kuli Lesa pa bumi kulingile ukutusesesha ku kukaana ukusuusulako ukuli konse ukwa mafunde yakwe ayalungama, yantu tuli abacetekela ukuti yapeelwe mu kuba na mabuseko yesu ayawamisha pa mutima—amabuseko yesu ayawamisha aya nshita yalepa. (Amalango 6:24; Amapinda 14:27; Lukala Milandu 8:12) Ni shani, nangu ni fyo, pa lwa bana besu?
11-13. Mimwene nshi iyalubana pa lwa bana babo no mulopa abafyashi bamo aba Bwina Kristu bakwata, kabili mulandu nshi?
11 Ilintu ubufyashi bwesu bali tunya nelyo bali abacepesha ica kuti te kuti bomfwikishe, Yehova Lesa kuti abamona nga basanguluka kabili abapokelelwa pa cishinte ca kuipeelesha kwesu. (1 Abena Korinti 7:14) E co cili ca cine ukuti utunya mu cinshingwa ŋanda ca Bwina Kristu kuti pambi tatulati tumfwikishe no kucita ukusala pa lwa kumfwila ifunde lya kwa Lesa. Bushe ifwe, nangu cibe fyo, tulecita apapela amaka yesu ukubasambilisha muli uyu mulandu wakatama? Abafyashi ba Bwina Kristu bafwile ukulanguluka ico mu kukatama, pantu abafyashi bamo bamoneka ukukwata imibele yalubana pa lwa bana babo no mulopa. Bamo bamoneka ukuyumfwa ukuti tabakwata mu cituntulu ukulama kukalamba pali nampo nga abana babo abanono bapeelwe ukukuushishamo kwa mulopa. Mulandu nshi iyi mimwene yalubana?
12 Ifyalo ifingi fyalikwata amafunde nelyo ifipani fya kamfulumende ku kucingilila abana balekeleshiwa kabili abacendwa. Abana ba Nte sha kwa Yehova tabalelekeleshiwa nelyo ukucendwa lintu abafyashi bapingulapo ukukanasuminisha umwana mwaume nelyo umwana mwanakashi wabo uwatemwikwa ukupeelwa umulopa, ukulomba pa muku umo wine ukubomfiwa kwa kundapa kwa kusengulwila uko umuti wa fya cipatala uwa muno nshiku kwingapayanya. Nelyo fye ukufuma ku mimwene ya fya cipatala, ici tacili kulekelesha nelyo ukucenda, ukulanguluka amasanso yasuminwa aya kundapa kwa kukuushishamo mulopa. Cili kubomfya kwa nsambu sha kupima amasanso yabimbilwemo kabili lyene ukusala ukundapa.a Nalyo line, ukupayanya kwa mwi funde e ko bakabomba bamo aba mu cipatala bayalukilako ukufwaya ubulashi bwa kupatikisha ukukuushishamo mulopa kushafwaikwa.
13 Abafyashi bamo, pa kuba abaibukila ukuti pambi kuti cabe cayanguka ku babomba mu cipatala ukukwata ukutungilila kwa cilye ku kukuushishamo mulopa mu mwana munono, kuti pambi bayumfwa ifyo umulandu naucila pa maka yabo, ukuti takuli icili conse cintu abafyashi bengacita nelyo balekabila ukucita. Fintu iyo mimwene ili yalubana!—Amapinda 22:3.
14. Ni shani fintu Davidi na Timote basambilishiwe mu bulumendo bwabo?
14 Natumona ukuti Davidi asambilishiwe mu nshila ya kwa Lesa ukufuma ku bwaice ukuya ku ntanshi. Ico calimupangeshe ku kumona umulopa nge ca bupe ukufuma kuli Lesa no kwishiba ukuti umulopa wimininako ubumi. (Linganyeniko 2 Samwele 23:14-17.) Timote asambilishiwe mu kutontonkanya kwa kwa Lesa “ukufuma ku bwaice.” (2 Timote 3:14, 15) Bushe taulesumina ukuti nelyo fye lintu Davidi na Timote baali pe samba lya cili ilelo umushinku wa mwi funde uwa bukalamba, bafwile baali na maka ya kuilumbulwila abene bwino pa fikansa fyalebimbamo ukufwaya kwa kwa Lesa? Mu musango umo wine, mu kubangilila sana pa ntanshi ya kuba uwa mushinku walinga, Abena Kristu bacaice ilelo balingile ukusambilishiwa mu nshila ya kwa Lesa.
15, 16. (a) Mimwene nshi yaimako mu ncende shimo pa lwa nsambu sha bana banono? (b) Cinshi catungulwile ku kupeelwa umulopa kwa mwana munono umo?
15 Mu ncende shimo uwitwa umwana munono uwafikapo alapeelwa insambu shapala kuli isho isha bakalamba. Ukushimpwa pa mushinku nelyo ukutontonkanya kwafikapo, nelyo fyonse fibili, umusepela kuti pambi wamonwa ngo wafikapo mu kulinga ku kupanga ukupingulapo kwakwe kwine pa kundapa kwa fya cipatala. Nelyo fye uko ici tacili lifunde, bakapingula nelyo abalashi kuti pambi bakonenena apakalamba ku kufwaya kwa musepela uuli na maka ya kulumbulula mu kumfwika ukupingulapo kwakwe ukwashangila pa lwa mulopa. Mu kupusanako, lintu umusepela tali na maka ya kulondolola ifisumino fyakwe mu kumfwika kabili mu kufikapo, icilye kuti pambi cayumfwa ifyo cili no kupingulapo icilemoneka icawamisha, nga fintu pambi cingacita ku kanya.
16 Umulumendo umo aali nasambilila Baibolo mu kucilaukila pa myaka lelo tabatishiwe. Te mulandu no kuba kwakwe imilungu fye cinelubali ukutaluka ukufuma ku mushinku lintu aali no kunonke “nsambu sha kuikaanina umwine ukundapa kwa fya cipatala,” icipatala caalemundapa kansa cafwaile ukutungilila kwa cilye ku kukuushishamo mulopa muli wene mu kupusana no kufwaya kwakwe no ko kwa bafyashi bakwe. Kapingula wasakamanishisha amwipwishe pa lwa fisumino fyakwe pa mulopa no kwipusha ifipusho fya kutendekelako, pamo nga amashina ya mabuku ya kubalilapo yasano aya Baibolo. Umulumendo taali na maka ya kuyalumbula kabili tali na maka ya kupeela ubunte bwa kushinina ubwa kuti aumfwikishe umulandu akaanine umulopa. Mu ca bulanda, kapingula asuminishe ukukuushishamo mulopa, ukulandapo kuti: “Ukukaana kwakwe ukusuminisha ukukuushishamo kwa mulopa takwashimpwa pa kumfwikisha kwafikapo ukwa fisumino fyakwe fiine ifya butotelo.”
17. Cifulo nshi umukashana wa myaka ya bukulu 14 abuulile pa lwa kupeelwa umulopa, mu kuba na ca kufumamo nshi?
17 Imilandu kuti pambi yaaluka mu kupusanako ku munono uwasambilishiwa bwino mu nshila sha kwa Lesa kabili uuleenda mu kucincila mu cine Cakwe. Umwina Kristu wacaice akwete umusango umo wine uushili wa lyonse uwa kansa. Umukashana na bafyashi bakwe baumfwikishe kabili bapokelele ukundapa kwayalulwa ukwa miti yatumbinkanishiwa ukufuma kuli shiŋanga walamuka pa cipatala caishibikwa. Nalyo line, umulandu watwelwe ku cilye. Kapingula alembele ukuti: “D.P. acitileko bunte ukuti aali no kucincintila ukukwata ukukuushishamo kwa mulopa mu nshila iili yonse intu aali na maka ya kucita. Alangulwike ukukuushishamo mulopa ukuba kwingililwa kwa mubili wakwe kabili alingenye kwene ku bucende bwa kwikata kama. Aipwishe Icilye ukucindika ukusalapo kwakwe no kumusuminisha ukutwalilila pa [cipatala] ukwabula ukukuushishamo kwa mulopa ukwakambishiwa ne Cilye.” Ukusambilisha kwa Bwina Kristu kuntu apokelele kwalimwafwilishe pali iyi nshita yayafya.—Moneni umukululo.
18. (a) Umukashana walecula abuulile kwiminina nshi ukwashangila pa lwa kupokelela umulopa? (b) Cinshi cintu kapingula apingwilepo pa lwa kundapwa kwakwe?
18 Umukashana wa myaka ya bukulu 12 aleundapwa leukemia (kansa ya mulopa). Icipani ca kusakamana abana catwele umulandu ku cilye pa kuti umulopa wingapatikishiwa pali wene. Kapingula asondwelele ukuti: “L. naeba ici cilye mu kumfwika kabili mu cine ukuti, nga ca kuti ukwesha kwacitwa ku kukuushisha muli wene umulopa, akalwisha uko kukuushishamo mulopa na maka yonse yantu engalonganya. Nasosa, kabili ndemusumina, ukuti akapunda no kushomboka kabili ukuti akatinta icibombelo ca kutungilako ukucifumya ku kuboko kwakwe kabili akesha ukonaula umulopa mwi botolo lili pa mulu wa busanshi bwakwe. Nakaana ukucita ukukambisha ukuli konse ukwingabika uyu mwana ukupula muli ubo bwafya . . . Kuli uyu mulwele, ukundapa kwatubululwa ne cipatala kulelungatika ubulwele mu mano fye ya ku mubili. Kulefilwa ukulungatika ukukabila kwakwe ukwa nkuntu ne fisumino fyakwe ifya butotelo.”
Mwe Bafyashi—Sambilisheni Bwino
19. Kukakililwako nshi ukwaibela abafyashi balingile ukulangisha ukulola ku bana babo?
19 Ifya kukumanya fya musango uyo fisenda ubukombe bwa maka ku bafyashi abafwaisha ukuti bonse mu lupwa lwabo bekale umwabela ifunde lya kwa Lesa pa mulopa. Umulandu umo untu Abrahamu aali cibusa wa kwa Lesa wali wa kuti Wene aishibe ukuti ici cikolwe caali no “[kufunda] abana bakwe abaume na ba ŋanda yakwe abakamukonkapo, [ukuti baali no kubake] mibele ya kwa Yehova, ku kucito bulungami.” (Ukutendeka 18:19) Bushe ici tacilingile ukube fyo ku bafyashi ba Bwina Kristu ilelo? Nga ca kuti uli mufyashi, bushe ulesambilisha abana bobe abatemwikwa ukwenda mu nshila ya kwa Yehova pa kuti bakabe lyonse ‘abaiteyanya . . . ku kuisosela kuli onse uwingabalubulwisha pa kucetekela ukuli muli [bene], lelo ukwasuka no bufuuke na katiina’?—1 Petro 3:15.
20. Cinshi tulingile maka maka ukufwaya abana besu ukwishiba no kusumina pa lwa mulopa? (Daniele 1:3-14)
20 Nangu cingati kuti cabe cisuma ku bana besu ukwebwa pa lwa masanso ya malwele na masanso yambi aya kukuushishamo kwa mulopa, ukusambilisha abana besu mwi funde lya kwa Lesa ilyapwililika takupilibula maka maka ukwesha ukupampamika umwenso wa mulopa. Nga ca kuti, ku ca kumwenako, kapingula aipwishe umukashana umulandu tafwaile ukupeelwa umulopa kabili icasuko cakwe cali ukucilisha ca kuti umukashana atontonkenye umulopa ukubo wacishamo busanso nelyo uwa kulengo mwenso, cinshi cali no kube ca kufumamo? Kapingula pambi nga asondwelele ukuti aali fye uushafikapo kabili uwatiinishiwa mu kucishamo, nga fintu fye pambi engaba no mwenso wa bulwele bwa ku bula ica kuti engalila no kucincintila uku kubombelwa uko nelyo fye abafyashi bakwe bayumfwile ukuti kwali ukwawamisha kuli wene. Ukulundako, twacimona mu kubangililako ukuti umulandu ukalamba untu Abena Kristu bakaanina ukukuushishamo mulopa te wa kuti umulopa walikowela lelo ukuti waliba uwaumo mutengo kuli Lesa wesu kabili Kapeela wa Bumi. Abana besu balingile ukwishibe co, pamo pene no kuti amasanso ya fya cipatala ayengacitikako aya mulopa yalapeela ukufina kwalundwako kwi tontonkanyo lyesu ilya butotelo.
21. (a) Abafyashi balingile ukwishiba cinshi pa lwa bana babo ne mimwene ya Baibolo iya mulopa? (b) Ni shani fintu abafyashi bengaafwa abana babo mu kulundana no mulopa?
21 Nga ca kuti naukwata abana, bushe uli uwashininkisha ukuti balasuminishanya kabili kuti balondolola ukwiminina kwashimpwa pali Baibolo pa kukuushishamo mulopa? Bushe balisumina mu cine cine uku kwiminina ukuba kufwaya kwa kwa Lesa? Bushe bali abashininwa ukuti ukutoba ifunde lya kwa Lesa kuti kwaba ukwabipisha ica kuti kwingabika mu busanso icilolelo ca Mwina Kristu ica bumi bwa muyayaya? Abafyashi ba mano bakapitulukamo iyi milandu na bana babo, nampo nga bali abaice sana nelyo bali mupepi na bakalamba. Abafyashi kuti pambi bakwata utushita twa kubelesha umo umusepela umo umo alolenkana ne fipusho ifingemishiwa pambi na kapingula nelyo umulashi wa cipatala. Ubuyo te kukwata umusepela ukubwekeshapo ku kusungila kwa ku mutwe ifishinka fyasobolwamo nelyo ifyasuko. Cili icacilapo kucindama ukuti beshibe cintu bene basumina, no mulandu. Kwena, pa kulubulula kwa mu cilye, abafyashi nelyo bambi kuti pambi bapeela ifyebo pa lwa masanso ya mulopa no kubapo kwa kundapa kwa kusengulwila. Lelo cintu kapingula nelyo umulashi mu kupalako engafwaya ukwishiba ukufuma ku kulanda na bana besu cili nampo nga mu kufikapo balomfwikisha imibele yabo no kusalapo kabili nampo nga ca kuti na bo bene balikwata ifyakatamikwa fyabo no kushininwa kwashangila.—Linganyeniko 2 Ishamfumu 5:1-4.
22. Cinshi cingaba ca kufumamo cibelelela ica kusambilishiwa kwesu na Lesa pa lwa mulopa?
22 Ifwe bonse tulekabila ukutesekesha no kulambatila mu kukosa ku mimwene ya kwa Lesa iya mulopa. Ukusokolola 1:5 kulondolola Kristu nga umo ‘uwatutemwa kabili uwatukakwile ukufuma ku membu shesu ku mulopa wakwe.’ Kupitila fye mu kupokelela umutengo wa mulopa wa kwa Yesu twinganonkela ukulekelelwa kwakumanina kabili ukubelelela ukwa membu shesu. Abena Roma 5:9 mu kulengama basosa ukuti: “E ico, apo twalungamikilwa nomba ku mulopa wakwe, pali bufi tukapusukila muli wene ku bukali.” Fintu cili ica mano, lyene, kuli ifwe na ku bana besu ukusambilishiwa na Yehova pali uyu mulandu no kuba abapampamina ukwenda mu nshila yakwe kuli pe na pe!
[Futunoti]
a Moneni How Can Blood Save Your Life?, iyasabankanishiwa na Watch Tower Bible and Tract Society of Pennsylvania, amabula 21-2, 28-31.
Ifishinka fya Mpikwe Ifya Kusambilisha
◻ Mimwene nshi tulingile ukukwata pa lwa kusambilishiwa na Yehova?
◻ Mulandu nshi ukumfwila ifunde lya kwa Lesa pa mulopa kwacindamina ifyo?
◻ Mulandu nshi cili icakatama ukuti imisepela ibe na maka ya kulondolola mu kumfwika kabili mu kushangila ukushininwa kwabo pa lwa mulopa?
◻ Ni shani fintu abafyashi ba Bwina Kristu bengaafwa abana babo ukuba abasambilishiwa bwino mwi funde lya kwa Yehova pa mulopa?
[Akabokoshi pe bula 17]
ICILYE CALYEBEKESHIWE
Cinshi cintu ukupingulapo kwa cilye kwalondolwele ukulosha kuli D.P. uulumbwilwe mu paragrafu 17?
“Icilye calyebekeshiwe apakalamba ku kulamuka, ukushikimana, umucinshi, no kubamo amaka ifya uyu wacaice wa myaka ya bukulu 14-1/2. Kuti pambi uyu mukashana atiinishiwe ku kusanga kwa kuti alikwete umusango wa kulenge mfwa uwa kansa . . . Nangu ni fyo, cali wacaice wafikapo uwaishile ku Cilye ku kupeelo bunte. Amoneke ukuba natonta mu kulengama pa mulimo wayafya untu alolenkene na o. Asangilwe ku tushita tonse utwa kufunda, asuminishe ukutantika kwa kundapa, alundulwile amano ya buntunse ayalongoloka pa fyo wene pamo ngo muntunse aali no kulolenkana no ku kusonsomba kwa fya cipatala, kabili aishile ku Cilye mu kuba no kulomba kwa kumfwisho bulanda: cindikeni ukupingulapo kwandi . . .
“Mu kulunda ku kufikapo kwakwe, D.P. nalumbulula imilandu yakumanina iya kupingulapo kwakwe iya kuti Icilye cicindike yene. Lwa ku mupashi, lwa ku muntontonkanya, mu mibele isuma, na mu nkuntu aali no kucenwa ku kutantika kwa kundapa ukwasanshishemo ukukuushishamo kwa mulopa. Icilye cikacindika ukusalapo kwakwe ukwa kutantika kwa kundapa.”
[Icikope pe bula 16]
Kapingula nelyo uwa kwangalila icipatala kuti pambi afwaya ukwishiba cintu umusepela wa Bwina Kristu mu cituntulu asumina, no mulandu